Marcos 10
10
Huni inũ aĩbu henenametimakiri Jesusũ hatu yusĩnikiaki, na hãtxarã
(Mt 19.1-12; Lc 16.18)
1Hanua Cafarnaum anua kaĩkaini kai Jordão hene kesha betsauri lestekiri, bari huaikirirã, Judéia mai pakea anu hikia yurã kaiã ana haki itxaibu haskabiranaibu hatu yusĩmis keskaibu Jesusũ ana hatu yusĩayã 2hanushũ fariseubu hatiritũ Jesus unãti watã haki beparamenũ ika haki kematã yukakĩ:
—Huninã, hawẽ aĩnã henetimẽ?— akabu 3Jesusũ haturi yukakĩ:
—Moisésnã, haskara nukũ shenipabu yusĩkĩ yununimẽ?— hatu wa
4habũri yuikĩ:
—Moisés yusĩanã, aĩbu henekatsi ikinã, hawẽ heneti unaki keneshũ inãtã henebaĩtiki, ani nũ uĩmiski— akabu
5hanushũ Jesusũ fariseubu hatu yuikĩ:
—Ikũki. Matu keska matũ shenipabu huĩti kuxikẽ haska Moisés hatu yununiki. 6Hakia Deusũ dasibi damiwakĩ taewakinã, huni inũ aĩbu hau ha dabe ketashamenũbũ, iwanã, Deusũ hatu damiwaniki. 7Haskakẽ hawẽ ibubu dapashkabaĩ huni aĩyãtã hawẽ aĩbe ketashameawẽ taea 8ana yura dabema habias yura bestitxai keska hiwetirubuki. 9Hanua Deusũ huni inũ hawẽ aĩ yura bestitxai keska hatu wa hunĩ hawẽ aĩ dapashkabaĩkĩ henetimahairaki— hatu watã
10hanua Jesus hawẽ tsumabube hiwetã hikia maniabũ haska hatu yusĩshu ana yukabu 11Jesusũ hatu yuikĩ:
—Tsuabũra hawẽ aĩ henetã aĩbu betsa aĩwãkinã, hawẽ aĩ sheni danãkĩ Deusũ yununiri danaĩ txakabumisbuki. 12Haska inũ, aĩbũ hawẽ bene henetã huni betsa benewakinã, hawẽ bene sheni danãkĩ Deusũ yununiri danaĩ txakaburiamisbuki— hatu anikiaki.
Bake mixtĩbu unãnuma wakĩ Jesusũ Deus hatu yukashunikiaki, na hãtxarã
(Mt 19.13-15; Lc 18.15-17)
13Hanua hatũ bakebu hau ea Jesusũ meshũkĩ unãnuma washunũ, iwanã, hanu iwebirãbiranaibu hawẽ tsumabũ hatu nemaya 14-15Jesusũ uĩ hawẽ tsumabuki sinatakĩ hatu yuikĩ:
—Hatũ bakebu ea anu iweaibu hatu nemayamakãwẽ. Deus shanẽ ibuaitianã, na bake mixtĩbu eki dateabuma keskabu besti Deuski dasishãkanikiki— hatu watã
16hanushũ bake mixtĩbu ikushũ mamepishũ duawakĩ bestibu hatu yuikĩ:
—Deus miwẽ nuikĩ mia abuaya unãnuma yumei pekãwẽ— hatu wakeakenikiaki, Jesusunã.
Huni mabu itxapa haya Jesusbe hãtxanikiaki, na hãtxarã
(Mt 19.16-30; Lc 18.18-30)
17Hanua Jesus ana kaĩkainaya huni betsa kuxikirã haki nukutã ha bebũ dãti itã yukakĩ:
—Yusĩnã pepaã, Mia yukapa? Hiwea kayabi bikinã, haska kayatã ẽ bitirumẽ? Ea yuiwe— aka
18Jesusũ yuikĩ:
—Haskakĩ ea kenakĩ: “Pepaã”, mĩ ea wai? Deus bestiki, peparã, mĩ unãmamẽ? 19Mianã, Deusũ yunuti inũ hawẽ nematirã, mĩ unãmamẽ? Eska yuinirã: “Aĩbu mĩ aĩma txutatimaki. Huni betsaki sinatakĩ tenãtimaki. Yumetsutimaki. Huni betsaki txanitxakatimaki. Parananãtimaki. Ha inũ, mĩ epa inũ mĩ ewa duawakubaĩtiki”— aka
20ha huni mabuyatũ Jesus yuikĩ:
—Ikũki. Dasibi Deusũ yunuti inũ hawẽ nemati haskarã, ẽ ma unã keyuaii. Bakeixtatũ tapinishũ ẽ txibãkubaĩmiski— aka
21Jesusũ uĩ hawẽ nuikĩ ana yuikĩ:
—Mĩ pe ea yuiaii. Na besti mĩ xinãriamaki. Mia yuinũ nĩkawe. Nai anua Deusũ manakuti pepa bikatsis ikĩ mĩ hawara dasibi mĩ haya hatu inã keyutã ha pei mĩ bixiã ha nuitapaibu inãkuĩtã txĩtuãma ebe kakĩ ea txibãkubaĩshãwẽ. Mĩ haskakũkainaiwẽ taeshũ hiwekuĩa mĩ bishanaii— aka
22Jesusũ haska yuia nĩkai hawẽ mabu itxapawẽ nui huĩti nixmai keyutã ana hawa yuiama benikainaya
23Jesusũ hatu uĩbaũkĩ hawẽ tsumabu yuikĩ:
—Huni mabuhairayarã, Deus shanẽ ibuai anu hikinũ ikairã, bikahairaki— hatu wa
24-25hawẽ tsumabũ hawẽ hãtxa nĩkai Habaa! ikaibũ Jesusũ ana hatu yuikĩ:
—Ikũki. Ha yuinaka ewapa camelorã, ha shumush hawẽ txishuiki hawẽ yura kaĩmakinã, tsuã atirumaki. Hakia haska keska bikarã, huni mabu itxapayarã, hawẽ mabu besti xinaĩ hawẽ nuikĩ hatũ xinã betsa wama Deuski txiti itirubumaki— hatu waya
26hawẽ hãtxa nĩkatã pes huĩti nixmashũ yuikĩ: Habaa! iki yuinamekĩ:
—Haskakenã, tsua Deusũ nuku mekekĩ pashawakĩ hiwematirumẽ?— ikaibũ
27hatu tibi uĩbaũkĩ yuikĩ:
—Tsuara yurabũ matu haska washũtirubumabiakẽ Deusũ besti dasibi matu ashũtiruki— hatu wa
28Pedrõ yuikĩ:
—Yusĩnaã, nukunã, mia txibãkatsi ikinã, hawara nũ haya dasibi baxikĩ keyubiranimashũ nũ ma mia txibãpakeaii— aka
29Jesusũ ana hatu yuikĩ:
—Txanima ẽ matu yuiai nĩkakãwẽ. Haratutũra ea txibãkĩ Deusũ hãtxa kakape yusĩtanũ ishũ hawẽ mae henekĩ hawẽ betsabu inũ, hawẽ puibu inũ, hawẽ epa inũ, hawẽ ewa inũ, hawẽ bakebu inũ, hawẽ bai henekĩ keyubaĩkẽ 30tsuabũra hamapaiwẽ hatu bika tenemabiaibũ na habiatiã Deusũ hatũ pepawẽ manakuhairakĩ ana hiwe betsa inãkĩ, betsabu inãkĩ, puibu inãkĩ, ewabu inãkĩ, bakebu inãkĩ, bai inãkĩ hatu haska washũshanikiki. Hatu haska wanishũ nai anu hatu habe hiwemashanikiki, ikibi imakinã. 31Ha inũ, yura itxapabu na habiatiã kẽkĩ yunumisburã, Deusũ hatu kẽwãma ishanikiki. Hakia betsabu na habiatiãri hawa kẽkĩ yunuisbumarã, Deusũ hatu kẽwãkĩ shanẽ ibuhairawashanikiki— hatu anikiaki.
Tiago inũ João daketapaibukiri Jesusũ hatu yusĩnikiaki, na hãtxarã
(Mt 20.17-28; Lc 18.31-34)
32Hanua Jerusalém bai tanabainaibũ Jesus bebukainaya haki txiti ikabu hatxũ bui supuibaini haria Jesuski haki sinatamisbu anu kaya hawẽ tsumabũ haska xinaĩ yuinamekubainaibũ yurã kaiã hatube bui dateyabi txibaĩbũ hanushũ Jesusũ hawẽ 12 tsumabu besti kenashũ hatu tari iyushũ haska wakĩ itxakawashanaibu ana hatu yuikĩ:
33—Jerusalém anu na habiatiã nũ kairã, mã unaiĩ. Hanushũ Deusũ bake ẽ matũ Hutxi Kayabi Iuwa Deusbe nukunabu hãtxashunika shanẽ ibubu inũ Deusũ hãtxa kenenibu yusĩnanãmisbu habu tsuãra hatu ea atximashanikiki. Habũ ea tenãkatsis ikĩ nawa betsabu ea hatu inãbu 34habu eki kashekĩ eki kemu mitxukĩ ea kuxa kuxa ashũ ea tenãbu shaba dabe inũ besti kaya ẽ ana bestẽshanaii— hatu wanikiaki.
35Hanua Zebedeũ huni bake dabe Tiago inũ João Jesus dapi kashũ yukakĩ:
—Yusĩnaã, nũ mia haskakiri yukairã, nuku ashãwẽ— akabu
36—Mã hawa ea yukai?— hatu wa
37habũ Jesus ana yuikĩ:
—Mĩ shanẽ ibu kuxipai pepaya mibe nũ shanẽ iburianũ mibe nuku tsaumashãwẽ, betsa mĩ yusiuri inũ betsa mĩ yusmaurirã— akabu
38Jesusũ hatu kemakĩ:
—Haska mã ea ea akairã, xinãkĩ mã nĩkariabumaki. Hawara ẽ ishanai keskarã, mã iriatirumẽ?— hatu wa
39—Nũ iriatiruki— akabu
Jesusũ ana hatu yuikĩ:
—Txanima ea itxakawaibu ẽ isĩ teneshanai keska mã teneriashanaii. 40Hakia ẽ yusiuri inũ ẽ yusmauri mã ebe shanẽ ibutirurã, ẽ matu yunutirumaki. Hakia ẽ Epa Deusũ hatu katunirã, ebe shanẽ ibushãkanikiki— hatu waya
41hanua Tiago inũ João haska yuka ikaibu Jesusũ tsuma betsa mekẽ dabetibũ nĩkai hatuki sinataibũ 42hanushũ Jesusũ hawẽ tsumabu keyu itxawashũ hatu yuikĩ:
—Haska nawa shanẽ ibubũ hawenabu ha akĩ mese wabetanã kuxipawẽ hatu yunukĩ hatũ tsumabu hawẽ kuxipa hatu uĩmakĩ hatu babu watã yunumisbu mã unaiĩ. 43Hakia matubunã, haska xinãyamakubaĩkãwẽ. Matu anua tsuara shanẽ ibukatsis ikinã, hau dasibi matu merabewakĩ duawakubainũbũwẽ. 44Habiaskariai tsuara shanẽ ibukatsis ikirã, dasibibũ tsuma hau iriakubainũbũwẽ. 45Hamẽ ea iki huirã, ẽ matũ Hutxi Kayabi Iuwabiarã, hau ea duawanũbũ ika ẽ huamaki. Hakia matu debushũkĩ yura itxapabu benuabu meshpamatã matu hiwemanũ ika ẽ huniki— hatu abaini
Jesusũ Bartimeu bekũ shushawanikiaki, na hãtxarã
(Mt 20.29-34; Lc 18.35-43)
46janua Jericó mae ewapa anu Jesus hawẽ tsumabube hikia ibai hanua Jesus kaĩkaini yurã kaiã inũ hawẽ tsumabube kaya hanu bai kesha anu Timeũ huni bake Bartimeu bekũ tsaushũ pei hatu yukamistũ 47Jesus Nazaré anua yumeni yui hakiri hãtxabainaibu nĩkatã unãshubima hawẽtxaĩs yuikĩ:
—Davĩ babaã, ewẽ nuiwe— akaya
48itxapabũ nemabiabu ana unãshubimahaira yuikĩ:
—Davĩ baba Jesusuũ, ewẽ nuiwe— abaũbaunaya
49Jesus niti itã hunibu hatu yuikĩ:
—Kenakãwẽ— hatu wa
hanushũ huni bekũ kenakĩ yuikĩ:
—Mia kenaikiki. Xinã txãkaĩ benirikirãwẽ— akabu
50hawẽ yabukuti peputakatã hawaira benikirã Jesuski nukua 51Jesusũ yukakĩ:
—Mia hawa merabewapa?— aka
huni bekũmã yuikĩ:
—Shanẽ ibuũ, ana ẽ uĩnũ ea bepeshwe ika ẽ ikaii— aka
52Jesusũ yuikĩ:
—Ana uĩriwe. Mĩ ea ikũwaĩwẽ taea shushatã inũ kariwe— aka samama Bartimeu bepeshetã Jesus txibãbainaya
Currently Selected:
Marcos 10: cbsBR
Highlight
Share
Copy
Want to have your highlights saved across all your devices? Sign up or sign in
NT © 1980-2006, Wycliffe Bible Translators, Inc.
OT portions © 2006, Wycliffe Bible Translators, Inc.
