Sam 19
19
Devitda kau aaknga matakut.
1Ena kakaa komune nana sangabamu kaamangga Anutu tupan sikngaapa ngang yeutnimukaing.
Sanga kuupbamu ena kakaa komune yuaingga puya noman taknga ita tasikut ngang yeutnimukaing.
2Siwan tapduk bamu sanga waakwakga ie atninikapmakaing.
Siwan gatu zikaane kuut natdetdeu kekeknga yeutnimukaing.
3Sike aminu kepna kepna nana aminda wamu inata inata yakaing ngana
sanga waakngatane wamu aminu kuupbamda atnataaing.
4Siwan sanga waakngaatdane wamu yotna yotna kuupbam tawamban sandekgak.
Ngan, wamna waakngata kepna kepna kuupbam tawamban sandekgak.
Sike ena kakaa komune Anututa sel you gwendu gunzitde mitapbut.
5Gunzitda kepmanu aminda maatna tanangge apbakngake yotna teke epu kunggak binga epu kunggak. Epuke inane kepinane kunggak.
Unzing aminu asisapnangge tandakngake apbaknganggak binga.
6Gunzitda ena kakaa komu kwaimune kuke uneta kautdu saak kunggak.
Siwan sanga tapatuta itane tokngana akngae kusopunanga dua.
7Mama wamu Buyambam tapatane taknga noman siknga.
Siwan Buyambam tapatane wamda ninde banip tangenakgak.
Siwan ninu mama wamu Buyambam tapatane takngae banip siknga sikamang.
Sike ita natdetdeu nomanu aminu natdetdetna matekngae ayamunggak.
8Buyambam tapatane mama wamu nomana siknga.
Siwan wamu waakngata nindane musipmin pangenawan apbakngakamang.
Siwan Buyambam tapatane mama wamu kakaa aknga binga.
Ita gataniman katak kaamang.
9Siwan aminu tapatuta ie munu puke ininggau ita kepi noman takngakan tasinggak.
Tasiwawan kepi nomanu waaknga asinggan asinggan yuwik.
Ngan. Ita mama wamu kuupbam tasinimde nininggau
wamu waaknga siakan siwan noman siknga.
10Siwan golmanitane buyana buyambam siknga.
Siwan ngana Buyambam tapatane mama wamda golmani ayapbikgak.
Siwan hani kaaya siknga.
Siwan ngana itane mama wamda hani ayapbikgak.
11Mama wamu gatane akngata na gikane puya amindae gwaut wam naninggak.
Naniwan natake nata gatane mama wamba tawanggatde gata natane yuyuknga tasiwi take siknga singgak.
12Siwan ngana maminda inane gutonganae kuupbam nataak?
Na gutonga kundu tasikumde apbotake na ie dua nataat. Unzingge gata natane gutonga waakngana sandeke tasiwi na gae kaikane dundumna siwit.
13Na gatane puya aminda. Ge gata na kakuya katak siknga nanduyuwi
nata waiaknga dua tasiwit.
Gata waiaknga dua katewi na nanduyuwik.
Unzingge nata noman yuke gutonga buyambamu takngatu dua tasiwit.
14Natane wama gatu natane natdetdetna gae kaikane take siwik ngang nataat.
Buyambam tapa, natane keu akusopunanga komu
ga siwan akgatangamunggayak kapa ga.
Currently Selected:
Sam 19: wncB
Highlight
Share
Copy
Want to have your highlights saved across all your devices? Sign up or sign in
© 2001, Wycliffe Bible Translators, Inc. All rights reserved.
