João 15

Jesusrã, uva bana hawẽ tashu keskakiaki, na hãtxarã

1nũ benibaunaibu nuku ana yuikĩ:

—Ana betsa matu yusĩnũ nĩkayukãwẽ. Earã, ẽ uva bana nia hawẽ tashu kayabiki. Ẽ Eparã, mibã ibuã mekekĩ meurumiski. 2Hatiri mebi tibi bimi hayamakẽ meshteshũ putamiski. Hakia hawẽ mebi tibi bimiyamis ana bimihaira wakĩ hawẽ ibuã bumeshtekĩ pewamiski, hau ana katakutã bimihairanunã. Ea ikũwaĩbu ẽ Epa Deusũ habiaskari washanikiki. 3Ẽ hãtxa ẽ matu yusĩaĩ mã ikũwaĩwẽ taea mã ma xinã betsa haya mã ma shũpĩhairaki. 4Hakia hawẽ tashu anua hawẽ mebi betsa meskea ana haska bimitirumaki. Habiaskari wakĩ ea henebaĩkĩ mã Deus benimawatirumaki. Haskakẽ ẽ matu putama keska wakĩ eari putayamashãkãwẽ. 5Earã, ẽ mibã tashu keskaki. Maturã, mã hawẽ mebi keskabuki. Ebe haibunamekĩ bimi itxapaya keskakĩ mã Deus benimawatiruki. Eauma mã hawayatirumahairaki. 6Ea haibuwama ewẽ petxiarã, hawẽ mebi bimiuma meshtetã putaima barĩ shana waxina itxawashũ kua keska wakĩ Deusũ txi anu hatu urẽshanikiki.

7Hanua maturã, ebe ketashameshũ ẽ hãtxa xinãkĩ unãhairai hakimama txibãkubaĩkĩ hawara bikatsis ikĩ mã Deus yuka matu ashũshanikiki. 8Haskai duapanãkĩ Deusũ kuxipa mã hatu kẽwãmairã, bimi itxapayai keskakĩ txanima ẽ tsumabu kayabi shabakabi mã ishãkanaii. 9Eãnã, ẽ matu abuaii, haska ẽ Epã ea abukĩ akai keska wakinã. Haskawẽ taea ea putapakeyamashãkãwẽ, ẽ nui mã hayawẽ taearã. 10Hawẽ hãtxa ẽ txibãyã ea abukĩ ẽ Epã ea putaismaki. Haska keskari wakĩ ẽ yunua hãtxa mã txibãyã matu abukĩ ẽ matu putamari ishanaii.

11Xinã txãkaĩ mã ebe benimahairanũbũ hawẽ benimati hãtxa ẽ matu yuiaii. 12-14Tsuara hawẽ haibuaibuwẽ nuikĩ abukĩ hatu merabewai mawashunai tsuã haskakĩ ana betsã binutirumaki. Ẽ hãtxa mã txibãkubainai mã ẽ haibuki. Eskaki, ẽ matu yunuairã. Ẽ matuwẽ nuikĩ abumiski. Haska txibãkĩ betsabuwẽ nui abunamekubaĩshãkãwẽ. 15Hamẽ betsarã, hawẽ dayakiri hawẽ dayarubu shanẽ ibũ hatu shabakabi tapĩmaismaki. Hakia dasibi ẽ Epã ea yuia ẽ matu unãmaiwẽ taeshũ yunubiakĩ ẽ dayaru wakĩ matu kenama ẽ haibuwakĩ ẽ matu kenaii. 16Mã ea katuama eã ẽ matu katuniki. Haskawẽ taeshũ ẽ matu yunuaii. Kashũ hatu yusĩkĩ mã bimi itxapa wai keska wakĩ ẽ tsumabu hatu wakĩ hau txĩtũyamanũbũ hatu kuxipa wakubaĩshãkãwẽ. Haska wakĩ ẽ kenayashũ Epa Deus hamapai tibi mã yuka matu ashũshanikiki. 17Na haska ẽ matu yunuai keska wakinã, habũ ea ikũwaĩ betsabube hatuwẽ nui abunamekubaĩshãkãwẽ— iwanã,

Yurabũ Jesus danãnishũ hawenaburi danãshanaibu hatu yuinikiaki, na hãtxarã

18-19ana betsa nuku yuikĩ:

—Habũ xinaĩ keska mã xinãyã ea ikũwãbumã matu abukeanaii. Hakia ikũwãbuma anua ẽ matu katuni habũ xinaĩ keska mã ana xinãmawẽ taeshũ ea dukũ danãxĩshũ maturi danãriashãkanikiki. 20Ẽ matu yuishurã, xinaĩrakãwẽ: “Dayakapã hawẽ tsuma binuismaki”, akĩ ẽ matu yuishuki. Haskakẽ ea itxakawanishũ habiabũri maturi itxakawashãkanikiki. Hakia betsabũri ẽ hãtxa nĩkanishũ matũ hãtxari nĩkakĩ ariashãkanikiki. 21Hatũ ea yununi habũ unãbumawẽ taeshũ na haska tibi matu wakinã, mã ea txibaĩbuwẽ taeshũ matu ashãkanikiki. 22Ẽ yusĩ hua hãtxamakẽ habu na mai anu hiweabũ ibubis xinaĩ: “Ẽ pepaki”, itirububia eskatiã ana haska washũ hatũ txakabu ibubis hũtãtirubumaki, mekeirã. 23Haska inũ, ea danãkinã, ẽ Epa Deusri danãriakanikiki. 24Ha inũ, hatu anushũ ẽ hawa hatu haska washũama txakabu xinãma ikeãkanaii. Hakia tsuã haska hatu anushũ haska washuĩsmabiakẽ Deusũ kuxipa hatũ berubi ẽ ma hatu uĩmabia uĩbiakĩ ea inũ ẽ Epa danãkanikiki. 25Haskakẽ Deusũ hãtxa yuishunikã yuikĩ: ‘Hawamawẽ taeshũ itxakawakĩ ea danãnibuki’, iwanã, keneni keska menekĩ ea danãkanikiki. 26Hanushũ maturi danaĩbũ ẽ Epa anua mekenã betsa matu anu ẽ yunua hanua Yushĩ Txanima Unãmanika hushũ ekiri matu unãmai ea hãtxashũshanikiki. 27Ha inũ, maturi ẽ tashnikiranai anua tapĩ mã ebe ikũkirãxinarã, mã ekiri hãtxai txaninikaburiki— iwanã,

Currently Selected:

João 15: cbsBR

Highlight

Copy