Ɔkɔ̀hɔ̀n-wá-bɔ̀ kɔ̀hɔ̀n hán 16

Timote hɔ́n sɩ́ Pɔlɛ̀n mán Silasɛ̀n

1Pɔlɛ̀n bru Derbɛ̀n anmàn, zɛtɛn hɔ́n Listrɛ̀n anmàn. Ankaẅì-bùtan-ẅɛn-wrɔn tɔ̀n ye bi Timote dú nanvrɛn; nɛ́n muan dú Zhüifɛ̀n-nyɔnwrɔn léyi srɔ Krisì sɛ̀nkɛn-hi, tɛ́n nɛ́n zi dú Grɛkɛ̀n-wrɔn. 2Anwrɔn-nɛ́n-muan-ẅì hɔ̀n léyi dú Listrɛ̀n mán Ikoniɔmɛ̀n anmàn nɔn, kɛ dɔ́ Timote ankà ankrankran. 3Pɔlɛ̀n kɛ cüɛn ɔmu le Timote kɛ̀ cɔ́ nɛ̀n mɛhi yɔ hɔ́n ɛyri kɩ nɛ̀n bɩ́ yi. Pɔlɛ̀n wí Timote wúcɔ̀-domɛ̀n, ɔmuhi Zhüifɛ̀n-bɔ̀ lɔ fɛn léyi dú ɔkpɔsɔ ndɔ hɔ̀n lɔ wú nyri ɔmu le Timote nɛ́n zi dú Grɛkɛ̀n-wrɔn nɔn. 4Anmàn hɔ̀n lɔ fɛn wú léyi yɔ cì nɔn, yɔ dɔ́ ankaẅì-bùtan-ẅɛn-bɔ̀ lɔ, ankà hɔ̀n léyi ɔkɔ̀hɔ̀n-wá-bɔ̀ mán ɛcüìcüì-bɔ̀ léyi dú Zherüzalɛmɛ̀n anmàn ẅɛn ɔmùan-krɔn hɩ wú, kɩ kɛ wá tán yɔ nɔn, yɔ ẅɛn ankà hɔ̀n lɔ yɔ hɛ́n. 5Ɔwɔ-fɛcüè-bɔ̀ ankaẅì-bùtan kɛ sán ẅɛn ecüì kɩ yɔ sán cüɛ́n ɛnbì lɔ fɛn.

Troasɛ̀n anmàn lɔ, Pɔlɛ̀n cɔ́ Ɔwɔ-mɛ̀n-yri-kàn tɔ̀n

6Ɛnhɛ́n Prɔnprɔn kè sɩ̀ tán yɔ ɛkɔrɛ̀levri yɔ dɔ́ Ɔwɔ ankà Azi kpɔsɔ wú lɔ, hán tán kɩ yɔ vɔ́n Frizhi mán Galasi kpɔsɔ wú. 7Ɛnvra léyi yɔ cɔ́ Mizi kpɔsɔ wú tɛ̀sɛ̀n nɔn, yɔ wá yɔ hɔ́n Bitini kpɔsɔ wú, tɛ́n Zhezü Hɛ́n lɔ kè sɩ̀ tán yɔ ɛkɔrɛ̀-levri. 8Zɛtɛn yɔ ci Mizi kpɔsɔ wú yɔ hɔ́n Troasɛ̀n anmàn ɛnhyàbri-hɛ̀ nɛnbàdù. 9Ɛnnyran lɔ, Pɔlɛ̀n cɔ́ Ɔwɔ-mɛ̀n-yri-kàn tɔ̀n: nɛ̀n kán Masedúhanɛ̀n-anmàn-wrɔn tɔ̀n, nyɔn ɛwú kɛ sɛ́n nɛ̀n, kɩ kɛ dɔ̀ le: “È ci Masedúhanɛ̀n kpɔsɔ wú, ô ɛ̀ và wá bɔ̀ ɔkɔrɛ̀!” 10Ɛnvra zri léyi Ɔwɔ-mɛ̀n-yri-kàn ndɔ lɔ vacì nɔn, bɔ̀ ji Masedúhanɛ̀n kpɔsɔ wú hɔ́n yri, ɔmuhi, bɔ́ nyrì le Ɔwɔ bi bɔ̀, bɔ̀ và sɩ́ anwrɔn hɔ̀n léyi dú ɔkpɔsɔ ndɔ lɔ wú nɔn, Ɛmɛẅi Ankà Ankrankran lɔ.

Filipɛ̀n anmàn lɔ, Lidi ẅɛn ankaẅì-bùtan Ɛẅɛnwrɔn mɛ̀n

11Bɔ̀ bɩ́ ɛhɛ̀ Troasɛ̀n anmàn kɩ bɔ̀ hɔ́n Samotrasɛ̀n shi vúta wú brɛzri, zɛtɛn, ɛcɛ̀n cüe kɩ bɔ̀ cɔ́ Nehapolisɛ̀n anmàn. 12Nanvrɛn lɔ, bɔ́ dù bɔ́ hɔ́n Filipɛ̀n anmàn léyi dú Masedúhanɛ̀n kpàkpà hinan wú mán Rɔmɛ̀n-bɔ̀ kruborɛ yri nɔn. Bɔ̀ yɛ́ ɛnvra bobrebe anmàn ndɔ lɔ mɛ̀n. 13Ɛnyanmán-bì lɔ, bɔ̀ dú anmàn, bɔ̀ srɔ bɔ̀ hɔ́n ɛnshi-gbɛ́-shi mùan, nanvrɛn lɔ, bɔ̀ tro le bɔ́ lɛ cɔ́ Zhüifɛ̀n-bɔ̀ Wɔ-sɛ́n yri tɔ̀n. Bɔ̀ yɛ́ kɩ bɔ́ dɔ́ wúyɔ̀ hɔ̀n léyi borɛkru nanvrɛn nɔn, y'ankà. 14Y'ɛmɛ̀n lɔ, ɛnnyɔnwrɔn tɔ̀n ye bi Lidi, nɛ̀n dú anhàn-zhrɛ-hi léyi dú Tiatirɛ̀n anmàn nvà, nɛ hɛ́ ebɩ́di càsa wɔnsɛn ankrankran, kɩ nɛ sɛ́n Ɔwɔ. Ne die bɔ̀ nukùɛ, kɩ Ɛẅɛnwrɔn tán nɛ̀n ankà-die nukù, ô nɛ̀n yá Pɔlɛ̀n ankà léyi kɛ dɔ̀ nɔn. 15Yɛ wá Lidi mán n'ɛmɛ̀n-bɔ̀ ɛnshi ɛnkru. Zɛtɛn nɛ̀n bi bɔ̀ kɩ nɛ dɔ̀ le: “Ke dú kɛ nye tro le mɛ̀n ẅɛn Ɛẅɛnwrɔn ankaẅì-bùtan hô, nyɛ́n và nyɛ́n dú m'ebɩ́ lɔ mɛ̀n.” Kɩ nɛ̀n ẅɛn bɔ̀ krekremɛ̀n bɔ̀ shrì bɔ̀ bru n'ebɩ́ lɔ mɛ̀n.

Pɔlɛ̀n mán Silasɛ̀n dú anwɔn-mɛ̀n-wá-wɔn mɛ̀n Filipɛ̀n anmàn

16Ɛnbì tɔ̀n, bɔ́ dù bɔ́ hɔ́n Ɔwɔ sɛ́n yri, eci-bɩ̀tan-hi tɔ̀n vá bɔ̀ ɛsù: ɛnhɛ́n gbangbàn tɔ̀n dú nɛ̀n edomɛ̀n kɩ kɛ hán nɛ̀n nɛ mrɛ́n ɛcɛ̀n-bì kɩ nɛ hán tán n'ankà-yé-bɔ̀ kɛ cɔ́ ɔkùa bobrebe n'ɛcɛ̀n-bì-mrɛ́n lɔ mɛ̀n. 17Nɛ̀n dú bɔ́ mán Pɔlɛ̀n mɛhi ɛmɛẅi, ne di bobo nɛ dɔ̀ le: “Anwrɔn ndɔ hɔ̀n lɔ dú Ɔwɔ léyi dú ɛwú hɛ́n nɔn, n'eci-bɩtan-bɔ̀! Yɔ yé nyɛ̀n ɛnkru-kɔrɛ̀ levri!” 18Ɛnnyɔnwrɔn lɔ hán eci lɔ ɛnvra bobrebe. Ɔtrɔmɛ̀n lɔ, Pɔlɛ̀n bɩ́ ɛmɛ̀nhyì vri kɩ crɛ̀ kɛ dɔ́ ɛnhɛ́n lɔ le: “Zhezü-Krisì bɩ́mɛ̀n, mɛ wá tán mɛ́n dù ɛnnyɔnwrɔn lɔ edòmɛ̀n srɔ ɛntrɛ!” Kɩ ɛnvra zri lɔ mɛ̀n, ɛnhɛ́n lɔ dú ɛnnyɔnwrɔn lɔ edomɛ̀n srɔ ɛntrɛ. 19Ɛnvra léyi eci-bɩ̀tan-hi lɔ, n'ankà-yé-bɔ̀ kán ɔmu le yɔ sɩ̀ vru cɔ́ ɔkùa eci léyi ɛnnyɔwrɔn lɔ kɛ hán nɔn mɛ̀n nɔn, yɔ ẅɛn Pɔlɛ̀n mán Silasɛ̀n, kɩ yɔ sɩ́ yɔ anmàn drɛ́nmɔɛ́n mɛ̀n ɛcüìcüì-bɔ̀ zìwú. 20Yɔ ẅɛn yɔ, yɔ hɔ́n sɩ́ Rɔmɛ̀n anmàn mrɛ̀nci-bɔ̀ kɩ yɔ dɔ́ yɔ le: “Anwrɔn ndɔ hɔ̀n lɔ ke sɩ́ gbɔ̀gbɔ̀ anmàn lɔ mɛ̀n. Zhüifɛ̀n-bɔ̀ dú yɔ, 21kɩ yɔ yé bɔ̀ edù-ci léyi kè sɩ̀ zrɔ̀ tàn le bɔ̀ hán hɩ ci, bɔ́ léyi bɔ́ dú Rɔmɛ̀n anmàn ɛnhi wú bɔ̀ nɔn.”

22Fɛcüè mán crɛ ezì gbangbàn kɛ́n yɔ. Govran-mrɛ̀n-ci-bɔ̀ hán yɛ kúa Pɔlɛ̀n mán Silasɛ̀n ɛceci edomɛ̀n kɩ yɛ wá tán yɛ cüran yɔ ngbèle. 23Ɛnvra léyi yɛ cüran yɔ ɛci trɔ nɔn, ye kɔ́n yɔ di anwɔn-mɛ̀n-wá-wɔn mɛ̀n kɩ yɛ wá tán ɛyri-nan-wrɔn kɛ nán yɔ anvrɛnvrɛn. 24Ɛnvra zri léyi ɛyri-nan-wrɔn cɔ́ ɛnyanmàn ndɔ lɔ nɔn, nɛ̀n sɩ́ yɔ ɔwɔn cɛ tɔ̀n léyi dú anwɔn mɛ̀n krutrɔ mɛ̀n, kɩ nɛ̀n wá yɔ angan annan. 25Ɛnnyran wanzi vra, Pɔlɛ̀n mán Silasɛ̀n dú Ɔwɔ-sɛ́n mɛ̀n, kɩ kɛ krɛ́ ɛcɔ̀ kɛ mrɛ́n Ɔwɔ; anwɔn-mɛ̀n-wá-bɔ̀ ndɔ hɔ̀n lɔ ke die yɔ nukùɛ.

26Ɛnvra zri lɔ mɛ̀n, ɛnhi jɔkɔ́ ecüemɛ̀n hán tán kɩ, anwɔn-mɛ̀n-wá-wɔn lɔ jɔkɔ̀. Ɛsù hɔ̀n lɔ fɛn srú ɛnvra zri lɔ kɩ anwɔn-mɛ̀n-wá-bɔ̀ gbraka hɔ̀n lɔ fɛn srú cüe. 27Ɛyri-nan-wrɔn lɔ dù ɛndamɛ̀n tɔhú; ɛnvra léyi nɛ̀n kán ɔmu le anwɔn-mɛ̀n-wá-wɔn sù hɔ̀n lɔ srú cüe nɔn, nɛ̀n sán n'anhà-kɔ́n-nyan she lɔ nɛ́n bɩ, ô nɛ̀n wri n'edomɛ̀n, ɔmuhi nɛ̀n tro le anwɔn-mɛ̀n-wá-bɔ̀ lɔ fɛn srɛ́ nɔn. 28Tɛ́n Pɔlɛ̀n bɩ́ n'ecüì lɔ fɛn di bobo kɛ dɔ̀ le: “E bɩ́ hán v'edomɛ̀n eci gbangbàn! Bɔ́ lɔ fɛn bɔ́ dú ɛnu lɔ!” 29Zɛtɛn ɛyri-nan-wrɔn lɔ sán kɛniɛn, srɛ́ bru ɔwɔn cɛ lɔ mɛ̀n edù cüicüiemɛ̀n mán ɛnjansuemɛ̀n, nɛ̀n bore Pɔlɛ̀n mán Silasɛ̀n annan zìwúɛ. 30Zɛtɛn nɛ̀n hán yɔ, yɔ srɔ ɛntrɛ kɩ ne yrɛ yɔ le: “Brɛ̀su hɔ̀n, ecitan de ke ji le mɛ̀n hán, ô mɛ̀n cɔ́ ebɩ̀die nɛ́n?” 31Yɔ mrɛ́n ɔmùan le: “È bú Ɛẅɛnwrɔn Zhezü ankà ɛ̀ tán ankaẅì kɩ ɛ lɛ cɔ́ ebɩ̀die, vɛ́n mán v'ɛmɛ̀n-bɔ̀ mɛhi.” 32Kɩ Pɔlɛ̀n mán Silasɛ̀n dɔ́ Ɛẅɛnwrɔn ankà tán nɛ̀n, nɛ́n mán anwrɔn hɔ̀n léyi dú n'ɔwɔn lɔ mɛ̀n nɔn. 33Ɛyri-nan-wrɔn bɩ́ yɔ ɛnnyran lɔ, wacɛ̀n zri ndɔ lɔ mɛ̀n, ô kè juru y'ecifɔn hɔ̀n lɔ. Ɛnvra zri lɔ, yɔ wá nɛ́n mán n'ɛmɛ̀n-bɔ̀ ɛnshi ɛnkru. 34Nɛ̀n hán Pɔlɛ̀n mán Silasɛ̀n hɔ́n n'ɔwɔn lɔ mɛ̀n kɩ nɛ̀n tán yɔ ɛci yɔ zî. Ɔwrɔn ndɔ lɔ mán n'ɛmɛ̀n-bɔ̀ lɔ fɛn dú pɔpüɛ̀ mɛ̀n, ɔmuhi yɔ ẅɛn ankaẅì-bùtan Ɔwɔ mɛ̀n nɔn.

35Ɛnvra léyi ɛcɛ̀n cüe nɔn, Rɔmɛ̀n anmàn govràn-mrɛ̀nci-bɔ̀ wá anwrɔn ɔkɔhɔ̀n kɛ dɔ́ ɛyri-nan-wrɔn lɔ le: “Teze anwrɔn ndɔ hɔ̀n lɔ.” 36Ɛyri-nan-wrɔn lɔ hɔ́n dɔ́ Pɔlɛ̀n ankà lɔ kɩ kɛ dɔ̀ le: “Govràn-mrɛ̀nci-bɔ̀ wá tán le, ye teze nyɛ̀n. Ɛkɔrɛ̀-levri dù, nyɛ̀n srɔ ɛntrɛ ô nyɛ́n hɔ́n anwɔwɔ mɛ̀n.” 37Tɛ́n Pɔlɛ̀n kɛ dɔ́ gɔliɛ-bɔ̀ lɔ le: “Yɔ hán yɔ ye gorɛ bɔ̀ fɛcüè wanzi, kɩ yɔ sɩ̀ cí bɔ̀ ɛmrɛ̀n hán ɔmu le dú edùci nɔn hɔ́, bɔ́ léyi bɔ̀ dú Rɔmɛ̀n anmàn ɛnhi wú bɔ̀ nɔn! Zɛtɛn yɔ kɔ́n bɔ̀ ku anwɔn-mɛ̀n-wá-wɔn mɛ̀n. Kɩ zɛtɛ̀ lɔ, yɔ ji yɔ hán bɔ̀ bɔ̀ srɔ ɛntrɛ ɛbanmɛ̀n hàn? Hɔ̂, bɔ̀ krɔ! Ke ji le yɔ dùku yɔ và yɔ mrɛ́n bɔ̀!” 38Gɔliɛ-bɔ̀ lɔ vru ɛmɛẅi hɔ́n dɔ́ govràn-mrɛ̀nci-bɔ̀ ankà léyi Pɔlɛ̀n dɔ̀ nɔn. Ɛnvra léyi yɔ yá le Pɔlɛ̀n mán Silasɛ̀n dú Rɔmɛ̀n anmàn ɛnhi wú bɔ̀ nɔn, ɛnjansù bru yɔ. 39Govràn-mrɛ̀nci-bɔ̀ vá tán Pɔlɛ̀n mán Silasɛ̀n ɛnkru-sɔ̀n, zɛtɛn hán yɔ, yɔ dú anwɔn-mɛ̀n-wá-wɔn mɛ̀n yɔ srɔ ɛntrɛ kɩ yɔ sɛ́n yɔ, ô yɔ cɔhɔ́ anmàn lɔ. 40Ɛnvra léyi Pɔlɛ̀n mán Silasɛ̀n dú anwɔn-mɛ̀n-wá-wɔn mɛ̀n srɔ ɛntrɛ nɔn, yɔ hɔ́n Lidi nanvrɛn. Ɛnvra léyi yɔ kán anwrɔn-nɛ́n-muan-ẅì hɔ̀n, hɩ yɔ tán yɔ edùyì nɔn, yɔ nan hɔ̀n.

Currently Selected:

Ɔkɔ̀hɔ̀n-wá-bɔ̀ kɔ̀hɔ̀n hán 16: ƐAA03

Highlight

Copy