Gênesis 13

Abrão inũ Ló pashkanibukiaki, na hãtxarã

1Hanua Egito anushũ nitxiãbu kai nortekiri Abrão hawẽ aĩ inũ, hawẽ betsã bake Ló inũ, hawẽ tsuamabu inũ, hawẽ hamapaiya kakĩ hatu iyui sulkiri txĩtunikiaki, 2Abrão mabuwãyã mane ouro tashi txashakapa inũ, mane prata hushupa txashakapa mane hushupa inũ, mabu itxapa inũ, inabu itxapaya buirã. 3-4Hanua ana nortekiri Betelkiri bui hiwekũkaĩkĩ ushe tibi nitxĩkubaini bui atimas hanu dukũ Canaã mai pakea anu hatũ bitxi hiwe nitxini anu Deus kẽwãkĩ mishki mãtxĩkĩ itxawatã hanushũ dukũ kẽwani anu ha mae dabe Betel inũ Ai namakis anu ana hikitã habianushũri Abrão ana Senhor Deusũ kena yuikĩ kushipa yukatushinikiaki.

5Hanua Ló Abrãobe kayama hari mabuyai hawẽ inabu itxapa inũ hawẽ tsumabu itxapa habe hayakẽ 6dasibi ha dapi habe hiweshũ hatũ inabu itxapatũ basi hawaira pikĩ keyuaibũ hatũ tsumabũ hawẽ inabu hania pimatima 7Abrão tsumabũ inũ Ló tsumabũ inabu pimanũ ika yaushinaĩ hatube ha iki detenameaibũ habianuri Canaã nawabu inũ Ferezeu nawabu habias maewanu hatũ inaya hiweriabũ haskawẽ taea basi itxapa hayabia damakẽ 8hanushũ hawẽ betsã bake Ló Abrão yuikĩ: “Epaã, mĩ enabi kayabiki. Haskawẽ taea ha ikarã, txakabuki. Haskayamanãwẽ, nukũ ina mekenikabu mina inũ eanabuberã. 9Haskakẽ mai hamẽ ikikiki. Nuku dapikea haratura mai pepa uĩtã katuwe, hanu tari hiwetãshunã, ea dapashkabainã. Hanua mĩ nortekiri kaya ea kairã, sulkiri Zoar anu ẽ kashanaii. Hanua mĩ sulkiri kaya ea nortekiri ẽ kashanaii. Mianã, ha dukũ miã hanu mĩ unanuma hiweshanai benabaũkĩ uĩbaũkĩ haratura miã dukũ katuwe”, aka

10Ló nishũ benakĩ txai Zoar anu uĩbaũkĩ Jordão hene napãpa mae pishta anu dapi uĩkĩ basi inũ hene pepa betxinikiaki, Egito pashku kesha bai pepa keskarã. Ha habiatianã, Deusũ Jordão hene napãpa mae dabe Sodoma inũ Gomorra nai anua txiwẽ menuriamakẽ 11Jordão hene napãpa betxipaikĩ katutã Ló hawenabu bari huaikiri hatu iyunikiaki, hatu hanu hiwemakinã. Haskai Abrão inũ Ló pashkanibukiaki, tari hiweirã. 12Canaã mae anu mananã Abrão hiwea Sodoma dapi napãpa anu Ló hawẽ tari hiwe watã hiweyunikiaki. 13Hanua Sodoma nawabu hiweaburã, hunibu txakabu atimapahairakĩ Senhor Deus danaĩ txakakubainibukiaki.

14Ló ma kakẽ Senhor Deusũ Abrão yuikĩ: “Hanu mĩ nia anushũ uĩbaũwẽ, nortekiri inũ, sulkiri inũ, bari huaikiri inũ, bari kaikiri uĩkinã. 15Ha mai hirabi mĩ uiaĩ inãkĩ ẽ mia ibu wamashanaii, mina inũ minabu paiburã. 16Ha inũ, eã minabu pakubaini mirimaibu mashiti tsuã tanatiruma keska ẽ hatu washaii. Minabu pakubainaibu tsuã hatu tana keyutiruma inũbarikanikiki. 17Hanua benia nishũ mai hirabi uĩbaũwẽ, hawẽ hashpa inũ hawẽ txaiparã. Ha mĩ uiainã, ẽ mia ha ibu wamakĩ inãshanaii”, aka 18hanua Abrão hawẽ tari hiwe hawẽ tsumabu pekamatã bekubirãkĩ Manre ni shukua merã hatũ tari hiwe ana nitxĩtã hiwenibukiaki, mae Hebrom dapirã. Hanushũ mishki txi tapu wakĩ mishki itxawakĩ maspu watã Abrão hanushũ Senhor Deus kẽwanikiaki.

Currently Selected:

Gênesis 13: cbsBR

Highlight

Copy