Zhuwawu 4

Yesu ni mwihiyana a murudda wa oSamariya

1AFarizi yahiiwa wi Yesu onowaakwekwetha anamasuuza ajinji aabathizaga omukwaranya Zhuwawu. 2(Mbwenye ebaribari, abathiza kaali Yesu oyo, yaali anamasuuza aaye). 3Yesu aganonile wi aFarizi ehiiwa dhedho, ahivenyagawo oZhudeya odhowaga oGalileya. 4Yaali yoofuneya wi Yesu avire murudda wa oSamariya wi afiye oGalileya. 5Vano ahifiyaga nluwa nimohi na oSamariya, ndina niwa Sikari, vakukuuve ni mudda oyene Yakobo wamvahiliiye mwaanaye, Zhuuze.#4.5 Wambeela 33.19; 48.22; Zhozuwe 24.32. 6Wewo wahikala ceela ya Yakobo. Yesu ahikaraatigi seresere ya ceela ele mwaha wi ahigomaga ni weedda. Yaaligi wora ya neekumi nabiili ya mutana, 7-8vano anamasuuza aaye yadhowilege oluwani ogula dhooja. Egadhowile vahifiyaga mwihiyana mmohi a oSamariya adheelaga orugwa mahinje. Yesu ahimulobaga, wiira: <<Mugivahe mahinje oong'wa>>. 9Mwihiyana a oSamariya ole ahaakulaga, wiira: <<Nyo muli muZhudewu, mwaha wa ddi munagilobeliinyu mahinje, miyo ngali muSamariya teto gili mwihiyana?>> (Vowi aZhudewu kineeddelana ni aSamariya.) 10Yesu ahiiraga: <<Wahaanonege Mulugu enandiiye ovaha teto wahaamunone oyene onaloba mahinje oong'wa, we weere omuloba, oliye eere wuuvaha mahinje enavaha egumi>>.#4.10 Madhu a eGerego eneera egumi enotapulela teto othamaga wa mahinje. Bu mwahaya mwihiyana ola oobuwelaga wi Yesu aagana needduuddu a mahinje enathamaga. 11Mwihiyana ole ahiiraga: <<Babani, kamwinna yoorugwana teto ceela ela sooddiiha. Ki mahinje oovaha egumi ayo munaadhana wuuvi? 12Yakobo, nikolo neehu danivahile ceela ela, mwiinyeene vang'wiiye vamohi ni anaaye teto ni dhoofuwa dhaaye. Ki nyo muhumukwaranya oliye?>> 13Yesu ahiiraga: <<Aatene enang'wa mahinje ala enowelela okalana nthona. 14Mbwenye ole onaadhe ang'we mahinje ayene miyo ginamvahiimi, kadha awelela okalana nthona. Vowi mahinje ayene ginamvahiimi enomusaddula okala aneedduuddu enaakumege mahinje oovaha egumi yoohumala>>. 15Mwihiyana ole ahiiraga: <<Babani, givahewoni mahinje ayene wi gihiwelele okalana nthona naari odhaaga orugwaga mahinje wuno>>.

16Yesu ahiiraga: <<Dhowa wamwiithane mamuno, adhe wuno>>. 17Mwihiyana ole ahiiraga: <<Kaginna mamunaga>>. Yesu ahaakulaga, wiira: <<Ohuwoga pama wi kawinna mamuno. 18Vowi wahiteliwa wale ni alobwana atanu, vano mulobwana onakaliiwena dhiinova kahuwo aawo. Dhiwogiliiwe seebaribari>>. 19Mwihiyana ole ahaakulaga, wiira: <<Babani, dhiinova gihinona wi muli namavuhulela. 20Makolo eehu yamweebedhesa Mulugu mwaango olena,#4.20 Mwaango olena Olena bu mwaango wa Zherizimu vakukuuve ni Samariya. Wale aSamariya yahimagavo nyuba yomweebedhamo Mulugu. Nyuba eyo egabwanyuliwe, aSamariya yeebedha vamwaangoni olene. mbwenye nyo aZhudewu muneera wi ofwaneelele athu weebedha fu oZheruzalemi>>. 21Yesu ahimwaaddelaga, wiira: <<Mmani, girumeedheni wi onoodha mudhidhi vevo munamweebedhigiinyu Baabi, ohukala vamwaangoni ola naari oZheruzalemi. 22Nyo aSamariya muneebedha eyene ehinoniliinyu. Hiyo aZhudewu nneebedha eyene enoniliihu, vowi ovulumusa onakumela mwa aZhudewu. 23Onoodha mudhidhi teto ohufiya mudhidhiya, vevo athu oweebedha mwa ebaribari enoodha emweebedhege Baabi mwa muneba ni mwa ebaribari. Baabi onaafuna athu owindo wi bineere emweebedhege. 24Mulugu di muneba, vano oomweebedha emweebedhege mwa muneba ni mwa ebaribari>>. 25Mwihiyana ole ahiiraga: <<Gihinona wi onoodha Muthikitheliwi#4.25 Muthikitheliwi aali ole Mulugu amusakuliiye wi avulumuse mulogo waaye. Mu ewogelo ya eGerego Kirixtu yootapulelaya si emohive wi Muthikitheliwi mu ewogelo ya eHeberi. Mu elemeelelo ya eTakwani eneera waathikithela mamwene ni saambale, mbwenye aZhudewu yeera waamiminela makura anamakutha, mamwene, ni asogoleli a mitugumano. Moone Okuma 28.41; Samuweli a Nabiili 16.1-13; Ezaya 61.1. ole aroromelihiwe teto ononiwe ni ndina na <Kirixtu>. Oliye afiya onoodha anaaddele dhaatedhene>>. 26Yesu ahimwaaddelaga, wiira: <<Dimiyeene ginawoga ni we>>.

27Mudhidhi oyene anamasuuza a Yesu yahifiyaga, yahitikinaga vomoona athapanyaga ni mwihiyana. Naari ndo kaalivo amukohilege, eera: <<Onafuna ddi?>> naari: <<Munathapanyedha ddi ni mwihiyana ola?>> 28Mwihiyana ole ahihiyaga muno waaye odhowa muluwani wawaaddela athu, wiira: 29<<Ndoweni, mwamoone muthu ogaaddele dhaatedhene dhedho dheeriimina. Kadha akala Kirixtu ole aroromelihiwe?>> 30Vevale athu ale yahikumaga muluwani mule odhowa wa Yesu.

31Mudhidhi oyene anamasuuza a Yesu yahimulobaga ni ntidi, wiira: <<Namasuuziha, jani>>. 32Oliye ahiiraga: <<Miyo gihikanna yooja emohi nyo muhunoniliinyu>>. 33Vevale anamasuuza ale yookohanaga mmohi ni mukwaaye, wiira: <<Sowi ohukalavo omudheelena yooja?>> 34Mbwenye Yesu ahaakulaga, wiira: <<Yooja yaaga fuwiirana efunelo ya ole ogirumile wi gimarihe mabasa egivahiliiye. 35Nyo kamuneera: <Dhavira mweeri minnayi, onofiya mudhidhi woohadda?> Mbwenye miyo gineera: Mfugule meento, musugwe mmiddani. Musugwe wi dhilo dhihiithwa ohufiya mudhidhi woohadda. 36Dhiinova, namahadda onalaba, onowaakelave yooliveliwa yaaye. Dhilo dhinahaddiiye si egumi yoohumala wa athu. Mowindo namadhala ni namahadda enahagalala vamohive. 37Ebaribari dhinowogiwa wi: <Onadhala di mmohi, onahadda di mmohiwa>. 38Miyo guhuurumani wi muhadde dhedho dhihikumiheliinyu nikurumela. Amohi bikumihile nikurumela, nyo daakelile opura wa nikurumela neewa>>.

39ASamariya ajinji a mmuruddani mule yahimuroromelaga Yesu mwaha wa onamoona wa mwihiyana ole, wowi: <<Oliye ohugaaddela dhaatedhene dheeriimina>>. 40Vevale aSamariya yahifiyaga wa Yesu, omuloba wi akale ni aliwa wewule. Vano ahikala wewule malabo meenddi. 41Vevale athu amohi ajinji yahimuroromela Yesu mwaha wa madhu aaye. 42Vowi yahimwaaddelaga mwihiyana ole, wiira: <<Dhiinova nihiroromela, ehili mwaha wa madhu aawo, mbwenye mwaha wi nihiiwa weekiihu. Nihinona wi ola di Mvulumusi a athu a elabo yaatene ya vati>>.

Yesu onomuyiliha mwaana a nameeddiha dha mwene

(Matewuzhi 8.5-13; Luka 7.1-10)

43Vigavirile malabo meenddi, Yesu ahivenyaga wewule odhowaga oGalileya. 44Yesu mwiinyeene ahiiraga: <<Kawuli namavuhulela onariihiwa veelaboni vaaye>>. 45Naari ndo vafiyiligiiye oGalileya, aGalileya yahimwaakelaga mwaha wi aliwa teto yahidhowagawo omamuthabelelo Paxkwa#4.45 Mathanga a Paxkwa yaali mathanga oofuneyesesa a aZhudewu. Moone Okuma 12.1-27. Vowi Yesu avenyihiwe nlabo nenddo na Paxkwa, hiyo dhiinova Paxkwa eehu nnathabela ovenyihiwa muukwani wa Yesu. oZheruzalemi, yahoonaga dhaatedhene Yesu dheeriligiiye wewo.

46Yesu ahidhowaga dila ya nabiili nluwa na oKana murudda wa oGalileya, wewo oliye waasadduligiiye mahinje ekala vinyu. Wahikala wewule nameeddiha dha mwene#4.46 Nameeddiha dha mwene Naari wi: zhareenti. Muthu ola mabasa aaye bookameela mabasa maatene a mwene. mwaanaye abulela oKafaranawu. 47Veewiligiiye wi Yesu ahiwelawo oZhudeya ohufiya oGalileya, ahidhowaga wa oliye omuloba wi adhowe oKafaranawu, amuyilihe mwaanaye aaligi vakukuuve ni okwa. 48Yesu ahimwaaddelaga, wiira: <<Mwaahoona dhitoonyihedho ni dhootikiniha, kamunaroromela>>. 49Nameeddiha ole ahiiraga: <<Nabwiyani, ndoweni mowaaguva, mwaanaga ahinakwe>>. 50Yesu ahimwaaddelaga, wiira: <<Dhowa! Mwaanawo onokalawo>>. Muthu ole ahiroromelaga madhu a Yesu, odhowa owaniwa. 51Mundila ahigumanaga ni amwiimeleli aaye, aliwa yahimwaaddelaga, wiira: <<Mwaaninyu oneere okalawo>>. 52Ahaakohaga dha mudhidhi wambeeliiye oyila mwaana ole, aliwa yahiiraga: <<Nipaddawe naaye nimwihiyile ndilo mudhidhi wa wora emohi ya mutana>>. 53Baabi ole ahinonelagamo wi waali mudhidhi olene Yesu wamwaaddeligiiye, eera: <<Mwaanawo onokalawo>>. Oliye vamohi ni aatene a vaade vaaye yahimuroromelaga Yesu.

54Ela yaali etoonyihedho yaaye ya nabiili Yesu yoonihiligiiye vaweliligiiye oZhudeya afiyaga oGalileya.

Currently Selected:

Zhuwawu 4: tke

Highlight

Copy