João 19

1Pilatõs nĩkawãshũ hatu yunua bitxi kuxatiwẽ Jesus kuxa kuxa atã 2kashe wakĩ Romano soldadobũ nixi mushaya maiti washũ Jesus maimashũ shanẽ ibũ bemakia tari taxihaira sawematã 3bestibu Jesusũ besuuri nishũ kashe wakĩ yuikĩ:

—Judeu shanẽ ibu kayabirã, mĩ miaki— iwanã, hawẽ besuki bepastãtanaibũ

4Pilatos ana kaĩtã judeu shanẽ ibubu yuikĩ:

—Jesusũ hawa hatũ txakabu wama ixiã ẽ matu unãmakĩ kaĩmai uĩkãwẽ— hatu waya

5musha maiti inũ tari pauti taxipa mexu duakabi sawemabu hawẽ besu himĩ iruma Jesus kaĩkiranaya Pilatõs tenãkatsi ikama ana hatu yuikĩ:

—Na huni mã iweshurã, uĩkãwẽ— hatu wa

6uĩkĩ Deusbe nukunabu hãtxashunika shanẽ ibubu inũ Templo mekenikabũ hui kuxipawẽ Pilatos yuikĩ:

—Cruzki mastawe! Cruzki mastawe!— akeakeabu

haska washũ atirubuma unãbiakĩ Pilatõs hatu kashe wakĩ ana yuikĩ:

—Hawa txakabu hayamaki. Matũmebi iyushũ aritãkãwẽ— hatu wa

7Deusbe nukunabu hãtxashunika shanẽ ibubũ yuikĩ:

—Txani txakai: “Ẽ Deusũ bakeki”, imiski. Deusũ hãtxa Moisés nuku keneshuni nũ hayaki. Haskawẽ taeshũ Deus yuãkĩ kanemiswẽ taea nũ yunuaiwẽ taearã, hau mawanũwẽ— aka

8haska yuiaibu nĩkatã Pilatos ana datekĩ 9hawẽ kene merã ana txĩtuãbaĩ Jesus iyushũ yukakĩ:

—Mĩ haniamẽ?— aka Jesusũ ana hawa yuiamakẽ

10haki sinatakĩ Pilatõs ana yuikĩ:

—Mĩ ea ana hãtxa wamamẽ? Ẽ kuxipawẽ hawa wama ẽ mia nitxĩtiru inũ ẽ kuxipawẽri ẽ mia hatu mastamatiru, mĩ unãmamẽ?— aka

11haska yuiai nĩkatã atimas Jesusũ kemakĩ:

—Deusũ dasibi damiwanitũ mia kuxipa yunuama ekiri mĩ kuxipa hayama ikeanaii. Haskakẽ habũ ea atxishũ mianu yunushũ ea nitxiãbunã, habũ txakaburã, mina binuabuki, Deus sinatamakinã— aka

12haska wa nĩkatã Pilatos tashnikirã Jesus hawa wama nitxĩnũ ikaya judeu shanẽ ibubũ hui kuxipawẽ Pilatos ana yuikĩ:

—Tsuara shanẽ ibu kayabi ikatsis ikĩ mĩ shanẽ ibu kayabi César danãkĩ hawẽ kuxipa mebĩpai imiski. Hawa wama Jesus mĩ nitxĩainã, mĩ Césarn haibumaki— akubainaibũ

13-14hanu Páscoa mexukiri ishanaitiã ma bari mananãbi kaya haskaibu Pilatõs nĩkatã Jesus tashnimabirã mixki buyakĩ kerã wanibu hawẽ kena Hebreu hãtxawẽ kenakĩ Gabatá hanushũ yunuti anu tsaushũ kashe hãtxawẽ judeu shanẽ ibubũ hatu yuikĩ:

—Narã, matũ shanẽ ibu kayabiki— hatu wa

15haki sinatakĩ hãtxa kuxipawẽ yuikĩ:

—Tenãriwe! Tenãriwe, cruzki hatu mastãmatanã!— ikubainaibũ

Pilatõs ana hatu yukakĩ:

—Haskakĩ matũ shanẽ ibu kayabi hatu mastamapa?— hatu wa

Deusbe nukunabu hãtxashunika shanẽ ibubũ yuikĩ:

—Nukurã, nũ shanẽ ibu betsa hayamaki! César besti nukũ shanẽ ibu kayabiki. Hatu mastamariwe!— akabu 16hatũ hãtxawẽ taeshũ Jesus hatu mastamakĩ Romano shanẽ ibu Pilatos ĩ hawẽ soldadobu yunua iyuaibũ

Cruzki Jesus mastanibukiaki, na hãtxarã

(Mt 27.32-44; Mc 15.21-32; Lc 23.26-43)

17hanushũ haki mastakatsi cruz Jesus iamatã sharamabaĩkĩ Jerusalém mae ewapanua kaĩmabaĩkĩ ha mati hawẽ kena Bushka Shau Mati anu mapematã, Hebreu hãtxawenã, Gólgota anurã, 18-20hanushũ hawẽ tari pekashũ cruzki mastashũ: “Nazaré anua Jesus judeubũ shanẽ ibu kayabiki”, iwanã, Pilatõs hãtxa dabe inũ besti hi besha sapaki Hebreu hãtxawẽ inũ, Grego hãtxawẽ, inũ Romano hãtxa Latimwẽ kenetã hatu buma Jesusũ bushka mamaki cruzki ha mamaki mastashũ netãbu Romano soldado betsabũri huni yumetsu daberi mastashũ betsa yusiuri nitxĩshũ betsa yusmauri nitxĩtã Jesus namakis wabu Jerusalém dapikea bukĩ Pilatõs hãtxa Jesusũ bushka mamaki netã judeu itxapabũ uĩbaĩbaĩkĩ 21haska wabu uĩbaĩ Deusbe nukunabu hãtxashunika shanẽ ibubu Pilatos anu bushũ yuikĩ:

—Hari mĩ keneshũ hatu netãmatirumaki: “Judeubũ shanẽ ibuhairaki”, akinã. Hakia haska ibubis yuimis keska hatu kene betsa washũwẽ, eska wakinã: “Earã, ẽ judeubũ shanẽ ibu kayabiki”, imiskirirã— akabu

22Pilatõs hatu nemakĩ:

—Hawara ẽ ma kenearã, hau habiaska kene nenũwẽ— hatu wa

23cruzki Jesus nitxĩshũ soldado dabe inũ dabetã Jesusũ tari tibi habu tibibũ pashkatã hakia hawẽ tima tari txaipa hirabi keshemawẽ taea 24yuinamei:

—Pashkakĩ txakabuwayamanãkãwẽ. Tsuã bimẽkaĩ? hawẽ beyusti heshe putakĩ tsarĩ tsarĩ akĩ putanãkãwẽ— iwanã, haska bebũkiri Deusũ hãtxa anu kenekĩ: “Ẽ tari pashkakĩ ẽ tima tari bikĩ hawẽ beyusti putashãkanikiki”, akĩ yuini unãmabia haska kenenibu soldadobũ habiaskari wanibuki.

25Haska waibũ Jesus mastabu dapi hawẽ ewa inũ, hawẽ ewa betsa Cleopasĩ aĩ Maria inũ, Maria Madalena inũ, ea nũ nia 26-27hawẽ ewa inũ ea uĩkĩ ekiri Jesusũ yuikĩ:

—Ewaã, ha mia dapi niarã, mĩ bakewawe— iwanã, ea abuhairamisshũ eari yuikĩ: —Baa, ikis ẽ ibu mĩ ewa ea washũwẽ. Ea uĩrashũkubaĩshãwẽ— ea wa ẽ hiwe anu iyuimashũ ẽ merabewapauniki.

Haskatã Jesus mawanikiaki, na hãtxarã

(Mt 27.45-56; Mc 15.33-41; Lc 23.44-49)

28Jesusũ haska nuku yuitã dasibi hawẽ Epa Deusbe yubakani keyuai unaĩ Deusũ hãtxa anu haska hakiri keneni menei Jesusũ hui kuxipawẽ yuikĩ:

—Ma ũpash manui ẽ tetsusinaki— ikai 29nĩkatã habũ kẽpuki uva vinho muka mata tsauwa haki tsinitiki pu atã tawaki ustãshũ Jesusũ kesha anu sanãshunabu 30tsu akĩ keyutã hui kuxipawẽ Jesusũ yuikĩ:

—Dasibi ẽ ma keyuaki— itã bekua tiniã mawakĩ hawẽ Yushĩ ibu anu nitxĩniki.

Haxĩwẽ Jesus pixpe akĩ txatxinikiaki, na hãtxarã

31Hanua judeu shanẽ ibubu yuinamei: “Mexukiri sábado hanu meribihaira Páscoa nawatitiãki. Cruzki hatũ yura mapuabu sábadotiã nũ henetirumaki, Deus hau nukuki sinatayamashanunã. Hatũ yura hau hawaira butenũbũ Pilatos yununũ bukãwẽ”, ika bushũ Pilatos yuikĩ: “Cruz anua hatũ yura hawaira butetiki. Hau hawaira mawanũbũ hatũ kixi hau kixtekenũbũ hatu yunuwe”, akabu 32Pilatõs habiaskari xinãkĩ hatu yunua soldadobu bushũ ha dukũ huni yumetsu dabe Jesusbe mastabu kixtekerabetã 33hanua Jesuski kemashũ ma mawa uĩtã hawẽ kixi tekeama 34habiaskabiakẽ soldado betsã haxĩwẽ Jesus pixpe akabu hanua hakimamari himi hawẽ hene husia habaya 35-37hakia bebũkiri Deusũ hãtxa keneni anu yuikĩ: “Hawẽ shau tekeama ishãkanikiki”, anibu inũ, kene betsa anushũ yuikĩ: “Tsuara txatxiabu hawenabũ uĩshãkanikiki”, iwanã, keneniburã, unãmabia habiaskari keneni menekĩ arianibuki. Matũri mã ikũwãshanũbũ hawara ibubis ẽ uĩni ẽ matu yuiaii. Ẽ uĩniwẽ taea ẽ hãtxa txanimaki.

Jesus hawaira maiwanibukiaki, na hãtxarã

(Mt 27.57-61; Mc 15.42-47; Lc 23.50-56)

38Hanushũ huni betsa José hawẽ mae Arimatéia judeu shanẽ ibubuki datekĩ hune Jesus ikũwãxinatũ Jesus mawa unãriai hakia natiã ana dateama Jesusũ yura maiwakĩ hanatanũ ika kashũ Pilatos ea akĩ yuka hawẽ yura yunua José hawẽ tsumabube kashũ Jesusũ yura cruz anua buteshunabu 39ha dikabi mexu merã Jesusbe hãtxatãyama Nicodemos hawẽ tsumabubetã 30 kilo mirra inũ aloé inĩti teipa husia bea José hawẽ tsumabube kashũ 40haska judeubũ yura mawa maiwakĩ pewamisbu keska wakĩ Jesusũ yura dapushyabi yabukubaĩkĩ inĩti teipawẽ dapushkubaĩkĩ tari hushupawẽ yabukĩ keyutã 41-42bari hiki ma huĩrukũti kemaya hĩ hĩ ikĩ hanu Jesus mastakãshu dapi mibã shukua namã hanu yura mawa datãti mixki tãpe kini bena waimabu hanu yura mawa datãriabuma anu hawaira ha merã hanakĩ mistutã mixki ewapa beputiwẽ beputã inũ bunibukiaki.

Currently Selected:

João 19: cbsBR

Highlight

Copy