Mateus 20

Dayakapabu tibikiri miyuiwẽ Jesusũ hatu yusĩnikiaki, na hãtxarã

1ana nuku yuikĩ:

—Deus shanẽ ibui haskamiskiri ana matu yusĩnũ nĩkakãwẽ. Deus shanẽ ibuirã, bai ibuã dayakapabu katutã hatu yunupakemis keskaki. Penai taeaya hawẽ bai anu hau uva tsekashũtanũbũ dayakapabu katushũ 2yuikĩ: “Mã ea dayashuni ka bari kai hikiaya shaba hirabi daya pei ẽ matu inaiĩ”, iwanã, dayakapabu hawẽ bai anu hatu yunua buabũ 3hanua ma 9:00 horaya hawẽ mae namakis hemaĩtĩ anu huni betsabũ hawawama uĩkĩ 4hatu yunukĩ: “Matũri ẽ bai anu ẽ bimi ea tsekashũtãkãwẽ, bari kai hikiaya ẽ matu paka pewairã”, hatu wa buabũ 5hanua bai ibu ana bari mananãbi tashnikaũ huni betsabu hatu yunua buabũ ana bari nai putxinĩ dakakẽ huni betsaburi hatu yunua buabũ 6hanua ma bari hiki kemaya ana hawẽ mae namakis hemaĩtĩ anu kashũ huni betsabũ hawawama uĩkĩ hatu yukakĩ: “Hawai bari txaitanai mã dayama ibaiai?” hatu wa 7habũri yuikĩ: “Tsuã nuku hawa yunuama nũ ikaii”, akabu bai ibuã hatu yunukĩ: “Maturi ẽ bai anu kashũ ẽ bimi ea tsekashũtãkãwẽ, ma bari hikiaya ẽ matu paka pewairã”, hatu wa buabũ

8hanua ma mexu beaya bai ibũ hatũ hawẽ daya tsumashũna yunukĩ: “Ea dayashũtãkãshu hatu kenashũ habianus kesua pei ea hatu meniakeakeshũtãwẽ. Ha dama bukãshu ha dukũ hatu paka taewabaĩkĩ ha habu dukũ buabu hawẽ henekĩ hatu pakakĩ keyutãwẽ”, aka kashũ 9ha dama bukãshu habu dukũ kenashũ shaba hirabi daya pei hatu inãkĩ keyutã 10hanua ha bari nai putxinĩ dakakẽ dayai buabu hatu kenashũ habianus kesua pei hatu pakatã hanua ha bari mananãbi dayai buabu hatu kenashũ habianus kesua pei hatu pakatã hanua ha 9:00 hora dayai buabu hatu kenashũ habianus kesua pei hatu pakatã hanua habu dukũ buabu bekĩ xinaĩ: “Ha hatu pakai binumakĩ nuku inaĩmẽkaĩtsa”, ibiaibũ habianus kesua pei binuama habias hatu inãriaya 11habũ pei bitã bai ibuki sinatakĩ ha akĩ 12yuikĩ: “Barĩ nuku kua niskaĩ shaba hirabi nuku besti dayai nũ nuitapabaishukẽ haskakĩ ha dama bubiakãshu daya eskarabesbiakãshukẽ nuku itsawakĩ shaba hirabi daya pei mĩ hatu pakashumẽ?” akabu 13bai ibuã hatu bestitxai yuikĩ: “Hatishũ kesua ma bebũkiri ẽ mia yuba ẽ mia pakashuki, mia parãmarã. 14-15Ana eki sinatama ẽ mia pakashuya kariwe. Hakia na dama bukãshu matu itsai shaba hirabi daya pei ẽ hatu inãshurã, hawa txakabumaki. Ha pei mã hawẽ nuiairã, matunamaki. Enaki. Hameẽ ẽ hatu duawaya mĩ daka ẽ peiwẽ nui ikai?” aniki.

16Haskawẽ taeshũ yurabu babuaibũ xinã pepakĩ ea danãma ẽ hãtxa txibãkĩ taewaibu pepawẽ ẽ hatu mekeshanaii. Hakia bari itxapa ẽ hãtxa txibaĩ ikũwãmisbu ha katxukea habu keskari ẽ hatu mekekubaĩshanaii— nuku waniki.

Mawashanaikiri dabe inũ bestiki Jesusũ hatu yuinikiaki, na hãtxarã

(Mc 10.32-34; Lc 18.31-34)

17Hanua Jerusalém baikiri nũ kaya yurã kaiã nukuberi buaibũ hanushũ Jesusũ nũ hawẽ 12 tsumabu besti kenashũ tari pashkabaĩ nuku yuikĩ:

18—Jerusalém anu na habiatiã nũ kairã, mã unaiĩ. Hanushũ ẽ matũ Hutxi Kayabi Iuwa Deusbe nukunabu hãtxashunika shanẽ ibubu inũ Deusũ hãtxa kenenibu yusĩnanãmisbu tsuãra ea hatu atxima 19habũ ea tenãkatsis ikĩ nawa betsabu ea hatu yunuabu habũ ea kashe wakĩ ea kuxa kuxa akĩ cruzki mastashũ ea tenãshãkanikiki. Ea tenãbu hanua mawa shaba dabe inũ besti kaya ẽ ana bestẽshanaii— nuku wakẽ

Tiago inũ Joãonẽ ewã Jesus hatu yukashunikiaki, na hãtxarã

(Mc 10.35-45)

20txipu Zebedeũ bake Tiago inũ João hatũ ewabe kai Jesus besti niaki nukutã hatu hãtxa washunũ ika ha bebũ dãti ituxiaya 21Jesusũ yukakĩ:

—Mia hawa merabewapa?— aka

hatũ ewã hatu yuishũkĩ:

—Mĩ nukũ shanẽ ibuaitianã, na ẽ bake dabe hau mibe shanẽ ibushanũ mĩ inaitiã betsa mĩ yusiuri inũ betsa mĩ yusmauri ea hatu katubaĩ tsaumashũshãwẽ— akaya

22hawẽ bake dabe uĩkĩ Jesusũ hatu yuikĩ:

—Mã haska ea yukairã, mã unãriamaki. Hawara ẽ teneshanairã, mã iriatirumẽ?— hatu wa

—Nũ iriatiruki— akabu

23Jesusũ ana hatu yuikĩ:

—Txanima ea itxakawaibu ẽ isĩ teneshanai keska mã iriashanaii. Hakia ẽ yusiuri inũ ẽ yusmauri tsaũtã tsua ebe shanẽ ibushanairã, ibubis ẽ yunutirumaki. Ẽ Epa Deusũ hatu katunirã, haburã, ebe ishãkanikiki, shanẽ ibuirã— hatu waya

24hanua Tiago inũ João haska yuka ikaibu nũ hawẽ dez tsuma betsabũ nĩkai nũ hatuki sinataya 25hanushũ nũ hawẽ tsumabu betsabu ana nuku shuku watã yuikĩ:

—Haska nawa shanẽ ibubũ hawenabu ha akĩ hatu mese wabetanã kuxipawẽ hatu yunumisbu mã unaiĩ. 26Hakia matubunã, haska xinãyamakubaĩkãwẽ. Matu anua tsuara shanẽ ibukatsis ikinã, hau dasibi matu merabewakĩ duawakubainũbũwẽ. 27Habiaskariai tsuara shanẽ ibukatsis ikirã, dasibibũ tsuma hau iriakubainũbũwẽ. 28Hamẽ ea iki huirã, ẽ matũ Hutxi Kayabi Iuwabiarã, hau ea duawanũbũ ika ẽ huamaki. Hakia matu debushũkĩ yura itxapabu benuabu meshpamatã matu hiwemanũ ika ẽ huniki— nuku waniki.

Huni bekũ dabe Jesusũ bepeshkĩ kayawanikiaki, na hãtxarã

(Mc 10.46-52; Lc 18.35-43)

29Hanua Jericó mae ewapa anu nũ hawẽ tsumabube Jesus hikia ibai nũ habe kaĩkainaya yurã kainẽ nuku txibaĩbũ 30hanu bai kaya kesha huni bekũ dabe tsauwabu Jesus huai huni betsa txaniaibu nĩkatã hanushũ habũ unãshubima yuikĩ:

—Davĩ baba Shanẽ Ibuũ, nukuwẽ nuiwe— akubainaibũ

31itxapabũ nemapaibiabu ana unãshubimahaira yuikĩ:

—Davĩ baba Shanẽ Ibuũ, mĩ miamẽkaĩ, nukuwẽ nuiwe— akabu

32hanua Jesus niti itã huni bekũ dabe kena beaibu hatu yukakĩ:

—Hawa matu merabewapa?— hatu wa

33ha dabetũ yuikĩ:

—Shanẽ Ibuũ, ana nũ uĩnũ nuku bepeshwe ika nũ ikaii— akabu 34Jesus hatuwẽ nuikĩ hatũ beru mekĩ hatu bepesha hawaira uĩkĩ pewatã Jesus txibãbaini nukube bunibuki.

Currently Selected:

Mateus 20: cbsBR

Highlight

Copy