João 5
5
Betesda kesha huni isĩ tenei babuni Jesusũ shushawanikiaki, na hãtxarã
1Galiléia anushũ Jesusũ huni bake shushawaima ana betsatiã Jerusalém anushũ judeubũ hatũ beya betsa txibaĩ besi nawaibu anu Jesus ana txĩtũkaini kakĩ 2-4hanushũ Jerusalém mae mixkiwẽ kenebaunibu hanu hikiti shui hawẽ kenarã, Txashuwã Kaĩtirã, ha dapi hanu ũpash uke merã habai anu mixki pukĩnibu anu ũpash tsauwa hawẽ kenarã, Betesdarã, hanu utai huĩrukũmisbu anu cinco utati anu bekũbu inũ, tiribu inũ, meyuxkibu inũ, isĩ betsa betsapa tenei maniabu anu mixki pukĩnibu ũpash mata nai tsumã xubimaya: “Ea dukũ ka ẽ pukua ẽ shushatiruki”, iki maniabu anu 5huni betsa 38 ano bari ka hawẽ yura babuni 6daka Jesusũ betxituxitã bari itxapa ka isĩ teneai unãkĩ yukakĩ:
—Mĩ yura shushai mĩ ana kuxipakatsis ikai?— aka
7—Haa, Shanẽ Ibuũ. Hakia nai tsumapã hene xubimai anu tsuã ea bakebaĩ pukutimakẽ ẽ unãshubira kaya isĩ teneai betsã ea maemai binukaĩ habu dukũ pukukubaĩmisbuki— aka
8hawẽ nuikĩ shushawanũ, iwanã, Jesusũ yuikĩ:
—Haskakenã, benitã mĩ dakati iabaini kariwe— aka 9hawaira hawẽ yura dakuxi kayatã benikawã sábado huĩrukũtitiã dayatimabiakẽ habiatiãri hawẽ dakati iabainaiwẽ taeshũ 10judeu shanẽ ibubũ yukakĩ:
—Haskakĩ huĩrukũtitiã mĩ dakati iabaĩkĩ Moisés nuku nemani mĩ txibãma kaneai?— akabu
11—Ea shushawashutũ yunukĩ: “Mĩ dakati iabaini kariwe”, ea wa ẽ kai ikaii— hatu wa
12—Tsuã mia haska yunushumẽ?— akaibũ 13hanu itxabu anu Jesus hawaira naxui ikawẽ taeshũ hatũ shushawashu unãma harakiri hawa hatu yuitima nibai kakẽ 14txipu Jesus Templo hemaĩtĩ anu haki ana nukushũ yuikĩ:
—Uĩwẽ, ikis ẽ ma mia shushawashuki. Haskakẽ txakabu xinãkĩ Deusũ hãtxa ana kaneyamashãwẽ, mĩ ana hamapai betsa kaneairã, hawara txakabuhairawẽ mĩ ana pikutirukirã— aka
15ha huni haska wa kashũ judeu shanẽ ibubu hatu yuikĩ:
—Na ẽ shushashu mã ea yukarã, Jesusũ ea akakiaki— hatu wa 16huĩrukũtitiã Jesusũ shushawawẽ taea haki sinatakĩ judeu shanẽ ibubũ Jesus danãkĩ yuaĩbũ 17hatũ hãtxa nĩkatã Jesusũ hatu yuikĩ:
—Ẽ Epa Deusũ hatu merabewai dayakũkaĩmiski. Eari habiaskariai ẽ dayariakũkainaii— hatu wa
18nĩkatã hune judeu shanẽ ibubu yuinamei:
—Sábado huĩrukũtitiã yununi kaneai bestimaki. Txakabu betsa wariai hamebi Deus keskakatsis ikĩ yuikĩ: “Deus ẽ Epaki”, ikĩ yuiriaikiki— ikaiwẽ taea haki sinatahairakĩ Jesus tenãkatsis itxakayamaibũ
Hawẽ Epã Jesus hawẽ kuxipa inãnikiri yusĩnikiaki, na hãtxarã
19Jesusũ ana hatu yuikĩ:
—Txanima ẽ matu yuiaii. Deusũ bakẽ hawẽ xinãnẽ besti haska atirumaki. Hakia hamapai xarabu Epa Deusũ akai uĩkĩ habiaskari wakĩ hawẽ bakẽri ariatiruki. Haskakẽ Epa Deusũ xinãnẽ ea hawẽ bakẽ ẽ ariaii. 20Haska inũ, Epa Deusũ hawẽ bake abukĩ dasibi akĩ uĩmamiski. Haska inũ, ana kuxipahairawẽ dami atimaska betsa betsapa hawẽ bakewẽ matu uĩmaya uĩ mã e ikũkaĩshanaii. 21Haska inũ, ẽ Epa Deusũ mawabu hiwemamiski. Habiaskari wakĩ hawẽ bakẽri tsuabura katutã hatu hiwekuĩmariatiruki. 22-23Haskawẽ taeshũ tsuara Epa Deusũ unãti waismaki. Hakia hau dasibibu hawẽ bakẽ hatu unãti washanũ hawẽ kuxipa inãni hayaki. Haskawẽ taeshũ habias Deus kẽwãmisbu keska wakĩ hawẽ bakeri hau kẽwãshanũbunã. Tsuabũra hawẽ bake ma yununi kẽwãbumarã, haskatã hawẽ Epari kẽwã kayabitirumaki.
24Txanima ẽ matu yuikubainaii. Tsuãra ea nĩka pewai hawẽ hiwea txakabukiri kai beshteketã hatũ ea yununiri ikũwaĩ hiwekuĩkanikiki, ikisrã. Bikawẽ unãti wama mawa kayabi tenemama hiwekuĩaĩbu txakabuwẽ nũ kupiama ishanaii. 25-26Txanima ana ẽ matu yuiaii. Ẽ Epa Deusũ hawẽ hiwemati kuxipa hamebi hayatũ habias ea inãniki. Haskakẽ hanu bari hawẽ heneaitiã mawabũ ẽ hui nĩkatã besteĩ ana hiweshãkanikiki. 27Ẽ matũ Hutxi Kayabi Iuwawẽ taeshũ dasibi unãti kuxipa ẽ Epa Deusũ ea yunurianiki, eã ẽ hatu unãti wakeakeshanunã. 28Na haska hãtxa ẽ matu yuiai nĩkatã e iyamakãwẽ. Haskashanai matu yuinũ nĩkakãwẽ. Mawanibu dasibi ẽ hui kuxipawẽ ẽ hatu kena nĩkatã 29mai anua hanira hatu maiwanibu tashnibirãshãkanikiki. Pepabu hiwekuĩaĩbũ habu txakabumisbu ana bestẽbiatã ana hawẽri kai bika tenehairai ikibi ishãkanikiki— iwanã,
Jesusũ ibubis hawẽ xinãnẽ aki huama inikiaki, na hãtxarã
30Jesusũ shanẽ ibubu hatu nĩkamakubaĩkĩ yuikĩ:
—Earã, ibubis e iskaũ ẽ xinãnẽ ẽ ikamaki. Hakia haska ẽ Epa Deusũ ea yunuai besti nĩkatã ẽ akubainaii. Haska hawẽ pepa ea katumairã, ẽ haska xinaĩwẽ ẽ akama hakia haska ẽ Epã ea yununitũ abuai haska yunuaya unãti wakĩ ẽ ashũkubainaii, kaneamarã. 31Emebi ẽ keãyanã, ẽ hãtxa txani ikeanaii. 32Hakia tsuabũra ekiri unãti watã ea kẽwaĩnã, hawẽ hãtxarã, pepaki, haska unaĩnã. 33Naximanika João Messiaskiri mã yukatanima txanima hakiri matu yuimaki. 34Hau tsuabũra mã ea kẽwãshanũbũ, iwanã, ẽ haskakiri xinãmaki. Hakia hanu kupiaitiã Deusũ hau matu kupiyamashanũ na kaka pepa ẽ matu yuiai nĩkatã mã benuama ishanaii. 35Haska inũ, João bĩ ewapa dekua hi ikĩ txashawa keskashũ matu yusĩaĩ nĩkai ushe eskarabes hawẽ yusĩa abui mã benimakũkainimaki. 36Hamẽ Epa Deusũ ea yununirã, hawẽ kuxipawẽ dami atimaska wakĩ ẽ matu uĩmaiwẽ taeshũ mã ea unãti wakĩ tapĩtirubuki, Deusũ ea yununirã. Haskakẽ ekiri hawẽ unãmati hãtxa Joãonẽ matu yusĩmaki. Hakia eãnã, atimaska betsa betsapa wakĩ haska Joãonẽ aisma akĩ ẽ binuaiĩ. 37Ha inũ, Deus mã uĩyama inũ hawẽ hui mã nĩkaismabiakẽ habiatũri ea yununitũ ea unãkĩ hawẽ hãtxa hatu kenemani anushũ ekiri hatu yuini mã uĩkubaĩmiski. 38Hakia matu anu Epa Deusũ ea yununi mã ea uĩkĩ ikũwãmawẽ taea habiaskari wakĩ hawẽ hãtxa uĩkĩ xinaĩ ha txibaĩ mã hawẽ hiweabumariki. 39Haskakẽ matunã, ha txibaĩ hiwei ikibi iti hãtxa kenenibu betxinũ, iwanã, Deusũ hãtxa yuishunikabũ kenenibu anua mã benakubaĩmiski. Hakia habias kenewẽ ekiri yuinibu uĩbiakinã, 40haskawẽ taea matũ ea ikũwãtã hiwekuĩkatsi ikama mã ea danaiĩ.
41Hawara pepa ekiri yuiaibu besti ẽ nĩkakatsi ikamaki, yurabũ hãtxawenã. 42Hamẽ eãnã, ẽ matu unaiĩ, Deus nuimis keska hayama mã ikũkainairã. 43Epa Deusũ kuxipaya ẽ hubianikẽ xinã betsatã mã ea nĩkamaki. Hakia huni betsa hamebi kẽkĩ yuiai nĩkakĩ mã txibãmiski. 44Haska inũ, matũmebi ibubis mã yurabu kẽwãma bestikatsis imiski, ha besti Deus hatu kẽwãmamarã. Haskawẽ taeshũ mã ea ikũwãtirubumaki. 45Haska inũ, Deus bebũ nishũ ẽ matu ha ashanai xinãyamakãwẽ. Hakia matũ yusĩnã pehaira Moisés mã ikũwaĩ hatũri matu ha ashanai xinaĩ hakimayamashãkãwẽ. 46Ha inũ, Moisés ekiri keneniwẽ taeshũ Moisés hãtxa ikũwãkĩ mã ea ikũwãriakeanaii. 47Hakia haska hatũ keneni ikũwãkĩ mã txibãmarã, ẽ hãtxari mã ikũwãtirubumariki— hatu waniki.
Currently Selected:
João 5: cbsBR
Highlight
Share
Copy
Want to have your highlights saved across all your devices? Sign up or sign in
NT © 1980-2006, Wycliffe Bible Translators, Inc.
OT portions © 2006, Wycliffe Bible Translators, Inc.
