Psalm 22
22
Da 22. Psalm.
Es Leides Un Di Hallichkeit Fumm Gerechta
En Psalm fumm Dawfit. Zumm foah-singah.
1Mei Gott, mei Gott, favass hosht du mich falossa?
Favass bleibsht du so veit vekk mitt dei hilf?
Un favass fa'achtsht du di vadda es ich am yammahra binn?
2Oh mei Gott, ich roof deich da dawk, avvah du gebsht kenn andvat,
un deich di nacht, avvah ich finn kenn roo.
3Du bisht heilich uf em kaynich-shtool,
un Israel lohbt dich.
4Unsah feddah henn iahra fadrauwes in dich gedu,
si henn in dich geglawbt un du hosht si frei ksetzt.
5Si henn zu diah groofa un voahra frei gmacht;
si henn in dich geglawbt un voahra nett nunnah glost.
6Avvah ich binn en voahm, nett en mensh,
leit fashpodda mich, si gukka nunnah uf mich.
7Alli-ebbah es mich saynd dutt shpodda,
si macha iahra maul uf, shidla da kobb un sawwa:
8“Eah hott sich falossa uf da Hah;
loss da Hah kumma een hohla.
Loss da Hah kumma een frei macha,
siddah es eah em Hah kfellich voah.”
9Avvah doch du hosht mich aus mei muddah iahra leib gnumma;
du hosht miah en fadrauwa gevva in dich,
vo ich an mei muddah iahra brusht voah.
10Ich habb mich falossa uf dich fumm dawk es ich geboahra voah,
funn mei muddahs-leib voahsht du mei Gott.
11Bleib nett veit vekk funn miah,
fa druvvel is nayksht,
un's is nimmand fa helfa.
12Si sinn um mich rumm vi feel bulla,
si henn mich umgringd vi shteiki bulla fumm land Basan.
13Si macha iahra meilah grohs uf geyyich mich,
so vi en rawsichah layb.
14Ich binn raus gleaht vi vassah;
awl mei gnocha sinn funn-nannah gezowwa,
mei hatz is vi fashmolsanah wax in miah.
15Mei grefta sinn ufgedrikkeld vi en shtikk fabrocha ksha;
mei zung shtekt zu mei gummah in meim maul,
un du layksht mich in da shtawb fumm doht.
16Di hund sinn um mich rumm,
gottlohsi leit henn mich umringd.
Si henn mei hend un fees deich kshtocha.
17Ich kann awl mei gnocha zayla,
leit gukka an mich un vatsha mich.
18Si fadayla mei glaydah unnich nannah,
si zeeya's lohs fa mei rokk.
19Avvah du, oh Hah, bleib nett veit vekk funn miah,
oh du, mei Graft, kumm kshvind un helf miah.
20Hald mei sayl aus di kfoah fumm shvatt,
hald mei layva funn di graft funn dee hund.
21Helf miah vekk funn dee layva iahra meilah,
hald mich aus di kfoah funn dee vildi oxa iahra hanna.
22Ich zayl shvetza veyyich dei nohma zu mei breedah,
un dich lohva in di mitt funn di fasamling.
23Diah es di furcht fumm Hah hend, lohvet een;
awl diah, di nohch-kummashaft fumm Jakob, eahret een,
un diah, di nohch-kummashaft funn Israel, gukket nuff zu eem.
24Eah hott sellah nett fa'acht un nunnah gedrayt,
es am leida un deich macha is.
Eah hott sei ksicht nett fashtekkeld funn eem,
avvah eah hott's keaht vo eah groofa hott zu eem.
25Ich vill dich lohva in di grohs fasamling,
ich vill du vass ich fashprocha habb
fannich selli es dich firchta.
26Selli es leida, sella essa un satt sei;
selli es da Hah sucha zayla een lohva.
Eiyah hatza sella ayvichlich layva.
27Alli-ebbah zayld droh denka un zumm Hah drayya
biss an's end funn di eaht.
Awl di kshlechtah funn di heida
zayla sich nunnah bikka fannich eem.
28Fa's Kaynich-Reich heaht zumm Hah,
eah roold ivvah di leit funn di veld.
29Awl di reicha funn di eaht
zayla essa un een ohbayda.
Awl selli es shlohfa in di eaht
zayla's gnee beeya fannich eem.
Nimmand kann sei aykni sayl levendich halda.
30Di nohch-kummashaft zayld een deena,
selli es noch nett geboahra sinn,
zayla ksawt sei veyyich em Hah.
31Si zayla sei gerechtichkeit breddicha
zu leit es noch nett geboahra sinn,
un zayla sawwa vass da Hah gedu hott.
Currently Selected:
Psalm 22: pdcB
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
