Sen 35
35
9Navong Siekob mea ran out Mesopotemia, Ahi kistal veni en out Betel hatte tamun ka rokol kat risi. 10Ahi viteni mini mukok, “Kosa isom ‘Siekob’ koa aneite teni vi ‘meatin tasakluvosien,’ ka kosa heha, isom hehi ‘Isrel’ koa aneite teni vi ‘meatin koa lehkao min Ahi.’#Sen 32:28 11Inau navi ‘El-Sadai,’ koa aneite teni vi ‘Ahi ten Keihoen.’ Mihelah titiali keil hehi houlu. Mari vangi meatin keil houlu ika enuk ka tei en keil imai ihi asuv houlu keil.#Sen 17:4-8 12Atan keil koa nasani min avu Ebraham ka tata onom Aesak, nisani minuk ka min vatiamal onom keil koa ikistal ika venuk.” 13Navong Ahi selus mini evus, mea rani. 14Ka en out koa Ahi selus mini, Siekob vati lat ahat tai mulomal vahi out koa hendem kati asa koa Ahi viteni mini. Evus, kur oel ten olip ka uaen, mutah keilu eni vatie lati vi out votut onen Ahi.#Sen 28:18-19 15Out koanek, Siekob ling isen vi ‘Bet-el,’ ‘eim onen Ahi.’
16Avong vahis muli, Siekob ka onen keil amea ran out Betel. Ka navong amul amual semau, soutin neli ran out Efrat, avong mai keke Resel vakur tivava ka kei votini keih. 17Navong longe tisa houlu, ahin koa mul katauni viteni mini vit, “Konandemkotei, ehon tamun keinek.” 18Ka mukos, mahien onen vi ten matien. Ka navong Resel leh ekor en eang, ling isen ehon ‘Ben-oni’ koa aneite teni vi ‘natin ten mahien.’ Ka tata onen viles isen mai vi ‘Ben-samin’ koa aneite teni vi ‘natin ten hek matu.’
19Navong Resel mat, arahini en vali sise koa va Efrat (kosa, out enek avise en Betlehem). 20Siekob kur mari ahat tai ka vati lati mulomal vatie lat tehitan onen. Ka mari ahat enek mules en out enek rokol kosa.
22bSiekob, ahin onen ehat (4) ka natnali keil teindan elu (12).#35:22 Natnahin tai mul koa Leah kuri, isen Dinah.
23Ehon keil koa aka en Leah mukok: Ruben (koa moeite onen Siekob), Simeon, Livae, Sudah, Isekar, ka Sebiulon.
24Ehon keil koa aka en Resel mukok: Siosep ka Bensamin.
25Ehon keil koa aka en Bilah, ahin toumien onen Resel, mukok: Dan#35:25 Dan, isen sav vi Manase (Rev 7:5-8). ka Navtali.
26Ehon keil koa aka en Silpah, ahin toumien onen Leah, mukok: Kat ka Aser.
Koakeil enek avi natin Siekob keil koa mama one avasi keil en kantri ten out Mesopotemia.
Currently Selected:
Sen 35: pma
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
