Sam 30
30
Devitda kau aaknga matakut.
1Buyambam tapa, gata na gwa take iwana dua kapewi
na tasiwa maiwa nanduke bakngaking.
Unzingge nata gatane umanda kumzang yatangenawit.
2Buyambam tapa, ga natane Anutuna.
Nata wamu gata akgatangamiakge yanggawa gata na tasiwi maitna wena sikut.
3Buyambam tapa, na paa kumbum siwan ngana gata matmat komuneta na gatuka takuyak.
Ngan, nata akupsa aminda yuaing komune dua pukuwitde natake gata na gatuka takuyak.
4Ginu aminu Anututane aminabam,
ginda kau itane umana yatangenake tainong.
5Sike ita kaanga tapduu dapaknga siknga natanimunggak.
Natake ngana ita ninde musia kwikwiknga tapduu ninda kayuk yuamang komune natanimunggak.
Kai yangganinu zikaane apimakaing.
Siwan ngana tembana ninu gatu apbaknganim.
6Tupa nata ninane kekeknganane yuke meya takngatu nae dua apik, ngang natake anzing yakum,
“Sanga tapatuta na ikomban pimananga dua,” ngang yakum.
7Siwan ngana, Buyambam tapa, tapduu ga nae take siknga natangamukuyak komune
gata na tasiwi kekekake yukum.
Unzing, daman gwenda tawan dakane kekeknga yuak binga.
Siwan ngana tapduu gata na napmake akusopukuyak komune na gwaut takngata na asiknga tanggaganukut.
8Buyambam tapa, nata gae yanggawakum.
Ngan, Buyambam tapata nae butaya natapikge natake nata kekeknga siknga yanggawakum.
9Sike nata akupanu sanga nomanu dasing bingata aawik?
Sike nata akungwake matmaune kuwanu sanga waakngata mamin gatangamik?
Aminu gwa kumbingga gatane umanda apme yatangenatning ba dasing?
Asikaya waaminda asingganu gata waaminde take tasiyamukuyak kakngae yakapning ba dasing? Wena. Dua yakapning.
10Buyambam tapa, gata nae natapso. Natake nae musip kwikwik natangamuyo.
Buyambam tapa, gata na gatangamuyo.
11Gatangamuke gata musipma kwanam siknggat taknga gwa sandekngamuke tasiwi nata kau apbakngake tainggat.
Tupa na meya siknga natayukum ngana nata kwanam sikum takngae yake tasiwi natane musipmaatang asiknga baknganggat.
12Unzingge nata gena dua umumbit. Aho, nata musipmaatangu kau umanda yatangenatnangge ataiwit.
Buyambam tapa, ga natane Anutuna. Nata gae gaak wamu asinggan asinggan ganimbakngawit.
Currently Selected:
Sam 30: wncB
Highlight
Share
Copy
Want to have your highlights saved across all your devices? Sign up or sign in
© 2001, Wycliffe Bible Translators, Inc. All rights reserved.
