Luka 4

Weehiwa wa Yesu mwiiddeddereni

(Matewuzhi 4.1-11; Maruku 1.12-13)

1Yesu agawelilewo omwihinjeni Zhordawu ahidhaaleliwa ni Muneba Woweela. Muneba mmohive wahimuthukulela mwiiddeddereni 2mowaakwana malabo makumi mannayi, wewule eehiwaga ni Sathana. Kaaja yego malabo alene. Omamalelo wiwa ahikalana dala.

3Nuwindo, Sathana ahimwaaddamela, wiira: <<Akala oli Mwaana a Mulugu wiirele nibwe ndda nsadduwe nikale mukaathe>>.

4Mbwenye Yesu ahimwaakulaga, wiira: <<Maleba Ootaleleya enawoga wi: <Muthu kanakala ni egumi mwaha wa yooja, baahi, mbwenye onokalawo mwa madhu maatene enakuma odhulu>#4.4 Deteronomiyo 8.3. >>.

5Nuwindo, Sathana ankeene ahimuthukulaga Yesu omudhowana mwaango wootaama omooniha omwene dhaatene dha mwiilaboni ni nthithimihoniwa. 6Nuwindo, Sathana ahimwiirelaga: <<Gineere wuuvaha othonga wula waatene ni nthithimiho neewa, na omwene ola, vowi gihivahiwa, vano ginomvaha oyene ginamfuniimi. 7Wagikokorela, ogeebedha, dhaatedhene dhinakala dhaawo>>.

8Yesu ahimwaakulaga, wiira: <<Maleba Ootaleleya yiire: <Omweebedhege Nabwiya Mulugu aawo, omwiimelelege oliyeeneve, baahi>#4.8 Deteronomiyo 6.13. >>.

9Nuwindo, Sathana ahimuthukulaga Yesu omudhowana oZheruzalemi, omugweliha vadhulu va nyuba ya Mulugu, omwiirela: <<Akala oli Mwaana a Mulugu, olupele vati. 10Vowi dhihilebiwa wi:

<Mulugu onoodha aalamule angero aaye wi yuwiing'aneleni;

11 vano aliwa eneere wuuhiddeelani ni madada eewa,

wi manyalo eenyu enadha eporeye ni mabwe>#4.10-11 Masaalimu 91.11-12. >>.

12Yesu ahimwaakulaga, wiira: <<Mbwenye Maleba Ootaleleya yiire: <Ohumweehe Nabwiya Mulugu aawo>#4.12 Deteronomiyo 6.16. >>.

13Sathana vagomeliwiiye omweeha ahimwihiyaga, ajejihedhaga ofiya mudhidhi wofwaneelela.

Yesu onokooddiwa ni athu a oNazarethi

(Matewuzhi 13.53-58; Maruku 6.1-6)

14Vano Yesu ahiwelela oGalileya ni owodha wa Muneba Woweela, bili yaaye yahiiweya okumela wewule ni mirudda dhaatedhene dhowaaddamana. 15Oosuuziha wewule mu nyuba dha matugumano dha aZhudewu,#4.15 Nyuba dha matugumano dha aZhudewu Nda mu ewogelo ya eGerego dheeriwa sinagoga. Mabasa eewa kayaali oolobelamoove, naari osuuzamo Malamulo, mbwenye teto yowaathongamo athu yahaaharihamo Malamulo a aZhudewu. Moone teto maverisikulu 31, 41. athu aatene yoomutamaala.

16Nuwindo, Yesu ahidhowa oNazarethi wewo waleliwiiye. Nlabo na sabuddu ahivolowaga nyuba ya matugumano. Wona moolemeelela ahiimelaga wi eelenge. 17Yahimwinkaga niivuru na namavuhulela Ezaya. Oliye ofugula,#4.17 Ofugula Naari wi: otapula. ofwanyavo valebiwe madhu ala:

18 <<Muneba wa Mulugu ohugikitela.

Ohugithikithela wi gaalaleyele

Muselu Wapama aliba orabula.

Ogirumile wi gilaleyele wooboliwa

wa athu eli mukaambura,

aliba ohoona wi yoonege,

ni waatapula ale yinna goyi,

19 wi gilaleyele yaaka ya mahala a Mulugu>>. # 4.18-19 Ezaya 58.6; 61.1-2.

20Ageelengile ahifugaga niivuruna, omwinka mwiimeleli, okaraati. Vevale meento a athu aatene yaaligi va oliye, yegi omusugwa. 21Vano Yesu ahambeelaga owoga, wiira: <<Dhaatedhene mwiwiliinyu odheela Maleba Ootaleleya, geelengiliimi dhihaakwanela peeno veva>>.

22Aatene yoomwiirelaga onamoona ni otikina mwa madhu aaye a mahala, yadheela vamulomoni vaaye. Yookohanaga, yiiraga: <<Olaya kahuwo mwaana a Zhuuze?>>

23Yesu ahawaaddela, wiira: <<Moohaanganyedha munodha mugiwogele nigano: <Nowi we oli namugu, wiiyilihe weeka! Dhaatedhene mwiiwiliihu mwiiriliinyuna oKafaranawu, mwiirena owaninyu wuno> >>.

24Yesu ahiwogagave, eeraga: <<Ebaribareene ginowuwaaddelani wi kalivo namavuhulela naari mmohi, onaakeliwa ni nriiho veelaboni vaaye. 25Ebaribareene ginowuwaaddelani wi mudhidhi wa Eliyazi wahikala amaamukwele ajinjeene muEzarayeli. Wahikala yummi yaaka thaaru ni mweeri mitanu ni mmohi, muzongwe ahirubwaga yahikalawo dala yuulubale elabo yaatene. 26Eliyazi kaarumiwe naari wa amaamukwele ale, ahili maamukwele a oZarapita, waaddamela oSidoni. 27Mudhidhi wa Elizewu, wahikala aliba maredda#4.27 Maredda mu ewogelo ya eGerego, kinaagana mareddave, mbwenye teto dhiredda dhoohiyana-hiyana dha nikupa na muthu. gwee muEzarayeli kaavo naari mmohi eelihiwe ahili Naamani, muSiriya>>.

28Athu aatene yaaligi mu nyuba ya matugumano veewiligiiwa yahitakaleliwaga vajinji. 29Yahimukumihaga Yesu muluwani omudhowana vadhulu va mwaango wootaama, wewo wamagiliiwa nluwa neewa ni efunelo yowi yamvokedhe musiddo mooddiiha. 30Mbwenye Yesu ahiviraga vaari veewa, ovenyavo.

Yesu onowiigara muneba wootakala

(Maruku 1.21-28)

31Vano Yesu ahikitelaga oKafaranawu, mudhi mulubale wa oGalileya. Nlabo na sabuddu egi waasuuziha athu munyuba ya matugumano. 32Athu yootikinaga dhosuuziha dhaaye, vowi yaali madhu oothongi.

33Ahikalagavo mulobwana mmohi, ahiddiwe ni muneba wootakala. Ahikuwaga ni ndhu nootaama, wiira: 34<<Ii! Ninna ddi hiyo ni nyo,#4.34 Ninna ddi hiyo ni nyo mu ewogelo ya eGerego onafuna owoge ddi: Munihiye mmurenddeleni. Yesu muNazarethi? Mudheele ontolosa? Miyo guhuunonani wi muli Oweela a Mulugu>>.

35Yesu ahisumululaga, wiira: <<Wiire pee! Okume mwa muthu ola!>> Vano muneba wabure ole wahimutongwihedha vati vameentoni va athu aatene, okumamo mwa muthu ole, kuwamporosege.

36Aatene yegi otikina valubalevene, ewogaga muthu ni mukwaaye: <<Alaya madhu baani? Enalamula ni owodha vamohi ni kopolo mineba dhootakala wi dhivenyemo, dhivenyagamo>>. 37Bili ya Yesu yoovuwa mirudda dhaatedhene dhowaaddamela.

Owodha wa Yesu mwa mineba dhabure ni dhiredda

(Matewuzhi 8.14-17; Maruku 1.29-38)

38Yesu ahimaruwaga okuma nyuba ya matugumano, odhowa vaade va Simawu. Omfwanya mbogohi a Simawu ahikalagana goyi mwaha wa nipaddawe nuulubale. Anaamudhi aaye yahimulobaga wi amuyilihe. 39Ahisusedhaga vaaligi muredda, ageemelile, ahilamula wi nipaddawe nimwihiye; omwihiya, oyila. Mowaaguva ovenya, wambeela waakamihedha aliwa.

40Ociguwoni, athu aatene yegi waadhana wa Yesu alene yannaga dhiredda dhoohiyana-hiyana. Egi waayiliha, vowaahela madada mmohi ni mmohi. 41Athu ajinji yegi okuma mineba dhabure, dhikuwaga, dhiiraga: <<Nyo muli Mwaana a Mulugu>>. Yesu oohiihaga wi dhihiwoge vowi dhahinona wi oliye di Kirixtu#4.41 Kirixtu mu ewogelo ya eGerego enatapulela Muthikitheliwi, Misiya, naari wi oosakuliwa a Mulugu, oyene onaavulumuse athu. ole aroromelihiwe.

42Ode ogasile, Yesu ahidhowaga mburo mmoheene yeekawo. Anamwinji yoomusayelaga egamfwanyile yahimuwadeelelaga wi ahidhowe. 43Mbwenye oliye ahawaaddelaga, wiira: <<Eli yoofuneya wi galaleyele Muselu Wapama wa Omwene wa Mulugu teto mmaluwani mamohi vowi si dhedho girumeliwiimi>>. 44Vano Yesu oolaleyela mu nyuba dha matugumano dha oZhudeya.#4.44 Dhoolebiwa ni madada dhimohi dhini: Galileya.

Currently Selected:

Luka 4: tke

Highlight

Copy