Atos 7
7
Hatũ shenipabukiri Estêvãonẽ shanẽ ibubu hatu ana xinãmanikiaki, na hãtxarã
1Haska uĩtã hanushũ Deusbe hawenabu hãtxashunika shanẽ ibu binuatũ Estêvão yukakĩ:
—Na haska mikiri yuiaiburã, txanimamẽ?— aka
2nĩkaibũ Estêvãonẽ hatũ yukai kemakĩ:
—Ẽ shanẽ ibubu inũ enabuũ, matu yuinũ nĩkakãwẽ. Mesopotâmia mai pakea anu nukũ shenipabu Abraão Harã mae ewapanu kariama bebũkiri nukũ Epa Deus kuxipa pepatũ yubakĩ unãmakĩ hanu hiweshanai anu 3yunukĩ yuikĩ: “Mĩ mai inũ minabu henebaini mai bena ẽ mia uĩmashanai anu hari kashãwẽ”, aka 4hanua Abraão kaĩkaĩkĩ Caldéia henebaini Harã anu kaima dakayukẽ hanua hawẽ epa ma mawaimakẽ hanushũ na habia mai mã hanu hiwea anu Deusũ Abraão iweshũ 5hanu hawẽ mae ibubis bitã hanu hiwepaketirumabiakẽ Abraão bebũkiri yubakĩ bakeyariamabiakẽ hau hanu hawẽ bababu hanu hiweshanũbũ hatu inãti hatuki tanamanikiaki, Abraão mawakẽ hawẽ bababu patã ibu wakĩ hau bishanũbũ yubakinã. 6-7Hanushũ ana yubakĩ: “Mai kesua betsa anu mĩ bababu hatube hiwei buimabu harishũ nawabũ habũ escravo dayaru hatu washũ 400 ano hatu dayamakĩ hatu itxakawakubainaibu atimas ẽ hatu kupiaya mĩ bababu haria kaĩbirani beshũ na mai ẽ mia yubai anu hiweshũ ea duawakubaĩshãkanikiki”, ayamashũ hanushũ Abraão hawẽ yubaka xinãmati wakĩ Deusũ yunukĩ: “Dasibi minabũ huni bake tibi kaĩyã hawẽ hina kubitxi meshtekĩ bikubaĩshãwẽ”, aka 8habe hãtxakĩ nĩkayamashũ hawẽ huni bake Isaque kaĩyã oito dia shabatiã hawẽ hina kubitxi binikiaki, haska yubani taewakinã. Hanua hawẽ bake Isaque bakeyatãri hawẽ bake Jacó birianikiaki. Hanua Jacó, hawẽ kena betsa Israel, hawẽ 12 huni bakebu kaĩaĩ habiaskari wakĩ hatu biriakubainikiaki. Ha 12 huni bakebu habu tibi anua nũ habia hawẽ bababuki.
9Hanua ha nukũ shenipabu Israelĩ huni bake betsa José hawẽ betsabũ danaĩ haki sinatakĩ hau tsuma wabaĩ Egito mai pakea anu iyutanũbũ hawẽ taeshũ pei bikĩ nawa betsabu inãbu iyuyamabu harishũ Deusũ duawakĩ José merabewaya 10habu anushũ bika tenebiaya Deusũ nemakĩ unãnepa wakĩ Egito shanẽ ibuhaira Faraó abumaya hawẽ shanẽ ibu betsa wakĩ José shanẽ ibu wakĩ hawẽ mai hirabi inũ hawẽ hiwe hawẽrua ewapa mekei hau dasibi shanẽ ibushunũ yununiki.
11Hanua Egito anua José shanẽ ibuaya Egito mai pakea anu inũ Canaã mai pakea anu dasibi ana yunu beneamakẽ Israelĩ bakebu nukũ shenipabu nuitapai hawa pitibumakẽ 12hanua Egito anu shekiwã haya txaniaibu Jacõ nĩkatã hau hawẽ bakebũ nukũ shenipabũ hari bushũ hau piti bikĩ taewatanũbũ hatu yunua butanibukiaki. 13Ana ha katxu betsatiã bunitxakayamakĩ ana piti bitanũ ika buabũ hanushũ Josẽ hatu unãmakĩ hãtxa wakĩ yuikĩ: “Ẽ matũ betsa Joséki”, akĩ hatu unãmaya Egito shanẽ ibu Faraónẽ nĩkatã: “José hawa nawamẽ?” itã xinãxĩkẽ 14txipu betsatiã José shanẽ ibuwẽ taeshũ hau hawẽ epa inũ dasibi hawenabu hau ishũtanũbũ hatu yunua hawenabu 75 ishũtãkĩ Egito anu iwenibukiaki. 15-16Haskawẽ taea Jacó, hawẽ kena betsa Israel, Egito anu kaima hiwea hanua mawa hanu maiwati tãpe Hamorĩ bakebũ hawẽ hutxi Abraão peiwẽ inãnibu Siquém anu hawẽ yura bushũ maiwatãnibukiaki. Israelĩ bakebu inũ hawẽ baba itxapaburi Egito anuari mawakubainibukiaki— iwanã,
17Estêvãonẽ judeu shanẽ ibubu hatu yuikubaĩkĩ ana yuikĩ:
—Abraãonẽ bababu, Israelburã, Canaã anu ana hatu txĩtũmakatsi Deusũ yubani ha baritiã ma hatu tashnimabaĩkatsi iki kemaya Israelbu Egito anu hiwea pai itxai mirimakubainaibũ 18hanua Egitonawa shanẽ ibu bena Faraõ ikimashũ haska wakĩ Josẽ Faraónẽ enabu hatu merabewakubaini unãma 19ha shanẽ ibu Faraó benatũ nukũ shenipabu parãkĩ hatu itxakawakĩ hatũ huni bake dama kaĩaĩbu hau tenãnũbũ hatu yunukĩ hatu putamakubainaya 20ha hatu haska waibutiã Moisés kaĩyã hawẽruahaira pixtakẽ abuhairakĩ hawẽ ibubũ hiwe anushũ hune ewa wakĩ ushe dabe inũ besti huneshũ yumewai 21ana haska washũ hunetima datekĩ hau mawanũ hene kesha basi anu txitxãki hene hikitima wakĩ buiwẽ pepushtã nanetã nũtãtã shunũbirana Egito shanẽ ibũ aĩbu bakẽ betxishũ neshewanimashũ hawẽ bake keska wakĩ yumewakĩ 22haska wabainimashũ Egitonawa unãnepatũ Moisés yusĩkĩ unãnepawakĩ tapĩmakubainabu hãtxapai huni kuxipakĩ haska yunuabu hatu ashũkubainikiaki.
23Ma hanu Moisés 40 bariyatũ hawenabu Israelbu xinãkĩ uĩbaunũ ika baii kashũ 24hanushũ Egitonawã Israelbu betsa itxakawakĩ kuxai uĩkĩ hawenabu merabewanũ ika kashũ nemakĩ hatũ itxakawai tenãshunikiaki. 25Hanushũ Moisés xinãkĩ: “Ẽ kuxipaiwẽ Deusũ ea merabewaya enabu Israelbu hatu merabewakĩ Egito anua hatu pashawatã unãnuma ẽ hatu hiwemashanaii”, ibiaya hakiri haska hawenabũ xinãma inibukiaki. 26Hanua mexukiri betsatiã Moisés ana kashũ hawenabu Israelbu dabe ana detenameaibuki nukutã daewakĩ hatu nemanũ ikaĩ hatu yuikĩ: “Matu dabe mã huni betsamaki. Haskai mã detenamei ikanai?” hatu wa 27ha hatũ hawenabu deteaitũ Moisés tu akĩ shututã yuikĩ: “Mĩ nuku uĩnũ tsuã mia shanẽ ibu wakĩ nukũ pewanika mia waxinamẽ, nuku anurã? 28Egitonawa detexĩshũ mĩ eari habiaskari wanũ ika ikai, tenãkinã?” aka 29haska wa nĩkatã datei txai kai Moisés pashai mae betsa Midiãnawabu anu hari kani haria nawa keskai hiweshũ aĩbu bitã huni bake dabe wanikiaki.
30Hari Midiãnawabu anu 40 ano Moisés ma hatube hiwea binukainaya Mati Sinai hanu tsua hiweabumanu Moisés kashũ uĩayã hi mashu kui menui keskai here hi hi ikai anu Deusũ nai tsuma nia 31uĩ e itã namai keskakĩ shabakabi ana uĩ pewanũ ika kemai ha dapi kaya Deusũ yuikĩ: 32“Earã, ẽ matũ shenipabũ mekenika Deuski, Abraão inũ, Isaque inũ, Jacõ mekenika Deusrã”, akai nĩkai Moisés datei saki saki ikĩ hari uĩkatsi ikamakẽ 33hanushũ Yavé Deusũ ana yuikĩ: “Na mĩ nia anu ẽ niriaki. Haskawẽ taea na shaba turu meribi meseki. Mĩ bitxi tae pekayuwe”, aka hutsekeshunaya 34ana yuikĩ: “Enabu Egito anushũ bika tenetxakayamai saĩ iki kashai hawawẽ haskatima ikaibu txanima shabakabi ẽ uĩmis hatu merabewanũ ika ẽ butushuki. Uĩwẽ. Haskawẽ taeshũ Egito anu hari ẽ mia yunukatsis ikaii”, akĩ Deusũ Moisés yuinikiaki.
35Uatiã ha habias Moisés danãkĩ hawenabũ yuikĩ: “Mĩ nuku uĩnũ tsuã mia shanẽ ibu wakĩ nukũ pewanika mia waxinamẽ, nuku anurã?” abianibu habias Moisés shanẽ ibu wakĩ hatũ merabenã wakĩ hawenabu merabewamakatsi ha nai tsuma hi mashu kui menui keska here hi hi ikai anua hãtxamakĩ Deusũ Moisés yununikiaki. 36Deusũ Moisés haska waimakẽ Moisés nukũ shenipabu Egito anua hatu kaĩmabaĩkatsi ikĩ Egitonawabu anushũ hatu dami betsa betsapa washũtã hanua hatu iyukĩ ha Iãnẽwã Taxipa hau pukebainũbũ damiwakĩ hene bai wakĩ hatu pashkashũtã hanu tsua hiweabuma anu nukũ shenipabu Egito anua hatu iyuimashũ 40 ano dami betsa betsapa hatu unãti wamakeatanikiaki, Moisés hatu tashnimabainishunã. 37Hanushũ habias Moisés Israelbu hatu yuikĩ: “Hawẽ hãtxa ẽ matu yusĩnũ Deusũ ea katuni keska wakĩ habia matunabu anuari Deus yuishunika betsa kuxipa ea keska matu anu yunushanikiki”, anikiaki. 38Haska inũ, hanu tsua hiweabuma anu ha habias Moisés nukũ shenipabu hatu itxawabainimashũ hanua ka Mati Sinai anua Deusũ nai tsumabe hãtxakĩ haska hiwea kayabi nũ bishanai Deusũ hãtxa nĩkatani nukũ shenipabukiri txanikirãkiranikiaki, Moisésrã.
39Haska hatu yusĩkĩ unãmabiakubaina nukũ shenipabũ txibãkatsi ikama Egito anu ana txĩtũkatsis ikĩ Moisés danãkĩ 40hawẽ betsa Arão yuikĩ: “Egito anua nuku iwebiaima Moisés Mati Sinai anu kaima ana huamaki. Haskaima nũ unãmaki. Haskakenã, yushĩ betsa dami wakĩ ha kẽwãti nuku ashũwẽ, hau hatũ nuku yunukĩ iyukubaĩshanunã”, akabu 41hanushũ mane damiwakĩ ina awa bake itsa hatu washũxina kẽwãkĩ txashuwã bake deteshũ kua keyui hatũmebi hatũ mekenẽ axiãwẽ taea haki besikĩ duawai benimahairanibukiaki. 42Haskaibuwẽ taea Deus Israelbuki sinatakĩ nai anua bixi besti hau kẽwãnũbũ ha hatuwẽ nuiai beshtenibukiaki. Haskakubiranibukiri hawẽ hãtxa yuishunika Amós Deusũ hãtxamakĩ yuima:
‘Israelbuũ,
hanu tsua hiweabuma anu 40 ano hiweshũ
ina awa inũ txashuwã bake deteshũ kua keyubiakĩ earã,
ea kẽwãkĩ mã hawa ea inãkĩ ea kẽwãma ikubiranibuki.
43Eũbia haskatimabiakẽ
yushĩ betsa hawẽ kena Moloque mã damiwaima kẽwãkĩ
hawẽ kẽwãti tari hiwe putakatsi ikama
iashũ bekubirãkĩ yushĩ betsa hawẽ kena Renfã kẽwãkĩ
hawẽ bixi kẽwãti ibubis damiwaimashũri
hari mã kẽwãkubainibuki.
Haska wakĩ mã txakabuwakubainibuwẽ taeshũ matu kupinũ, iwanã,
matũ mai anua txaihaira matu nitxĩkĩ
nawabũ mai pakea betsa Babilônia anu ẽ matu yunushanaii’,
aka keneshuniki.
44Hakia hanu tsua hiweabuma anu nukũ shenipabu buaketãkinã, Deusũ hawẽ hatu yubakĩ xinãmati tari inũ bitxi hiwe hatu amaima hayanibuki, haska Moisés Deusũ uĩmakĩ yunuima keska hatu amaimarã. 45Hanushũ nukũ shenipabũ ha tari inũ bitxi hiwe mekekubainaibũ Josué hatũ shanẽ ibutã nawa betsa betsapabu hatube detenamemaya Deusũ hatu merabewakĩ hatũ mae tibi mebĩkĩ hatu nitxĩmatã hatu ibu wamaya ha tari inũ bitxi hiwe Deusũ hatu amani pekashũ iatã bekubiranibukiaki. Haskaibutiã ha hiwe bebũshũ Deus kẽwãkubainibukiaki. Habias hiwe hayayukẽ Davi hatũ shanẽ ibu iriakũkainikiaki. 46Hanua Davi shanẽ ibukĩ Deus benimawakubainaiwẽ taeshũ ana duawanũ, iwanã, Jacó hawẽ kena betsa Israel hawenabũ Deuski nukuti kayabi mixki hiwe hawẽrua washũshanũ, iwanã, Davĩ yukabia Deusũ nemayunikiaki. 47Hakia Davĩ bake Salomão shanẽ iburiatã hatũ Templo mixki hiwe Deus hatu amashunikiaki, 48hanu hunibũ hiwe wabu anu ha Deus dasibi binu keyua hiwetirumabiakenã. Habiaskari Yavé Deusũ hawẽ hãtxa yuishunika hãtxamakĩ:
49-50‘Nai anurã, ẽ shanẽ ibui hanu tsauwa
inũ ẽ tae hanu maiki ẽ tapakea maiki paiaki.
Eãnã, dasibi ẽ damiwaniwẽ taeshũ ea huĩrukũmanũ, iwanã,
haska washũ tsuã ea hawa hiwe washũtirubumẽ?
Tsuã ea hawa hiwe washũtirumaki’,
aka keneshuniki— iwanã,
51Estêvãonẽ Sinédrio ana hatu yuikubaĩkĩ:
—Dasibi kuxipa Deus haya mesebiakẽ matũ shenipabu ipaunibu keskai matuburã, matũ besu inũ, matũ huĩti inũ, matũ pabĩki kuxikẽ Deusũ Yushĩ Pepatũ matu yusĩbiakubainaya mã nĩkaisbumaki, nawabũ Deus unãbuma keskarã. 52Haska inũ, Deusũ Katua pepa hushanai Deusũ hãtxa yuishunikabũ bebũkiri hakiri txanibiakubainaibũ hawa nĩkakatsi ikama matũ shenipabũ hatu dasibi danãkĩ hatu itxakawakĩ detekubainibuki, hatu tenãkinã. Hanua natiã Deusũ Katua huni hawa kaneisma hakiri matu yuĩnibu ma nuku anu huni xinãma nawabu atximatã mã ha huni pepa Jesus hatu tenãmariaimaki. 53Deusũ hãtxa hawẽ nai tsumabũ nukũ shenipabu yusĩni haya tapĩbiakĩ mã txibaĩsbumaki— hatu wa
Estêvão tenãnibukiaki, na hãtxarã
54haska xarabu hatukiri shanẽ ibubu txiteai nĩkatã Estêvãoki sinatatxakayamai bene bene iki sheta yẽsh yẽsh akaibũ 55hakia Deusũ Yushĩ Pepatũ Estêvão merabewakĩ kuxipa waya naiuri teskãshũ uĩkĩ Deus txasha kuxipahaira anu hawẽ yusiuri Jesus nia uĩtã 56dateama hatu ana yuikĩ:
—Uĩkãwẽ. Teskãtã nai bepemana anua Deusũ yusiuri nukũ Hutxi Kayabi Iuwa Jesus nia ẽ uĩaiĩ— hatu waya
57habũ hawẽ hãtxa ana nĩkakatsi ikama pabepukui keyubaĩ hakiri kuxi biski ibaĩ atxitã 58-59mae anua tashnimakĩ sharabaĩ habu Estêvãoki txani txakaibũ ha dukũtũ tsakanũ itã hatũ tari txaipa pekatã huni betsa hawẽ kena Saulo mekematã itxapabubetã mãkãwẽ tsaka tsaka akaibũ Estêvãonẽ Jesus yuikĩ:
—Shanẽ ibu Jesusuũ, menã ẽ yushĩ ea hari biriwe!— atã
60hanua dãti ika dakashũ bis ikĩ hui kuxipawẽ ana yuikĩ:
—Shanẽ Ibuũ, na ea txakabuwaibuwẽ taeshũ hatu kupiyamashãwẽ— atã di iki mawanikiaki.
Currently Selected:
Atos 7: cbsBR
Highlight
Share
Copy
Want to have your highlights saved across all your devices? Sign up or sign in
NT © 1980-2006, Wycliffe Bible Translators, Inc.
OT portions © 2006, Wycliffe Bible Translators, Inc.
