Ɔkɔ̀hɔ̀n-wá-bɔ̀ kɔ̀hɔ̀n hán 8

1Kɩ Sɔlɛ̀n cüɛn ɔmu le ye wri Etiɛnɛ̀n.

Sɔlɛ̀n ke hán Ɔwɔ fɛcüè ɛgbàn

Ɛnbì zri léyi Etiɛnɛ̀n nwù nɔn, ɛgbànkàn vri bukru tán Zherüzalɛmɛ̀n Wɔ fɛcüè-bɔ̀. Ankaẅì-bùtan-ẅɛn-bɔ̀ lɔ fɛn, bonyi y'edomɛ̀n Zhüde mán Samari kpɔsɔ wú, ɔkɔ̀hɔ̀n-wá-bɔ̀ lɔ kɩ badà yɔ ɛmɛ̀n. 2Ɔwɔ-kɔ̀hɔ̀n-hán-bɔ̀ anvrɛnvrɛn bɩ́ Etiɛnɛ̀n dùwru lɔ wá ɛnhibɩ́ kɩ wú eyú ku Etiɛnɛ̀n wú. 3Sɔlɛ̀n tɛn, kɛ hán kekremɛ̀n, ô kɛ̀ jrɛ́ Ɔwɔ fɛcüè-bɔ̀ lɔ; ne ci ebɩ́bɩ́, nɛ ẅɛn ankaẅì-bùtan-ẅɛn-bɔ̀ lɔ, wúcɔ̀ mán wúyɔ̀ kɩ ne ku yɔ anwɔn-mɛ̀n-wá-wɔn mɛ̀n.

Filipɛ̀n kɛ dɔ́ ɛmɛẅì ankà ankrankran lɔ Samari kpɔsɔ wú

4Anwrɔn hɔ̀n léyi yɔ bonyì nɔn, ke ci Samari kpɔsɔ wú kɛ dɔ́ Ɛmɛẅi ankà Ankrànkràn lɔ. 5Filipɛ̀n hɔ́n Samari anmàn cüìcüì lɔ kɩ bukru kɛ dɔ́ nanvrɛn anmàn-bɔ̀ lɔ, Ebɩ̀die-wrɔn lɔ ankà. 6Ɛnvra léyi yɔ yá Filipɛ̀n ankà-dɔ̀ lɔ, hɩ yɛ kán anvɛmɛ̀n-frɛ́n-ci léyi nɛ hán nɔn, anmàn fɛcüè lɔ fɛn dú nɛ̀n nukù die mɛ̀n anvrɛnvrɛn. 7Annanwɔrɛ mɛ̀n lɔ, anhɛ́n gbangbàn ke dú ɛnlɔẅiɛ-bɔ̀ bobrebe edomɛ̀n kɛ srɔ ɛntrɛ, kɛ sɔ́n nkù vri tɔ̀n kɩ ɔkpɔ̀cɔ-bɔ̀ mán ɛsɔ̀ze-bɔ̀ bobrebe kɛ cɔ́ ɔkɔrɛ̀. 8Ɔmu lɔ de pɔpüɛ̀-brà ndù sevri anmàn ndɔ lɔ mɛ̀n nɔn.

9Ɔwrɔn tɔ̀n léyi ye bi Simɔn nɔn gɔ́ dú anmàn ndɔ lɔ mɛ̀n. Nɛ hán seke kɔ̀hɔ̀n kɩ nɛ hán anvɛmɛ̀n-frɛ́n-ci ne yé Samari kpɔsɔ wú anmàn-bɔ̀. Ne bú n'edomɛ̀n nɛ hán ɔwrɔn anvrɛnvrɛn, 10kɩ yɔ lɛ fɛn lɔ, sugban-bɔ̀ mán ɛcüìcüì hɔ̀n kɛ ẅɛn n'ɔbɔ̀sɔ̀ bobrebe. Yɛ dɔ̀ le: “Ɔwrɔn ndɔ lɔ dú Ɔwɔ kɔrɛ̀-srɔn, ɛkɔrɛ̀-srɔn léyi ye bi ɛkɔrɛ̀-srɔn vri nɔn.” 11Yɔ ẅɛn n'ɔbɔ̀sɔ̀ bobrebe, ɔmuhi ɛnvra sheshemɛ̀n de nɛ hán anvɛmɛ̀n-frɛ́n-ci seke mɛ̀n ne yé yɔ nɔn. 12Tɛ́n ɛnvra léyi yɔ bú Filipɛ̀n mɛẅi ankà ankrankran léyi kɛ dɔ́ anhobɩ́ nɛ̀ncüì-dúyri mán Zhézü Krisì domɛ̀n ankà tán ankaẅì nɔn, yɔ hán yɛ wá yɔ ɛnshi ɛnkru, wúcɔ̀ mán wúyɔ̀. 13Simɔn dùku mán bú tán ankaẅì kɩ yɛ wá nɛ̀n ɛnshi ɛnkru; nɛ̀n yɛ́ Filipɛ̀n ɛtɛ̀sɛ̀n kɩ nɛ̀n dú anvɛmɛ̀n-frɛ́n mɛ̀n, anvɛmɛ̀n-frɛ́n-ci ɛvrivri hɔ̀n mán ɛci-woroan-ci hɔ̀n léyi nɛ kàn yɛ hán nɔn.

14Ɔkɔ̀hɔ̀n-wá-bɔ̀ léyi dú Zherüzalɛmɛ̀n anmàn nɔn, ncɔ́ nyrì le Samari kpɔsɔ wú anmàn-bɔ̀ cɔ́ Ɔwɔ mùan-ankà yá; zɛtɛn yɔ hán Piɛrɛ̀n mán Zhan hɔ́n cɔ́ yɔ. 15Ɛnvra léyi Piɛrɛ̀n mán Zhan cɔ́ Samari kpɔsɔ wú nɔn, yɔ sɛ̀n yɔ tán ankaẅì-bùtan-ẅɛn-bɔ̀, ô yɔ cɔ́ Ɛnhɛ́n Prɔnprɔn. 16Annanwɔrɛmɛ̀n lɔ, Ɛnhɛ́n Prɔnprɔn kɛ vá kakɛ y'ɛmɛ̀n lɔ ɔwrɔnẅì zriɛmɛ́n wúɛ; ɛnshi de yɛ wá yɔ ɛnkru Ɛẅɛnwrɔn Zhezü bɩmɛ̀n. 17Zɛtɛn Piɛrɛ̀n mán Zhan di yɔ ankɔrɛ̀ ɛwú kɩ yɔ cɔ́ Ɛnhɛ́n Prɔnprɔn. 18Ɛnvra léyi Simɔn kán ɔmu le Ɛnhɛ́n Prɔnprɔn kɛ va cɔ́ ankaẅì-bùtan-ẅɛn-bɔ̀ lɔ, ɛnvra léyi ɔkɔ̀hɔ̀n-wá-bɔ̀ ke di yɔ ankɔrɛ̀ ɛwú nɔn, nɛ̀n tán Piɛrɛ̀n mán Zhan ɔkùa 19kɩ nɛ dɔ̀ le: “Mɛ̀n mán nyɛ́n tán mɛ̀n ɛkɔrɛ̀srɔn ndɔ lɔ, ô anwrɔn hɔ̀n léyi me le di ɛkɔrɛ̀ ɛwú nɔn, kɛ̀ cɔ́ Ɛnhɛ́n Prɔnprɔn.” 20Tɛ́n Piɛrɛ̀n mrɛ́n nɛ̀n ɔmùan le: “Ke ji le v'ɔkùa mán vɛ́n mùmù mɛhi nyɛ́n jrɛ́, ɔmuhi e tro le Ɔwɔ cice lɔ ɔkùa mɛ̀n de yɛ wɔ́ nɛ̀n nɔn! 21È sɩ̀ ẅɛ̀n eci-dɛ́-ci zriɛmɛ́n hɩ ká kɛ́n ɛkɔrɛ-levri zriɛmɛ́n ankà ndɔ lɔ mɛ̀n, ɔmuhi ɛnbɔrɛ kè sɩ̀ nyrɔn mɛ́n Ɔwɔ zìwú nɔn. 22Ɛ̀ kɔ́n v'ankà-tro gbàngbàn lɔ è ze, ɛ̀ sɛ́n Ɛẅɛnwrɔn, ô ke dú kɛ, ɛkɔrɛ̀levri ke le dù hô, nɛ̀n bɩ́ ankà-tro gbangbàn léyi ɛ ẅɛ̀n nɔn, nɛ̀n ce mɛ́n. 23Mɛ kán ɔmu le, eci-gbangbàn drɔ yɩ́ mɛ́n ɛmɛ̀n, kɩ è dú ɛgbàn wɔ̀nwrɔn.” 24Zɛtɛn Simɔn kɛ dɔ́ Piɛrɛ̀n mán Zhan le: “Nyɛ́n dùku nyɛ́n sɛ́n Ɛẅɛnwrɔn nyɛ́n tán mɛ̀n, ô eci-ẅì zriɛmɛ́n ke bɩ́ hán mɛ̀n ankà léyi nyɛ́n dɔ̀ nɔn hɩ wú.” 25Ɛnvra léyi yɔ di Ɛẅɛnwrɔn ankà-dɔ̀ lɔ nɛ́n dalɛfuɛ trɔ nɔn, ɔkɔ̀hɔ̀n-wá-bɔ̀ anyhrɛ̀ lɔ vru ɛmɛẅi hɔ́n Zherüzalɛmɛ̀n anmàn. Ɛnlevri dù hɔ́n mɛ̀n lɔ, yɔ dɔ́ Ɛmɛẅi ankà Ankrankran lɔ, Samari kpɔsɔ wú anmàn bobrebe.

Filipɛ̀n mán Etiopi govràn kɔ̀hɔ̀n-hán-wrɔn

26Ɛẅɛnwrɔn-kùyüre-wrɔn tɔ̀n dɔ́ Filipɛ̀n le: “È bɩ́ ɛnlevri léyi kɛ hɔ́n ecüemɛ̀n, hɩ ke ci Zherüzalɛmɛ̀n kɛ hɔ́n Gaza anmàn nɔn. Ɛnlevri ndɔ lɔ, anwrɔn ke sɩ́ ci nɛ̀n ɛwú.” 27Ɛnvra zri lɔ Filipɛ̀n hɔ̀n. Kɩ, n'ɛnlevri wú lɔ ɔwrɔn tɔ̀n srɔ: ɔwrɔn ndɔ lɔ nɛ́n dú Etiopi govràn kɔ̀hɔ̀n-hán-wrɔn cüìcüì, kɩ yɛ bɔ́ nɛ̀n ye ze; nɛ́n de yɛ wá nɛ̀n Etiopi nɛ̀ncüì-hi léyi, ye bi Kandasɛ̀n nɔn, nɛ́n nɛ̀ncüì-di-ci lɔ fɛn antamɛ̀n nɔn; nɛ̀n vá Zherüzalɛmɛ̀n anmàn, Ɔwɔ ankɔrɛ̀ ezìwú cue yri 28kɩ nɛ̀n vru ɛmɛẅi nɛ hɔ́n n'anmàn. Nɛ̀n yɛ́ nɛ́n kpàngɔ-hɛ̀ lɔ mɛ̀n kɩ nɛ krɛ́ Ɔwɔ-mùanwú-ankà-dɔ́-wrɔn Ezahi wrú lɔ. 29Ɛnhɛ́n Prɔnprɔn kɛ dɔ́ Filipɛ̀n le: “Sɔ̀nba kpàngɔ-hɛ̀ ndɔ lɔ ɛtɛ̀sɛ̀n.” 30Filipɛ̀n srɛ́ hɔ́n nɛ̀n ɛtɛ̀sɛ̀n kɩ yá Etiopi-wrɔn lɔ ɔmùan kɛ krɛ́ Ɔwɔ-mùanwú-ankà-dɔ́-wrɔn Ezahi wrú lɔ. Ne yrɛ yi le: “Eci léyi ɛ krɛ̀ nɔn ɛ yá n'ɛmɛ̀n hàn?” 31Ɔwrɔn lɔ mrɛ́n ɔmùan le: “Anwɔntan de mɛ lɛ hán mɛ̀n yá n'ɛmɛ̀n, ke dú kɛ ɔwrɔn zriɛmɛ́n kè sɩ̀ yé mɛ̀n nɛ́n?” Kɩ nɛ̀n bi Filipɛ̀n kɛ̀ và bru kpàngɔ-hɛ̀ lɔ mɛ̀n, ô kɛ yɛ́ nɛ̀n ɛtɛ̀sɛ̀n. 32Owrú Prɔnprɔn ankà-dɔ̀ léyi nɛ krɛ̀ nɔ̀n, dú ankà-dɔ̀ ndɔ lɔ:

“Nɛ́n dù nɛ̀n hán kɔ̀kɔ̀sɛ̀ léyi ye sɩ́ owri-yri, (owú-kɔ̀ mɛ̀n)

kɔkɔsɛ̀-ẅì léyi ke sɩ́ jɔ̀kɔa ɛnvra léyi yɛ kùa nɛ̀n ɛtù nɔn.

Nɛ̀n sɩ̀ dɔ̀ ankà zriɛmɛ́n.

33Yɛ trɔ nɛ̀n ezì kɩ nɛ̀n sɩ̀ cɔ́ ɛnyràn ɛmrɛ̀nciemɛ̀n.

Antɔn de kɛ lɛ dɔ́ n'ɛmɛẅi-bɔ̀ ankà nɛ́n?

Ɔmuhi yɛ trɔ n'ɛnu hibù wú wúvà lɔ nɔn.”

34Govràn-kɔ̀hɔ̀n-hán-wrɔn lɔ ke yrɛ Filipɛ̀n le: “Mɛ sɛ́n mɛ́n, ɛ̀ dɔ́ mɛ̀n, antɔn ankà de Ɔwɔ-mùanwú-ankà-dɔ́-wrɔn lɔ kɛ dɔ́ ɔmu lɔ nɛ́n? Nɛ́n dùku n'ankà de nɛ dɔ̀ kale ɔwrɔn nyàntɛn tɔ̀n hàn?” 35Zɛtɛn Filipɛ̀n bɩ́ ankà-dɔ̀ kɩ bukru owrú ankà-dɔ̀ ndɔ lɔ wú kɛ dɔ́ nɛ̀n Zhezü Mɛẅi ankà Ankrankran lɔ. 36Yɔ dú ɛnlevri yɔ hɔ̀n kɩ yɔ cɔ́ ɛyri tɔ̀n léyi ɛnshi ndù nɔn. Zɛtɛn govràn-kɔ̀hɔ̀n-hán-wrɔn lɔ kɛ dɔ̀ le: “Nyàn ɛnshi; ecitan de kɛ lɛ kɛ́n m'ɛnshi-kru-wá lɔ kɛ̀ hɛ́n nɛ́n?” [37Filipɛ̀n kɛ dɔ́ nɛ̀n le: “Ke dú kɛ ankaẅì-bùtan dú v'ɛnbɔrɛ lɔ fɛn mɛ̀n, yɛ lɛ wá mɛ́n ɛnshi ɛnkru tɛ̀.” Kɩ ɔwrɔn lɔ mrɛ́n ɔmùan le: “Me bú tán ankaẅì le Zhezü-Krisì dú Ɔwɔ Ẅì.”] 38Zɛtɛn nɛ̀n hán kpàngo-hɛ̀ lɔ sannyɔn. Nɛ́n mán Filipɛ̀n mɛhi yɔ kakɛ ɛnshiemɛ̀n kɩ Filipɛ̀n wá nɛ̀n ɛnshi ɛnkru. 39Ɛnvra léyi yɔ dú ɛnshiemɛ̀n yɔ srɔ ɛntrɛ nɔn, Ɛẅɛnwrɔn Hɛ́n bɩ́ Filipɛ̀n sɔhɔ́. Govran-kɔ̀hɔ̀n-hán-wrɔn lɔ kè sɩ̀ vrù kàn Filipɛ̀n, tɛ́n pɔpüɛ̀-bra mɛ̀n nɛ̀n bɩ́ n'ɛnlevri nɛ hɔ̀n. 40Filipɛ̀n cɔ́ Azɔtɛ̀n anmàn, zɛtɛn ne ci anmàn anmàn nɛ dɔ́ yɔ ɛyri lɔ fɛn Ɛmɛẅi ankà Ankrànkràn lɔ, hàn kɩ cɔ́ ɛnvra léyi nɛ̀n bru Sezare anmàn nɔn.

Currently Selected:

Ɔkɔ̀hɔ̀n-wá-bɔ̀ kɔ̀hɔ̀n hán 8: ƐAA03

Highlight

Copy