LOS HECHOS 14
14
Apquilvoyam Pablo najan Bernabé tingma Iconio
1Apquilvocmec alhta Pablo najan Bernabé tingma Iconio. Apquilantalhningvocmec alhta apcaneyquiclhilha judíos. Avanjec alhta apquiltimnaycam. Yejemoc alhta apquiltomja melyasquiyam aplhamoclhojo judíos najan metnaja judíos. 2Apquilyascacmec alhta napocja judíos. Apquillovcasquic alhta metnaja judíos. Apquilmapsom alhta apquiltimescasac apquilpipma. 3Acvoncaclho alhta apnaycam Pablo najan Bernabé. Apquiltimnam alhta amyaa mepqui apquillay. Am alhta elyascacmoc Visqui ingac. Apyimnatescasquic alhta almam apquilvalhoc actemaclha appayvam Visqui ingac (Dios). Apmesquic alhta apquilmopvan, yoyam ellanac asoc monquinatquiscama najan asoc sinpilapquiscama. 4Apyaptacpec alhta napocja enlhitaoc tingma. Apquilpasmec alhta napocja enlhitaoc judíos. Napocja alhta najan apquilpasmac apóstoles apquilapajasomap. 5Apquilpasmeclhec alhta judíos metnaja judíos najan apquilimja apmamyi. Apquililtamjoc alhta elticpam apyimpeoc apóstoles apquilapajasomap najan elyicna mataymong. 6Lhama alhta apquillinga amyaa apquillhenamap. Yejemoc alhta apquinyajamco yoclhilhma Licaonia. Apquilvocmec alhta tingma Listra najan tingma Derbe najan poc tingma. 7Apquililtimnasquic alhta najan tasic amyaa apquilvoycamlha.
Apyicnamap mataymong Pablo tingma Listra
8Apnec alhta tingma Listra lhama enlhit mepqui aplhingam. Aptemaclha apquitcoc actimem colyimnatem alyiptetaclha apmancoc. Apnec alhta mataa nalhpop. Am alhta copvanac elhong. 9Aplingac alhta as enlhit actemaclha aplhanma Pablo. Yejemoc alhta apquilano Pablo. Apyicpilcoc alhta Pablo actemaclha aclhanma apvalhoc as enlhit, yoyam etamalvomoc. 10Apyimnatasquic alhta appayvam Pablo:
—Itnimiclha netin, ipeyvasiclha apmancoc —alhta aptomjac.
Apnilhtinquic alhta netin as enlhit. Inyicpintangvocmo alhta aplhingam. 11Lhama alhta apquilvita actemaclha aptamjaycam Pablo. Yejemoc alhta apquilpalhimcaso actemaclha apquilpayvam apanco licaonia:
—¡Apquilvayventac ingilyapam diosaoc as nalhpop, apquilyitsomacpo enlhitaoc! —alhta intomjac amyaa apcanyacpo.
12Apcanyacpec alhta Bernabé apvisay ingilyapam Júpiter. Apcanyacpec alhta Pablo apvisay ingilyapam Mercurio. Ayinyema alhta apmopvan apquiltimnaycam Pablo. 13Ningatoc tingma Listra apyitna alhta tingma apponquinomap apmaclha Júpiter. Yejemoc alhta apvaa sacerdote apquinyema as tingma apponquinomap. Apnalantac alhta vayqui inquilinavaa, yoyam coticyo. Apquilsantac alhta najan yamit ilhnamoc tingma apatong. Apquililtamjoc alhta elpasmiclha apquililmalhnesquiscama najan elmesic asoc acticyovam, yoyam colvatnalhca. 14Lhama alhta apquilvita as asoc Bernabé najan Pablo. Yejemoc alhta apquilyapta apnenyic apquilantalhnama. Apquinincamquic alhta nipyesicsa enlhitaoc, apquilpalhamamcaa:
15—¡Quip elanojo enlhitaoc! ¿Soctomja apquiltomja nac as asoc quellhip? —alhta apquiltomjac. Enlhit nincoo lha ningno quellhip. Ningvaac nincoo, yoyam ongiltimnacsic amyaa. Elvatsaoc as asoc apquilyitquiscama dios. Elyiplaclha sat Dios Ingyapam apjalhnancoc aptomja apquillanay netin najan nalhpop najan yingmin acvanyam najan aclhamoclhojo asoc acnamco maa. 16Apcavoc nic nat Dios Ingyapam, yoyam elvajanamcoc apquiltemaclha apancavo apquilanomacpo enlhitaoc lhalhma anco. 17Inlingasalhquic nic nat mataa aptemaclha apanco Dios Ingyapam nipyesicsa enlhitaoc. Ayinyema ilhnic nat apmescama mataa asoc altamila. Ingmesquic mataa acmamay najan cotlaycaoc acyilhna. Apquilpayesaclhec mataa ingilvalhoc singmesa nintoycaoc acmenmalhem najan asoc, yoyam ongilitsovacsojo —alhta apquiltomjac Pablo najan Bernabé.
18Naysicsa colyoyam alhta elvatsamcoc, invocmoc alhta apquilvalhoc appayvam apóstoles apquilapajasomap. Apquilvatsamquic alhta apquilmescama asoc acticyovam alvatnomalhquilha.
19Yejemoc alhta apquilvaa judíos apquilinyema tingma Antioquía najan tingma Iconio. Apquillovquiscaac alhta enlhitaoc. Yejemoc alhta apyinjacpo mataymong Pablo. Apcanyacpec alhta ingyitsapo. Apquilyinyovasamquic alhta tap tingma. 20Lhama alhta apcaneclho enlhit melyasquiyam tasic amyaa apyitnaclha Pablo. Yejemoc alhta aplhaticja. Aptalhningvoclhec alhta mocjam tingma. Secaseclha alhta intomjac apquilmiyaclho Pablo najan Bernabé tingma Derbe.
21Yejemoc alhta apquiltinasamcaa mocjam tasic amyaa tingma Derbe. Aplhamaseclhec alhta enlhit melyasquiyam tasic amyaa. Apquiltajavoc alhta mocjam apquilmiyaclho tingma Listra najan tingma Iconio najan tingma Antioquía. 22Aptomjac alhta Pablo najan Bernabé apquilanya enlhit melyasquiyam tasic amyaa: “Elyimnaticsojo mataa apquilvalhoc. Elinlhanmojo apquiltimem melyasquiyam tasic amyaa. Elyasamcojo quellhip: Incaymalhquic colhamojoc actemaclha acyajapmo ingilvalhoc, yoyam ongilpalhavomoc Dios apquilnancascama” —alhta apquiltomjac. 23Apquilyacyesquic alhta Pablo najan Bernabé enlhit, yoyam etnejic apquinimsomap apmamyi moclhama Jesucristo apmolhama (iglesia). Yejemoc alhta apquililmalhnam actemaclha melmajay aptoycaoc. Apquilmalhnescasquic alhta as enlhitaoc. Am alhta elyascacmoc Visqui ingac as enlhitaoc.
Apquiltajemo Pablo najan Bernabé tingma Antioquía yoclhilhma Siria
24Apquilyeycajangvoclhec alhta yoclhilhma Pisidia. Apquilvoclhec alhta yoclhilhma Panfilia. 25Apquililtimnam alhta tasic amyaa tingma Perge. Natamin alhta apquilyasa tingma Atalia. 26Apquilquinamtec alhta maa barco. Apquilmiyaclhec alhta tingma Antioquía apquilinyemayaclha alhta. Amamyi apquillhingam siclhoc anco alhta apquililmalhnesquisa Dios Ingyapam, yoyam eltamilsic Pablo najan Bernabé. Apquilvactamoc alhta mocjam. Apquilsovjoquic alhta apquilanyomap eltimjic. 27Lhama alhta apquilvactamo tingma Antioquía. Apcansaclhoc alhta enlhitaoc Jesucristo apmolhama. Apquililtimnam alhta aclhamoclhojo actemaclha apquilanyomap eltimjic ayinyema Dios Ingyapam. Visqui ingac alhta aptomja apmayesquiscama atong, yoyam eltimjic najan melyasquiyam metnaja judíos. 28Acvoncaclho alhta apma Pablo najan Bernabé nipyesicsa enlhitaoc melyasquiyam tasic amyaa.
Currently Selected:
LOS HECHOS 14: ENHL
Highlight
Share
Copy
Want to have your highlights saved across all your devices? Sign up or sign in
