Wambeela 31

Yakobo onothawa wa Labani

1Yakobo ahiiwa wi ahima alobwana a Labani yoomuwoga, yiiraga: <<Yakobo ohuthukula dhego dhaatedhene dhaali dha babiihu. Ebaribareene oliye oreelele dhooreela dhende>>. 2Yakobo ahoona wi Labani kanahagalala wona yeeriiye.#31.1-2 Neera nifwanafwanihe ni dha opama dha amohiwa nnowaambeela okalana aje. Enofuneya ndhiveliwege ni dha opama dha amohi nivahaga mahala wa Mulugu mwa mareeliho aaye.

3 Nabwiya ahiiraga Yakobo: <<Owelele elabo ya ababo, wewo obaliwiiwe. Miyo ginoodha gikale ni we>>. 4Vevale Yakobo ahawiithanihaga Rakeli ni Liya wi yagumanele okokolani waali aneenyama aaye. 5Ahawiirelaga aliwa: <<Ginowoona wi babiinyu kanagoona pama wona dheeriiye, mbwenye Mulugu a ababa oli ni miyo. 6Nyoovo muhunona wi goomulaba babiinyu ni kopolo dhaatedhene. 7Naari ndo, oliye ooginyengetha wiinddi-wiinddi, asaddulaga yoolivela yaaga, mbwenye Mulugu aaga kaarumeedhe wi girabulege. 8Ahiwoga, wiira: <Ana-ahima yaabaliwege a maganga binaakalege aawo>, veva ana-ahima aatene yakala ndale. Vawogiliiwa wi: <Ana-ahima aatene a maganga a mutthoonttho binaakalege aawo>, ana-ahima aatene yabaliwa yakala owindale. 9Sowi Mulugu deerana waathukula aneenyama a babiinyu, agivahaga miyo. 10Nlabo nimohi, mudhidhi woogumanela aneenyama, gahirohaga. Gahoonaga wi aneenyama aatene apogo yagumanele ni a mukolo, yaali a maganga. 11Veva mungero a Mulugu ahigiithanaga, wiira: <Yakobo!> Gahaakulaga: <Miyo gili va!> 12Oliye ahigaaddelaga, wiira: <Osugwe wi aneenyama aatene apogo enogumanela ni a mukolo, ehili amaganga. Ndala wi gihoona dhaatedhene dhendo Labani dhinowiireliiye.#31.12 Mulugu ahoona dhaatedhene Labani dhamwiireliiye Yakobo. Nuhuubuwelege wi kanidha nimunyengetha muthu, Mulugu ahoonile dhowiira dheehu. 13Miyo gili Mulugu geyooneyihile oBeteli,#31.13 Beteli enatapulela vaade va Mulugu, naari wi: nyuba ya Mulugu. vevale vithathileliiwe makura vanibweni nowiimela, olibela. Ovenyemo mwiilaboni mu, owelele elabo ebaliwiiwe> >>.#31.13 Mulugu ahoona dhaatedhene Labani dhamwiireliiye Yakobo. Nuhuubuwelege wi kanidha nimunyengetha muthu, Mulugu ahoonile dhowiira dheehu.

14Rakeli ni Liya yahimwaakulaga, wiira: <<Kaninna yego yoojejihedha ovahiwa ni babiihu. 15Aliwa enanoona wona amarala. Ehimala oniguliha, ehija teto yooliveliwa yeehu. 16Ebaribareene dhooreela dhaatedhene dhende Mulugu dhithukuliiye wa babiihu dhili ni hiyo ni ahima eehu. Mwiirena eyene Mulugu yuwaaddeliiyeni>>.#31.16 Yakobo ahawiithanaga ahiyanaaye aabiileene wawaaddelihamo dhaatedhene. Waakoha moobuwelelo eewa. Mulobwana afunaga okalana dhowaakwanela enofuneya amukohege moobuwelelo Mulugu, odheela wa mwihiyanaaye. Yakobo ahikalana yoorumeedheya mwa yookoha yaaye wa Mulugu. Naari aakuliweve ni Mulugu, ahaakoha teto ahiyanaaye.

17Yakobo ahimaruwaga agaagwelihe ahiyanaaye ni anaaye vakameloni. 18Ahaasogolihaga aneenyama aaye ni dhaatedhene dhende dhapuriliiye agali oPadani-Aramu, weeddaga adhowaga wa ababe Ezaaki oKanani. 19Sowi mudhidhi olene Labani agali epaddi emohiya awiigaga mabila aaye, Rakeli ahiiya thumwa#31.19 Thumwa dhakala wona amilugu oosemiwa, dhadhana mareeliho, waang'anela vaade, naari onamavolowa mba. dha vaade va ababe. 20Yakobo ahaanda omunyengetha Labani mu Aramu, othawa vaade vaaye ahimwaaddele. 21Ahithawa ni dhaatedhene dhanniiyena, olabuwa mwihinje Ewufarati, odhowaga mwaango dha oGileyadi.

Mulugu onomwaakihedha Yakobo wa Labani

22Egavirile malabo maraaru, ahaaddeliwaga Labani wi Yakobo ohuthawa. 23Labani ahimaruwaga ni amudhi aaye omuthamagelaga Yakobo. Agamalile malabo matanu nameenddi, ahimfwanyaga mwaango dha oGileyadi. 24Mulugu ahimooneyelaga Labani muAramu mahiyu moorohani, omwaaddela, wiira: <<Pole-pole, kumwiirele yego, kumuthuuse Yakobo, mwa dila eli yaatene!>> 25Labani amfwanyilege Yakobo agakaraatile mwaango dha oGileyadi mmusasani. Labani ni addibile yahikaraatigi teto vevale.

26Ndala Labani ahimukohaga Yakobo, wiira: <<Wiirile ddi? Oginyengetha othawa ni anaaga wona athu oohiddiwa okoddoni. 27Mwaha bwaddi wiira oginyengetha ohugaaddela wi ginafuna gidhowege? Wahagaadele miyo goosasanya mathanga a mpaganyo oohagalala ni majibo ni dhowiibela dhooruma. 28Mbwenye weevo kawafunile wi gaapaganye anaaga ni adhulaaga, osasanyile dha otaduwa! 29Gowuwiirela yootakala, mbwenye Mulugu a ababo ohugaaddela ndilo mahiyu, wiira: <Pole-pole, kumwiirele yego, kumuthuuse Yakobo, mwa dila eli yaatene!> 30Ebaribareene we ohukalana munukwela woodhowa owaninyu, wa ababo, ki waathukulele ddi amilugu oosemiwa a vaade vaaga?>>

31Yakobo ahimwaakulaga Labani, wiira: <<Miyo kaguwaaddele vowi gowoova wi onagaake anaawo. 32Mbwenye amilugu aawo oosemiwa, akalavo waathukulile, akwe, amudhi aawo egali veva, osayele eyene eli yaawo, othukule>>. Yakobo kaanonaga wi Rakeli dawiiyilege.

33Labani ahivolowaga mmusasani mwa Yakobo, mwa Liya, ni mwa amwiimeleli aahiyana abiili, kaafwanyilege yego. Ahivolowaga teto mmusasani mwa Rakeli. 34Rakeli vathukuliiye thumwa, ahithukuthedhaga vati va ettengu ya kamelo, okaraatela. Labani ahisayelaga mmusasani mwaatemwene mwa Rakeli, kaafwanyilege yego. 35Rakeli ahimwiirelaga babe: <<Nyoovo babani, kamuguubuwelena mootakala, kaginaanda ovenya vowi gili omweerini>>. Labani ahididelaga osayela, mbwenye kaafwanyilege.

36Yakobo ahitakaleliwaga mmurimani ni mwaha wa ela, yowaakulana ni Labani, eeraga: <<Giirilena yootakala baani? Oniharaga ndala giirile ddi? 37Ohumwadha dhoobo dhaaga dhaatedhene. Akala ohufwanya yego eli yaawo, woonihe wa amudhi aawo aatene ala eli veva, enikohe hiyo aabiileene wi emfwanye winna mwaha.

38<<Gaali owaninyu yaaka makumi meenddi guulabaga. Mabila ni mbuzi dhaawo kadhinaabihege othathila ana-ahima, naari miyo kagitakunile nibila, naari nimohi, naariwene ya dhoofuwa dhaawo. 39Kaginaabihege odhiiha nibila nimohi nigahiddiwe ni mwaneenyama wona muneereyeliiwa. Vamburoni mwa ndde nahiddiwavo, gooliva ni nibila nimohi. We woogiliviha ayene yeeyiwa mutana naari mahiyu. 40Mutana gazha nduwa, mahiyu garabula ni oddiddila, kagagona. 41Gihilaba yaaka dhedhi makumi meenddi. Yaaka kumi ni yaaka nnayi gihaalabela anaawo abiili wi gaatele. Yaaka tanu nammohi galaba wi gawaakele aneenyama. Mbwenye wooginyengetha dila biili-biili yoolivela yaaga.

42<<Ahigikamihedha Mulugu a makolo aaga, Mulugu Abarahamu, Mulugu owoopiha a ababa Ezaaki, peeno onagidhowiha gihinna yego. Mulugu ahoona orabula waaga ni wukuuwa waaga, ndala ohuusumulula ndilo mahiyu>>.#31.38-42 Yakobo aali namalaba eerana mabasa apama oomudhivela nabwiya aaye. Namalaba a musawo olena: onodhiveliwana Mulugu, onoweenjedhedha zelu, onokala oovuwa, onokala oororomeliwa ni athu amohi, onoweenjedhedha tthottho, onoliba mmunebani.

Nipangano no waandana wa Yakobo ni Labani

43Labani ahimwaakulaga Yakobo, wiira: <<Ahima ala baaga, aniiwa baaga, aneenyama baaga. Dhaatedhene dhinooniiwe saaga. Ki gawiirena ddi anaaga ala, naari aniiwa ale yaabaliliiwa? 44Vamwaha olena, nisasanye waandana woopanganela wi okale onamoona weevo ni miyo>>.

45Vevale Yakobo ahithukulaga nibwe, wiimesa. 46Yakobo ahiiraga wa amudhi aaye: <<Muugele mabwe mamohi>>. Yahiiragana ndale, wuugela mabwe majinji, oja vadhulu vevale va mabwe. 47Yahithwa niburo ndde ndina na Yegari-Saduta#31.47 Yegari-Saduta mu ewogelo ya eAramu enatapulela mabwe owuugeliwa a onamoona. mu ewogelo ya Labani, ni ndina Galedi#31.47 Galedi mu ewogelo ya eHeberi enatapulela mabwe owuugeliwa a onamoona. mu ewogelo ya Yakobo. 48Labani ahiwogaga dha ndina nathwiliiye niburo ndde, wiira: <<Mabwe ala yuugeliwe peeno ekale onamoona wa miyo ni we>>. 49Ahithwa mabwe ale yoogeliwege teto ndina nimohi nowi Misipa,#31.49 Misipa mu ewogelo ya eHeberi enatapulela mburo wowooneyela. wiira: <<Nabwiya ononaang'anela, naari nigali woolapelawene mmohi ni mukwaaye. 50Waarabulihaga ahima aaga, waahiya waatela ahiyana amohi, naari vahili muthu onanaang'anela, onone wi Mulugu onoodha akale namoona a miyo ni we>>.

51Labani ahiiraga wa Yakobo: <<Ala mabwe yuugeliwe va. Ndda teto nibwe niimesiliimi vaari va we ni miyo. 52Aabiileene ala yahiirelaga onamoona wi miyo gihikwaranye mabwe ala guwiirela yootakala. Emodha-modhave weevo kukwaranye mabwe ala ni nibwe ndda wi ogiirele yootakala. 53Wi Mulugu a Abarahamu, ni Mulugu a Nahori, Mulugu a nlogo neehu aniing'anele>>. Ndala Yakobo ahimulibelaga Mulugu owoopiha a ababe Ezaaki.#31.53 Oliwo Mulugu mmohi baahi. Oliye kanavembaniheya, oli yeeka, sowi vamohi athu kinanonelamo dha makalelo aaye. Vamohi enovaha mandina mamohi, naari osuuziha mwa oholosa dha oliye. Mbwenye Mulugu a makolo eehu di Mulugu a Bibiliya. Kaliwo mmohi. Vowi awale-wale kayanna Bibiliya mu ewogelo yeewa kayanonelemo mowaakwanela wi Mulugu ononidhivela ni onivulumusa. Kayanonile wi enofuneya nimweebedhege ni omwiimelela oliye baahi. 54Yahimpaga mwaneenyama a mukutho vamwaangoni vevale, wawiithana amudhi aaye wi eje mathanga. Yahijaga, ogona vamwaangoni vevale.#31.54 Okutha ni oja vamohi dhaali dhipaddi dha dhowiira dha nipangano. 55Omaselo bebeheene, Labani ahaakubaarelaga anaaye abiili ni adhule, ahaareelihaga, odhowaga owaniwa.

Currently Selected:

Wambeela 31: tke

Highlight

Copy