Êxodo 3

Moisés Deusũ katukĩ kenanikiaki, na hãtxarã

1Habiatiãri hawẽ kuka Reuel, hawẽ kena betsa Jetrorã, Midiã anu hiwea hawẽ txashuwã Moisĩ basi pimashũkubaini txaihaira kakũkaini hanu tsua hiweabuma anu hatu iyui kai hanu Deusbe hãtxati mati keyatapa hawẽ kena Horebe tenamã Moisés hikikẽ 2hi mashu hamebi menui hawẽ here anua Senhor Deusũ hãtxa bunika Moisésbe hãtxanũ ika butua hi mashu anu txi herehairabiai hawa hi menuama metakara ibestiaya betxishũ 3Moisĩ shinãkĩ: “Haskai txi herehairabiai menuamamẽ? Haska tsuã uĩsmabiakẽ uĩtanũ”, ika 4kai ma kemaya hi mashu menui here hi ikai merãshũ Senhor Deusũ kenakĩ:

—Moisĩ, Moisĩ— aka

Moisĩ kemakĩ yuikĩ:

—Ẽ nenuki. Ea yuiwe— aka

5Senhor Deusũ yuikĩ:

—Ea dapi txaima huyamawe. Ẽ nenukẽ na mai meribiki. Haskakẽ eki mesekĩ mĩ bitxi tae hutsekewe— aka ma hutsekekẽ

6ana yuikĩ:

—Ẽ mĩ shenipabũ mekenika yushĩki. Abraão inũ, Isaque inũ, Jacó ea nĩkakubainiwẽ taeshũ duawakĩ ẽ hatu mekekubainiki— akaya Deus uĩ Moisĩ datekĩ hawẽ mekẽnẽ hawẽ besu atximakẽ 7ana Senhor Deusũ shabakabi yuikĩ:

—Egito anushũ enabu itxakawaibu shabakabi ẽ hatu uĩmis ẽ unaiĩ. Hatu dayama txakayamaibũ hau ẽ hatu merabewanũ nuitapai hãtxawẽ ea yukaibu ẽ nĩkaii. 8Egito nawabũ hatũ kushipawẽ hatu tsumawani hatu mebĩbaĩkĩ eã Egito mai pakeanua hatu pashawakĩ iyunũ ika ma ẽ butuaki. Hari ha mai pakea betsa pepa ewapa anu unanuma hiweshanaibu anu piti mirima hamẽ ikai anu ẽ hatu iyushanaii. Hanu Canaã nawabu inũ, Heteu nawabu inũ, Amorreu nawabu inũ, Ferezeu nawabu inũ, Heveu nawabu inũ, Jebuseu nawabu ikis hiweabu anu hatũ mae tibi ẽ hatu mebĩma akeakeshanaii. 9Israelĩ enabu kashaibu ma ẽ nĩkaki. Habiaskari Egito nawabũ hatu itxakawa txakayamaibu ma ẽ uiãki. 10Haskawẽ taeshũ enabu Israelĩ enabu Egito anua mĩ hatu kaĩmashanũ Egito shanẽ ibu bena anu ẽ mia nitxĩkĩ yunuyuaki— aka

11Moisĩ Deus kemakĩ yuikĩ:

—Haskakaĩ shanẽ ibu Faraó bena anu kashũ enabu Israelbu ẽ hatu hãtxashũtã Egito anua ẽ hatu kaĩmai katirumẽ, ẽ hawaumabiarã?— aka

12Senhor Deusũ ana kemakĩ:

—Ibubis mĩ hawaumabiakẽ mia merabewakĩ mia putama ẽ mibe ikũkaĩshanaii. Egito anua enabu iwei nenu na mati meribi anu mĩ ana hushũ minabubetã mĩ ea kẽwãyã parãma ẽ mia yunuima mĩ uĩshanaii— aka

13datekĩ Moisĩ ana yuikĩ:

—Mĩ ea haska wa Israelĩ enabu anu kashũ eã hatu yuikĩ: “Hatũ nukũ shenipabu mekekĩ duawapauni Deusũ matu anu ea yunushinaki”, ẽ hatu wabia ea yukakĩ: “Harakiri kenamẽ?” ea akabu Harakiri hatu yuishãpa?— aka

14Deusũ ana yuikĩ:

—Earã, Ẽmebi Ẽ Hiwearã, Ẽ Eaki. Hari Israelbu mĩ hatu yuitiruki: “Hamebi Hiweatũ matu anu ea yunushinaki”, akinã— iwanã,

15ana Moisés yuikĩ:

—Eskakiri hatu yuikinã: “Matũ shenipabu Abraão inũ, Isaque inũ, Jacó hatũ habu mekekĩ duawapaunirã, Senhor Deusũ matu anu ea yunushinaki”, akĩ hatu yuitãshãwẽ. Na kena ‘Senhor Deus’ habias ikũkaĩshanikiki, ẽ kena hawa betsa maeamarã. Na ẽ kena Senhor Deus dasibitũ ea shinãtiruburã, henenakamaki— iwanã 16—Ẽ mia haska wa kashũ Israelĩ enabu shanẽ ibubu itxawatã hatu yuikĩ: “Senhor Deusũ matũ shenipabu Abraão inũ, Isaque inũ, Jacó mekekĩ duawapaunitũ ea betxitã matukiri shinãkĩ Egito anushũ matu itxakawa txakayamaibu matu uĩmis shũ ea yuishinaki. 17Habiatiãri Egito anushũ matu bika tenemaibu matu merabewakĩ pashawatã hanu Canaã nawabu inũ, Heteu nawabu inũ, Amorreu nawabu inũ, Ferezeu nawabu inũ, Heveu nawabu inũ, Jebuseu nawabu hiwebaunabu anu iyukĩ mai pakea pepa anu piti inũ nushuti mirimanu Deusũ matu iyushanikiki”, akĩ hatu ea yuishũtãwẽ. 18Mĩ hatu haska wa mia nĩka pewashãkanikiki. Haskakẽ Egito shanẽ ibu bena anu hatubetã uĩ kashũ shanẽ ibu yuikĩ: “Hebreubu mekenika Senhor Deus tashnikirã nukuki ma nukushinaki. Haskakẽ nuku heneyuwe, shaba dabe inũ besti ushakaĩ nukũ mekenika Senhor Deus kẽwãkĩ txashuwã itxapa tesẽshũ kuakĩ nũ benimawayui kairã”, akĩ ha shanẽ ibu haska ekiri yuishũtãshãwẽ. 19Mĩ haska ekiri yuibia Egito shanẽ ibũ matu nĩkatã matu nitxiãma ishanikiki. Hakia ẽ kushipawẽ nĩkamas ẽ matu mebikinãshanaii. 20Hawenabu ẽ kushipa hatu uĩmakĩ itxapabu hatu tenãkĩ ẽ hatu betsa betsapawẽ date date akubaina hatũ mae pakeanushũ ẽ haska waiwẽ taeshũ datekĩ txipu shanẽ ibu Faraónẽ matu nemama heneshanikiki. 21Habiatiãri Egito nawa dasibi ẽ datekĩ matuki pe shinãmaya mekẽ bestia mã mais kama ishanaii. 22Hakia mã kaĩkainaitianã, matũ aĩbu tibitũ Egito nawabu matu dapi hiweabu inũ habe hiweabu anua hau hatũ dau tibi yukashanũbũwẽ, prata mabu inũ ouro maburã. Ha dikabi hatũ tari pepa sharabu biãkubaũkĩ keyutã matũ huni bakebu inũ matũ aĩbu bakeburi hatũ tari hatu sawemaya hau haya bunũbũ haska wakĩ Egito nawabu mã hatu nuitapa washanaii, hatu kupikinã— aka

Currently Selected:

Êxodo 3: cbsBR

Highlight

Copy