Yowane 12

Maliya Yesu kaena ye heyausidi

1Mayadai haligigi-kesega mo matadi ne unai na kabo Taukiuli Henuwaisinina huyana, na Yesu ye lagelau Betaniya, teina meta Lasalo boita unai ye hetoloꞌuyoi wa yona magai. 2Ede temenai kaikaigogo gagilina se ginauli Yesu hesabana. Maleta meta kadi haitala wa ye kabinonohai, na Lasalo maiyanao Yesu ma kana bodao wa se kaikaigogoi. 3Na Maliya yausi panepanena pakuna ye hai ede ye ini Yesu kaena ne udiyedi na kuluna ne unai ye sauhepitalidi. Na panena meta numa wa ye laugilihai. Na yausi ne nadi#12:3 Nadi kaniyona meta Maleko 14:3 unai ka kulihemasalaha na ku hasili. unai se ginauli, lakina ede lita kesega tehana, na maisana ye lakikalili.

4Na Yudasi Isakaliyota, iya Yesu yona hekahekata wa hesau na iya kabo kana tauwalohai ne, iya ye wane, 5“Idohagi to teina yausi panena namwanamwana ta nige ku lokunei, kabo maisana denali 300 ku hai, na monina ne kabo ye lau taudehadeha udiyedi?” 6Yudasi saha ye hedede ta meta nige taudehadeha ye nuwatukaliliyedi, na matawuwuna ede iya taukabikabigaibu. Iya meta yodi kabahaisagusagu monina tobwana taukitahetetena, na yona laulau ede moni tobwana ne unai hekadi ye haihaigaibuidi.

7Yesu ye hededebui ye wane, “Waihiu ne ku kitagabaei! Saha ye ginauli ne meta yau kabo se tolegau bwayabwaya ne unai kabinonohana. 8Huya badobado taudehadeha kabo maiyamiyao, na yau meta taba nige huya badobado maiyamiu.”

9Na Dius tamowaidiyao bodalakilaki wasa se lapui meta Yesu iya ede Betaniya unai. Ede se lau temenai nige bena Yesu ye bom se kita, na Lasalo hinage, iya ede tamowaina ye boita na Yesu ye hetoloꞌuyoiꞌusei wa. 10Unai ede taukaitalasam tauwoyaidi wa yodi hineli se ginauli meta bena kabo Lasalo hinage se koihemwaloi. 11Matawuwuna Lasalo yona toloꞌuyo ne debanawai, Dius bodalakilaki yodi tauwoyawoya wa se laugabaedi na se lau Yesu se sunumaei.

Yesu se hailobai yo se hedebasae Yelusalema unai

12Mayadai hesauna kabo Yesu ye lau Yelusalema. Tenem mayadaidi ne udiyedi bodalakilaki teha maudoidi udiyedi se laoma na Yelusalema unai se miyamiya, Taukiuli Henuwaisinina hesabana. Boda wa wasana se lapui meta ye laolaoma 13ede tutube bagadi se baheidi na se lau se hailobai yo se heyoheyoga se wane,

“Hosana!#12:13 Kalina Hebelu unai hedehedede Hosana kaniyona bagubagunana ede, “Ku gilihaigai”. Na Yesu yona huya wa unai meta ye hemala hedebasae hedehededena. Unai ede ka kulibui ka wane, “ka hedebasaego”.

Ka hedebasaego, kowa Guiyau hesanawai ku laoma.

Ka hedebasaego, kowa Isalaela yoma wasawasa.”

14Yesu donki saehauna ye lobai ede ye gelusae unai, doha peloweta hesau ye kuliyako ye wane,

15“Yelusalema tamowaidi,#12:15 Kalina Giliki bukadi beyabeyadi se bado se kuli se wane “Saiyona natuna waihiu”, na kaniyona ede, “Yelusalema tamowaidi”. tabu kwa matausi!

Kwa kitalau! Yomi wasawasa wa donki saehauna unai ye tutuli na ye laolaoma.” (Sakaliya 9:9)

16Na tenem huyana ne unai hekahekatao wa nige se nuwatulobai meta kulikuli ta Yesu hedehededena. Na muliyena, huyana Yesu ye toloꞌuyo yo ye sae galewa ne unai na yona hekahekatao wa kana kao saesaena mamohoina se kita, kabo se nuwatulobai meta kabikabi maudoidi ta siya ede kulikuli tabudi udiyedi se kulinonohaidiko wa.

17Na huyana Yesu Lasalo ye yogahepesa bwayabwaya unai yo boita unai ye hetoloꞌuyoi wa meta bodalakilaki maiyanao. Na saha ye ginauli wa se kita meta sola se hewahewasa. 18Na tamowai gwaudi kabikabi gigigigibwalina ye ginauli wa wasana se lapui, ede se lau Yesu se hailobai. 19Na Paliseya tamowaidi se bom yodi se hedehedede se wane, “Sola kwa kita! Nige gonowana saha hesau kabo ta ginauli kalinawai. Kaniyona ede tanoubu maudoina iya se hemuhemuliwatani.”

Yesu yona boita ye hedehededei

20Na tausae Yelusalema Taukiuli Henuwaisinina unai tautabaꞌohu wa luwadi ne unai meta Giliki tamowaidi hekadi. 21Na siya se lau Pilipo unai, iya meta magai Betesaida teha Galili ne tamowaina, na se hededelau unai se wane, “Taubada, ka henuwa bena Yesu ka kita.” 22Ede Pilipo ye lau Andeleya yona ye hedehedede, na kabo taudi labui se lau Yesu yona se hedehedede.

23Na Yesu ye hededebui ye wane, “Mahanana wa ye lageko, Tau Natuna kabo kana kao saesaena mamohoina ye masalaha. 24Ya hededemamohoi kalimiuwai: Ena witi tumana nige ye beku bwatano ne unai na ye mwaloi, kabo ye miyamiya mo. Na ena ye bekudobi na ye mwaloi, meta kabo kaniyona gwaudi ye hetubudi. 25Na kaiteya yona mauli tanoubu ta unai ye gadosisiyei, kabo ye kabisapuli. Na kaiteya yona mauli tanoubu ta unai nige ye gadosisiyei, kabo mauli nige kana siga ye hai. 26Ena tamowai hesau ye henuwa bena yogu ye paisowa, meta bena ye hemuliwatanigau. Yau haedi ya miya meta yogu heyayai tauhaina hinage kabo temenai. Na yogu heyayai tauhaina ne meta kabo Tamagu iya ye hekasisiyei.

27Mahana ta unai yau meta nuwagu ta unai ya hekohekoidada, na kabo saha ya hedede? Taba gonowana ya kaibwada Tamagu unai ya wane, ‘Mahana ta unai ku gilihaigau’? Taba nige. Ya dobima ta meta bena kamkamna matagu ne unai ya hekalo.”

28Na kabo ye wane, “Tamagu, hesam ku hesaekaliliyei.” Kabo kalina hesau galewa ne unai ye dobima ye wane, “Yau hesagu ya hesaeyako na kabo ya hesaeꞌuyoi.” 29Na bodalakilaki temenai se totolo wa kalina ta se lapui ede yodi nuwatu bena tulutululu. Na hekadi se wane, “Nuwana anelu hesau ye hedehededelau Yesu unai.” 30Na Yesu ye hededebui ye wane, “Tenem kalina ne meta komiu hesabamiu, yau nige. 31Na teina mahana ta unai Yaubada kabo tanoubu ta ye hekasa, yo tanoubu ta yodi wasawasa#12:31 Tanoubu ta yodi wasawasa iya ede Satani. yona gigibwali kabo ye hetatagwaligwali. 32Na huyana tano unai yau se lausinigau, kabo tamowai maudoidi ya yogagogoidi se laoma kaliguwai.”

33Yesu ye hedede doha teina meta bena yona boita kana kao ye hededehemasalaha.

34Ede boda wa se henamaiyei se wane, “Kai laugagayo unai ka lapui meta Keliso kabo ye miya ye lau ee huya nige kana siga. Na idohagi to ku wane, ‘Tau Natuna kabo se lausini’? Na teina Tau Natuna ta meta kaiteya?”

35Na kabo Yesu ye hededelau udiyedi ye wane, “Mala#12:35 Mala meta Yesu heyaheyasonina. ta kabo maidamiu kwa miya huyakubwakubwa mo. Na mala maidamiu ta unai ne bena kwa laulau, na tabu masigili ye taukasinigomiu. Na kaiteya masigili unai ye laulau meta nige kabina ye kata haedi ye laulau. 36Na mala maidamiu ta unai ne bena kwa sunumaei, ede kabo kwa hemala mala natunao.” Teina hedehedede ta mulinawai ye laugabaedi na ye lau ye kenowadamyedi.

Dius tamowaidi nige tausunuma hedehedededi

37Yesu kabikabi gigigigibwalidi gwaudi ye ginaulidi Dius tamowaidiyao matadiwai, na iyamo nige se kawamamohoiyei. 38Teina ta meta Aisaiya peloweta yona hedehedede wa ye hemamohoiyei, doha ye wane,

“Guiyau, yoda wasa wa kaiteya ye kawamamohoiyei?

Na kaiteya unai Yaubada yona gigibwali ye hemasalaha?” (Aisaiya 53:1)

39Na Dius tamowaidiyao wa nige gonowana se kawamamohoi, matawuwuna ede teha hesau unai peloweta wa ye hedede ye wane,

40“Guiyau tamowai matadiyao ye hegibugibudi,

yo nuwadiyao ye hekwailolodi,

unai taba nige matadi udiyedi se kita,

yo taba nige nuwadi udiyedi se nuwatulobai,

yo taba nige nuwadi se buidi na unai kabo ya henamwanamwadi.” (Aisaiya 6:10)

41Aisaiya teina ye kulihemasalaha, matawuwuna Yesu kana kao saesaena mamohoina ye kita, na Yesu hedehededena ye hedehededei.

42Na iyamo tamowai gwaudi Yesu se sunumaei, luwadi ne unai hekadi meta Dius tauwoyaidi. Na Paliseya tamowaidi debadiwai ede yodi sunuma wa nige se hemasalaha, kaniyona ede se matausi ena kabidi se kata kabo sunago unai se hepesadi. 43Siya meta tamowai yodi noko kalidiwai ne se henuwakaliliyei na kabo Yaubada yona noko.

44Na kabo Yesu kalinana lakilakina unai ye wane, “Kaiteya ye sunumaeigau, meta nige yau ya bom mo ye sunumaeigau, na hinage tauhetamaligauma wa ye sunumaei. 45Yo kaiteya ye kitagau, meta tauhetamaligauma wa ye kita. 46Yau ya dobima tanoubu ta yona mala, unai kaiteyadi se sunumaeigau taba nige masigili unai se miya. 47Na ena tamowai hesau yogu hedehedede ta ye lapuidi na nige ye miyawatanidi, taba nige yau yona ya hekasa. Matawuwuna yau ya dobima ta nige bena tanoubu ta ya kitahekasa, na bena ya hemauli. 48Tausubugau yo yogu hedehedede nige taukabihekahinidi tauhekasadi nonohana ede ye miya. Hedehedede ya hededediko wa, siya kabo kabahegiludi huyagehena ne unai. 49Matawuwuna yau nige ya bom yogu nuwatu unai ya hedehedede, na Tamagu iya tauhetamaligauma wa ye hekatagau saha kabo ya hedede yo idohagi kabo ya hedededi. 50Na kabina ya kata meta yona hedehedede ne kabo mauli nige kana siga ye leyama. Unai teina saha ya hedededi ta meta gonogonowana doha saha Tamagu ye hededeidi kaliguwai wa bena kabo ya hededehemasalahadi.”

Currently Selected:

Yowane 12: sbeP

Highlight

Copy