LOS HECHOS 12

Apmatnam Jacobo najan apmomap Pedro

1Aplovquic alhta apvisqui Herodes. Yejemoc alhta apquilanya Herodes, yoyam elmacpoc napocja apquilpalhaviyam Jesucristo apmolhama, yoyam elascacsic apyimpeoc. 2Apmatnec alhta Jacobo, Juan apipma. Sovo acvinatem alhta inyatemenalhcac apyispoc. 3Lhama alhta apvita actemaclha apquilyisponcama judíos. Yejemoc alhta apcanya emacpoc najan lha Pedro. Caya alhta apquiltomjac aptoycamcolha quilpasmongam mepqui apquimpascaoc. 4Apcanayquic alhta Herodes, yoyam colhic acnescacmo Pedro singilpilhtetomaclha. Cuatro alhta apquilanayc eltamilsic singilpilhtetemo. Cuatro alhta mataa apquilyanmongsaycaoc apquiltamilquiscama. Apquiltamjoc alhta Herodes eyantimiclha Pedro napatavo enlhitaoc natamin pascua, caya apquilyeycajaycaoc.#Ex 12.1-27. 5Apnec alhta Pedro singilpilhtetomaclha. Apquilinlhanacmec alhta apquililmalhnesquiscama Jesucristo apmolhama.

Dios Ingyapam aptipquiscama Pedro singilpilhtetomaclha

6Apquiltamjoc alhta Herodes eyantamiclha Pedro secaseclha. Aptinquic alhta alhtaa Pedro nipyesicsa apcanit singilpilhtetemo. Cadena alhta malpilhquitma apmeoc. Apquilanam alhta poc singilpilhtetemo aptamilquiscama atong singilpilhtetomaclha. 7Yejemoc alhta aptalhningvaa ángel apquinyema Visqui ingac. Inquilsasquic alhta olhma aptenaclha singilpilhtetomaclha. Appatningvocmo alhta ángel Dios apcasinancama Pedro aplhaticjasa. Aptomjac alhta apcanya:

—Ingyapajam ilhaticja —alhta aptomjac ángel Dios apcasinancama.

Yejemoc alhta aljalhyovasalhco apmeoc cadenas. 8Aptomjac alhta apcanya ángel Dios apcasinancama:

—Ipilhteticlha niplhit. Ilteticlha tiyayipeoc apác —alhta aptomjac.

Apquilyajaclhoc alhta Pedro. Aptomjac alhta apcanya ángel Dios apcasinancama:

—Ingyalap apava, jeyiplaclha —alhta aptomjac.

9Yejemoc alhta aptepa Pedro apyiplaclho ángel Dios apcasinancama. Am alhta eyasamcoc Pedro actomja nasoc anco aptomjaclha ángel Dios apcasinancama. Apvanmoncama alhta apcanayc. 10Apquilyeycajangvocmec alhta singilpilhtetemo apquiltamilquiscama atong. Apquilyeycajangvocmec alhta mocjam poc singilpilhtetemo apquiltamilquiscama atong. Apquilvocmec alhta tava ápaoc atong ningyascamaclha tingma. Acmayjayclha anco alhta intomjac atong. Apquilantiyapvactamo alhta eyca. Yejemoc alhta apquilyiplova amay acpeyvomo acvocmo moc actajemoclha amay. Yejemoc alhta apvonquepa ángel Dios apcasinancama. 11Apyasingvocmec alhta Pedro. Yejemoc alhta appametamcaa:

—Quilhvoc acyasingvocmec actomja nasoc anco aptomjaclha Visqui ingac. Apcapajasqui nac ángel apanco, yoyam jevomsic tap naysicsa yoyam jelajic apvisqui Herodes najan co Judea —alhta intomjac apvalhoc Pedro.

12Lhama alhta aclhena apvalhoc Pedro. Apmiyaclhec alhta María tingma ac. Juan inquin alhta, moc apvisay Marcos. Aplhamoc alhta enlhit apcaneyclha, yoyam elilmalhnam Dios Ingyapam. 13Lhama alhta apticpamcaa atong nicja amay (tingma apatong). Yejemoc alhta actiyapvactamo quilvana ayitcoc acvisay Rode, yoyam colanojo. 14Inyicpilcoc alhta appayvam Pedro. Am alhta colcasac atong. Payjeclhec alhta avalhoc. Inquinincam alhta congne tingma altimnascaclho amyaa:

—Apvoctac lhac Pedro. Nicja atong lhac apquinmam —alhta intomjac. 15Apquilatingmavoc alhta:

—¡Coyascalhma nac lhiya! —alhta intomjac amyaa ayanyalhco.

—Nasoc anco sicpayvam —alhta intomjac alanya. Apquilatingmavoc alhta:

—Jave lhaja Pedro. Angel Dios apcasinancama lhaja —alhta apquiltomjac.

16Apticpam alhta mocjam atong Pedro. Lhama alhta apquillica atong. Pilapcasquic alhta apquilvita. Payjeclhec alhta apquilvalhoc. 17Vamlha apmic alhta aplhicmosac, yoyam elvanma. Yejemoc alhta apquiltimnamcaa actemaclha aptipquiscama Visqui ingac singilpilhtetomaclha. Aptomjac alhta apcanya:

—Eliltimnas sat amyaa Jacobo najan ingilyalhinga —alhta aptomjac.

Yejemoc alhta aptepa apyasa poc tingma (moc yoclhilhma).

18Lhama alhta ayitsaca. Intamjam alhta apquilvalhoc singilpilhtetemo. Am alhta elyasamcoc aptomjaclha Pedro. 19Apcanayquic alhta apvisqui Herodes ectamacpoc Pedro. Am alhta etacpoc. Apquililmalhnaclho alhta singilpilhtetemo apquiltamilquiscama atong. Yejemoc alhta apquilanya eticyo singilpilhtetemo apquiltamilquiscama atong. Aplhinquic alhta apvisqui Herodes. Apyinyovquic alhta yoclhilhma Judea. Tingma Cesarea alhta apnacmoc.

Apquitsepma apvisqui Herodes

20Apquiltanongvocmec alhta apvisqui Herodes enlhitaoc apnaycam tingma Tiro najan tingma Sidón. Yejemoc alhta apquilquilhyacmo as enlhitaoc. Apquilyoctamo alhta apnaclha Herodes apcasinancama apvisay Blasto. Apquilpamejitsacpec alhta. Apquiltamjoc eltimjic altamilaycam apquilvalhoc. Nintom alhta ayinyemaclha. Intingyalhquic alhta mataa nintom apvisqui apcaoclha. 21Invocmec alhta acnim aplhanmaclha apvisqui Herodes. Yejemoc alhta apquilantalhneclho apava visqui apquilantalhnama. Apnacmec alhta nitno netin aptajanem. Apquiltimnam alhta napatavo enlhitaoc. 22Yejemoc alhta apquilpalhamamcaa enlhitaoc:

¡Jave nac enlhit appayvam lha, Dios appayvam nac lha! —alhta apquiltomjac.

23Yejemoc alhta aptimesquisa acmasca apyimpejic ángel Dios apcasinancama. Ayinyemaclha mengyac apvisqui Herodes Dios Ingyapam. Ascoc alhta intavac apvalhoc. Apquitsepquic alhta apvisqui Herodes.

24Inpayjingvocmec alhta mataa Dios appayvam. Inlingalhquic alhta mataa lhalhma anco.

25Lhama alhta apquilsovja apquiltamjaycam Bernabé najan Saulo. Aptajingvoclhec alhta tingma Jerusalén. Apmiyaclho alhta tingma Antioquía. Apquilyantamaclhec alhta najan Juan, moc apvisay Marcos.

Currently Selected:

LOS HECHOS 12: ENHL

Highlight

Copy