དཱ༌ནི༌ཨེལ༌ 2
2
ནེ༌བུ༌ཀཱ༌ནེ༌ཟཱར༌རི༌ ཉི༌ལམ༌།
2:1-23
1ནེ༌བུ༌ཀཱ༌ནེ༌ཟཱར༌རི༌ ཝང༌སྲུལ༌ལི༌ ལོ༌ ཉིས༌པའེ༌ ནང༌ང༌ གྱལ༌པོའ༌ མིན༌དྲ༌ ཉི༌ལམ༌ཞིག༌ ཐོང༌ ཀ༌བོའེ༌ ཁོའེ༌ སེམས༌ལ༌ ནགས༌ སྲན༌ཏྲེ༌ སྟན༌པ༌ ཁོའ༌ ཉིད༌ མ༌ ཡོངས༌། 2ཏེ༌ནེ༌ གྱལ༌པོའེ༌ ཉི༌ལམ༌ ཐོང༌ཁན༌བོ༌ ཤད༌ཅེས༌ལ༌ ཁོ༌རང༌ངི༌ མོ༌ ཏབ༌ཁན༌, ཤི༌ཁན༌ནི༌ སེམས༌ཉིད༌ བོད༌ཁན༌, སྐར༌མ༌ རྩི༌ཁན༌ དང༌ ཆོས༌ངན༌ ཅོ༌ཁན༌ གུན༌ བོདས༌། ཁོང༌ ཚང༌མ༌ ཡོངས༌ཏེ༌ གྱལ༌པོའེ༌ དུན༌ལ༌ ལངས༌ཏེ༌ དུག༌ག༌ཅིག༌, 3གྱལ༌པོའེ༌ ཁོང༌གུན༌ལ༌ ཟེརས༌, “ང༌ ངའེ༌ སེམས༌ལ༌ ནགས༌ སྲན༌ཏྲེ༌ སྟན༌ཁན༌ནི༌ ཉི༌ལམ༌ཞིག༌ ཐོང༌, ངའ༌ ཏེ༌བོའེ༌ ཏོན༌བོ༌ ཧ༌གོ༌ ཉིན༌ རག༌།”
4ཏེ༌ནེ༌ སྐར༌མ༌ རྩི༌ཁན༌གུན༌ནི༌ ཨ༌རམ༌པའེ༌ སྐད༌དི༌ ནང༌ང༌ གྱལ༌པོའ༌ ལན༌ཏངས༌, “གྱལ༌པོ༌ སྐུན༌དུན༌ནི༌ སྐུ༌ཚེ༌ རིང༌ཤིག༌། ཉེ༌རང༌ངི༌ ཞབ༌ཤི༌གུན༌ལ༌ ཉི༌ལམ༌བོ༌ ཤད༌ད༌ ཛད༌ ཏེ༌ནེ༌ ང༌ཞའེ༌ ཏེ༌བོའེ༌ ཏོན༌བོ༌ ཤད༌ཨིན༌།”
5ཨིན༌ནའང༌ གྱལ༌པོའེ༌ ཁོང༌གུན༌ལ༌ ཟེརས༌, “ཀལ༌ཏེས༌ ཁྱོ༌རང༌གུན༌ནི༌ ངའེ༌ ཉི༌ལམ༌ དང༌ ཏེ༌བོའེ༌ ཏོན༌བོ༌ མ༌ཤད༌ན༌ ངའེ༌ ཁྱོ༌ཞ༌གུན༌ ཏུམ༌པ༌ ཏུམ༌པའེ༌ ནང༌ང༌ ཅད༌ཏེ༌ ཁྱོ༌ཞའེ༌ ཁང༌པ༌ ཤིགས༌ཏེ༌ མེད༌ཁན༌ ཅོ༌ཅེས༌པོ༌ ངའེ༌ ཐག༌ཅད༌ ཏན༌ཏན༌ ཨིན༌། 6ཨིན༌ནའང༌ ཉི༌ལམ༌ དང༌ ཏེ༌བོའེ༌ ཏོན༌ ཤད༌ཁན༌བོའ༌ ངའེ༌ སོལ༌རས༌ དང༌ རྩི༌ཝ༌ ཀྲག༌པོ༌ ཏང༌ཨིན༌། ཏེ༌བོའེ༌ཕིའ༌ ཉི༌ལམ༌ དང༌ ཏེ༌བོའེ༌ ཏོན༌བོ༌ ངའ༌ ཤོད༌།”
7ཁོང༌གུན༌ནི༌ ཡང༌སྐྱར༌ ཟེརས༌, “གྱལ༌པོ༌ ཉེ༌རང༌ངི༌ ཞབ༌ཤི༌གུན༌ལ༌ ཉི༌ལམ༌བོ༌ ཤད༌ད༌ ཛད༌ ཏེ༌ནེ༌ ང༌ཞའེ༌ ཏེ༌བོའེ༌ ཏོན༌བོ༌ ཤད༌ཨིན༌།”
8གྱལ༌པོའེ༌ ལན༌ཏངས༌, “ང༌ གྱུས༌ཡོད༌ ཁྱོ༌ཞ༌གུན༌ནི༌ ཏུས༌ ཕུད༌ཨིན༌ ཨིན༌ནོག༌ ཅིའ༌ཟེར༌ན༌ ངའེ༌ ཟེར༌ཁན༌བོ༌ ཏན༌ཏན༌ ཁྱོ༌ཞའ༌ ཉམ༌པོ༌ ཅོ༌ཅེས༌ ཁྱོ༌ཞའ༌ གྱུས༌ཨིན༌ནོག༌། 9ཁྱོ༌ཞའེ༌ ཉི༌ལམ༌ མ༌ཤད༌ན༌ ཁྱོ༌ཞའ༌ ཚང༌མ༌ ཆད༌པ༌ ཕོག༌ཅེས༌ ཏན༌ཏན༌ ཨིན༌ནོག༌། ང༌ གོབ༌སྐོར༌ཅེས༌ལ༌ ཁའ༌ ཆམས༌ཏེ༌ ཁྱོ༌ཞའེ༌ ངའེ༌ སམ༌བའེ༌ ནང༌ང༌ གྱུར༌ཇ༌ ཡོང༌ང༌ནོག༌ སམ༌མ༌ རག༌ག༌? ཏ༌ ཉི༌ལམ༌བོ༌ ཤོད༌ ཏེ༌ནེ༌ ཏེ༌བོའེ༌ ཏོན༌ ཤད༌ཁན༌བོའེ༌ཀ༌ ང༌ དེན༌ ཤེས༌ཤེས༌ རག༌།”
10ཏེ༌ནེ༌ སྐར༌རྩིས༌ ཏང༌ཁན༌གུན༌ནི༌ གྱལ༌པོའ༌ ལན༌ ཏངས༌, “ཇིག༌རྟེན༌ནི༌ ནང༌ང༌ སུའང༌ ཉེ༌རང༌ངི༌ ཉི༌ལམ༌ ཤད༌ མི༌ ཉན༌། ཀྲག༌པོ༌ ཡ༌ ཝང༌ཅན༌ གྱལ༌པོ༌ སུ༌ཞིག༌གིའང༌ ཁོ༌རང༌ངི༌ མོ༌ ཏབ༌ཁན༌ ཡ༌ ཤི༌ཁན༌ནི༌ སེམས༌ཉིད༌ བོད༌ཁན༌ ཡ༌ སྐར༌རྩིས༌ ཏང༌ཁན༌ གུན༌ལ༌ འི༌ ཙོགས༌སི༌ ཏྲི༌ཝ༌ མ༌ནེ༌ མ༌ ཏྲིའ༌ ཡོད༌གྲོ༌། 11གྱལ༌པོ༌ ཉེ༌རང༌ངི༌ ཏྲི༌ཝ༌བོ༌ མ༌ ཀགས༌པོ༌ཞིག༌ ཨིན༌ནོག༌། ལྷ༌ལྷ༌མོ༌གུན༌ མན༌པ༌ ཞན༌ སུའང༌ ཏེ༌བོ༌ ཤད༌ མི༌ཐུབ༌ ཨིན༌ནའང༌ ལྷ༌ལྷ༌མོ༌གུན༌ མི༌ ཕྲོའ༌ དུག༌ག༌ མ༌ནོག༌།”
12ཏེ༌བོའེ༌ ཞས༌ཏེ༌ གྱལ༌པོའ༌ མ༌ སྲན༌ཏྲེ༌ སྲོ༌ ཡོངས༌ ཡང༌ ཁོའེ༌ བ༌བེ༌ལོན༌ནི༌ ནང༌ང༌ ཁོང༌གུན༌ ཙོགས༌ ཤེས༌རབ༌ཅན༌ མི༌ ཚང༌མ༌ སད༌ཅེས༌ལ༌ བཀའ༌ ཏངས༌། 13ཏེ༌ནེ༌ གྱལ༌པོའེ༌ བཀའ༌ ནང༌ཞིན༌ ཤེས༌རབ༌ཅན༌ མི༌ ཚང༌མ༌ སད༌ཅེས༌སི༌ བཀའ༌རྒྱ༌ སྤེལས༌ ཡང༌ མག༌མི༌གུན༌ནི༌ དཱ༌ནི༌ཨེལ༌ དང༌ ཁོའེ༌ ཛ༌འོ༌གུན༌ སད༌ཅེས༌ལ༌ ཙལས༌།
14གྱལ༌པོ༌ སྲུང༌ཁན༌ནི༌ མག༌མི༌ འུ༌སྐྱོང༌ ཨ༌རི༌འོཅ༌ ཁོང༌གུན༌ སད༌ད༌ ཡོང༌ང༌ཅིག༌ དཱ༌ནི༌ཨེལ༌ལི༌ མ༌ ཤེས༌རབས༌ དང༌ རིག༌པ༌ ཉམ༌པོ༌ ཁོའ༌ ཏྲིས༌, 15“གྱལ༌པོའེ༌ འི༌ཙོགས༌ སྙིང༌རྗེ༌ མེད༌ཁན༌ནི༌ བཀའ༌ ཅིའ༌ སལ༌ཏེ༌ ཨིན༌ནོག༌?” ཏེ༌ནེ༌ ཨ༌རི༌འོཅ༌ཅི༌ ཁོའ༌ ཏེ༌བོའེ༌ སྐོར༌ ཞིབ༌སལ༌ ཅོས༌ཏེ༌ ཤདས༌། 16ཏེ༌བོ༌ ཚོར༌ར༌ཅིག༌ དཱ༌ནི༌ཨེལ༌ གྱལ༌པོ༌ ཡོད༌ས༌ སོང༌ཏེ༌ ཁོའེ༌ ཉི༌ལམ༌མི༌ ཏོན༌བོ༌ ཤད༌ཅེས༌ལ༌ ཁོའ༌ ཏུས༌ སལ༌ ཞུས༌།
17ཏེ༌ནེ༌ དཱ༌ནི༌ཨེལ༌ ལོགས༌ཏེ༌ ཁང༌པ༌ སོང༌ ཡང༌ ཁོ༌རང༌ངི༌ ཛ༌འོ༌ ཧ༌ན༌ནཱི༌ཡཱ༌, མི༌ཤཱེལ༌ དང༌ ཨ༌ཟར༌ཡཱ༌ གུན༌ལ༌ ཏེ༌ ཚང༌མ༌ ཤདས༌ 18ཡང༌ བ༌བེ༌ལོན༌པ༌ ཤེས༌རབས༌ཅན༌ མི༌གུན༌ ཐེས༌ཏེ༌ ཁོང༌ ཚང༌མ༌ མི༌སད༌ཅེས༌ལ༌ ནམ༌ཁའེ༌ དཀོན༌མཆོག༌ག༌ ཁོང༌གུན༌ལ༌ སྙིང༌རྗེ༌ ཛད༌ཏེ༌ ཏེ༌ སང༌ཝའེ༌ ཉི༌ལམ༌ དང༌ ཏེ༌བོའེ༌ ཏོན༌ སྔོན༌ཅུག༌ག༌ ཛད༌ཅེས༌ལ༌ མོས༌ལམ༌ ཞུས༌ ཟེརས༌། 19ཚན༌ལ༌ ཞལ༌ཟིགས༌སི༌ ནང༌ང༌ དཀོན༌མཆོག༌གི༌ དཱ༌ནི༌ཨེལ༌ལ༌ ཉི༌ལམ༌ དང༌ ཏེ༌བོའེ༌ ཏོན༌བོ༌ སྔོན༌ཅུག༌ག༌ ཛདས༌ ཡང༌ ཁོའེ༌ ནམ༌ཁའེ༌ དཀོན༌མཆོག༌ག༌ སྟོད༌པ༌ ཕུལ༌ཏེ༌ ཟེརས༌,
20“དཀོན༌མཆོག༌གི༌ ཚན༌ལ༌ ཏུས༌གྱུན༌ནེ༌གྱུན༌ སྟོད༌པ༌ ཕུལ༌,
ཤེས༌རབས༌ དང༌ ཁྱུད༌ ཁོང༌ངི༌ ཨིན༌ནོག༌།
21ཁོང༌ང༌ ནམ༌ལ༌ དང༌ ཏུས༌ གྱུར༌ ཐུབ༌བ༌ནོག༌།
གྱལ༌པོ༌གུན༌ སྟག༌ཅེས༌ དང༌ ཕབ༌ཅེས༌ ཁོང༌ངི༌ ཛད༌ད༌ནོག༌།
ཁོང༌ངི༌ མི༌ ཁས༌པ༌གུན༌ལ༌ ཤེས༌རབས༌,
དང༌ ཧ༌གོའ༌ ཐད༌ཁན༌གུན༌ལ༌ རིག༌པ༌ སལ༌ལ༌ནོག༌།
22ཁོང༌ངི༌ ཏིང༌ཅན༌ སྦས༌ཏེ༌ བོར༌ཁན༌གུན༌ སྔོན༌ཅུག༌ག༌ ཛད༌ད༌ནོག༌།
མུན༌གྲིག༌གི༌ ནང༌ང༌ ཡོད༌ཁན༌གུན༌ ཁོང༌ངི༌ ཁྱེན༌ན༌ ཛད༌ད༌ནོག༌
ཅིའ༌ཞུ༌ན༌ ཁོང༌ངི༌ ནང༌ང༌ འོད༌ ནས༌ཏེ༌ ཡོད༌ཏེ༌ ཨིན༌ནོག༌།
23ངའེ༌ ཕ༌མེས༌པོ༌གུན༌ནི༌ དཀོན༌མཆོག༌ལེ༌ ཉེ༌རང༌ང༌ ངའེ༌ སྟོད༌པ༌ ཕུལ༌ཏེ༌ ཐུག༌རྗེ༌ཆེ༌ ཞུའད༌།
ཉེ༌རང༌ངི༌ ང༌ ཤེས༌རབས༌ དང༌ སྟོབས༌ སལ༌ལ༌ ཛདས༌།
ང༌ཞའེ༌ ཏྲིའ༌ ཛད༌ཁན༌བོ༌ ཉེ༌རང༌ངི༌ ངའ༌ སྔོན༌ཅུག༌ག༌ ཛདས༌།
ཉེ༌རང༌ངི༌ གྱལ༌པོའེ༌ ཉི༌ལམ༌བོ༌ ང༌ཞའ༌ ཤད༌ད༌ ཛདས༌།”
དཱ༌ནི༌ཨེལ༌ལི༌ གྱལ༌པོའེ༌ ཉི༌ལམ༌མི༌ ཏོན༌ ཤདས༌།
2:24-49
24ཏེ༌ནེ༌ དཱ༌ནི༌ཨེལ༌, བ༌བེ༌ལོན༌པ༌ ཤེས༌རབས༌ཅན༌ མི༌གུན༌ སད༌ཅེས༌ལ༌ གྱལ༌པོའེ༌ སྐོས༌ཁན༌ ཨ༌རི༌འོཅ༌ ཡོད༌ས༌ སོང༌ཏེ༌ ཟེརས༌, “བ༌བེ༌ལོན༌པ༌ ཤེས༌རབས༌ཅན༌ མི༌གུན༌ སད༌ད༌ མ༌ཛད༌, ང༌ གྱལ༌པོ༌ ཡོད༌ས༌ ཁྱེར༌ ཡང༌ ངའེ༌ ཁོང༌ངི༌ ཉི༌ལམ༌མི༌ ཏོན༌བོ༌ ཤད༌ཨིན༌།”
25ཨ༌རི༌འོཅ༌ཅི༌ ཁོ༌ ཏེན༌ན༌མལ༌ལ༌ གྱལ༌པོ༌ ཡོད༌ས༌ ཁྱེརས༌ ཡང༌ ཟེརས༌, “ཡ༌ཧུ༌དཱ༌པ༌ ཟུམས༌ཏེ༌ ཁྱོང༌ཁན༌གུན༌ནི༌ ཕྲོ༌ནེ༌ ངའ༌ ཉེ༌རང༌ངི༌ ཉི༌ལམ༌མི༌ ཏོན༌ ཤད༌ ཉན༌ཁན༌ མི༌ཞིག༌ ཐོབ༌།”
26གྱལ༌པོའེ༌ བེལ༌ཏེ༌ཤ༌ཟར༌ ཟེར༌ཁན༌ དཱ༌ནི༌ཨེལ༌ལ༌ ཏྲིས༌, “ཁྱོ༌རང༌ང༌ ངའ༌ ཐོང༌ཁན༌ནི༌ ཉི༌ལམ༌བོ༌ ཤད༌ཏེ༌ ཏེ༌བོའེ༌ ཏོན༌ གྱུར༌ ཉན༌ཅེས༌ རག༌ག༌?”
27དཱ༌ནི༌ཨེལ༌ལི༌ ལན༌ ཏངས༌, “ཤེས༌རབ༌ཅན༌ མི༌ ཡ༌ ཆོས༌ངན༌ ཅོ༌ཁན༌ ཡ༌ སྐར༌མ༌ རྩི༌ཁན༌ ཡ༌ ཤི༌ཁན༌ནི༌ སེམས༌ཉིད༌ བོད༌ཁན༌ སུ༌ཞིག༌གའང༌ གྱལ༌པོའེ༌ ཉི༌ལམ༌མི༌ སང༌ཝ༌བོ༌ ཤད༌ མི༌ཉན༌, 28ཨིན༌ནའང༌ ནམ༌ཁའེ༌ ནང༌ང༌ ཞུགས༌ཁན༌ དཀོན༌མཆོག༌གི༌ སང༌ཝ༌བོ༌ ཤད༌ ཐུབ༌བ༌ནོག༌། ཁོང༌ངི༌ གྱལ༌པོ༌ ནེ༌བུ༌ཀཱ༌ནེ༌ཟཱར༌ལ༌ ཡོང༌ཅེས༌ཅན༌ནི༌ ཏུས༌སི༌ སྐོར༌ལ༌ ཤད༌ད༌ ཛད༌ཏེ༌ ཨིན༌ནོག༌། ཉེ༌རང༌ ཉིད༌ལོགས༌ཏེ༌ ཡོད༌ ཟ༌ནེ༌ ཐོང༌ཁན༌ནི༌ ཉི༌ལམ༌བོ༌ ནི༌:”
29“ཉེ༌རང༌ ཉིད༌ལོགས༌ཏེ༌ ཡོད༌ ཟ༌ནེ༌ ཉེ༌རང༌ངི༌ སམ༌བ༌ ཡོང༌ཅེས༌ཅན༌ནི༌ ཏུས༌སི༌ ཆོགས༌ལ༌ སོང༌ཏེ༌ སང༌ཝ༌ སྔོན༌ཅུག༌ག༌ ཛད༌ཁན༌ དཀོན༌མཆོག༌གི༌ ཉེ༌རང༌ང༌ ཇུང༌ཅེས༌ཅན༌གུན༌ སྟན༌ན༌ ཛད༌ཏེ༌ ཨིན༌ནོག༌། 30ཞན༌ ཚང༌མའེ༌ སང༌ ཤེས༌རབས༌ཅན༌ ཨིན༌ཅེས༌པོའེ༌ ང༌ འི༌ སང༌ཝའེ༌ ཉི༌ལམ༌མི༌ ཏོན༌ ཤེས༌ཏེ༌ མ༌ནོག༌ ཨིན༌ནའང༌ དཀོན༌མཆོག༌གི༌ ཉེ༌རང༌ང༌ འི༌ ཉི༌ལམ༌ ཐོང༌ཁན༌ནི༌ ཏོན༌ དང༌ ཏེ༌བོའེ༌ སྐོར༌ལ༌ ཉེ༌རང༌ངི༌ སམ༌ཁན༌བོ༌ ཧ༌གོ༌ཅུག༌ག༌ ཛད༌ཅེས༌པོ༌ ཨིན༌ནོག༌།”
31“ཉི༌ལམ༌མི༌ ནང༌ང༌ གྱལ༌པོ༌ ཉེ༌རང༌, མ༌ ཆེན༌མོ༌, ལྡང༌ཤན༌, མ༌ ཧ༌ལས༌ཤེས༌ དང༌ ཇིགས༌ནང༌ཅན༌ནི༌ སྐུན༌དྲ༌ ཞིག༌གི༌ དུན༌ལ༌ ལངས༌ཏེ༌ དུག༌པིན༌། 32ཏེ༌ སྐུན༌དྲའེ༌ གོ༌ ཅའང༌ མ༌དྲེས༌ཁན༌ སེར༌རི༌ དྲང༌ དང༌ ལག༌པ༌གུན༌ མུལ༌ལི༌, ཀྲོད༌པ༌ དང༌ རྐང༌པའེ༌ ཤལ༌དིག༌ ཟངས༌སི༌, 33རྐང༌གུན༌ ལྕགས༌སི༌ ཡང༌ རྐང༌པ༌ ཉིས༌ཀོ༌ ལྕགས༌ དང༌ མར༌ཀ༌ལག༌ དྲེས༌ཁན༌ནི༌ ཅོས༌ཏེ༌ དུག༌པིན༌། 34ཉེ༌རང༌ངི༌ ཟིགས༌ཨིན༌ ཡོད༌ ཟ༌ནེ༌ མི༌ ལག༌པ༌ནེ༌ མ༌ཅད༌ཁན༌ ཕོ༌ལོངས༌ བུད༌ཏེ༌ མར༌ཀ༌ལག༌ དང༌ ལྕགས༌ལ༌ ཅོ༌ཁན༌ནི༌ སྐུན༌དྲའེ༌ རྐང༌པ༌ ཕོག༌ཏེ༌ ཏེ༌གུན༌ ཁྲེས༌ཏོར༌ ཅོས༌། 35ཏེ༌ནེ༌ སྐུན༌དྲའ༌ གང༌པོ༌ གྱེལ༌ཏེ༌ སེར༌, མུལ༌ དང༌ ལྕགས༌ ཚང༌མ༌ ཁྲེས༌ཏོར༌ སོང༌ ཡང༌ ཡར༌རི༌ ཏུས༌ལ༌ ཡུལ༌ཐག༌ག༌ ཡོད༌ཁན༌ནི༌ ཕུག༌མ༌ ཙོགས༌ལ༌ ལུངས༌པོའེ༌ ཐག༌རིང༌ང༌ ཁྱེར༌ཏེ༌ ཏེ༌བོ༌ ཡོད༌ཁན༌ནི༌ མལ༌ལའང༌ མ༌ལུས༌ ཨིན༌ནའང༌ སྐུན༌དྲའ༌ ཕོག༌ཁན༌ནི༌ རྡོའ༌བོ༌ རི༌ ཆེན༌མོ༌ཞིག༌ གྱུར༌ཏེ༌ ཇིག༌རྟེན༌ གང༌པོ༌ གང༌།”
36“ཏེ༌བོ༌ ཉེ༌རང༌ངི༌ ཉི༌ལམ༌བོ༌ ཨིན༌པིན༌, ཏ༌ ངའེ༌ གྱལ༌པོའ༌ ཏེ༌བོའེ༌ ཏོན༌བོ༌ ཤད༌ཨིན༌། 37གྱལ༌པོ༌ལེ༌, ཉེ༌རང༌ ཚང༌མའེ༌ སང༌ ཀྲག༌པོ༌ གྱལ༌པོ༌, ནམ༌ཁའེ༌ དཀོན༌མཆོག༌གི༌ ཉེ༌རང༌ང༌ གྱལ༌སྲིད༌, ཁྱུད༌, ཝང༌ དང༌ རྩི༌ཝ༌ སལ༌ཏེ༌ ཨིན༌ནོག༌། 38ཁོང༌ངི༌ ཇིག༌རྟེན༌ གང༌པོའེ༌ མི༌, ནམ༌ཁའེ༌ ཅ༌ དང༌ ནག༌ཚོགས༌སི༌ སེམས༌ཅན༌ ཚང༌མ༌ ཉེ༌རང༌ངི༌ ཆག༌ག༌ སལ༌ལ༌ ཛད༌ཏེ༌ ཉེ༌རང༌ ཏེ༌ ཚང༌མའེ༌ཀ༌ ཝང༌ སྲུལ༌ཁན༌བོ༌ ཛདས༌། ཉེ༌རང༌ སེར༌རི༌ གོ༌ ཨིན༌ནོག༌།”
39“ཨིན༌ནའང༌ ཉེ༌རང༌ངི༌ སྟིང༌ནེ༌ ཉེ༌རང༌ངི༌ སང༌ འུ༌ཐུག༌ ཡོད༌ཁན༌ གྱལ༌སྲིད༌ ཞག༌གི༌ ཉེ༌རང༌ངི༌ ནས༌ས༌ ལེན༌ཨིན༌། ཏེ༌ སྟིང༌ནེ༌ ཟངས༌སི༌ ཨིན༌ཁན༌ གྱལ༌སྲིད༌ སུམ༌པའེ༌ ཇིག༌རྟེན༌ གང༌པོའེ༌ཀ༌ ཝང༌ སྲུལ༌ཨིན༌། 40སྟིང༌ཇུག༌པོའེ༌ཀ༌ ལྕགས༌ ཙོགས༌ སྲན༌ཏྲེ༌ ཡོད༌ཁན༌ གྱལ༌སྲིད༌ ཞི༌པ༌ བིང༌ཨིན༌། ལྕགས༌སི༌ ཞན༌ ཅ༌ལག༌གུན༌ ཁྲེས༌ཏོར༌ ཅོའ༌ ཙོགས༌ལ༌ ཏེ༌ གྱལ༌སྲིད༌པོའེ༌ ཞན༌ གྱལ༌སྲིད༌ ཚང༌མ༌ ཅགས༌ཏེ༌ ཁྲེས༌ཏོར༌ ཅོ༌ཨིན༌། 41ཉེ༌རང༌ངི༌ ཐོང༌ཁན༌ མར༌ཀ༌ལག༌ དང༌ ལྕགས༌ དྲེས༌ཁན༌ནི༌ རྐང༌པ༌གུན༌ ཙོགས༌ལ༌ ཏེ༌ གྱལ༌སྲིད༌པོའ༌ པོ༌བུད༌ཏེ༌ ཅིག༌གྲིལ༌ མེད༌ཁན༌ ཆེན༌ ཨིན༌ནའང༌ མར༌ཀ༌ལག༌ དང༌ ལྕགས༌ དྲེས༌ཁན༌ ཙོགས༌ལ༌ ཏེ༌གུན༌ནི༌ ནང༌ང༌ ལྕགས༌ ཙོགས༌ ཤེད༌ ཙ༌པིག༌ ཡོང༌ཨིན༌། 42ལྕགས༌ དང༌ མར༌ཀ༌ལག༌ དྲེས༌ཁན༌ ཀང༌པ༌ ཙོགས༌ལ༌ ཏེ༌ གྱལ༌སྲིད༌དི༌ ཁག༌ ཁ༌ཅིག༌ ཤེད༌ཅན༌ ཡང༌ ཁག༌ ཁ༌ཅིག༌ ཆག༌ ཆོག༌ཆོག༌ ཡོང༌ཨིན༌། 43ལྕགས༌ དང༌ མར༌ཀ༌ལག༌ དྲེས༌ཁན༌ ཙོགས༌ལ༌ ཏེ༌ གྱལ༌སྲིད༌དི༌ ནང༌ང༌ མི༌ སྣ༌ཙོགས༌ དྲེས༌ཏེ༌ ཅིག༌གྲིལ༌ མི༌ ལུས༌ ཀ༌ཟུག༌ ལྕགས༌ དང༌ མར༌ཀ༌ལག༌ གྱལ༌ལ༌ དྲེས༌ས༌ མ༌ནོག༌།”
44“ཏེ༌ གྱལ༌པོ༌གུན༌ནི༌ ཝང༌སྲུལ༌ལི༌ ཏུས༌ལ༌ ནམ༌ཁའེ༌ དཀོན༌མཆོག༌གི༌, མ༌ནེ༌ ཤིག༌ མི༌ ཉན༌ཅེས༌ ཡ༌ སུའང༌ ང༌ཡོག༌ག༌ ཁྱོང༌ མི༌ཉན༌ཁན༌ གྱལ༌སྲིད༌ཞིག༌ ཙུག༌ག༌ ཛད༌ཨིན༌། ཏེ༌ གྱལ༌སྲིད༌དི༌ ཞན༌ གྱལ༌སྲིད༌གུན༌ མེད༌ཁན༌ ཅོས༌ཏེ༌ ཁོང༌རང༌ངི༌ གྱལ༌སྲིད༌པོ༌ ཏུས༌གྱུན༌ནི༌ཕིའ༌ ཙུག༌ག༌ ཛད༌ཨིན༌། 45མི༌ ལག༌པ༌ ཉམ༌པོ༌ མ༌ ཅག༌ཁན༌ རིའི༌ རྡོའ༌ བུད༌ཁན༌བོའེ༌ ལྕགས༌, མར༌ཀ༌ལག༌, ཟངས༌, མུལ༌ དང༌ སེར༌ གུན༌ ཁྲེས༌ཏོར༌ ཅོ༌ཁན༌ནི༌ ཏོན༌བོ༌ ཏེ༌བོ༌ ཨིན༌ནོག༌།”
“ཀྲག༌པོ༌ དཀོན༌མཆོག༌གི༌ གྱལ༌པོ༌ ཉེ༌རང༌ང༌, མ༌ཡོངས༌པའེ༌ ཏུས༌སི༌ ནང༌ང༌ ཇུང༌ཅེས༌པོ༌ སྟན༌ན༌ ཛད༌ཏེ༌ ཨིན༌ནོག༌། འི༌བོ༌ ཏན༌ཏན༌ལ༌ ཉེ༌རང༌ངི༌ ཉི༌ལམ༌ ཡང༌ ཏེ༌བོའེ༌ ཏོན༌ ཨིད༌ཤེས༌ ཐུབ༌བ༌ ཨིན༌ནོག༌།”
46ཏེ༌ནེ༌ གྱལ༌པོ༌ ནེ༌བུ༌ཀཱ༌ནེ༌ཟཱར༌ དཱ༌ནི༌ཨེལ༌ལི༌ དུན༌ལ༌ གྱེལ༌ཏེ༌ ཁོའ༌ རྩི༌ཝ༌ སྟནས༌ ཡང༌ ཁོའེ༌ ཕིའ༌ ཆོད༌པ༌ དང༌ སྤོས༌ ཁྱོང༌ཅེས༌ལ༌ བཀའ༌ ཏངས༌། 47གྱལ༌པོའེ༌ དཱ༌ནི༌ཨེལ༌ལ༌ ཟེརས༌, “ཏན༌ཏན༌ ཁྱོ༌རང༌ངི༌ དཀོན༌མཆོག༌ ནི༌, ལྷ༌ལྷ༌མོ༌གུན༌ནི༌ དཀོན༌མཆོག༌ ཡང༌ གྱལ༌པོ༌གུན༌ནི༌ གཙོ༌བོ༌ དང༌ སང༌ཝའེ༌ ནང༌ང༌ ཇུང༌ཅེས༌གུན༌ སྔོན༌ཅུག༌ག༌ ཛད༌ཁན༌ ཞུགས༌ཏེ༌ ཨིན༌ནོག༌ ཅིའ༌ཟེར༌ན༌ ཁྱོ༌རང༌ང༌ འི༌ སང༌ཝ༌བོ༌ ཤད༌ཉན༌།
48ཏེ༌ནེ༌ གྱལ༌པོའེ༌ དཱ༌ནི༌ཨེལ༌ ཁར༌རི༌ ནང༌ང༌ ཀོ༌ས༌ ཐོན༌པོའེ༌ཀ༌ སྐོས༌ ཡང༌ ཁོའ༌ སོལ༌རས༌ མང༌པོ༌ ཏངས༌། གྱལ༌པོའེ༌ ཁོ༌ བ༌བེ༌ལོན༌ནི༌ ཡུལ༌ཇོངས༌ གང༌པོའེ༌ཀ༌ ཝང༌ སྲུལ༌པ༌ ཅོས༌ ཡང༌ ཁོ༌ ཤེས༌རབ༌ཅན༌ མི༌ ཚང༌མའེ༌ཀ༌ གོ༌སྐྱོང༌ང༌ སྐོས༌། 49ཏེ༌བོ༌ མན༌པ༌ དཱ༌ནི༌ཨེལ༌ལི༌ ཞུ༌ཝ༌ ནང༌ཞིན༌ གྱལ༌པོའེ༌ ཤཱད༌རག༌, མེ༌ཤཱག༌ དང༌ ཨ༌བེད༌ནི༌གོ༌ གུན༌ བ༌བེ༌ལོན༌ནི༌ ཡུལ༌ཇོངས༌སི༌ ཝང༌སྲུལ༌པ༌ ཅོས༌ ཨིན༌ནའང༌ དཱ༌ནི༌ཨེལ༌ ཁར༌རི༌ ནང༌ང༌ དུགས༌ཏེ༌ གྱལ༌པོའེ༌ ཕིའ༌ ལས༌ ཅོའད༌པིན༌།
Currently Selected:
དཱ༌ནི༌ཨེལ༌ 2: lbj
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
