Yaasawey 19
19
1Talka kaŋ ga dira laadirtaray ra
baa boro kaŋ sii nda lakkal, a ga šenni šiirandi.
2Ka huru haya ra bila fahamay si boori,
cahãyan futu ga kate dereyan.
3Boro lakkal jaŋantetaraa no mʼa daŋ fondo laala ra,
a ga futu Abadantaa ga.
4Alman mma tonton boro cerey ga,
amma talka cerey mma mooru a ga.
5Seedezooru si diyandi boro kaŋ mana haya kul tee,
boro kaŋ ga taari har si hallasi.
6Boro boobo ga baa ngi ma kan boŋkoyni se,
boro kul ga baa nga ma tee kabedoona se cere.
7Talka, nga armey kul gʼa konnay,
soko nga cerey, i ga hibi a ga.
Waati kaŋ a ga baa nga ma šelaŋ i se, i sii no.
8Boro kaŋ duu lakkal ga baa nga boŋ,
boro kaŋ na lakkal dii ga duu gomni.
9Seedezooru si goro a mana zukandi,
taariharkaw ga halaci.
10A si boori boro lakkal jaŋante ma huna daame ra,
wala mo baɲɲa ma boŋkoyni juwal.
11Boro kaŋ goo nda lakkal ga suuri,
nga beeraa ti a ga dirɲa tooɲeroo kaŋ teendi a se.
12Kokoy futuroo ga hima nda ganjihayla soogo booroyanoo,
nga borohennataraa ga hima nda harandaŋ kaŋ goo suboo boŋ.
13Izʼaru lakkal jaŋante ga kate bone nga baaba ga,
woy yenjewey ga hima nda ndorro kaŋ si fay nda ka doo.
14Hugu nda alman ti hayayaŋ kaŋ boro ga duu a baaba ga,
woy lakkalkoyni manʼti kala Abadantaa nooyan.
15Fuyyantetaray mma boro kaŋandi jirbi koma ra,
boro kaŋ si haya kul tee, heray gʼa farandi.
16Boro kaŋ ga yaamarey dii na nga boŋ dii,
boro kaŋ si kula nga dira takaa ra ga buu.
17Boro kaŋ ga hinna talka se mma garaw Abadantaa se,
a ga kaa kʼa bana a se.
18Ni izoo aladabu za waatoo kaŋ nʼga hin kʼa tee,
masi baa nga buuyan.
19Boro kaŋ hanse ka futu, a gʼa bana,
nda manʼti woo, a ga koy a ga kʼa tee.
20Haŋajer hoyrawey se, gaabu cawyanoo ga,
hala ma duu ka duu lakkal waatey kaŋ ga kaa ra.
21Adamize binoo ga haya boobo miile,
amma woo kaŋ Abadantaa nʼa kayandi no ma tee.
22A ga boori adamize ma borohennataray cebe,
talka baa taariharkaw.
23Ka hunbur Abadantaa ga boro noo aloomur,
nʼga kani nda kunji bila nda bone ma bisa ni here.
24Fuyyante ga nga kaboo daŋ taasaa ra,
amma a si hin kʼa ka too nga miɲoo do.
25Ɲooɲokaw kar, lakkal jaŋante ga duu lakkal,
lakkalkoyni daŋ fondaa ra, a ga duu bayray.
26Boro kaŋ na nga baaba kayri ka nga ɲaa gaaray
manʼti kala izʼaru kaŋ ga boro haawandi kʼa futandi.
27Ay izʼaroo, hoyray kaŋ ga ni moorandi bayray fondaa,
fay nda ka haŋajer a se.
28Seede yaamu si kula cimi ra,
boro laaley miɲey ga ifutu gon.
29Ciitiyaŋ soolandi ɲooɲokey se,
barzuyaŋ soolandi lakkal jaŋantey dumawey se.
Currently Selected:
Yaasawey 19: ses
Highlight
Share
Copy
Want to have your highlights saved across all your devices? Sign up or sign in
© BFP Velberter Mission and Wycliffe Bible Translators, Inc.
