Yunusa 2
2
Yunusa na Abadantaa ŋaaray
1Za i na Yunusa warra teekoo ra, Abadantaa na hamiisa beeri foo tunandi kaŋ na Yunusa gon. De Yunusa na cijin hinza nda zaari hinza tee hamiisa beeroo gundoo ra. 2Hamiisa beeroo woo gundoo ra Yunusa na nga Koyoo, Abadantaa ŋaaray.
3A nee:
«Ay binemarayyanoo ra, ay na Abadantaa cee,
a nʼay zaabi,
alaahara gundoo ra, ay kaati ka faaba ceeci,
nʼna haŋajer ya ne.
4Nʼnʼay warra hala hari guusaa ra, teekowey gamey ra.
Ni bondawey nda ni mennawey kul nʼay kar ka bisa.
5Ay nee ay hundoo ra:
‹Nga ne, nʼnʼay moorandi ni!
Amma ba woo tee, ay naataa goo kaŋ ay ga kaa ka dii
ni hugoo kaŋ ra i ga ni ŋaaray.›
6Haroo nʼay dii hala ay kormollaa ga,
guusu futaa nʼay kuubi kʼay bere.
Subey kaŋ goo teekoo cire didiji ay boŋoo ga.
7Ay zunbu teekoo cire ka too hala
nongoo kaŋ ra tondi hondey asaasoo goo,
no din ra alaahara ganbey baa ka daabu ay ga hala abada.
Amma Abadantaa, ni kaŋ ti ay Koyoo,
nʼnʼay hundoo yeeti ay ra kʼay kaa guusu futu ra.
8Waatoo kaŋ ay huru buuyan nda hunayan gamoo ra, ay na ni cee, Abadantaa, de ŋaarayroo kaŋ ay nʼa tee, too hala ni do hugoo kaŋ ra i ga ni ŋaaray.
9Tooru yaada ganakey na Abadantaa yankar ka mooru nga arrahamaa.
10Ay ga don ka albarka tee ma ne, ka sargari kaa ma ne. Ay ga meefurey kul kaa kaŋ ay nʼi sanbu ni maaɲoo ga, zama cimi no, hallasikaw kul sii kala ni, Abadantaa.»
11Woo banda ga, Abadantaa na hamiisaa yaamar a ma koy guraa ga ka Yunusa yeeri.
Currently Selected:
Yunusa 2: ses
Highlight
Share
Copy
Want to have your highlights saved across all your devices? Sign up or sign in
© BFP Velberter Mission and Wycliffe Bible Translators, Inc.
