Zaburey 35
35
Irkoy ga nga ganakey kaa ifutu cire
1Woo ti Dawda zabur foo.
Abadantaa, borey gurgay kaŋ gʼay gurgay,
borey gandu kaŋ gʼay gandu!
2Koray kaccu nda ibeeri zaa
ka tun kʼay faaba!
3Yaajoo nda daašoo kʼay gaaraykey kar!
Nee ya ne kaŋ ni ti ay Hallasikaa!
4Borey kaŋ ga ceeci ngi mʼay hundoo kaa,
yala i ma haw, i ma kayna!
Borey kaŋ anniyaa ti ngi ma ifutu tee ya ne,
yala i ma yee banda ka haw!
5Yala i ma tee sanda kokoši kaŋ hewoo gʼa zaa,
yala Abadantaa almalaykaa mʼi gaaray ka koy!
6Yala ngi fondawey ma kubay i ma tanši,
yala Abadantaa almalaykaa mʼi gaarandi!
7Zama bila addalil i na sankay hirri ya ne,
ka guusu fanši ya ne hala ngi mʼay hundoo kaa bila addalil.
8Yala halaciyan ma kaa i ga bila nda i ma bay,
yala i ma kaŋ sankaa ra kaŋ i nʼa hirri,
i ma kaŋ a ra, i ma bone!
9Nda woo teendi, ay hundoo ga ɲaali nda Abadantaa,
a ga duu binekaanay nga hallasiroo ra.
10Ay ga nee nda ay binoo kul: «Abadantaa, may no ma hima nda ni
ka yalaafante kaa boraa kaŋ ga hin a kaboo ra,
ka talkaa nda alfukaaroo kaa ngi komakaa kaboo ra?»
11Seede bine konnayaŋ tun,
i gʼay hãa nda haya kaŋ ay sʼa bay.
12Ihennaa kaŋ ay nʼa tee i se, i gʼa bana nda ifutu,
ay hundoo cindi nga folloku.
13Waati kaŋ i wirci, ay ga saaku kasa daŋ ay ga,
ay nʼay boŋ dii, ay meehaw,
ay si fay nda ka Irkoy ŋaaray ay binoo ra.
14Sanda ay ceroo se, sanda agʼarmaa se ay taabi,
ay sonbu sanda boro kaŋ ga nga ɲaa buuyanoo hẽe.
15Waati kaŋ ay takawey si boori, i ga ɲaali nda ay misoo,
i ga marga ay ga.
Yawyaŋ, boroyaŋ kaŋ ay sʼi bay marga ay ga
i si fay nda kʼay ciinay,
16ngi nda borey kaŋ si hunbur Irkoy, nda ɲooɲokey
ga mee ɲama ay ga.
17Ay Koyoo, hala waati foo no nʼga woo benandi?
Ay hundoo kaa borey futawey wey kabey ra,
ay kaa ganjihayla soogey wey kabey ra!
18Ay ga ni saabu margari beeroo ra,
ay ga ni saabu jama gaabante ra.
19Yala borey kaŋ nʼay tooɲe ka tee ya ne iberi masi ɲaali nda ay misoo,
yala borey kaŋ konna agay bila addalil masʼay gullu!
20Zama i si šelaŋ alaafiya se,
i mma zanba soolu borey se kaŋ ga goro gandaa ra nda alaafiya.
21I ga ngi deeney feeri ay ga,
i ga nee: «Nhuu! Nhuu!
Ir dii a nda ir moɲey!»
22Abadantaa, ni dii a, masi dangay!
Ay Koyoo, masi mooru agay!
23Tun, tun kʼay noo ay cimoo!
Ay Irkoy, ay Koyoo, tun ka faasa ya ne!
24Ciiti ka sawa nda ni šerretaraa, Abadantaa, ay Koyoo!
Yala i masi ɲaali nda ay misoo!
25Yala i masi nee ngi boŋ se: «Nhuu! Hayaa kaŋ ir ga bagʼa tee.»
Yala i masi nee: «Ir benandi nda a pat!»
26Yala borey kul cere ra ma haw ka bone,
borey kaŋ ga ɲaali nda ay bonaa!
Borey kaŋ tun ya ne,
yala haawi nda bone ma tee i se bankaaray!
27Yala borey kaŋ ay šerretaraa kan i se
ma yafarhã, i ma ɲaali,
de i masi fay nda ka nee: «Abadantaa ga beeri,
nga kaŋ nga tamoo alaafiyaa ga kan a se!»
28Woo ra, ay miɲoo ga ni šerretaraa har,
zaaroo kul a ga ni saabu.
Currently Selected:
Zaburey 35: ses
Highlight
Share
Copy
Want to have your highlights saved across all your devices? Sign up or sign in
© BFP Velberter Mission and Wycliffe Bible Translators, Inc.
