Sion 15

Tatavolien usil vati grep

1Iesu viten tatavolien min meatin keil onen vit, “Inau navi vati grep ka Tata onak suval meatin koa lei kati. 2Ka angoite vasi keil koa rosontei heite, kei kum vulvul en keil avaha. Ka angoite vasi keil koa ason heite, kei mul rei motein keil vasakin keil avason heite vahi houlu mok.#Mat 3:10; 15:13 3Ka kami mimai mimuto tuai ka en hihiseien koa nasani min kami.#Sion 13:10 4Kami mihel miheapil hetal minau, ka inau nil niapil hetal min kami. En vati sakien koa angoi grep koa rokapiltei vatal min vatte sakras vason heite kei sasen enges, kami emun misakras mivason heite en moulien onami munak mirkapiltei vatal minau.#Rom 11:17-18; 2Kor 3:5; Sion 6:56

5“Inau navi vati grep enek, ka kami mivi angoite keil onak. Koakeil akapil ral minau, ka inau ral min keil, amul ason heite houlu en moulien one. Ka munak mikeka ranau, misakras mivoumon etai tounah.#1Kor 12:12,27; Sion 15:16; 2Kor 3:5 6Koakeil arkapiltei vatal minau asuval angoite keil koa amukou ka amemes. Angoite keil vatinek, Ahi helah ruain keil ka heson keil iha en ahang keke henit lin keil.#Mat 3:10; 7:19; 13:42 7Ka munak mikapil ral minau, ka mimusil kat selusien keil onak, kami mikilea mivahis ven asa emi vati, ka Ahi houmoni.#Mak 11:24; Sion 14:13; 16:23 8Ka navong mimai mivi meatin keil onak ka mison heite houlu en moulien onami, koanek mul vati lat isen Tata.#Mat 5:16

9“Envatien onak mul en kami en vati sakien koa envatien onen Tata mul enau. Miheles miheapil vituai hetal minau keke envatien onak hel ven kami lisenges. 10Munak milong kat mengkatien keil onak, mihetie lati keke mimul mikapil vituai ral minau anatin ka envatien onak hel ven kami. Koanek suval etin sakien koa inau nalong kat mengkatien keil onen Tata onak vatie lati keke namul nakapil vituai ral mini ka envatien onen mul enau.#Sion 14:15; 1Sion 2:5; 5:3

11“Naviten tounah keil enek min kami vasakin sien val en moulien onami vasuval sien koa mul enau. Ka ek vati keke mihehilelau en sien.#Sion 17:13; 1Sion 1:4 12Mengkatien koa namul nasani min kami ekek: emi hehathat kami hesuval etin koa inau ek vat kami.#Sion 13:34; 1Sion 3:11,23; 2Sion 1:5 13Sakien ten envatien koa marite mok keinek: navong meatin tai mul sa lat moulien onen vahinat tue keil. Sakien koanek marite mok en sakien sav keil ten envatien.#Sion 10:11; Rom 5:8; 1Sion 3:16 14Ka kami mivi tuak keil munak mimumon asa koa nameng kat kami eni.#Luk 12:4 15Narvisetei mun kami en meatin toumien keil onak, veni meatin toumien keil areingeingen asa koa masta one mul mumoni. Ka navise kami en tuak keil, veni navit meseini min kami tounah vasi koa Tata onak viteni minau. 16Rovitei kami koa mirie lati keke mimusil inau, ka inau varei narie lat kami. Ka nasan umen min kami keke mivaha mivoum. Ka miheson heite hehi houlu, heite koa hel lisenges. Ka hesakini, Tata hesani min kami tounah koa mivisi en isok.#Sion 6:70; 13:18; 15:5; 14:13,14; 16:23 17Avong tamun, mihoumon asa koa nameng kat kami eni: emi hehathat kami.”#Sion 13:34; 1Sion 3:11,23; 2Sion 1:5

Iesu mul sel kat meatin keil onen keke meatin keil ten out netan tine heat keil

18Iesu vit risi min meatin keil onen vit, “Munak meatin keil ten out netan tine kat kami, mihendem kati keke, mulamu, tine kat inau.#Mat 10:22; 24:9; Mak 13:13; Luk 6:22; Sion 17:14; 1Sion 3:13; Sion 7:7 19Munak kami mivi meatin keil ten out netan, koakeil ten out netan e hehathat kami hesuval mivi one. Ka inau nalei kan kami miteisav ran koakeil ten out netan ka mirvitei mun ten out netan. Sakini, koakeil ten out netan tine kat kami.#Sion 4:5; 17:14 20Mihendem kat asa koa naviteni min kami keke slev tai romaritetei mok valin masta onen.#Mat 10:24; Luk 6:40; Sion 13:16 Sakini, koakeil amumoni tisa minau, miheilea keke umoni hetisa min kami emun. Ka koakeil along kat hihiseien keil onak, keil ilong kat hihiseien keil onami emun. 21Keil koa umoni hetisa min kami umon tounah vasi enek min kami veni mivi onak keil ka mimum en isok. Ka umoni emun veni areingeingen kei koa sila inau numai.#Sion 16:3; Mat 5:11 22Vahit marmaitei ka marvitentei min keil, keil avarmottei en tisaen. Ka veni numai anatin min keil ka asesein selusien onak, arie lati keke tisaen koanek mul en usite one.#Sion 9:41 23Meatin koa tin kat inau, rie lati keke tin kat Tata onak emun.#Luk 10:16; Sion 5:23; 1Sion 2:23 24Vahit marmaitei ka marmumontei merikel keil koa meatin sav keil asakras avoumoni, keil avarmottei en tisaen. Ka veni numai tuai ka namumon vati merikel keil en mete koa meatin sav keil asakras avoumoni, tisaen mul en usite one. Veni alei sesein merikel keil enek, arie lati keke tine kat inau ka Tata onak emun.#Sion 14:11; 9:41 25Koanik kur out vasakin selusien koa amutisi mul en mengkatien koa amusil kati keke vamai vahi anatin koa vit, ‘Tine kat heisav enau.’ (Sam 69:4)#Sam 35:19

26“Navong Ninin ten kataunien hemai ven kami, kei hehit lein anatinien usil inau. Nisila heka ven Tata ka hehothot en anatinien onen min kami.#Sion 14:26 27Ka kami mun mihehit lein inau min meatin sav keil, veni kami miro ral minau navong namum rohtoh mai rokol kosa.”#Umen 1:8; 5:32; 1Sion 4:14

Currently Selected:

Sion 15: pma

Highlight

Copy