Ɔkɔ̀hɔ̀n-wá-bɔ̀ kɔ̀hɔ̀n hán 14

Pɔlɛ̀n mán Barnabasɛ̀n dú Ikoniɔmɛ̀n anmàn

1Ikoniɔmɛ̀n anmàn lɔ, Pɔlɛ̀n mán Barnabasɛ̀n vru bru Zhüifɛ̀n-bɔ̀ Wɔ-sɛ́n-wɔn lɔ mɛ̀n, kɩ dɔ́ Ɔwɔ ankà, hán tán kɩ Zhüifɛ̀n-bɔ̀ bobrebe mán anwrɔn hɔ̀n léyi kè sɩ̀ dù Zhüifɛ̀n-bɔ̀ nɔn srɔ ankàẅì-bùtan-bɔ̀. 2Tɛ́n Zhüifɛ̀n-bɔ̀ léyi krɔ, kè sɩ̀ bù tàn ankaẅì nɔn, kɛ wá anwrɔn hɔ̀n léyi kè sɩ̀ dù Zhüifɛ̀n-bɔ̀ nɔn, ankà, ô yɔ ẅɛn Pɔlɛ̀n mán Barnabasɛ̀n ankà-tro gbangbàn. 3Ɔmu tɛ̀kɩ Pɔlɛ̀n mán Barnabasɛ̀n yɛ́ Ikoniɔmɛ̀n anmàn ɛnvra sheshe. Yɔ dɔ́ ankà ankaẅìbùtan mɛ̀n mán Ɛẅɛnwrɔn sɛ́ mɛ̀n. Ɛẅɛnwrɔn kɛ tán yɔ ɛkɔrɛ-srɔn ô yɔ hán anvɛmɛ̀n-frɛ́n-ci mán eci-woroan-ci, ô kè yé tán le ankà léyi yɔ dɔ́ Ɔwɔ boafɔ̀n mɛ̀n nɔn dú annanwɔrɛ. 4Anmàn-bɔ̀ vɔ́n y'edomɛ̀n anhyrɛ̀: ɛnjanbɔ̀ dú Zhüifɛ̀n-bɔ̀ ɛmɛẅi kɩ ndɔ hɔ̀n dú ɔkɔ̀hɔ̀n-wá-bɔ̀ tɛn. 5Zhüifɛ̀n-bɔ̀ mán anwrɔn hɔ̀n léyi kè sɩ̀ dù Zhüifɛ̀n-bɔ̀, mán y'ɛcüìcüì-bɔ̀ mɛhi kɛ wá kɛ̀ hán Pɔlɛ̀n mán Barnabasɛ̀n anbɔrɛci, ô yɔ soran yɔ ɛbù yɔ wri yɔ. 6Ɛnvra léyi anwrɔn anhyrɛ̀ lɔ cɔ́ ankà lɔ nyrì nɔn, yɔ srɛ́ yɔ hɔ́n Listrɛ̀n mán Derbɛ̀n anmàn hɔ̀n léyi dú Likaonie kpɔsɔ wú, mán anmàn hɔ̀n léyi dú yɔ ɛtɛ̀sɛ̀n nɔn. 7Nanvrɛn lɔ, yɔ bukru yɔ dɔ́ Ɛmɛẅi ankà Ankrankran lɔ.

Pɔlɛ̀n mán Barnabasɛ̀n dú Listrɛ̀n anmàn

8Listrɛ̀n anmàn lɔ, ɔwrɔn tɔ̀n ndù kɛ yɛ́ ɛnvra lɔ fɛn, ɔmuhi annan kpɔcɔ nɛ̀n nɔn; nɛ̀n dú ɔkpɔcɔ mɛ̀n n'ebiemɛ̀n hàn hɛ́n, kɩ ɛnbì zriɛmɛ́n nɛ vá nán esù mrìmrì. 9Ne die ankà léyi Pɔlɛ̀n kɛ dɔ̀ nɔn nukùɛ. Pɔlɛ̀n crɛ anvɛ̀ kɛ́n nɛ̀n kɩ kán ɔmu le ɔkpɔcɔ-wrɔn lɔ ẅɛn ankàẅì-bùtan léyi kɛ lɛ kɔrɛ̀ nɛ̀n nɔn. 10Zɛtɛn Pɔlɛ̀n kɛ dɔ́ nɛ̀n esùvá cüìcüìemɛ̀n le: “Tɔhú, ɛ̀ nyrɔn yɛ́ v'annan hɔ̀n lɔ wúɛ!” Ɔwrɔn lɔ trɛ́nshɛ́n kɩ brukru kɛ nán esù. 11Ɛnvra léyi fɛcüè kán eci léyi pɔlɛ̀n hán nɔn, fɛcüè lɔ kɛ dɔ́ y'anmàn-brɛ̀ mɛ̀n le: “Anwɔ hɔ̀n bɩ́ anwrɔnẅì dùwrú kɩ kakɛ bɔ̀ ɛmɛ̀n.” 12Yɔ wá Barnabasɛ̀n ebɩ́ “Zesɛ̀n” kɩ Pɔlɛ̀n yɔ wá “Hermɛsɛ̀n”, ɔmuhi Pɔlɛ̀n dú bɔ̀dɔ̀-die nɔn. 13Zesɛ̀n cice-wrɔn lɔ, hɩ n'ecice-wɔn lɔ dú anmàn kru nɔn, bɩ́ ɛnnànman cüì hɔ̀n, yɛ jrɔ́ yɔ anhyrà-shi ɛtrù wú, kɩ ye sɩ́ yɔ, Ɔwɔ-cice-wɔn gbàtà-mùan: ɔmu lɔ de, ne ji le fɛcüè kè ce Barnabasɛ̀n mán Pɔlɛ̀n eci nɔn. 14Tɛ́n ɛnvra léyi ɔkɔ̀hɔ̀n-wa-bɔ̀ anhyrɛ̀ lɔ cɔ́ ankà lɔ nyrì nɔn, yɔ shá y'ɛceci hɔ̀n lɔ kɩ yɔ srɛ́ ku fɛcüè mɛ̀n, yɔ di bobo yɔ dɔ̀ le: 15“Bɔ́ nyran anvrɛn hɔ̀n, cɛci kruhú kɛ̂ nyɛ hán eci ndɔ lɔa? Anwrɔnẅì kɩ dú bɔ̀, bɔ́ dù bɔ̀ cá nyɛ̀n. Bɔ́ và bɔ́ sɩ́ nyɛ̀n Ɛmɛẅi ankà Ankrankran lɔ, ô nyɛ́n teze antɛ̀-buri-Wɔ woro ndɔ hɔ̀n lɔ, ô nyɛ́n crɛ́ ezì nyɛ́n kɛ́n Ɔwɔ kɔrɛkɔrɛ léyi hán anhobɩ́, ɛnhi, ecüe mán eci lɔ fɛn léyi dú yɔ ɛmɛ̀n nɔn. 16Ɛnbìɛhɛ́n vra lɔ, Ɔwɔ teze ɛnhi wú anmàn hɔ̀n lɔ fɛn bɩ́ yɔ dùku y'ɛnlevri. 17Ɔmu tɛ̀kɩ, ɛnvra lɔ fɛn ne yé n'edomɛ̀n n'eci ankrankran hán mɛ̀n: nɛ tán nyɛ̀n ɛnvravra ɛnshi mán antɛ̀-ẅì ke dú anhobɩ́ kɛ và, nɛ tán nyɛ̀n ɛci-zî kɩ nɛ hán pɔpüɛ̀-brà ke dú ny'ɛnbɔrɛ lɔ mɛ̀n.” 18Ankà ɔmu léyi ɔkɔ̀hɔ̀n-wá-bɔ̀ lɔ kɛ dɔ̀ nɔn, ɔmu tɛ̀kɩ y'ecice lɔ kè sɩ̀ ẅɛ̀n sɔhɔ́.

19Zhüifɛ̀n-bɔ̀ dú Antiɔshɛ̀n anmàn Pisidi kpɔsɔ wú mán Ikoniɔmɛ̀n anmàn nvà kɩ fɛcüè dú yɔ ɛmɛẅi. Yɔ kɔ́n ɛbù srɔan Pɔlɛ̀n, ô ye wri nɛ̀n, zɛtɛn yɔ wán Pɔlɛ̀n ɛnhibɩ́ yɔ sɩ́ anmàn kru, kɩ ye tro le nɛ́n wúɛ. 20Tɛ́n ɛnvra léyi ankaẅì-bùtan-ẅɛn-bɔ̀ bɔrɛkru n'ɛtɛsɛ̀n nɔn, nɛ̀n tɔhú kɩ nɛ̀n bru anmàn lɔ mɛ̀n. Ɛnvra léyi ɛcɛ̀n cüe nɔn, nɛ́n mán Barnabasɛ̀n mɛhi yɔ hɔ́n Derbɛ̀n anmàn.

Pɔlɛ̀n mán Barnabasɛ̀n vru ɛmɛẅi hɔ́n Antiɔshɛ̀n anmàn Siri kpɔsɔ wú

21Pɔlɛ̀n mán Barnabasɛ̀n dɔ́ Ɛmɛẅi Ankà Ankrankran lɔ Derbɛ̀n anmàn kɩ nanvrɛn lɔ anwrɔn bobrebe srɔ Krisi-sɛ̀nkɛn-bɔ̀. Zɛtɛn yɔ vru ɛmɛẅi yɔ hɔ́n Listrɛ̀n anmàn Ikoniɔmɛ̀n anmàn mán Antiɔshɛ̀n anmàn Pisidi kpɔsɔ wú. 22Yɔ tán ankaẅì-bùtan-ẅɛn-bɔ̀ ɛnbɔrɛ sɔ́, yɔ tán yɔ edùyì ankaẅì-bùtan-ẅɛn mɛ̀n. Kɩ yɔ dɔ́ yɔ le: “Ke ji le bɔ̀ kán ɛgbàn bobrebe, ô bɔ̀ bru Anhobɩ́ nɛ̀ncüì-dúyri.” 23Ɔwɔ-wɔn lɔ fɛn mɛ̀n, yɔ wá ɛcüìcüì-bɔ̀ kɩ, ɛnvra léyi yɔ bɩ́ kishe hɩ yɔ sɛ́n Ɔwɔ kɛ trɔ nɔn, Pɔlɛ̀n mán Barnabasɛ̀n ke bɩ́ yɔ kɛ wá Ɛẅɛnwrɔn léyi yɔ ẅɛn n'esɛ́ ɛwú nɔn, antamɛ̀n.

24Zɛtɛn Pɔlɛ̀n mán Barnabasɛ̀n vɔ́n ɛnshi Pisidi kɩ cɔ́ Panfili kpɔsɔ wú. 25Yɔ dɔ́ Ɔwɔ ankà Perzhe anmàn, zɛtɛn yɔ hɔ́n Atali anmàn. 26Nanvrɛn lɔ yɔ bɩ́ ɛnhyàbri-hɛ̀, yɔ hɔ́n antiɔshɛ̀n anmàn léyi dú Siri kpɔsɔ wú, nanvrɛn lɔ, ye bɩ́ yɔ yɛ wá Ɔwɔ-boafɔ̀n mɛ̀n, ɔkɔhɔ̀n léyi zɛtɛ̀ lɔ yɔ hán sá nmù nɔn, hɩ kruhú. 27Ɛnvra léyi yɔ cɔ́ Antiɔshɛ̀n anmàn nɔn, yɔ bɔrɛ Krisì-fɛcüè-bɔ̀ lɔ ɛkru kɩ yɔ dɔ́ yɔ eci lɔ fɛn léyi Ɔwɔ hán yɔ, yɛ hán nɔn, mán ɔmu le Ɔwɔ srú ankaẅìbùtan levri tán anwrɔn hɔ̀n léyi kè sɩ̀ dù Zhüifɛ̀n-bɔ̀ nɔn, yɔ mán. 28Pɔlɛ̀n mán Barnabasɛ̀n cɔ́ ankaẅì-bùtan-ẅɛn-bɔ̀ lɔ yɔ yɛ́ Antiɔshɛ̀n anmàn nmɔɛn jan.

Currently Selected:

Ɔkɔ̀hɔ̀n-wá-bɔ̀ kɔ̀hɔ̀n hán 14: ƐAA03

Highlight

Copy