Sak 1
1
AMBUJE akwaŵilanga ŵandu kuti awujile kwa jwalakwejo
1Une ndili jwakulocesya* Sakaliya, mwanace jwa Belekiya soni cisukulu ca Ido. Pa mwesi wa msano ni jitatu, mcaka caŵili ca ucimwene wa Daliyasi, AMBUJE ŵampele utenga Sakaliya.#Esa 4:24—5:1; 6:14 2AMBUJE Mlungu Jwamaciligosope ŵamsalile Sakaliya kuti ŵasalile ŵandu kuti, “Une AMBUJE naliji jwakutumbila mnope ni acinangolo ŵenu, 3nambo sambano ngumsalila kuti, mwujile kwa une, une soni timbujile kwa jemanja.” 4Mkaŵa mpela acinangolo ŵenu. Kalakala ŵakulocesya ŵapele jemanjajo utenga wangu, wakwasalila kuti akatamaga m'ma umi gakusakala ni mu ulemwa.* Nambo nganambikanila kapena kuyitendela kandu. 5Acinangolo ŵenu ni ŵakulocesyawo nganaŵa soni cijumi. 6Napele acinangolo ŵenuwo malamusi gangu kupitila mwa ŵakulocesya, nambo nganagapikanila ni ŵayiweni yakuyicisya yakwe. Kaneko ŵapesisye ulemwa wawo ni kwiticisya kuti Une, AMBUJE Ŵamaciligosope, napele jemanjajo cilango pakukuya ni ndamo syawo ni masengo gawo gakusakala.
Mesomkulola ga jwakulocesya gakwamba mahaci
7Mu caka caŵili Daliyasi piŵaliji mwenye, pa lisiku lya 24 lya mwesi wa 11 (Nofembala), AMBUJE ŵapelece utenga cilo kupitila m'mesomkulola. 8Namŵeni jwine jwakwe ali akwesile pa haci jecejewu. Jwalakweju jwajimi pasikati pa yitela ya kutenjela m'ciŵata, nipo kunyuma kwa jwalakwejo kwapali mahaci gane gecejewu, gane gepiliwu panandi, gane gamaswela.#Ciw 6:2-8 9Myoyo, une namwusisye kuti, “AMBUJE ŵangu, ana mahaciga gagopolela cici?”
Ŵanjanjile kuti, “Tinimlosye yigakugopolela. 10AMBUJE agatumisye gelego kuti gajawule gakajendele cilambo capasi.”
11Kaneko gosopego ŵalisalile lilayika lya AMBUJE lilyajimi pasikati pa yitela yakutenjela lila kuti: “Tujendele cilambo cosope capasi ni tusimene kuti, ŵandu wosope ali pa mtendele.”
12Kaneko lilayika lila lyatite kuti, “AMBUJE Ŵamaciligosope, ŵalakwe aŵele ali mkwatumbilila ŵandu ŵa mu Yelusalemu ni ŵandu ŵiŵatamaga mwakuwusyungulila msinda wa Yuda kwa yaka 70 sambano. Ana tiyijigale ndaŵi jelewu uli kuti ŵalakwe ŵalosye jemanjajo canasa?”
13AMBUJE ŵalijanjile lilayika lila ni maloŵe gambone gakulisangalasya lilayika liŵaŵecetanaga nalyo lila. 14Myoyo Lilayika lila lyasalile une kuti mjenesye yaŵecete AMBUJE Ŵamaciligosope yila: “Nganisyo ni mtima wangu wosope uli pa ŵandu ŵa mu msinda wangu weswela wa Yelusalemu. 15Une ndili jwakutumbila mnope ni ŵandu ŵa mitundu jine* ŵali pa utendele. Pinaliji mkwatumbilila ŵandu ŵangu ni ndaŵi jele ŵandu ŵanewo ŵapitilisyaga kwalagasya ŵandu ŵangu. 16Ali ni ligongo lyakwe yice soni ku Yelusalemu kuno kukulosya canasa kwa ŵandu ŵa mu msindamu. Nyumba jangu tijiciwucisidwa soni nipo msinda tiwucitaŵidwa soni.”
17Lilayikalyo lyasalile soni kuti njenesye ayi: “AMBUJE Ŵamaciligosope akuŵeceta kuti misinda jawo timuciŵa yipanje yejinji soni kuti jwalakwejo tacakamucisya ŵandu ŵa ku Yelusalemu ni kusala kuti msindawo uli wakwe wakwepe.”
Mesomkulola ga misengo
18Kupitila m'mesomkulola gane, najiweni misengo mcece ja ng'ombe. 19Myoyo naliwusisye lilayika lilyaliji mkuŵeceta ni une lila kuti, “Ana misengo jeleji jikugopolela cici?”
Lyalakwelyo lyanjanjile kuti, “Jikwimilila macili ga cilambo capasi pano gigapwilingenye ŵandu ŵa ku Yuda, ku Isalaeli ni ŵa ku Yelusalemu.”
20Kaneko AMBUJE ŵandosisye afundi ŵakusyana yisyano. 21Myoyo, nawusisye kuti, “Ana jemanjaji ayice akuno kukutenda cici?”
Ŵanjanjile kuti, “Jemanjaji ayice kukogoya ni konanga macili ga mitundu ja ŵandu jijacipundile cilambo ca Yuda ni kwapwilinganya ŵandu ŵa mwelemo.”
Currently Selected:
Sak 1: YAWO
Highlight
Share
Copy
Want to have your highlights saved across all your devices? Sign up or sign in
Chiyawo Bible: Buku Jeswela © Bible Society of Malawi, 2014
