Sion 6

Iesu vengan meatin keil taosen elim (5000)

1Navong Iesu selus min hetetamen keil onen Siu keil evus, va en vot tai ral min meatin keil onen, ka amu koteh Mari Oai ten out Kaleli (mari oai enek avise en Mari Oai ten out Taebirias emun).#Mat 14:13-21; Mak 6:30-44; Luk 9:10-17 2Ka navong Iesu va, tali meatin keil houlu amusili en out ut veni ales merikel keil koa mumoni ka mukave sak revi koakeil amesai.#Mat 4:25; 8:1; 12:15; 19:2; 20:29; Mak 5:24; Luk 9:11; Sion 2:23; 6:14 3Navong Iesu rokol usi oai, vina nesa en hou tai ka rondan ral min meatin keil onen.#Mat 5:1; 24:3; Mak 3:13; Luk 22:39 4Koanek kur out vesesal en avong ten Anien ten Mul Laui.#Luk 22:1; Sion 2:13; 11:55

5Navong arondan mukok, Iesu lele va, ka lesi keke tali meatin keil houlu umai veni. Sakini, vis Pilip vit, “?Rehehul anien koa hevinvin hehengan tali meatin keil ekek en out kave?” 6Iesu kilea tuai en asa koa houmoni, ka viteni mukonek keke vasak vis demkatien onen Pilip.

7Ka Pilip vit kesi vit, “!Ei! Avaseini munak rovakur ui umen vavinvin ven avati ahetai (6) #6:7 Selusien kati teni vit, “200 denarie,” koa suval 200,000 vatu. Iesu ral min meatin keil onen arkurtei mani koa vamukonek. ka rovahul veret vatal mani enek, anien koanek sakras vavinvin keke meatin vasi keil enek avakur hati veret tai koa vahi havivis vahi ae.”

8Andru, koa vi meatin tamun onen Iesu ka tunali Saemon Pita, kei viteni vit,#Mat 4:18; 10:2; Mak 1:16; Luk 6:14; Sion 1:40 9“Ekek, ehon tai koa kur veret elim koa amumoni en bale, ka mesau elu enges. Ka anien enek rovinvintei varei ven tali meatin keil ekek.”#Sion 21:9,13

10Evus, Iesu viteni vit, “Alhiteni min tali meatin keil ekek avatondan.” Out enek, oumunai houlu mul ien, ka tali meatin keil ekek arondan eni. Amo keil vesesal vatokol taosen elim (5000). 11Navong arondan evus, Iesu kur veret, san masmasien min Ahi veni, ka sani min meatin keil onen ariti vasi min tali meatin keil. Ka mumoni vatte tas en mesau. Meatin keil vasi akanian rokol avong koa alonge avit vinvin.

12Navong meatin keil vasi akanian vinvin, Iesu viteni min meatin keil onen vit, “Alva allah soke anien keil koa mules keke reherpuruntei.” 13Sakini, uva aso ruain soke anien keil ten veret bale elim (5) enges koa meatin keil akan rani. Ka amutimanin navong alesi keke asien veiat teindan elu (12) vil mules.

14Navong tali meatin keil ekek alei kilea en merikel koa Iesu mumoni, aviteni avit, “Anatin eli, koanik vi Provet koa Ahi vat kati vit hesani hemai en out netan.”#Dut 18:15,18; Umen 3:22; 7:37

15Iesu kilea keke tali meatin keil imai ka ikeih kati keke vamai vahi asuv houlu one. Sakini, lokovein keil amules, ka vina va en vatihou tai nesa keke vato sasen.#Sion 18:36; Mat 14:23; 15:29; Mak 6:46; Luk 6:12

Iesu mual en oai#Mat 14:22-33; Mak 6:45-52

16Navong vongien emai, meatin keil onen Iesu avita aiou. 17Alesi keke out vong ka Iesu romaitei veah ven keil. Sakini, uva en vot one ka amu koteh oai keke avaha ris en taon ten out Kapaniam. 18Navong uva, avotini keih keke avahalis veni avisu min eang takeih tai ka oai langlango houlu. 19Navong avalis en vot rokol kilomita elim (5 km), amutimanin ales Iesu mai ven keil ka mul mual en oai suval mul mual en atan. Navong alesi ametau houlu. 20Ka Iesu viteni min keil vit, “!Minametautei! !Inau navi kei!”#6:20 Vahesa selusien enek vahit, “Inau NAVI,” koa vi ‘Iahova,’ isen kati onen Ahi (Eks 3:14). #Mat 14:27 21Navong alesi keke kei anatin, asi keil avakuri en vot. Ka navong Iesu vut va en vot, amutimanin keke rokol out ut en out koa e vati avaha ien.

22Out mulan, tali meatin keil koa aro veah en usi oai amundemi keke iles Iesu, veni alei kilea keke meatin keil onen enges uvut uva en vot koa heite tas, ka alokovein Iesu mules. 23En avong enek, meatin sav keil aka en taon ten out Taebirias umai en vot keil one. Umai ut vesesal en out koa Iesu san masmasien min Ahi ven veret ka sani vahengan tali meatin keil eni.#Sion 6:11 24Navong meatin keil enek alesi keke Iesu ka meatin keil onen armultei mun ekonek, uvut en vot keil one ka uva en taon ten out Kapaniam keke avalekati.

Iesu vi veret ten moulien

25Meatin keil avotin Iesu en usite ten Mari Oai ten out Kaleli. Ka navong avotini, avisi avit, “?Tiser, keik komai ekok nengeis varei?”

26Iesu vit risi vit, “Naviteni anatin min kami keke mirlekattei inau veni milei kilea aneite ten merikel keil koa namul namumoni. Vuo. Mimul milekat inau veni nasakin vangomi laia en veret.#Sion 6:11-12 27Kami minasantei kami ven anien enges koa hervitei tuetin hemai hetisa. Hetahos imok mihesan kami ven anien koa sakras vatisa koa hesan moulien min koakeil vasi akuri. Inau, Natin Meatin, nakilea masani min kami, veni Ahi, Tata onak, rie lat inau ka si kei venau.”#Sion 4:14; 6:50,51,54,58

28Sakini meatin keil avisi avit, “?Mehoumon sa koa mehousil asa koa Ahi en vat komai mevoumoni?”

29Ka Iesu vit kesi vit, “Asa koa Ahi en vat kami mivoumoni mukok: miheling demkatien onami en meatin koa kei sila.”

30Sakini, avis Iesu avit, “?Kumon merikel sa mevalesi keke meheling demkatien onomai enuk? ?Anatin, kumon sa varei? 31Navong avu keil onomai amual en out volvol, akan manna koa Mosis sani min keil, veni Tus Votut vit, ‘Kei san veret ran out nesa vi ae.’” (Sam 78:24)#Eks 16:15; Nam 11:7-9; Neh 9:15; Sion 6:49,58; Sam 105:40

32Ka Iesu viteni min keil vit, “Naviteni anatin min kami, kei koa san veret ran out nesa vi ae rovitei Mosis. Vi Tata onak koa sani min keil. Ka kei mul sani min kami veret koa vi anatin koa ka en out nesa. 33Ven veret koa Ahi mul sani vi kei koa mita netan ran out nesa ka mul san moulien min meatin keil ten out netan.”#Sion 6:41,51

34Navong alonge mukok, avisi avit, “Asuv, kisan veret enek min komai li lisenges.”#Sion 4:15; Mat 6:11; Luk 11:3

35Sakini, Iesu viteni min keil vit, “Inau navi veret koa san moulien. Koakeil vasi umai venau, amai herkattei mun keil. Ka koakeil akur anatin enau, maroro herkattei mun keil.#Sion 6:48,51,58; 4:14 36Ka avaseini miles inau ka merikel keil koa namumoni, mirkurtei anatin veah enau.#Sion 20:31 37Koakeil vasi Tata onak rie lat keil avahi meatin keil onak, keil imai usil kat inau. Ka nikur revi koakeil vasi usil kat inau, nirseseintei keil en avong etai.#Sion 17:2,7,24; Mat 11:28

38“Nikur revi keil veni namita ran out nesa keke moumon asa koa kei koa sila inau en vati moumoni. Narmumonteis asa koa inau sasok ek vati.#Mat 26:39; Mak 14:36; Luk 22:42; Sion 4:34; 5:30 39Ka kei en vati keke malekat revi tounah vasi koa lingi en hek keke tounah tovuol vavuol. Ka en keite ten tounah vasi, meatin vasi keil onak imea ran matien.#Sion 6:44,54; 10:28,29; 11:24; 17:12; 18:9 40Ven Tata onak en vati keke koakeil vasi ales Natnali ka akur anatin eni ikur moulien ten lisenges. Ka, en keite ten tounah vasi, nisakin keil imoul eris ran matien.”

41Navong Siu keil alonge keke Iesu vit vi veret koa ka en out nesa, aselus kutut kati avit,#Sion 6:33,35,51,58 42“Komai mekilea en meatin ekek. Ka mekilea en tata ka mama onen emun. Kei vi Iesu, natin Siosep enges. ?Sakini, hemukave suk kilea vahiteni keke mita ran out nesa?”#Mat 13:55; Mak 6:3; Luk 4:22

43Iesu vit kesi vit, “Kami minasel kututtei mun usil selusien keil onak. 44Koakeil enges Tata onak mul sila keil keke avamai venau akilea imai ihi meatin keil onak. Ka inau nisakin keil imoul eris ran matien en keite ten tounah vasi.#Sion 6:65; 6:39,40,54; 11:24 45Provet keil telamu amutisi avit, ‘Ahi varei hehisein meatin vasi keil.’ (Aes 54:13)#1Tes 4:9 Ka koakeil along ren Ahi ka akur hihiseien eni amul umai venau. 46Narvitentei keke meatin tai les Tata en meten kati. Inau enges nales Tata onak veni naka veni.#Sion 1:18 47Anatin eli naviteni min kami keke koakeil vasi aling demkatien one enau ikur moulien ten lisenges.#Sion 3:15,16,36 48Inau navi veret koa san moulien.#Sion 6:35,41,51,58 49Avu onami keil akan manna en out volvol. Ka avaseini, keil umatmat.#Sion 6:31,58 50Ka inau navi veret koa mita netan ran out nesa. Ka koakeil akan veret enek asakras avamat.#Sion 6:33,58 51Anatin, inau navi veret koa san moulien koa mita netan ran out nesa. Meatin koa kan veret enek, kei hemoul lisenges. Veret koa nasani min kami vi avek. Ka namul nasani min meatin keil ten out netan keke akilea avakur moulien.”

52Navong Siu keil along selusien onen Iesu amutimanin ka asel min keil eris avit, “?Ei, mukave? ?Meatin ekek hesan aven min komai meheani hemukave?”

53Ka Iesu viteni min keil vit, “Anatin eli naviteni min kami, munak miherkantei aven Natin Meatin, ka mihermuntei ran, misakras mivakur moulien ten lisenges. 54Koakeil akan avek ka amun rak, nisakin keil enges imoul eris ran matien en keite ten tounah vasi.#Sion 6:39,40,44; 11:24 55Veni avek vi anien koa vi anatin, ka rak vi tounah tamunien koa vi anatin. 56Koakeil akan avek ka amun rak#6:56 Aneite ten selusien enek vi meatin koa mai kur anatin en Iesu. akapil vituai ral minau, ka inau nakapil vituai ral min keil.#Sion 15:5; 1Sion 3:24

57“Tata onak sila inau numai ka kei vi vatte ten moulien. Inau nakur moulien rani. Sakini, en vati sise enek, koakeil akan inau ikur moulien ranau. 58Sakini, avek vi veret koa mita ran out nesa. Ka rosuvaltei veret koa avu onami keil akani, ka katau suk umatmat. Veni meatin koa kan veret ekek hekur moulien ten lisenges.” 59Iesu viten selusien keil ekek navong mul vihisei en eim tahihiseien onen Siu keil en taon ten out Kapaniam.

Meatin keil houlu armusiltei mun Iesu veni amundemi avit hihiseien keil onen keih

60Navong koakeil amusil Iesu along selusien keil onen, aviteni min keil eris avit, “Ei, hihiseien keil ekek keih varei keke rovakuri. ?Isei varei kilea vakur anatin eni?”

61Ka Iesu kilea keke meatin keil onen amul aselus kutut kat hihiseien keil onen enek. Sakini, les keil ka vit, “?Mukave? ?Hihiseien keil ekek mul sakin kami mimutimanin ka mimusavoi en demkatien onami? 62Ka mihetimanin ka mihesavoi anatin munak miheles inau, Natin Meatin, nihina ris en out nesa, out koa naka ien mulamu.#Umen 1:9-11 63Ninin onen Ahi varei mul san moulien min meatin keil. Ka meatin sakras vahotin moulien vaka en keihoen onen sasen. Selusien keil koa nasani min kami aka ven Ninin ka amul asan moulien.#2Kor 3:6 64Ka tei en kami arlingtei demkatien one enau.” Iesu viteni mukok veni, en avong koa mum rohtoh en umen onen, kilea tuai isei en keil herlingtei demkatien onen eni, ka isei varei hemaeni heha en hen vativieh keil onen.#Sion 13:11 65Evus, Iesu vit risi vit, “Veni nakilea keke meatin houlu irlingtei demkatien enau, naviteni min kami tuai keke meatin tovuol kilea vamai venau munak Ahi romaentei.”#Sion 6:44

66En avong koanek, meatin keil houlu alokoveini ka armusiltei mun. 67Navong Iesu les meatin keil enek amul uva rani, viles les meatin teindan elu (12) onen ka vis keil vit, “?Ka mukave en kami? ?Kami emun mihelokovein inau?”

68Ka Saemon Pita vit kesi vit, “?Asuv, munak mehelokoveinuk, meheha ven isei mun? Veni keik kos kokur selusien koa san moulien ten lisenges.#Sion 6:63 69Ka komai meling demkatien onomai enuk ka melei kilea keke keik kovi Mesaea, Meatin Votut onen Ahi.”#Mak 1:24; Luk 4:34

70Ka Iesu viteni min keil vit, “Inau varei narie lat kami koa mivi teindan elu (12) keke mivousil inau. Ka avaseini, tai en kami vi Temat.” 71Iesu mul vit usil Sudas, natin Saemon Eskariot. Veni avaseini Sudas vi tai en meatin teindan elu (12) onen, kei hemaen Iesu heha en hen vativieh keil onen.#Sion 12:4

Currently Selected:

Sion 6: pma

Highlight

Copy