Luk 17

Yesusva Unna Hevtindimba, Maivithu Indkoklamoa, Sesoamangas Ningminu Keknam.

Matiu 18:6-7 eva 18:21-22, Mak 9:42

1-2Yesus hevtindim unna, tanam mana vemamba sahoklal hona petharini indhanamba si kekaiv vevav, wo noinda himba indkoklava vivra, notongokokla, notongokokla. Wo no indhanariniva owalmba wonsiharava no indkoklarava, hev kinmba vravav Sesoaindava, eva owalva snakolava vilovra. Wo himba ovav, kamoa doara dahata, wo hona indkoklaoa os kohata.

3-4Yeoa besal monam engivm. Yenamba etepevpa yemba indkokla vretava, yeoa ishomno hena indkoklamoa. Doa himba wuleihatava hevna indkoklamba, manam yimba hengava nengvav. Wo himba yemba indkoklava vretava, wo himba ovav, kava doa yemba indkokla vrei, yeoa kana indkoklamoa maivetho, wo manam yimba hengava nengavav. Wo hengava yemba venavrava osva, osangas venavm. Wo honamba osva vaomanatava esvemava yemba, yeoa osangas maivethamno.

5Hevtindi 12pelara Yesus mendeklim umnina, kam kolvrowol veo, kava yem keknamangas lovahalm venav, osm keknam. 6Doa Yesus unna, yimba kamba ningminivrava espetava, wo yena nengavnangva maim ora, sahaikw, homeista, wo yimba kanapopol mendekliandrava vivra. Yimba osva utava, ti velavhoao petharini, wanplombra lohvhoa, wo timba wohvelavhoavav, verava, wanplombra vilundthoa.

Yesusva Unna, Andranindva Besalva Os Viv.

7-9Yimba andranindrinimba waiavrava, yena osondra sipsipandra noi vevra. Doa himba andra vaomana verava, vepiarava, doa deuvram pro, yimba hemba omnavavma, osva lelnam sihao, avhoao, kava yem dahwolm vev? Owai, yimba os omnavav hemba, yeoa pora daloho, pikian besal vewol veo, kana innesowa veo. Doa kava nepiarava, daha yeoa os neo. No yena andranindriniva vepiarava, nomba temba yimba omnavpa, yimba es esesmba omnavav hemba, owai. 10Doa yimba kana andranind, yimba andrava vivrava, vepieirava, nomba temba kava unnamba yemba, doa yeoa os u, kava ambo andranind, kava ambo kuwulna moam engiv, wo kava osva ningvmoa, heoa kamoa iovongovra, owai.

Yesusva 10pelara Lombamungilm Sishona Vewol Vena.

11-13Yesusva mendah gavna monam Yerusalemram. Himba hovra phona Samaria provinsra eva Galili provinsra. Hev mongona kembella sihalm vevna, doa lombamungil 10pelara nunglinamba hemba, ehalla ambo ishomb ovowolvohvna vevandnam, una, Yesus, yimba mendekli, kam ninginu, wo kam kolvrowol veo.

14Yesus nongalnamba, doa hev unna hemba, yeoa ango sembayang andranindindam, wo he ata yena nihmba naengho vrowol vinvav. Doa no lombamungilva os angana, wo doa monara hevna nihm ona nungeilna, pai pai pina nihtovpa beswonamangas lohprinv. Lombamba doa wohselvpingu vei.

15-16Mongongal gana heriniva hengava Yesusindamba, Sesoam mindnam aongtanahonam ishomnavna, ona, lehra yimba kamba veni doa. Mulumbdandna lohvhoanamba Yesusinda, omnana, lehra yimba veni. Doa noi indhanariniva himba Samarianindrini ungundrini, himba Yutanindriniva owai.

17-19Doa Yesus ona, es hevpa kava sishona vewol vei 10pelara lombamungilva, a owaimi? Wo nomba monglava 9pelarava hi? Hona ungundriningas Sesoamba okolav, wo eva nomba Yutanindva 9pelarava owai. Doa Yesus omnana hemba, yeoa gao deuvram, yimba kamba lohvhoamnav pevna indnahonam, wo noinda yemba lesvhoai.

Yesusva Unna, Sesoatindi Nemel Si Avav Musera.

Matiu 24:23-28 eva 24:37-41

20Varisinind Yesusm osihminina, henanam si Sesoava pimba kekalvho vewol vevav, pivm eva pivna petham? Doa Yesus unna, yimba si mana emamba novnamba nunglivavmoa, osm yimba uvav, men phov. 21Indhanamba si nunglivavmoa, uvra, Sesoatindi nemel ten av, owai. Heva os monglava yimba doa Sesoana moamba hillina, wohkek vithiv, wo noinda himba doa Sesoana nemeltindilm av.

22Yesus hevtindim ishunna, sewonamba yimba si os uvav, kava nonglalm viv Kristusmba, heoa kamoa kolvrowol vera. Doa heva os owai, yimba si nonamba nunglivavmoa kamba. 23Indhanamba si yemba os unvav, dom nov venga viu, Kristusva ten avmi? Doa heva os owai, manam yimba hilwilvav, hemba patvunvav. 24Manara, kava arana ombol lohv, kana prolmba hengamba petharamba si maim ora, wing vei, indkumbiva indakonda pethanindva si os nunglivav novnamba nonamangas mongawulm. 25Heva os seilmba hona indhanamba pethariniva si kamba mindnam kin vreihuvmona vevav, wo kamba meis haravhueimnivav, doa henga sism kava si provav.

Yesusva Unna, Kava Arana Ombol Lohv, Kana Prolmba Si Lelnam Phovav, Indhanakoklam Yumna Vewolalm.

26-27Yesusva mendah ishunvna hevtindim, kava si prolmba vevrava, kava nungi lelnam si phovav. Os ten Noa nemet pueumbm nengvlomana venam. Nonamba indhanamba manam ata onengvhuta, ambo indwonam aevvna, inne ongases noi vewuvmona vevna. Doa Noava wonsihavna siprava, doa pueumbva nomba indkumbimba wohmera vena, wo hemba mueisowa vilona.

28-29Kana prolmba si maim ora, Sotom kembelnind hev ambo indwonam aevvna, nomangas vivna, innem, maketm, tokom, osondram, deuvandram. Doa nonamba Lotva no kembelliniva dashalahanganamba, doa nungi lelnam suwe honboal ovrini vetral venamba, miklewol wohvena no kembelnindmba.

30-32Wo nonamba kava si kavmba ambara vethavrava hona petharava, si indhanamba os ningvav, pai kamba indkokla vilov. Doa nonamba indhanamba kuksaruvrava aevrava, himba manam saivvav deuvmeramba, hevna wohmba dombolmba, owai. No indhanamba osondrava vivrava, himba deuvramba manam ambvav, owai. Manam yimba osva vivav, temba Lotna ongalva venamba, osva haravhoanamba, henga nengvhoana hevna deuvna wohnam, wo noinda hemba mueisowa vena.

33Himba nomba hevna nengavnangmba engivrava, beswonamba almba, hemba nomba mueisowa vilovav. Doa heva os himba nomba hevna nengavnangmba wuleihivrava, Sesoana nengavnangmba engivrava, himba si beswonam aevulvav yunalm.

34-36Kava nonamba provrava, sambla indhana ihilvra nin sinim. Wo mongova nomba kana ovsongolnind waiwohangavav, mongomba wuleihivav. Wo nonamba eva ungevlirini samblava ahavhorava, innesowa evevra. Wo mongova nomba kana ovsongolnind waiwohangavav, mongomba wuleihivav. 37Yesusva os ona, wo hevtindi umnina, honamba henahalm si vevav? Doa Yesus olhmona unna, tatamba diva nunglavpa, endandva dingas kusov.

Currently Selected:

Luk 17: wrsPB

Highlight

Copy