Wambeela 6
6
Weenjedhedheya wa yoothega
1Athu venjiviliiwa mwiilaboni, yahibaliwa ahima anaahiyana ajinji. 2Ahima a Mulugu#6.2 Ahima a Mulugu Naari wi: Ahima a amilugu, naari wi angero. yahawoona owoma ahima anaahiyana a athu, yahaasakula alene yaafuniliiwa, waatela.
3Veva Nabwiya ahiira: <<Muneba gaavahiliimi athu kunaalogelege mwa aliwa mudhidhi dhaatedhene, ayene bookwa. Enaakalegewo#6.3 Muneba…Enaakalegewo Naari wi: Egumi gaavahiliimi athu kinaalogelege mwa aliwa mudhidhi dhaatedhene ayene bookwa, enaakalegewo yaaka zana ni makumi meenddi (120). Naari wi: Muneba waaga kunawaakihedhege mudhidhi dhaatene. Ayene bookweene. Mu ewogelo ya eHeberi kineeweya pama. yaaka zana ni makumi meenddi (120)>>.
4Malabo alene ni musogolo mweewa yahikalamo mwiilaboni athu oolapa a nlogo na aNefili.#6.4 ANefili yaali athu alubale, akopolo dhijinji. Oothega vameentoni va Mulugu, mbwenye oovuwa vameentoni va athu. Veva ahima a Mulugu vaagoniliiwana ahiyana alene, yahaabala aniiwa. Yaali athu akopolo ni oovuwa malabo alene awale.
5 Nabwiya vooniliiye wiinjiva wa dhoothega dha athu wi moobuwelelo eewa yaali abure malabo maatene, 6ahiira: <<Geerela ddi ompaddusa muthu?>>#6.6 Mulugu ahiira: <<Geerela ddi?>> mwaha wa yoothega ya mwiilaboni. Oliye kaandile ovilela. Ahaathonga anamathega. Mahinje amutokora yadhaaga mudhigumini dheehu, noonege akala Mulugu orumihedhe mwaha wa dhoothega dheehu. Vowukuuwa, 7Nabwiya fawogiliiye: <<Ginafuna gaatolose athu gaapaddusiliimi, vamohi ni aneenyama, ni dhowaabadha, balame dha odhulu ni dhaatedhene dhinavuma. Guhukuuwa waapaddusa alena>>.
8Mbwenye Nowe yeeka dooneya pama vameentoni va Nabwiya.#6.8 Nowe ni anaaye araaru ni athu amohi esasanyaga mwanddeya.
Osasanyiwa wa mwanddeya
9Ola mwaha wa Nowe, mulobwana mmohive ahariha efunelo ya Mulugu mwa mukalelo wowaakwanela vaari va athu a mudhidhi olene, eedda ni Mulugu.#6.9 Nowe aali mulobwana owogoowa, apama vaari va athu. Mwiilaboni mu modhaala obure, Nowe ohunoonihedha wi dhinowaandeya muthu weedda ni Mulugu vaari va athu abure. Onofiya mudhidhi mmohi oneehiwa nroromelo neehu niharaga dha elabo dhohogoowa. Noonaga wi hiyo weekiihu dili a mukalelo wapama. Ebaribareene Nowe aali mulobwana mmohi owogoowa, apama, vaari va athu abure, mbwenye ahaakwaniha okala oororomeleya vameentoni va Mulugu. 10Nowe aganna ahima araaru: Semu, Kami ni Zhafeti.
11Mulugu ahoona wi elabo ya vati yahipahuwa, athu aatene yahidhaaliwa owali. 12Vowoona, Mulugu ahifwanya dhigapahuwe dhoopaddusiwa dhaatedhene dha mwiilaboni eharaga dila dhootakala. 13Nuwindo Mulugu ahiira wa Nowe: <<Ginafuna gaatolose athu aatene, vowi elabo ehidhaaliwa owali, bu mwahaya ginaatoloseliimi vamohi ni elabweene.
14<<Osasanye mwanddeya#6.14 Mwanddeya mu ewogelo ya eHeberi enatapulela yego wona mala, kaxa. Mwa elemeelelo ya gerezha enoniwe ni ndina nowi aaraka. mulubale wa mithanko dhooliba, ogawemo asuubi. Omare ni arikataraya muwari ni ode wi mahinje ehivolowegemo. 15Opime, malapeloya okale meeturu zana ni makumi matanu (150), orambalala wiwa meeturu makumi meenddi ni matanu (25), vano mataameloya ekale meeturu kumi ni matanu. 16Otomeye ni pato, olapelawa odhulu okale vaari ni vaari va meeturu, okalena musiwo mbararuni. Ogawemo maburo maraaru, etandaanyihedhane, nimohi vati, nimohi vaari, nimohi odhulu.
17<<Miyo ginoodha gaadhiihe mahinje majinji, emire elabo yaatene ni otolosa dhoovuma dhaatedhene. Dhaatedhene mwiilaboni ya vati dhirimeele. 18Mbwenye ginohelavo nipangano no waandana waaga ni weevo. Onoodha ovolowe mmwanddeyani vamohi ni mwihiyanaawo, anaawo, ahiyaniiwa.#6.18 Emudhi ya Nowe yahivulumuwa mwaha wa mukalelo ni wiiwelela wa musogoleli a emudhi. Teto emudhi ya Lothi yahivulumuwa egalamuliwe odhowa ode wa nluwa na oSoddoma. Moone Wambeela 19.12. Mbwenye emudhi ya Adamu yahirabula mwaha wa yoothega yeewa. Makalelo a musogoleli a emudhi enokamihedha woonihedha ekalelo ya emudhi yaaye. 19Ovolowena aneenyama a misawo dhaatedhene mmwanddeyani wi evuluwe, abiili-abiili, dhapogo ni dhamukolo. 20Enoodha, evolowe ni weevo aneenyama a misawo dhaatedhene, balame ni dhowaabadha. 21Othukule teto dhooja dhaatedhene dhaawo ni anaawo, ni dha aneenyama>>.
22Ndala Nowe ahiirana dhaatedhene wona Mulugu mwamulamuleliiye. Ebaribareene ahiirana.
Currently Selected:
Wambeela 6: tke
Highlight
Share
Copy
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
