Sion 12

Ahin tai ten out Betani vouhou min Iesu#Sion 11:1,43-44

1Avong ahetai (6) mulamu en avong ten Anien ten Mul Laui, Iesu va en meteimal ten out Betani. Va ro en teim onen Lasaros, meatin koa sakini moul eris ran matien.#Mat 26:6-13; Mak 14:3-9 2Sakini, keil amumon mari anien tai keke avahouhou mini. Marata lah anien emai, ka Lasaros rondan vituai en avet taanianien ral min Iesu ka meatin sav keil.#Luk 10:40 3Evus, Meri kur hati senta tai koa amumon en nard#12:3 Nard vi senta koa amumoni en li holeai tai ten out India koa avise en ‘nard.’ koa mani teni mariso vis mariso mok. Va vesesal ven Iesu ka mutahi en alen keke vahouhou mini. Evus, Meri muuli en hilin. Navong mumoni, more vite ten senta enek ka vasi out neim.#Luk 7:37-38

4Ka, navong tai en meatin teindan elu (12) onen Iesu lesi, rositei veni. Isen meatin enek Sudas Eskariot koa, hervitei tuetin, hemae lat Iesu heha en hen vativieh keil onen. Sakini, kei vit,#Sion 6:71 5“?Vensa varei arsalem entei senta koanik keke avasan mani teni min koakeil tounah one tovuol. Veni mani teni vinvin en silva mani handred etel (300).”#12:5 Mani koanek suval 300,000 vatu ka vinvin en ui umen koa meatin tai kuri en sua tai.#Mat 19:21; Mak 10:21; Luk 18:22 6Kei rovitentei selusien enek veni mundem houlu usil koakeil tounah one tovuol. !Vuo! Viteni mukok veni vi tarhena tai. Veni kei lei kat ateli ten mani onen Iesu keitel, ka mul venan mani rani.

7Ka Iesu viteni vit, “!Lokoveini! Ahin ekek vul senta koanek keke vasak mesein avek vamese ven avong tatetahinien onak.#Sion 19:40 8Koakeil tounah one tovuol ito hetal min kami lisenges. Ka inau, nirtotei hetal min kami lisenges.”#Dut 15:11

Avat keil onen Siu keil amumon lingkatien keke u vini Lasaros

9Navong meatin keil alonge keke Iesu ro en meteimal ten out Betani, meatin houlu vis houlu mok umai keke avalesi. Umai emun keke avales Lasaros koa Iesu sakini moul eris ran matien.#Sion 11:43-44 10Ka navong asuv keil onen pris keil alonglong eni, amumon lingkatien keke avou vini Lasaros emun 11veni alesi keke merikel koa kistal eni mul sakin meatin houlu akur anatin en Iesu, ka armusiltei mun keil.#Sion 11:45

Asan masmasien min Iesu navong kistal en out Serusalem#Mat 21:1-11; Mak 11:1-11; Luk 19:28-40

12Out mulan, mari vangi meatin keil koa umai en Anien ten Mul Laui alonge keke Iesu mul mai en out Serusalem. 13Sakini, amusah oumeil keil ka uva avahisu mini. Ka navong uva, avisohiso vina nesa avit,

“!Masmasien min Ahi!

‘!Tokolkatien hel en kei koa mai en isen Iahova!’ (Sam 118:26)#Mat 27:42; Mak 15:32; Sion 1:49

!Tokolkatien hel en asuv houlu ten out Isrel!”

14Iesu votin sili dongki tai ka muloh eni eva. Koanek suval asa koa Tus Votut viteni koa vit,

15 “Kami koa miro en taon ten out Serusalem en Hou Saeon minametautei.

!Mihelesi! Asuv houlu onami mul mai keke valosil kat kami.

Anatin, mul rondan en sili dongki tai enges ka mul mai.” (Sak 9:9)

16Navong tounah enek mul kur out, teindan elu (12) onen Iesu arkileatei aneite teni. Ka, katau suk, navong Ahi rali lat Iesu vina nesa keke vakur hetetamenien onen, amundem kati keke tounah keil enek koa Tus Votut vit usili mai kistal vi anatin.#Sion 2:22

17Houlu en vangi meatin keil ekek amul ral min Iesu navong vise lat Lasaros ran valengeihat tatetahinien ka sakini moul eris ran matien. Ka keil avitehiteni min mesav keil va vio … meatin houlu along usili.#Sion 11:43-44 18Sakini, veni meatin keil houlu vis houlu imok along usil merikel koanek, uva avisu min Iesu en sise.

19Ka navong Farasi keil ales mari vangi meatin ekek, aviteni min keil eris avit, “!Alles visi! !Meatin vasi keil en out netan amul amusil kati tuai! Misakras emun mivoumon etai tounah vaha kat usite onen.”#Sion 11:48

Iesu selus usil matien onen min me-Gris keil

20Navong Siu keil uva en out Serusalem keke avaha netan min Ahi en avong ten ale, me-Gris otetai keil emun uva. 21Me-Gris keil enek uva ven Pilip, koa kei ten meteimal ten out Betsaeta en provins ten out Kaleli. Ka aviteni mini avit, “Komai emai vati mevales Iesu.”#Sion 1:44; Luk 19:3; 23:8

22Sakini, Pilip eva ka vit meseini min Andru, ka keilu luva luviteni min Iesu. 23Ka Iesu viteni vit, “Avong emai ekek keke Natin Meatin vakur mari hetetamenien onen.#Sion 13:31-32; 17:1 24Nita tavol usil anatinien tai min kami. Munak uti uit tai, arluhtei en atan ka arrahintei, kei heles hehi utite. Ka munak itahin uti uit koanek en atan, hesuval koa hemat. Ka, hekatau, hemoul hekur heite hehi houlu.#12:24 Iesu mul selus usil matien onen, mukave hemoul eris ran matien ka hekataun meatin keil hehi houlu heka ien.#1Kor 15:36 25Koakeil e vat moulien one, moulien enek hevuol ran keil. Ka koakeil tine kat moulien one en out netan ekek, keil varei ihuli kat moulien one hel lisenges.#Mat 10:39; 16:25; Mak 8:35; Luk 9:24; 17:33 26Koakeil e vati avoum minau, keil usil inau. Veni out koa namul ien, meatin toumien keil onak il hetal minau. Ka Tata onak hehouhou min meatin sei keil koa amum minau.#Sion 14:3; 17:24

27“Kosa, tinok vil en demvoen. ?Ka nihiten sa? Vahesa nihis Tata onak keke houtut inau keke nirhisutei en avong takeih koanek. Ka vuo. Veni namita keke mahisu en avong ten mahien enek.”#Sam 6:3; 42:5,11; Mat 26:38; Mak 14:34

28Evus, Iesu vis viteni vit, “O Tata li, kihati lat isom keke hehi hetetamen imok.”#Mat 3:17; 17:5; Mak 1:11; 9:7; Luk 3:22; 9:35

Navong vis mukok, rea tai selus ka en out nesa vit, “Nasakin isok mai vi hetetamen tuai, ka num risi.”

29Vangi meatin keil koa amulomal ekonek along rea enek, ka tei en keil aviteni avit vi voulul koa mul musel. Ka teimun en keil avit, “!Angelo tai selus mini!”#Umen 23:9

30Ka Iesu viteni min keil vit, “Rea koanek roselustei vakataun inau, selus keke vakataun kami.#Sion 11:42 31Kosa vi avong koa Ahi helei rahit usite onen meatin keil ten out netan ekek ka hesan mahien min keil. Kosa vi avong koa Ahi hehile lat Temat, mari avat ten out netan, heha ran out enek.#Sion 9:39; 14:30; 16:11 32Ka navong ihati lat inau nihina nesa en ai tai, nileh meatin vasi keil imai venau.”#Nam 21:9; Sion 3:14 33Iesu viteni mukok vahit luvat sakien koa hemat heka ien.#Sion 18:32; 21:19

34Vangi meatin keil avit kesi avit, “Tus Votut onen Ahi mul viteni min ir keke Mesaea heto lisenges.#2Saml 7:16; Sam 72:17; 89:4,35-37; 110:1; Aes 9:7; Esek 37:25; Dan 7:14 ?Sakini, vensa suk komul koviteni keke ihati lat Natin Meatin hehina nesa en ai tai? ?Isei varei Natin Meatin enek?”

35Iesu viteni min keil vit, “Meneai hel ven kami avong hehi havivi tamun. Sakini, hetahos mihoual navong meneai mul veah ritin keke mankoli hermutaluh koetei kami. Veni koakeil amual en mankoli areingeingen out kave uva ien.#Sion 7:33; 8:12; 9:4; 12:46; 11:9-10; 1Sion 2:11 36Sakini, mihekur anatin en meneai enek navong mul veah ritin, keke mihemai mihehi meatin keil ten meneai.” Navong Iesu selus min meatin keil evus, lokovein keil ka ro suai ran keil.#Efes 5:8

37Ka avaseini keke Iesu mumon merikel keil houlu en mete, rovitei meatin vasi keil koa akur anatin eni. 38Koanek kur out vasakin asa koa provet Aesea viteni vamai vahi anatin koa vit,

“?Iahova, munak meatin tai vit usil longlongien enek mulamu,

isei hekur anatin eni?

?O Iahova, isei kilea valei kilea hem,

en sakien keil koa kistal ekek?” (Aes 53:1)#Rom 10:16

39Sakini, keil asakras avakur anatin eni, veni Aesea viteni mun vit,

40 “Ahi houmon mete hevar ka tine hekeih imok,

keke asakras avalei kilea vatal min mete,

ka asakras avandem kilea en tine asa koa kei mumoni.

Hemukonek, irvilestei ran tisaen keil one

ka Ahi hersak revitei moulien one.” (Aes 6:10)#Mat 13:15; Mak 4:12

41Aesea viten selusien koanik veni lei kilea hetetamenien onen Iesu ka vit luvati.#Aes 6:1

42Ka avaseini keke koanek vi anatin, hetetamen keil houlu onen Siu keil akur anatin en Iesu, ka ametau keke avahit leini. Ametauni veni Farasi keil aviteni keke koakeil vasi avit leini keke Iesu vi Mesaea, iso lat keil ran eim tahihiseien keil one.#Sion 7:48; 2:23; 7:31; 8:30; 10:42; 11:45; 12:11; 9:22 43Hetetamen keil enek arie lati keke e vati avoumon asa koa vatahos en meten meatin keil vali asa koa vatahos en meten Ahi.#Sion 5:44

Iesu vit leini keke koakeil aseseini ikur mahien en hen Ahi

44Iesu viso keih vit, “Koakeil akur anatin enau, rovitei inau nges koa akur anatin eni. Amul arie lati keke akur anatin emun en kei koa san inau numai.#Mat 10:40; Sion 5:24 45Veni koakeil ales inau, suval koa amul ales kei koa san inau numai.#Sion 14:9 46Numai navi meneai koa ritin en meatin keil ten out netan, keke koakeil vasi akur anatin enau irmultei mun en mankoli.#Sion 1:9; 3:19; 8:12; 9:5; 12:35 47Munak meatin tai long selusien onak ka rolong kattei, inau nirsantei mahien mini. Veni narmaitei en out netan keke masan mahien min meatin keil teni. Vuo, numai keke moutut keil.#Mat 7:26; Sion 3:17; 8:15 48Ka koakeil asesein inau ka aling rendemien keke irkurtei anatin en selusien onak, tai mul koa hesan mahien min keil. Ka en keite ten tounah vasi, en avong ten Mari Kot, selusien keil onak heat ris keil ka hetie lati keke mal ikur mahien. 49Koanik hehi anatin, veni narvitentei tounah keil koa ka en rendemien onak sasok, ka namul naviten tounah keil koa Tata koa san inau numai meng kat inau keke mahiteni.#Sion 7:17; 14:31 50Sakini, namul navit mesein selusien etin koa Ahi meng kat inau keke mahiteni, veni nakilea keke meatin keil ihotin moulien ten lisenges heka ien.”#Sion 8:26,28

Currently Selected:

Sion 12: pma

Highlight

Copy