Atos 4

Judeu shanẽ ibubũ Pedro inũ João yukanibukiaki, na hãtxarã

1Pedro inũ Joãonẽ yura itxapabu hatu yusĩkĩ meneriabumakẽ Deusbe hawenabu hãtxashunikabu inũ, Templo mekemisbu shanẽ ibu inũ, saduceubu beshũ 2Pedro inũ Joãonẽ yurabu yusĩkĩ Jesus mawa ana bestẽkainima hatu unãmai nĩkatã hatuki sinatabaĩ 3hatu atxishũ ma bari kaya bitxiti hiwe anu hatu bitxitã: “Mexukiri besti hatu yukatiki”, ibainaibũ 4ha haskaibutiã itxapabũ habũ Pedrõ hãtxa nĩkakĩ kaka pewẽ taeshũ Jesus ikũwãkĩ taewaibu hatu tanakĩ aĩbu tanama hunibu besti 5.000 tananibukiaki.

5Hanua ushaxini Jerusalém anu judeu shanẽ ibubu inũ, mae shanẽ ibubu inũ, Deusũ hãtxa kenenibu yusĩnanãmisbu Jerusalém anu itxabũ 6habianuri judeu shanẽ ibuhaira binua Anás inũ, Caifás inũ, João inũ, Alexandre inũ, Deusbe hawenabu hãtxashunika shanẽ ibubũ enabu dasibi hatibu itxashũ 7Pedro inũ João hau iwenũbũ hatu yunua iweabu hatu namakis nitxĩtã yukakĩ:

—Tsuã kuxipawẽ inũ tsuã kenawẽ na huni mã shushawaxinamẽ?— hatu wabu

8Deusũ Yushĩ Pepatũ Pedro kuxipa wa hatu kemakĩ:

—Ẽ shanẽ ibubuũ, 9huni nuitapai isĩ teneai pewakĩ nũ shushawaxinakiri tapĩkatsi ikĩ mã nuku yukai ikaii. 10Haskakenã, matu inũ dasibi Israelbũ mã nĩkaya matu xinãmanũ nĩkakãwẽ. Habias Jesus Cristo Nazaré anua haki sinatakĩ hiki mã hatu mastama mawa Deusũ ana bestẽwaĩma ikũwãkĩ hawẽ kuxipa bestiwẽ na huni dasibibũ mã uĩaĩ nũ shushawaxinaki. 11Jesus Deusũ haska keska waimakiri matu shabakabi wanũ ea nĩkakãwẽ. Mã hiwe wanikabũ mixki danãbiaibũ habias mixki keska Deusũ bishũ deshũ makeresh wakĩ kene hawẽ mestẽwãkĩ akawaimaki, ha habias Jesusrã. 12Ha inũ, hawa tsua betsawẽ nũ meketi hayamakiaki. Mai hirabi anushũ hawa huni betsawẽ Deusũ hawẽ nuku mekekĩ pashawati hayamarikiaki— hatu wa

13hanua Pedro inũ João hawa dateama kuxipai shanẽ ibubũ uĩabũ berubi Jesuskiri shabakabi hatu yusĩaĩbu shanẽ ibubũ nĩkatã ha hunibu unãnepabuma inũ escola anushũ hawa tapĩsbumabia pewẽ hatu hãtxa waibuwẽ taea unaĩ e itã hakia Jesus hatube nishũ hatu yusĩkubainima xinãtã 14ha huni shushawaxinabu hatube niawẽ taea haska washũ hatu haska watima nashukukĩ 15hanushũ hanu itxabu anua hatũ mekenikabu hatu nitxĩmatã habu besti yubakai yuinameakeakekĩ 16yuikĩ:

—Na Jerusalém anu hiweabũ dami atimaska wakĩ shushawaxinabu dasibibũ unãkanikiki. Nũ hatu haska wai, na huni daberã? “Habũ akamaki”, ikĩ nũ hatu parãmatirumaki. 17Hakia na haska Jesuskiri txanikubainaiburã, dasibibu hau ana hatu nĩkamakĩ ikũwãmayamanũbũ hatu beshtekĩ nesewanãkãwẽ, hau unuri ana Jesuskiri tsua yusĩtaskayamashanũbunã— itã

18hanushũ ana hatu kenashũ hatu yunukĩ:

—Jesuskiri ana hãtxakĩ hawẽ kenawẽ hatu yusĩyamashãkãwẽ— hatu wabu 19Pedro inũ Joãonẽ hatu nĩkasama hatu kemakĩ:

—Dasibi nũ amis Deusũ unaĩwẽ taea haratu txibaĩ pemẽ? Matũ hãtxa nĩkaimẽkaĩ? Deusũ hãtxa nĩkairaka? Haskakẽ matũmebi unãti wakãwẽ. 20Eskawẽ taea nũ ikai matu yuinũ nĩkakãwẽ. Hawara uĩkĩ nũ nĩkakubiranima hakimama hatu yusĩkĩ nũ henetirumaki— hatu wabu 21haska shushawaxinabuwẽ taeshũ yurã kaiãnẽ Deus kẽwaĩbu shanẽ ibubũ uĩkĩ habuwẽ datekĩ hawa txakabuwama ixiãbu haska washũ hatu kupitima hãtxa kuxipa bestiwẽ ana hatu nematã nitxĩnibukiaki. 22Ha huni txãtu kaĩni ma 40 bari binubiakẽ kaya wakĩ damiwakĩ akawanibukiaki.

Jesus ikũwaĩbu hatu mesewaibu datetima kuxipa yukanibukiaki, na hãtxarã

23Hanua Pedro inũ João hatu hawa wama hatu kaĩmabu kaĩbaĩ hatũ haibuaibuki nukutuxitã hatube itxatã dasibi Deusbe hawenabu hãtxashunika shanẽ ibubu inũ mae shanẽ ibubũ hatu haska wakãshu hatuki txaniaibu 24haska hatu wakãshukiri nĩkatã dasibibũ Deus kẽwãkĩ yukakĩ:

—Nukũ Epa Deusuũ, nai inũ, mai inũ iãnẽwã, inũ dasibi hanu hiweabu mĩ damiwani nũ unaiĩ. 25Haska inũ, mĩ Yushĩ Pepawẽ mĩ tsuma nukũ shenipabu shanẽ ibuhaira Davi yuimakĩ:

‘Haskai hamẽmẽs hawa xinãma ha yurabu yubaka besumai

haskai hamẽ ha iki hãtxãwãkanimẽkaĩ, hawa xinãmarã?

26Mai kesua anua inũ mae tibi anua shanẽ ibubu kuxipabu itxa yubakai

Shanẽ Ibu Deus inũ hawẽ Katua Messias danaĩ haki sinatashãkanikiki’,

iki hãtxanirã,

27—Txanima na habiatiã shanẽ ibu Herodes Antipas inũ Pôncio Pilatos na mae anu nawa betsabube inũ Israelbube itxa mĩ tsuma Jesus meribi mĩ katuni Messias mĩ yununi mĩ kẽwãmis haki sinatakanikiki. 28Haska dasibi bebũkiri mĩ hakiri yubakani hau haska wai bunũbũ mĩ yuinirã, txanima haska keskarã, habunã, ma akimabuki. 29Nukũ Shanẽ Ibuũ, natianã, habũ nuku mese mesewaibu mĩ uĩaiĩ. Haskawẽ taeshũ nũ mĩ tsumabu hawa datea mĩ bakẽ kakape nũ shabakabi txanikũkaunũ nuku yunuwe. 30Mĩ kuxipa paewẽ isĩ teneaibu shushawakĩ dami atimaska tsuã atiruma mĩ tsuma meribi Jesus mĩ waniwẽ hawẽ kuxipawẽ nuku amakĩ nuku hatu uĩmakubaĩwẽ— akĩ

31Deusbe hãtxai meneaibũ habiatiãri hanu itxabu anu patxa sakuaya Deusũ Yushĩ Pepatũ hatu dasibi atxikĩ kuxipa wakĩ keyua hanushũ ana dateama Deusũ kakape hawenabu hatu shabakabi yuikubainibukiaki.

Ikũwaĩbũ hatũ mabu pashkatã hawẽ hiwenibukiaki, na hãtxarã

32Habũ Jesus ikũwaĩbu mirimabũ hatũ xinã habiaskas xinãwẽ xinaĩ habũ mabu tibi yui: “Ena bestiki”, ikama hakia dasibibũ mekubainibukiaki. 33Hanushũ Jesusũ kuxipayabũ haska Shanẽ Ibu Jesus bestẽkainima hawẽ kuxipa unãkĩ hatuki txanikubainaibu ikũwaĩbu dasibi Deusũ hatu duahairawakubainaya 34habu baiyabu inũ hiweyabũ habu hawa nuitapabumã huni betsa inãtã hawẽ taeshũ pei bitã ha pei 35hau hatu inanũbũ Jesusũ kuxipayabu hatu inãkubainaibu ha betsabu hawa hayama hau hawẽ binũbũ bestibu tibi hatu pashkashũkubainibukiaki. 36Haskanibu betsakiri mia yuinũ nĩkawe. Hanua Levĩ baba betsa natukã Chipre anua kaĩni hawẽ kena Josẽ hatubetã ikũwãyã Jesusũ kuxipayabũ kena betsa wakĩ Barnabé wanibukiaki, nukũ hãtxawẽ kenarã: “Xinã txãkãwanika bakeki”, akinã. 37Ha hunĩ hawẽ bai haya huni betsa inãtã hawẽ taeshũ pei bitã beshũ Jesusũ kuxipayabu hatu inãnikiaki, hawẽ hau ikũwaĩbu betsabu hatu merabewanũbunã.

Currently Selected:

Atos 4: cbsBR

Highlight

Copy