Matiyu 21

Isa huru Žerizalem sanda kokoy

(Marku 11.1–11; Luka 19.28–40; Yehiya 12.12–19)

1Waatoo kaŋ i man Žerizalem, de i too Betefaže, Zaytuɲaŋey tondi hondoo here, Isa na taalibi hinka sanba 2ka nee i se: «Wa koy koyra-izoo ra kaŋ ga war tenje. Dogoo din da war ga farka woy foo gar kaŋ ga hawa, nga nda farka-ize foo. Wʼi feeri, war ma kate ey ya ne. 3Nda boro šelaŋ war se, war ma nee a se: ‹Ir Koyoo no ma too i ga, sohõ da a gʼi yeeti.›#21.3 ‹Ir Koyoo no ma too i ga, sohõ da a gʼi yeeti.› Grek šenni ra, almaganaa faa ti ‹Ir Koyoo no ma too i ga.› Dogoo din da a gʼi naŋ.» 4Woo teendi hala hayaa kaŋ annaboo dontandi a mʼa har ma tabati, a nee:

5«Wa nee woy-izoo kaŋ ti Siyoŋ koyraa se:

‹Ni kokoyoo ne ma kaa ni ga,

binoo ga yay, a žigi farkaa woy

nda farka-ize boŋ, adabba kaarumay izʼaru.›»#21.5 Zakariya 9.9.

6Taalibey koy, de i na hayaa tee sanda takaa kaŋ nda Isa nʼa har. 7I kate farka woyoo nda farka-izoo, i na ngi darbawey fur i boŋ, de Isa goro i boŋ.

8Alžamaa beeri na ngi darbawey daaru fondaa ra, affooyaŋ na tuuri kabeyaŋ dunbu kʼi daaru fondaa ra. 9Alžamaa kaŋ goo jinoo ra nda wey kaŋ goo dumaa ga kaati ka nee:

«Hozaana Dawda Haamaa se!

Albarka ma bara boraa se kaŋ goo kaa ir Koyoo maaɲoo ga!

Hozaana beenaa se beene!»#21.9 Zaburey 118.25–26.

10Waatoo kaŋ Isa huru Žerizalem, koyraa kul jijiri ka nee: «May ti woo?» 11Alžamaa nee: «Woo ti annabi Isa, Nazaret kaŋ goo Galile boro no.»

Isa na maamalakey gaaray Irkoy hugu beeroo ra

(Marku 11.15–19; Luka 19.45–48; Yehiya 2.13–22)

12Isa huru Irkoy hugu beeroo ra, a na maamalakey nda daykey kul gaaray kʼi kaa taray no din ra. A na nooru barmaykey taabaley nda tuuzun neerekey gorohayey gum carawey ga. 13A nee i se: «A hantumandi Citaaboo ra ka nee:

‹Ay hugoo ga ciyandi nda hugu kaŋ ra Irkoy ga ŋaarayandi›#21.13 Ezayi 56.7.,

amma war wey, war nʼa tee zay lanbadoo.»

14Danawyaŋ nda bonguyaŋ man a Irkoy hugu beeroo ra, a nʼi noo baani. 15Kaŋ sargari juwalkey jineborey nda Citaaboo baykey dii kayfey kaŋ a nʼi tee, nda zankey kaŋ ga kaati Irkoy hugu beeroo ra ka nee: «Hozaana Dawda Haamaa se!», i futu, 16de i nee a se: «Nʼga maa hayaa kaŋ wey goo mʼa har wala?» Isa nee i se: «Ayyo. War mana bay ka šennoo woo caw: ‹Nʼna ni saaburoo daŋ zanka kaccey nda naanandey miɲey ra?›#21.16 Zaburey 8.3.» 17Woo banda ga, a nʼi naŋ, a fatta koyraa ra ka koy Betani, no din ra a na cijinoo tee.

Jeejayɲaŋoo kaŋ Isa nʼa danga

(Marku 11.12–14, 20–24)

18Subbaahi tayaa ra, kaŋ Isa ga yee koyraa ra, a heray. 19Kaŋ a ga jeejayɲaa foo honnay fondaa ra, a koy a here, amma a mana haya kul gar a ga kala fitawey hinne. A nee a se: «Ize masi zay ni ga hala abada.» Dogoo din da jeejayɲaŋoo kogu. 20Taalibey dii woo, boŋey haw, i nee: «Taka foo dogoo din da jeejayɲaŋoo kogu?» 21Isa nʼi zaabi ka nee i se: «Cimoo ne kaŋ ay gʼa har war se, nda war ga naanay, war si šikka, war ga hayaa tee kaŋ teendi jeejayɲaŋoo se, koyne mo ba tondi hondoo woo, nda war nee a se: ‹Hun ne ma ni boŋ warra teekoo ra›, a ga tee. 22Haya kul kaŋ war nʼa wiri Irkoy ŋaarayyan ra, nda war ga naanay, war ga duu a.»

Man ra Isa duu nga hinoo

(Marku 11.27–33; Luka 20.1–8)

23Isa koy Irkoy hugu beeroo ra, a goo ma cawandi kaŋ sargari juwalkey jineborey nda gandaa boro beerey man a ka nee: «Hini foo nda nʼga wey tee? May ka ni noo hinoo woo?» 24Isa nʼi zaabi ka nee: «Agay mo ga war hãa nda haya folloku. Nda war nʼa har ya ne, ay ga hinoo har war se kaŋ nda ay ga wey tee: 25Yehiya batizeyanoo, man ra a hun, beenaa ra wala adamizey do?» I šelaŋ-šelaŋ cere game ka nee: «Nda ir nee ‹Beenaa ra›, a ga nee ir se: ‹Adiši macin se war mana naanay a?› 26Nda ir nee mo: ‹Adamizey›, ir ga hunbur alžamaa, zama borey kul ga Yehiya dii annabi.» 27I na Isa zaabi ka nee: «Ir si bay.» A nee i se: «Agay da si hinoo har war se kaŋ nda ay ga wey tee.»

Izʼaru hinkaa filla yaasayantaa

28«Macin no war nee fillaa woo ra? Aru foo kaŋ goo nda zanka hinka. A man ijinaa ka nee: ‹Ay zankaa, koy goy hõ alaneb faaroo ra.› 29A zaabi ka nee: ‹A si tee ya ne.› Waati banda ga, zanka yee nga šennoo se banda, a koy. 30A man affaa ka šenni follokaa har a se. Zankaa nʼa zaabi ka nee: ‹A boori, ay koyoo.› Amma a mana koy. 31Ihinkaa ra, affoo ka nga baabaa ibaayoo tee?» I nee: «Ijinaa.» Isa nee i se: «Cimoo ne kaŋ ay gʼa har war se, alkaasidiikey nda woykuurey ga war jin ka huru Irkoy Laamaa ra. 32Zama Yehiya kaa war do nda fondo šerrantaa, war mana naanay a. Amma alkaasidiikey nda woykuurey naanay a. De mo ba kaŋ war dii woo, war mana kokor ka nimsi ka naanay a.»

Alaneb faaroo beerikey filla yaasayantaa

(Marku 12.1–12; Luka 20.9–19)

33«Wa haŋajer filla yaasayante foo se koyne. Aru foo kaŋ hugukoy no, a na alaneb faari tee. A na cete cin kʼa wanga. A na nongu fanši kaŋ ra i ga tuuri-izey motti. A na soorohugu kuku cin#21.33 Soorohugu no kaŋ ga lakkalkey ga žigi ka faaroo hawgay.. Woo banda ga, a na faaroo naŋ beerikawyaŋ kone, de a naaru. 34Kaŋ hegaa waatoo man, a na nga tamey sanba beerikey do hala nga ma duu faari-izey ra. 35Beerikey na tamey dii ka affoo kar, ka affoo wii, ka affaa warra nda tondi kʼa wii. 36A yee koyne ka tam fooyaŋ kaŋ boobo nda ijinawey sanba. I na taka follokaa tee i se. 37Woo kul banda ga, a na nga izʼaroo sanba i do, a nee: ‹I gʼay izʼaroo beerandi.› 38Amma kaŋ beerikey ga dii izʼaroo, i nee cere se: ‹Woo ti tubukaa. Wa kaa, ir mʼa wii, ir ma nga tubuhayaa taa.› 39I nʼa dii, i nʼa warra taray kʼa kaa faaroo ra, i nʼa wii. 40Nda faaroo koyoo kaa, macin no a gʼa tee beerikey wey se?» 41I nee a se: «A ga boro laaley wey halaci laala. A ga faaroo yeeti beerikaw tanayaŋ se kaŋ gʼa noo faari-izey hegaa waati.»

42Isa nee i se: «War mana bay ka woo caw Citaaboo ra wala:

‹Tondoo kaŋ cinakey nʼa fur,

nga no ka tee hugoo kanjoo tondoo.

Ir Koyoo ka baa woo ma tee,

alaabiina no ir moɲey cire!›#21.42 Zaburey 118.22–23.

43Woo se ay ga nee war se, Irkoy Laamaa ga hun war kone, de a ga nondi jama foo se kaŋ ga albaha tee Laamaa se. 44[De mo boro kaŋ kaŋ tondoo woo boŋ ga say. Boro kaŋ ga a kaŋ ga motti.]»

45Kaŋ sargari juwalkey jineborey nda Fariziyeŋey maa nga filla yaasayantey, i bay kaŋ ngi ga a goo. 46I ceeci ngi mʼa dii, amma i hunbur jamaa, zama jamaa mmʼa dii annabi.

Currently Selected:

Matiyu 21: ses

Highlight

Copy