Yaasawey 27
27
1Masi fooma nda suba,
zama nʼsi bay haya kaŋ zaari foo gʼa hay.
2Naŋ boro foo ma ni saabu, masi ni boŋ saabu,
naŋ boro tana mʼa tee, manʼti ni miɲoo.
3Tondi ga tiŋ, labutaasi ga tiŋ,
dooraa kaŋ saama gʼa daŋ boro ra tiŋ nda ihinkaa kul.
4Futay ga tun, bine tunyan ga laala,
amma may ma hin ka kay canseyan jine?
5Ka boro teje kaaray ga baa baji tugante.
6Ni baakaa ma cimi har ma ne ka ni dor
baa summuyaney kaŋ boraa kaŋ ga konna ni gʼi tee ma ne ka ni darga.
7Boro kaŋ kungu ga yuu gani taama,
boro kaŋ ga heray, haya hotta kul ga kan miɲoo ra.
8Boro kaŋ na nga dogoo naŋ ka koy yaara nongu mooro ra,
ga hima nda ciraw kaŋ ga yaara nongu mooro ra nga tejoo se.
9Jii nda dugu ga bine kaanandi,
takaa din da boro ceroo hoyray hennaa
si hun kala nga bine boryaa ra.
10Masi ni ceroo naŋ, masi ni baaba ceroo naŋ,
masi koy ni armaa do han kaŋ bonaa kaa ni ga.
Taalamma maana baa arma mooro.
11Ay izʼaroo, duu lakkal mʼay binoo ɲaalandi,
hala ya hin ka tuuru boraa se kaŋ gʼay wow.
12Boro carma ga dii bonaa, a ga tugu,
boŋbii si dii bonaa kaŋ ga kaa, nga kokoroo ti zarabiyan.
13Nga darbaa dii, zama a nka nga boŋ tolme,
boro kaŋ boro sʼa bay maaganda,
boraa kaŋ na nga boŋ tolme ma tolmaa bana.
14Boro kaŋ biya ka nga jindoo jer ka gaara nga cinaa se,
a ga kabandi a se sanda danga.
15Ndorro kaŋ si fay nda ka doo ncirɲi zaari hane,
takaa din da ti woy yenjekaari.
16Boro kaŋ ga hin ka woyoo woo ganji, ga hin ka hew ganji,
nga kabe gumaa ga hin ka jii dii.
17Guuru no ma guuru kaanandi,
takaa din da boro ga nga cinaa noo lakkal.
18Boro kaŋ na jeejayɲaa saajaw ga izey ŋaa,
boro kaŋ na lakkal daŋ nga jineboraa se ga duu beeray.
19Nda nʼna hari guna, nʼga dii a ra ni ndumoo,
takaa din da adamize lakkaloo ga nga binoo cebe.
20Alaahara nda alaaharaa guusoo si kungu,
takaa din da adamize moɲey si kungu.
21Nzorfu kaaray ga mennandi botol ra,
wura ga mennandi alforon ra,
takaa din da adamize da ciitandi ka sawa nda nga maaɲoo.
22Ba nda nʼna lakkal jaŋante dur tinda ra nda hinji attamoo ra,
nga lakkal jaŋantetaraa si fay nda a.
23Ma hanse ka ni feejey affoo kul bay,
lakkal daŋ ni alman kuroo se,
24zama alman si cindi hala abada,
kokoy fuula si cindi boŋ ra zaman ka kaa zaman.
25Nda subu kogaa dogandi, nda subu firzoo zay,
nda tondi hondey subey margandi,
26nʼgoo nda feeji ka ni boŋ bankaaray,
nʼgoo nda jindaaru ka faari day.
27Hanciney wawaa ga wasa ni ŋaayanoo se
nda ni hugoo ŋaayanoo se, nda ni koŋŋey hunaroo se.
Currently Selected:
Yaasawey 27: ses
Highlight
Share
Copy
Want to have your highlights saved across all your devices? Sign up or sign in
© BFP Velberter Mission and Wycliffe Bible Translators, Inc.
