Mag 10
10
Lipiiyiil a bɔr
(Matiu 19:1-12; Lug 16:18)
1Le Yisa nan nyan ki chaa Judiya a tingbɔŋin ki tan don Jɔdann a mɔgilin. Le bininfob takpem nan lagin u ban, le u yaan ti nan wɔɔn bi Uwonbɔr a bɔr ke waah pii ti wɔɔn man nin. 2Le Farasii yaab dan u ban ki ban bin mag u lig, le ki baan u ke, “Nsiim chee sei ke uja n yii u poo?”
3Le u mu baan bi ke, “Moziz nan sei ni nsiim nii ki jiin ni paamaa?”
4Le bi ke, “Moziz nan wɔɔn ti ke uja li fir sɔb lipiiyiil a gbɔŋ#10:4 Juu yaab nan jɔɔ lipiiyiil a gbɔŋ kan wee bi sɔb ki yiin bipiib. ki yii u poo.”
5Le Yisa bei bi ke, “Ni tukangbir bu le nan che Moziz nan sɔb nsiim nmɔn ki sei ni. 6Amaa Uwonbɔr kaah nan naan dulinya npiinim ni, ‘U nan naan uja nin upii le.’ 7Mambu, le uja li jiɛn u baa nin u na le ki kɔɔn upii, 8wee binib bilee n lagin ki li ye tigbanann tiba, baa ji yin ye bininfob bilee, amaa bi ni yin ye uninfo uba le. 9Mambu, ban wee Uwonbɔr ta bi ki lagin ni, uninfosaal li nyi un choo bi ki bɔgir.”
10Baah nan nan jirin iniin n-yonn man nin, le u bɔɔnɔɔb nan baan u bɔr nmɔn a taai. 11Le u bei bi ke, “Uja wan yii u poo wee ki kɔɔn upii uba ke, u tun iwanjaab toon na, waah kɔɔn upii ki kpiɛ u bu-n bu. 12Man mu jigin, upii yii u chal wee ki tan kun uja uba ke, u mu tun iwanjaab toon na.”
Yisa kaah nan kaab jaa nbuwaab bu man
(Matiu 19:13-15; Lug 18:15-17)
13Le bininfob biba nan ta bi buwaab ki dan Yisa ban, ki ke un ta u nɔɔ ki paan bi bu-u, amaa le u bɔɔnɔɔb fu bi bu. 14Waah nan kan bi tann bi bu-n ni, le u ŋuul nan fii bi bu, le u bei bi ke, “Ni che nbuwaab nmɔn n dan n ban ni, ki laa ŋɔɔ bi, nbuwaab nan kaah be man nan Uwonbɔr a niin a naamin ye bi yaan le. 15Ibamɔn le n bei ni nan, wan kaa gaa Uwonbɔr a naam ke kibigin ke, waa li kɔɔ mi ni.” 16Le ki gaa nbuwaab nmɔn, le ki ta u nɔɔ ki paan paan bi bu, ki kaab jaa bi bu.
Ujɔɔndaan uba a bɔr
(Matiu 19:16-30; Lug 18:18-30)
17Yisa kaah nan nyan ni yaan ki chaa nmɔn, le uja uba guun kenn u ki gbaan u nintogil, le ki baan u ke, “Wan wɔɔn ŋan, n yin ŋa nii wee ki nan kan limiɛfol lan kaa jɔɔ ndiɛm aa?”
18Le Yisa jiin ki bei u ke, “Ba ŋa wee a yim uninfo ŋan naa? Uba kaa be ki ye uninfo ŋan ni, see Uwonbɔr a binba. 19A pii nyi Uwonbɔr a siim kaah wɔɔn man, ‘Laa ku uninfo; laa tun iwanchɔgin toon ni, laa su, laa ji tibɔkar a siɛra ki bii a kpiɛgi; laa ŋal bininfobi, ki li tenn a baa nin a na jilimau.’”
20Le uja-n bei u ke, “Wan wɔɔn, n pii chee ki tun ni niɛ nan n nbuwaan nin le.”
21Le Yisa lig u chimm nin njiɛm, le ki nan bei u ke, “Niwann niba kpeŋileŋ li pariŋ; li kun na ki tan kɔɔr ŋaah jɔɔ niwann nan biɛn na, wee ki ta iligin ki sei faladama, wee ki nan kan njɔɔm Uwonbɔr a niin, wee ki ni li nɔɔm.” 22Uja-n kaah nan gbir man nin, le u sufu nan bii takpem, le u nan jir ki kun nin npoobiin, u nan jɔɔ tiwann takpem pam.
23Le Yisa nan gbiɛ lig u bɔɔnɔɔbin, le ki bei bi ke, “Ni li pɔɔ pam nin bijɔɔndam n nan kɔɔ Uwonbɔr a niin a naamin.”
24U bɔr nmɔn nan ŋa bi ligaril le; le u ji mann ki bei bi ke, “N buwaab, ni pɔɔ pam nin uninfosaal n nan fir kɔɔ Uwonbɔr a niin a naamin. 25Ni pɔɔ paa nin ujɔɔndaan n kɔɔ Uwonbɔr a niin a naamin ki jon nin alakoomi kaah li kɔɔ siɛrig a bolin na.”
26U mɔleen nmɔn nan gar bi pam, le bi nin baan tab, “Ke ni ye man ke ŋma pii li fir ŋmaraa?”
27Le Yisa lig bi ki bei bi ke, “Uninfosaal kaa li firi amaa Uwonbɔr ma li fir tun niwann biɛn.” 28Le Piita bei u ke, “Liga, tim jiɛn niwann biɛn le ki nɔɔŋ.” 29Le Yisa bei bi ke, “Ibamɔn le n bei ni nan, wan biɛn jiɛn u niin, bee u watiib nin u kpetiib, bee u ninsiɛb, bee u nam, bee u baam, bee u buwaab, bee u kpaab, n yinl bu nin tibɔŋann nin bu ke, 30u na li kan tiwann ke tin jo waah nan jiɛn tiwann tan ni biɛn. U na li kan iniin, nin watiib nin kpetiib, nin ninsiɛb, nin nam, nin nbum, nin tikpaann, a kobig kobig kutingbɔŋ nan yaan, ki biɛ na li kan limugil ki kpiɛ; le n-yonn man chaan nan le un nan kan limiɛfol lan kaa jɔɔ ndiɛm nan. 31Bisanliib na li ŋa bibɔɔnpaab, le bibɔɔnpaab mu na li ŋa bisanliib.
Yisa kaah nan pag u kum a bɔr nfimitaa man
(Matiu 20:17-19; Lug 18:31-34)
32Iyaayoo nmɔn le Yisa nin u bɔɔnɔɔb nan nyan nsan bu ki do Jerusalam, le u gaa bi sam ki liin, le ni gar bi, le bijawaam mu ji choo kuninfogbaluŋ kan nan pa bi bɔɔn nin. Le u yaan ti nan ta u tooi piig nin bilee-n ki nyan ngbaan, ki wɔɔn bi nan li ŋa u, 33ke laa, “Ti yin do Jerusalam le nan, nan yaan wee bi li ta Uninfosaal a Big ki ŋubin kumanug a yudam nin ban wɔɔnn nsiim a nɔɔn le bin ji u tibɔr ki ke bin ku u, le ki ta u ki sei ban kaa ye Juu yaab nan; 34le bi li laa u ki sii timɔsann ki ŋaa u ki boo u, ki nan ku u, amaa ni ween itaa daal u li fii nkumin.”
Jemisi nin Jɔnn kaah miɛ Yisa tininkper man
(Matiu 20:20-28)
35Iyaayoo le Jemisi nin Jɔnn, ban nan ye Zebedi a naachim nan, nan dan Yisa ban ki nan bei u ke, “Wan wɔɔn, ti ban a tun niba le ki sei ti.”
36Le u baan bi ke, “Ni ban n tun ba sei naa?”
37Le bi jiin ki bei u ke, “N-yonn man wee a nan jin a naamin ki kan npɔɔn ke, a che ti ni uba n kal a nɔɔjiim paam wee u miɛnin mu n kal a nɔɔgam paam.#Mag 15:27
38Le u jiin ki bei bi ke, “Naa nyi naah miɛ niwann nan ni. Ni li fir nyu kiyiinyɔɔg kan wee n yin nyu nan naa? Bee ni li fir ki ji fala ke maah yin ji man nan naa?
39Le bi jiin ki ke, ti li fir.
Le u bei bi ke, “Ni sin li fir nyu kiyiinyɔɔg nmɔn yaan ki biɛ li fir ji fala ke maah yin ji man ni. 40Amaa naa ye min le li gann wan na yin kal nnɔɔjiim paam bee n nɔɔgami. Uwonbɔr le yin gann ban na yin kal nkaam nmɔn bu.”
41Le Yisa a tooi piigin kaah gbir man nin, le bi ŋuui fii Jemisi nin Jɔnn bu. 42Le Yisa yin bi biɛn ki lagin u ban, ki bei bi ke, “N tɔɔl nyi ke bininfob ban yin biba dulinya nan a yudam nan don biba le; le ban mu jɔɔ tininkper nan mu ŋmag bininfob npɔɔn le. 43Amaa ni laa be man ni. Ni ye uba ban tininkper ke, see ke u ta uba ki ŋa ni biɛn nan a yomu; 44Wan mu ban un ŋa uyudaan ke, see ke u ŋa u ba ni biɛn nan a yomu; 45Uninfosaal a Big kaa dan ke bininfob n tun ki sei u le, amaa u dan ke u nan tun ki sei bininfob le, le ki ji ta u miɛl ki da bininfob takpem.”
Yisa kaah ligir ujɔɔn Batimiyasi a num man
(Matiu 20:29-34; Lug 18:35-43)
46Le Yisa nin u bɔɔnɔɔb dan Jeriko, ki nan nan nya, le bi ma nin bininfob takpem nɔɔ; le ujɔɔn uba nan be ki miɛ, u nan ka nsan gbaan le bi yi u ke Batimiyasi, u nan ye Timiyasi a bija le. 47Waah nan nan gbir Yisa wan ye Nazarif a ninfo bu n-yonn man nin, le u yigin papaab ki ke, “Yisa, Ubɔr Defid a yaabil, sam kunyunyunbaag ni.”
48Le bininfob takpem nan tan u bu ke u ŋmin na. Le u ji mann tiɛn papaab ke, “Defid a yaabil, sam kunyunyunbaag ni.”
49Le Yisa sir ki bei ke, “Ni yin u ni.” Le bi yin u, ki bei u ke, “Che a sufu li pɔɔu. U yiŋ. Fii sira.” 50Le ujɔɔn nmɔn pir u daala takpoŋ ki bil, le ki fii sir, ki dan Yisa ban.
Le Yisa baan u ke, “A ban n tun ba ki seiŋaa?”
51Le u jiin ki ke, “N baa, n ban a ligir n num le.”
52Le Yisa bei u ke, “Tɔ, li chaau. Ŋaah ŋaam yada n bu le a num ligir.” Libol nmɔn, le u num ligir, le u nɔɔ Yisa, le bi chaa.
Currently Selected:
Mag 10: KUGL
Highlight
Share
Copy
Want to have your highlights saved across all your devices? Sign up or sign in
Komba New Testament © Bible Society of Ghana, 2014.
