João 11
11
Lázaro mawanikiaki, na hãtxarã
1-2Hanua xinã Betânia anushũ Mariã txipu sheni ininipawẽ Shanẽ Ibu Jesusũ tae peukashũ hawẽ buwẽ tere ashanai anu hawẽ betsa Maria inũ Martabe hatũ pui Lázaro hiwea hanua isĩ teneaya 3hau Jesus yuishũtanũbũ hawẽ pui dabetã hatu yunua bushũ Jesus hatu yuishũkĩ:
—Shanẽ Ibuũ, mĩ haibu mĩ abuairã, isĩ teneikiki. Nukube kashũ uĩ kawe— akabu
4Jesusũ nĩkatã nũ hawẽ tsumabu nuku yuikĩ:
—Ha isĩmanã tenãkĩ debu wamaki. Hakia Deus inũ hawẽ bakẽ kuxipa hatu uĩmashanũ ika isĩ teneikiki— ikaya
5Maria inũ Marta inũ hatũ pui Lázaro abuhairabiai 6Lázaro isĩ teneai yuiabu nĩkatã kayuama ana usha dabei Jesus baxikuxĩshũ
7nũ hawẽ tsumabu nuku ana yuikĩ:
—Judéia anu ana bunãkãwẽ— nuku wa
8—Yusĩnaã, judeu shanẽ ibubũ dama harishũ mixki tũkuwẽ mia tsakapai ixiãbuki. Haskai hariri mĩ ana kakatsi ikai?— nũ wa
9nuku yuikĩ:
—Shaba tibirã, 12 hora hayaki. Bariri shabatiã tsuara kai uĩ pewabaini tsua huti itirumaki, na ẽ mai anu shaba txasha hayawẽ taearã. 10Hakia tsuara mexu merã biũma kairã, huti itirubuki, eauma kai keskarã— 11itã,
—Nukũ haibu Lázaro ma ushaki. Datekĩ ẽ bestẽwaĩ kaii— nuku wa
12—Shanẽ Ibuũ, ha huĩrukuĩ usharã, mawama maĩkiki. Kayamawe— nũ wa 13Lázaro mawakiri Jesusũ nuku yuibia unãma usha bestiakiri nũ xinãniki. 14Haska nũ xinaĩ unãtã shabakabi Jesusũ nuku yuikĩ:
—Lázarorã, ma mawaxinaki. 15Ẽ harimakẽ ixĩkẽ ẽ benimaii. Haskarã peki, matunarã, ana shabakabi ẽ matu ikũwãmai kairã. Eki sinatabiaibu anua Lázaro uĩnũ bukãwẽ— nuku waya
16haskaya nũ hawẽ 12 tsuma kuxipaya betsa Tomé tsupibu bakẽ nuku yuikĩ:
—Kawe. Haria habe mawarinũ bukãwẽ— nuku waya
Jesusrã, mawabu bestẽwãkĩ hiwemanikakiaki, na hãtxarã
17-19haska nĩkatã Jesusbe nũ kaya Betânia dapishũ: “Usha dabe inũ dabe ka Lázaro maiwaxinabuki”, akĩ nuku yuiabu Jerusalém txaima quilômetro dabe inũ besti anua judeu shanẽ ibubu itxapa beshũ hatũ pui mawaxĩkẽ Marta inũ Maria kashaibu hatuwẽ nuikĩ daewakĩ hatu nese wai beabũ 20Jesus huai bana nĩkatã Martã itanũ ika kai Jesuski nukui kaya Mariãri hawa nĩkama hiwetã hiwekẽ 21-22haki nukushũ Martã Jesus yuikĩ:
—Shanẽ Ibuũ, mĩ nenukenã, ẽ pui mawama ikeãxinaki. Hamapai xarabu mĩ Deus ea akai nĩkatã mia merabewakĩ mia ashũmiski, ẽ unãnã— aka 23Jesusũ yuikĩ:
—Mĩ puirã, ana hiweshanikiki— aka
24hanushũ Martã yuikĩ:
—Txanima habiaskaki. Bari hawẽ heneaitiã mawabu Deusũ yura dasibi bestẽwãshanaitiã ana hiweshanai ẽ unãnaiĩ— ikaya
25hanushũ Jesusũ ana yuikĩ:
—Bestẽwãkĩ hiwemanikarã, habia ẽ eaki. Tsuabũra ea ikũwaĩ mawabia ana hiweshãkanikiki. 26Habu dasibi hiweyushũ ea ikũwaĩ mawataskama ishãkanikiki. Na ẽ mia yuiairã, mĩ ikũwaĩ?— aka
27—Heẽ, Shanẽ Ibuũ, mĩ Cristo Messiaski. Hawẽ bake yurabube hau hiweyushanũ Deusũ yubanirã, habia mĩ miaki, ẽ unãnã. Ẽ mia ikũwaiĩ— atã
Lázarowẽ taea Jesus kashanikiaki, na hãtxarã
28hanua Marta hawẽ hiwe anu txĩtũkirã hawẽ betsa Maria hune yuikĩ:
—Nukũ Yusĩnã ma huaki. Mia kenaikiki. Kayuwe— aka
29Mariã nĩkatã benikaini hawẽ betsa Martabe kaĩkainaya 30hawẽ mae anu hikiriama habianuari Marta haki nukushu anushũ Jesusũ manaya 31judeu shanẽ ibubũ Maria daewai bea hawẽ hiwetã habe maniabũ Mariã hawa hatu yuiama benikaini hawẽ betsabe hawaira buaibũ hatu uĩtã xinaĩ:
—Mixki tãpe anua kashai kaikiki— ikĩ txibaĩbũ
32Jesuski nukutã huĩti nixma ha namã dãti ishũ Mariã yuikĩ:
—Shanẽ Ibuũ, mĩ nenukenã, ẽ pui mawama ikeãxinaki— atã 33judeu shanẽ ibubube Maria kashai bis ikaibũ Jesusũ haskaibu uĩ hatuwẽ uke merã nuihairai hatube kashakatsis ikĩ 34hatu yukakĩ:
—Hani mã datãxinamẽ?— hatu wa
—Shanẽ Ibuũ, uĩnũ kawe— abainabu 35Jesus kashakainaya 36shanẽ ibubũ uĩ yuinamei:
—Uĩwẽ, aburiaikikirã— akaibũ 37hakia shanẽ ibu betsabu yuinameriai:
—Huni bekũ shushawabiaxina hau Lázaro mawayamanũ shushawati xaraxina hawawẽ haska watima damapaikiki— abainaibũ
Lázaro mawaxina Jesusũ bestẽwã ana hiwenikiaki, na hãtxarã
38Jesus hatube kai kashakũkainaya ana nui pae tsekekirani kakĩ mixki tãpe merã datãtã mixki ewapawẽ bepuxinabu anu kematã
39—Bepẽkãwẽ— hatu wa nemakĩ Lázarõ pui Martã yuikĩ:
—Shanẽ Ibuũ, hamaki. Meyamanãwẽ. Ma shaba dabe inũ dabe ka txapui pisi mayaikiki— aka 40Jesusũ kemakĩ yuikĩ:
—Ewẽ dateyamawe. “Ikũwãkĩ Deusũ kuxipa mĩ uĩaiĩ”, akĩ ẽ mia dama yuibirãshurã, xinãwẽ— akaya
41hanushũ mixki ewapawẽ bepuxinabu bepẽshunabu Jesusũ uĩtã naiuri teskãshũ yuikĩ:
—Epaã, mĩ ea nĩkaiwẽ taeshũ ẽ mia pepawaii. 42Ẽ mia yuka nĩkatã mĩ ea merabewakubaĩmiski. Mĩ ea yununirã, na ebe mapubaunabũ hau ea uĩkĩ ikũwanũbũ shabakabi ẽ mia yukaii— itã, 43hui kuxipawẽ kenakĩ:
—Lázaroõ, hari dakama tashniyuwe!— akaya 44mawa tariwẽ yabu keshtu wakĩ sebikĩ utsi washũ hawẽ besuri beyabubiaxinabu ana hiwei bestẽtã kaĩkiranaya Jesusũ hatu yunukĩ:
—Hawẽ yabu dapekãwẽ, hau kanunã— hatu wa dapeabu haskai Lázaro ana bestẽtã hiweniki.
Jesus atxitã tenãkatsi yubakanibukiaki, na hãtxarã
(Mt 26.1-5; Mc 14.1-2; Lc 22.1-2)
45Hatũ berubi Jesusũ haska waiwẽ taeshũ judeu shanẽ ibu itxapabu Mariabe beshũ Lázaro mawaxina Jesusũ ana hiwemai uĩkĩ: “Jesus Deusũ bakeki”, ikĩ ikũwaĩbũ 46hakia shanẽ ibu betsabũ haska washu ikũwãkatsi ikama fariseubu anu bushũ haska Jesusũ ashu hatuki txaniabu 47hanua Deusbe nukunabu hãtxashunika shanẽ ibubu inũ fariseubu Sinédrio kena hatube itxatã Jesuski datei yuinamei:
—Ha huninã, hatu unãti wamakĩ dami tsuã haska watiruma itxapa waikiki. Nũ haska watirumẽ? 48Nũ nemama nuku henekĩ keyutã dasibibũ ikũwaĩ haki txiti iki keyutirubuki. Haskaibũ Romano shanẽ ibubũ hatũ soldadobu mirima beshũ nukũ Templo inũ nukunabuya nuku yamawashãkanikiki— ikaibũ
49hakia na habia baritiã Deusbe nukunabu hãtxashunika shanẽ ibuhaira Caifásĩ hatu nĩkatã yuikĩ:
—Matunã, mã hawa unãmaki. 50Nukunabu hau pashkai sa iyamashanũbũ huni bestitxai nukunabu mawashunaya mã pepakũkaĩshanai mã haska xinãmaki— hatu wanikiaki.
51Haska yubakaibu xinãmakinã, ibubis Caifásĩ xinãma hakia na habia baritiã Deusbe nukunabu hãtxashunika shanẽ ibuhairawẽ taeshũ: “Jesus judeubu mawashũtiruki”, akĩ Deusũ Caifás hatu yuimaniki. 52Na haska yunuirã, habu bestikiri ikama hakia Deusũ bakebu pashka hiweakeakeabu habũ ikũwaĩbu dasibi itxawashanũ ika merabewai Jesus nuku mawashũshanai 53Caifásĩ haska hatu yuiaiwẽ taeshũ judeu shanẽ ibubũ Jesus tenãnũ ika yubakai taenibukiaki.
54Judeu shanẽ ibubu haki haskaibu hanua Jesus shabakabi ana niama hatu anua kaĩkaini mae betsa Efraim anu hanu hiweabuma dapi nuku iyushũ usha itxapakĩ Jesusũ nuku besti yusĩayã
55Páscoa judeubu nawai besimisbutiã ma kemaya nawai taeriama hatũ beya txibaĩ hau Deus ana hatuki sinatayamanũ Deus daewai ibubis pepakatsi iki mae hatiubuma anua Jerusalém anu yurabu mirima beshũ 56-57Jesusũ yusĩaĩ nĩkakatsi ikĩ benabaunaibũ Deusbe nukunabu hãtxashunika shanẽ ibubu inũ fariseubũ Jesus atxitã bitxinũ, iwanã, hatu yunuxĩshũ hatu yuikĩ:
—Jesus haniara betxitã nuku yuikãwẽ— ikaibuwẽ taea mae betsa betsapa anua bexiãbu Templo hemaĩtĩ anua yuinamei:
—Jesuskiri hawa mĩ xinaĩ? Huimẽkaĩ? Huamaraka?— ibaũbaunaibũ
Currently Selected:
João 11: cbsBR
Highlight
Share
Copy
Want to have your highlights saved across all your devices? Sign up or sign in
NT © 1980-2006, Wycliffe Bible Translators, Inc.
OT portions © 2006, Wycliffe Bible Translators, Inc.
