Zhan 21

Zhezü bɩ́ n'edomɛ̀n yé n'ɛsɛnkɛn-bɔ̀ ɔbɔɛ̀n

1Ɛnvra cá vácì, Zhezü vru bɩ́ n'edomɛ̀n yé n'ɛsɛnkɛn-bɔ̀ Tiberiadɛ̀n nɛnbà cɛ gbàtà mùan. Nyàn ɔmu le nɛ̀n bɩ́ n'edomɛ̀n nɛ̀n yé yɔ nɔn: 2Simɔn Piɛrɛ̀n, Toma (léyi ye bi ɛshre ẅì nɔn), Natanaɛlɛ̀n (léyi dú Kana, Galile Kpɔsɔ wú wrɔn nɔn), Zebede ẅì hɔ̀n, mán Zhezü sɛnkɛn-bɔ̀ anyhrɛ̀, yɔ lɔ fɛn ye dú ɛyri zri. 3Simɔn Piɛrɛ̀n kɛ dɔ́ yɔ le: “Mɛ hɔ̀n mɛ̀n hán ɛnshiemɛ̀n kɔ̀hɔ̀n.” Yɔ dɔ́ nɛ̀n le: “Bɔ mán, bɔ lɛ cɔ́ mɛ́n mɛhi bɔ̀ hɔ̀n.” Yɔ hɔ̀n kɩ yɔ ku anhàka mɛ̀n. Tɛ́n ye sɩ̀ ẅɛ̀n eci zriɛmɛ́n ɛnnyran ndɔ lɔ mɛ̀n. 4Ɛnvra léyi ɛcɛ̀n bukru ke cúe nɔn, Zhezü srɔ ɛnshi gbàtà mùan, tɛ́n n'ɛsɛnkɛn-bɔ̀ lɔ kè sɩ̀ nyrì ɔmu le nɛ́n. 5Zɛtɛn Zhezü kɛ dɔ́ yɔ le: “Kɛ̂ nyɛ́n ẅɛn ɛcàn jan m'ɛẅì hɔ̀n?” Yɔ mrɛ́n nɛ̀n ɔmùan le: “Hɔ̂!” 6Nɛ dɔ́ yɔ le: “Nyɛ́n ze ɛdàn lɔ anhàka zì-kɔrɛ̀ hɔnan, kɩ nyɛ lɛ ẅɛn ɛcàn.” Yɔ ze ɛdàn kɩ yɔ sɩ́ sán ɛdàn lɔ rɔa, ɔmuhi ɛcàn dú nɛ̀n ɛmɛ̀n cüɛn nɔn. 7Ɛsɛnkɛn-wrɔn léyi Zhezü kɛ cüɛ̀n nɔn kɛ dɔ́ Piɛrɛ̀n le: “Ɛẅɛnwrɔn de dɔ́ ankà nɔn!” Ɛnvra léyi Simɔn Piɛrɛ̀n yá ankà ndɔ lɔ nɔn: “Ɛẅɛnwrɔn de dɔ́ ankà nɔn”, nɛ̀n bɩ́ n'ɛwú ceci nɛ́n cɔ̀, ɔmuhi nɛ̀n nyɔn ɛsɛ̀n-kɔra, kɩ nɛ̀n bru ɛnshi. 8Ɛsɛ̀nkɛn-bɔ̀ ndɔ hɔ̀n lɔ bɩ́ anhàka nvà kɩ kɛ wán ɛdàn léyi ɛcàn yɩ ɛmɛ̀n nɔn: ye sɩ̀ dù esù she ɛnshi gbàtà mùan, anhɛ́ kɔrɛ̀ ɛkoẅi-ɛnrì kɩ. 9Ɛnvra léyi yɔ dú anhɛmɛ̀n yɔ kakɛ nɔn, yɔ kán nanvrɛn lɔ ɛnhyà kɩ ɛcàn mán abutùkumɛ́n dú ɛwú. 10Zhezü kɛ dɔ́ yɔ le: “Ɛcàn hɔ̀n léyi nyɛ́n ẅɛn nɔn, nyɛ̀n bɩ́ jan nyɛ́n và.” 11Simɔn Piɛrɛ̀n bru anhàka mɛ̀n kɩ wán ɛdàn léyi ɛcàn ɛvrivri dú ɛmɛ̀n nɔn cüe ɛnhiɛ: ɛcàn ɛkoẅi-ɔbɔ̀ɛn mán ɛẅì ɛvà-anhɔ̀n de dú ɛdàn lɔ mɛ̀n nɔn. Ɛcàn cüɛn, ɔmu tɛ̀kɩ ɛdàn lɔ kè sɩ̀ shà. 12Zhezü kɛ dɔ́ yɔ le: “Nyɛ́n và nyɛ́n zi ɛci.” Ɛsɛ̀nkɛn-wrɔn zriɛmɛ́n ke sɩ́ ẅɛn ɔmùan ká yrɛ nɛ̀n le: “Antɔnwrɔn dú mɛ́n hán?” Ɔmuhi yɔ nyri ɔmu le Ɛẅɛnwrɔn nɔn. 13Zhezü sɔ́nbá ɛtɛ̀sɛ̀n, bɩ́ abùtùkumɛ́n kɩ dɛ́ yɔ; nɛ̀n tán yɔ ɛcàn mán. 14Kɛ hán andɛ̀n anhɔnmɛ̀n de Zhezü bɩ́ n'edomɛ̀n yé n'ɛsɛnkɛn-bɔ̀ nɔn, bukru ɛnvra léyi nɛ̀n dú owúemɛ̀n nɛ̀n frɔ́ nɔn.

Zhezü mán Piɛrɛ̀n

15Ɛnvra léyi yɔ zî ɛci trɔ nɔn, Zhezü ke yrɛ Simɔn Piɛrɛ̀n le: “Simɔn, Zhan ẅì, ɛ cüɛn mɛ̀n kɛ vrán ɛnyran hɔ̀n ndɔ lɔa?” Piɛrɛ̀n mrɛ́n nɛ̀n ɔmùan le: “Hɛ̀ɛ̀ Ɛẅɛnwrɔn, è nyri ɔmu le mɛ cüɛn mɛ́n.” Zhezü kɛ dɔ́ nɛ̀n le: “Ɛ̀ wá mɛ́n kɔ̀kɔ̀sɛ̀-ẅì hɔ̀n lɔ esùva.” 16Zɛtɛn Zhezü ke yrɛ nɛ̀n andɛ̀n anhyrɛmɛ̀n le: “Simɔn, Zhan ẅì, ɛ cüɛn mɛ̀n hàn?” Piɛrɛn mrɛ́n nɛ̀n ɔmùan le: “Hɛ̀ɛ̀ Ɛẅɛnwrɔn, è nyri ɔmu le mɛ cüɛn mɛ́n.” Zhezü kɛ dɔ́ nɛ̀n le: “Ɛ̀ wá mɛ́n kɔ̀kɔ̀sɛ̀ hɔ̀n lɔ esùva.” 17Zɛtɛn nɛ dɔ́ yi andɛ̀n anhɔnmɛ̀n le: “Simɔn, Zhan ẅì, ɛ cüɛn mɛ̀n hàn?” Kɛ hán Piɛrɛ̀n ejüedì, ɔmuhi Zhezü ke yrɛ nɛ̀n andɛ̀n anhɔnmɛ̀n le: “Ɛ cüɛn mɛ̀n hàn?” Kɩ nɛ̀n mrɛ́n yi ɔmùan le: “Ɛẅɛnwrɔn, è nyri eci lɔ fɛn; è nyri ɔmu le mɛ cüɛn mɛ́n.” Zhezü kɛ dɔ́ nɛ̀n le: “Ɛ wá mɛ́n kɔ̀kɔ̀sɛ̀ hɔ̀n lɔ esùva. 18Annanwɔrɛ mɛ̀n mɛ dɔ́ mɛ́n le: Ɛnvra léyi è dú sugbàn-wrɔn nɔn, vɛ́n dùku ɛ nyɔn pɛtɛ̀n ɛẅìe kɩ ɛ hɔ́n ɛyri léyi e ji nɔn; tɛ́n ɛnvra léyi ɛ lɛ srɔ ecüìcüì nɔn, ɛ lɛ trɛ́n ɛkɔrɛ̀ kɩ ɔwrɔn nyantɛn kɛ lɛ nyɔn mɛ́n vɛ́n pɛtɛ̀n lɔ ɛẅìe kɩ ne le bɩ́ mɛ́n nɛ lɛ hɔ́n ɛyri léyi e sɩ́ ji ɛ̀ hɔ̀n nɔn.” 19(Ankà ndɔ lɔ wú lɔ, Zhezü ke yé ɔmu le Piɛrɛ̀n kɛ lɛ hán kè wù, ô kɛ̀ zrɔ Ɔwɔ eci nɔn.) Zɛtɛn Zhezü kɛ dɔ́ nɛ̀n le: “Kɛ́n mɛ̀n ɛsɛ̀n!”

Zhezü mán n'ɛsɛnkɛn-wrɔn léyi nɛ cüɛ̀n nɔn

20Piɛrɛ̀n crɛ ɛmɛẅi kɩ kán ɛsɛnkɛn-wrɔn léyi Zhezü kɛ cüɛ̀n nɔn (nɛ́n léyi nɛ̀n bɩ́ ɛnkru nɛ̀n bá Zhezü ɛtɛsɛ̀n ɛci-zîemɛ̀n kɩ ne yrɛ yi le: “Ɛẅɛnwrɔn, antɔn dú ɔwrɔn léyi kɛ lɛ hɛ́ mɛ́n nɛ́n?”) 21Piɛrɛ̀n kán ɔwrɔn lɔ kɩ kɛ dɔ́ Zhezü le: “Ɔwrɔn ndɔ lɔ, Ɛẅɛnwrɔn ecitan de kɛ lɛ wɔ́ɛn nɛ̀n nɛ́n?” 22Zhezü mrɛ́n nɛ̀n ɔmùan le: “Ke dú kɛ me ji le nɛ̀n dù hàn kɩ mɛ̀n vru mɛ̀n và hô, kɛ crɛ nyan mɛ́n hán? Vɛ tɛn ɛ̀ kɛ́n mɛ̀n ɛsɛ̀n!” 23Ankà ndɔ lɔ, zɛtɛn bonyi anwrɔn nɛ́n muan-ẅì hɔ̀n granmɛ̀n le, ɛsɛ̀nkɛn-wrɔn léyi Zhezü kɛ cüɛ̀n nɔn ke sɩ̀ wù. Annanwɔrɛ mɛ̀n lɔ, Zhezü kè sɩ̀ dɔ̀ Piɛrɛ̀n le: “Nɛ́n sɩ̀ wù”, tɛ́n nɛ̀n dɔ̀ le: “Ke dú kɛ me ji le nɛ̀n kɔrɛ̀ nɛ̀n dù hàn kɩ mɛ̀n vru mɛ̀n và hô, kɛ crɛ nyan mɛ́n hán?”

24Ɛsɛnkɛn-wrɔn ndɔ lɔ, nɛ́n de nɛ́n dɔ̀ kɩ nɛ̀n merɛ̀n ankà ndɔ hɔ̀n lɔ fɛn, kɩ bɔ̀ nyri ɔmu le ankà léyi nɛ́n dɔ̀ nɔn dú annànwɔrɛ.

Ɛmɛẅi-trɔ ankà-dɔ̀

25Zhezü hán ɛci bobrebe ndɔ hɔ̀n. Ke dú kɛ ye merɛ́n ankà zri zri, me tro le ɛnhibù ke sɩ̀ cɔ́ ɛyri kɛ hɛ́n ɛwrú hɔ̀n lɔ fɛn.

Currently Selected:

Zhan 21: ƐAA03

Highlight

Copy