Wambeela 24

Otela wa Ezaaki

1Abarahamu owuuluvaleene, Nabwiya ahimureeliha mwa dhaatedhene. 2Nlabo nimohi ahiwogaga ni namalaba aaye oororomeleya, musogoleli a akwaaye, oyene aang'anela dhego dhaaye dhaatedhene: <<Ginafuna ohele ndada naawo vamweddoni vaaga, 3olibele mu ndina na Nabwiya Mulugu a odhulu ni vati, ogiroromelihe wi kudha omuteliha mwaanaga mwihiyana a elabo ela ya oKanani giliimi dhiinova. 4Odhowe elabo yaaga, wamusayele wa amudhaaga mwihiyana wi Ezaaki amutele>>.#24.4 Abarahamu amfuna nzala a emudhi yaaye vowi waali mweeddelo wa mudhidhi olene otelana muwari mwa emudhi. Teto kayafuna wi mwaana mmohi amutele mwihiyana a oohuroromela muKanani. Hiyo teto nitelanege muwari mwa emudhi ya Mulugu. Nihimutelege oohuroromela nuubuwelaga wi oneere akale oororomela osogolo.

5Namalaba ahimwaakulaga, wiira: <<Ki eera mwihiyana oyo ahifuna ogihara, odha elabo ela, mwaaninyu gimuyiihe elabo eyene mukumiliinyu?>>

6Abarahamu ahimwaakulaga, wiira: <<Kawiireve dhedho, omuyiiha elabo ele. 7Nabwiya, Mulugu a odhulu, diirilena ogivenyiha vaade va ababa ni elabo ya addibilaga, vano ahigiroromeliha, olibelela waavaha elabo elena ahima aaga a musogolo. Nabwiya yekaaye onomuruma mungero aaye osogolo waawo wi omudhena mwihiyana a mwaanaga. 8Mwihiyana oyo aahifuna wuuhara, we kunaakalena mwaha mwa olibela waaga. Naari, kumuyiihewo mwaanaga>>. 9Namalaba ahitadeelelaga ndada naaye vamweddoni va Abarahamu vano ahilibelaga wiirana dhende dharumiwiiye. 10Ahaathukulaga akamelo kumi a nabwiye, ni dhoovaha dhapama dha misawo-misawo dha Abarahamu. Vevale ahivenyaga odhowaga oAramu-Naharimu, nluwa na Nahori.

11Ahifiyaga nluwa ndde ciguwo, mudhidhi oyene ahiyana vinarugwiiwa mahinje, ahaavumihaga akamelo okwibi wa nluwa, waaddamela vaceelani. 12Ahilobelaga, wiira: <<Nyoovo Nabwiya, muli Mulugu a nabwiya aaga Abarahamu, ginowuulobani wi dhaatedhene dheedde pama wa miyo peeno, vano moonihe odhivela weenyu woororomeleya wa nabwiya aaga, Abarahamu.#24.12 Eliyezeri ahisuuza vajinji dha Mulugu ni dha ororomela wa nabwiya aaye, Abarahamu. Hiyo teto nikale efwanafwanihelo ya nroromelo ni amudhi eehu aatene. Eliyezeri ahinona omuriiha Mulugu. Ehikalawo amwiimeleli amohi yarimeelihe dhookalana dhaatedhene dha Abarahamu. Yalabihege dhokalanadha wona dheewa. Mbwenye Eliyezeri owiiwelela dhaatedhene Abarahamu dhamwaaddeliiye. 13Viimeliliimi vaceelani va, anamwali a nluwa nddi enoodha orugwaga mahinje. 14Mwiirena wi oyene gineeriimi gimulobe mahinje, aworomihe muno waaye vang'ono wi ging'we, oliye agaakula, eera: <Ng'wani, ginowaavaha teto akamelo eenyu>, akale mwadha a namalaba eenyu Ezaaki. Ndo gineere ginone wi munowooniha odhivela weenyu, woororomeleya ni nabwiya aaga>>.#24.14 Soofuneya nimulobege Mulugu wi anisogolelege mwa mathongelo alena oofuneya. Eliyezeri ahiirihedha yoweeha yoonihe mukalelo wa mwihiyana oli aatene. Ahaakale mwihiyana ooyimwiwa kaakwaniha wiirana dhedho. Mbwenye mwihiyana a mukalelo wa thagaraga, a mpurelo ni owawaakela aleddo owaanda wiirana. Ola bu musawo wa mwihiyana wasayeliiye.

15Amarihaga owoga madhu alena, ahidhawo Rabeka, mwaana a Betuweli, akumaga muluwani agakapathile muno waaye. Betuweli aali mwaana a Milika ni a Nahori, ddibile Abarahamu. 16Ola ebaribareene aali oowomesesa, oliye aali namwali ahamunonile mulobwana. Rabeka ahikitelaga vaceelani, odhaaliha muno waaye ogwelela. 17Namalaba a Abarahamu ahimuthamagelaga, omuloba mahinje, wiira: <<Ginowuuloba, ogihiye ging'we mahinje a mmunoni mwaawo>>. 18Oliye ahaakulaga, wiira: <<Ng'wani, nabwiya aaga>>. Vano mowaaguva ahirulaga muno waaye, ohiddeela mmadani wi amvahe mahinje. 19Agamalile omvaha mahinje, oliye ahiwogaga, wiira: <<Ginowaavaha teto akamelo eenyu, vinafuneliiwa>>.#24.19 Ki hiyo? Nihikalana murima wowiimelela wona wa Rabeka? Nnowaakamihedha athu mootapuwa dhakala dhowaandeya? Afuna nnajejihedha waakela namulabela muthu mmohiwa? 20Mowaaguva ahaamarihagamo mmunoni eetthelaga mwang'wela aneenyama. Oweeddaga wiinddi-wiinddi, arugwaga mahinje vaceelani, aavahaga akamelo aatene. 21Namalaba oomusugwaga, agamaalile wi oone Nabwiya yarumeedhiliiye wi olenddo waaye, opure yego.

22Akamelo egamalile ong'wa, oliye ahimvahaga Rabeka cipini ya oro, yanyemelaga garama tanu nammohi, vamohi ni purusera biili dha oro, onyemela wiwa okwaranya garama zana. 23Vano ahiwogagana, wiira: <<Ginowuukoha, babo baani? Aliwa ehikalana mburo wi gihayewo vamohi ni ala ginniimina?>> 24Oliye ahimwaakulaga, wiira: <<Miyo gili mwaana a Betuweli, mwaana a Milika ni Nahori. 25Owanuhu ohukalawo mburo wowaakwana nyoovo. Ehikalawo teto manasi, ni dhooja dhijinji dha aneenyama>>.

26Vevale namalaba ahikokoraga, omutamaalela Nabwiya, 27eeraga: <<Athithimihiwe, Nabwiya Mulugu a nabwiya aaga Abarahamu, oyene ohuhiyile wooniha odhivela waaye ni ororomeleya waaye wa Abarahamu. Miyo ahigisogolela dila ya ebaribari ofiyedha owaniwa wa addibile>>.#24.26-27 Naakela waakuliwa wa malobelo enofuneya nimweebedhege, nimuthithimihege Mulugu, nihikalelege oohagalala baahi.

28Namwali ole ahithamagelaga owaniwa, wawaaddela amaaye dheereyilege. 29Vano Rabeka ola ahikalana murogoriye eeriwa Labani. Ola ahithamagaga mowaaguva adhowaga oceelani, okwibi wa nluwa wi agumane ni mulobwana ole. 30Labani vooniligiiye cipini ni purusera mmoononi, ahimwaaddelaga Rabeka dhego dhawogile mulobwana ole, ahidhowaga ogumana ni oliye. Namalaba a Abarahamu eemelilege vaceelani vevale ni akamelo aaye. 31Labani ahiiraga: <<Mudhe, niye owanuhu. Nyo muli ooreelihiwa a Nabwiya. Mwahaya bwaddi mukaleliinyu murampani? Gihisasanyedha nyuba ni mburo wa akamelo>>.

32Vevale yahifiyaga vaade otapula dhego dha akamelo, waahelela manasi, odhiiwana mahinje omvaha muleddo ni alene yannigiiyena wi ehabihe manyalo. 33Mbwenye agavahiwe yooja, namalaba ole ahiiraga: <<Kaginaanda oja gihinawoge yego eyene girumiwiimi>>. Labani ahaakulaga, wiira: <<Wogani>>. 34Vevale ahiiraga: <<Miyo gili namalaba a Abarahamu. 35Nabwiya ahimudhaaliha mareeliho, okala muliba a dhooreela, omvaha mabila ni ng'ombe, parata ni oro, anamalaba aalobwana ni aahiyana, akamelo ni abuuru. 36Mwihiyanaaye Saara ohumbalela mwaana-mulobwana, naari agooluvale. Vano Abarahamu omvaha mwaana oyene dhooreela dhaaye dhaatedhene, dhanniiyena. 37Nabwiya aaga ahigiruma olibela, wiira: <Kumutelihe mwaanaga ni ahiyana a oKanani wuno oliimi dhiinova. 38Odhowe owani wa ababa, wamusakule mwihiyana mwa nlogo naaga wi mwaanaga amutele>. 39Miyo gahimwaakulaga nabwiya aaga, wiira: <Ki eera mwihiyana oyo ahifuna ogihara?> 40Oliye ahaakulaga, wiira: <Nabwiya oyene gineeddiimina, onoodha amurume mungero aaye oosogolelege wi olenddo waawo weedde pama wi waande omudheelana mwaanaga mwihiyana a nlogo na ababa. 41Waafwanya amudhaaga ehifuna wuuvaha mwihiyana, veva onaakale ootapuwa mwa olibela wu>.

42<<Mwa mwaha olena, peeno ngafiyile vaceelani gilobelaga, giiraga: <Nyo Nabwiya, Mulugu a nabwiya aaga Abarahamu, akala ebaribari mwaafunaga wi olenddo waaga ola ogikalele pama, mwiiwe yooloba yaaga.#24.42, 48 Eliyezeri kaakalana manyazo owoga dha Mulugu ni dheeriiyena vameentoni va athu oohunoneya. Soofuneya wi niharege efwanafwaniho ela yoovaha mahala a Mulugu vameentoni va amohiwa. 43Miyo gili vaceelani va, adha namwali aarugwaga mahinje, giwoga ni oliye, giira: <<Ogihiye wi ging'we mahinje a mmunoni mwaawo>>, 44oliye agaakula, eera: <<Ng'wani teto ginowaavaha akamelo eenyu>>, mwiirena wi oyene akale mwadha a mwaana a nabwiya aaga, oyene munamudhiveliinyu, Nabwiya>. 45Gimarihagawene madhu ala muwari mwaaga, ahifiya Rabeka agakapathile muno waaye, ahikitelaga vaceelani wi aarugwe mahinje. Vano miyo gahiiraga: <Ginowuuloba wi ogivahe mahinje>.

46<<Mowaaguva ahirulaga muno wa mahinje, wiira: <Ng'wani, ginowaavaha teto akamelo eenyu>. Miyo gahing'wa, ahaang'wiha akamelo aaga. 47Ndala gahimukohaga, wiira: <Ababo baani?> Oliye ahaakulaga wi mwaana a Betuweli, mwaana a Milika ni Nahori. Vevo miyo omuwariha cipini, ni purusera mmoononi. 48Gahikokora gimutamaalaga Nabwiya, Mulugu a Abarahamu, gimuthithimihaga mwa ogisogolela waaye dila ya ebaribari wi gidhe gimuthukule mwaana a emudhi ya nabwiya aaga wi akale mwihiyana a mwaanaye. 49Ndala, mwaafunaga wooniha odhivela ni ororomeleya wa nabwiya aaga, mugaaddele. Dhaahirumeedheyaga mugaaddele wi gidhowe dhipaddi dhimohi>>.

50Labani ni Betuweli yahimwaakulaga, wiira: <<Nda sa Nabwiya. Kanifwaneelele owoga <ee> naari <eehi>. 51Rabeka ola, oli va. Mmuthukule wi ateliwe ni mwaana a nabwiya eenyu, wona Nabwiya munafuneliiye>>. 52Namalaba a Abarahamu veewiligiiye yowaakula yeewa, ahikokoraga, omutamaalela Nabwiya. 53Vevale ahithukulaga dhego dhoosasanyiwa ni parata ni oro, vamohi ni dhoowara, ahimvahaga Rabeka, waavaha teto dhego dhimohi dhapama murogoriye, vamohi ni amaaye. 54Ndala ahija, ong'wa, vamohi ni alobwana ale yannigiiyena, ogona vevale. Omenseloni wiwa namalaba ole ahiiraga: <<Mugihiye wi gidhowege wa nabwiya aaga>>. 55Mbwenye, murogoriye ni amaaye Rabeka yahaakulaga, wiira: <<Mmwihiye wi akale ni hiyo mudhidhi vang'ono, malabo kumi vano, avenye adhowege>>. 56Oliye ahawaakulaga, wiira: <<Kamugiselihe owela waaga vowi Nabwiya ahikaliha pama olenddo waaga. Mugihiye gidhowege wa nabwiya aaga>>.

57Aliwa yahaakulaga, wiira: <<Mbwenye nimwiithane namwaliya wi nimwiiwe yoofuna yaaye>>. 58Vevale yahimwiithanaga Rabeka, omukoha, wiira: <<Oneere omuhara mulobwana ola?>> Oliye ahawaakulaga, wiira: <<Ginomuhara>>.

59Vevale arogoriye yahimpaganyaga Rabeka, namalaba aaye, vamohi ni namalaba a Abarahamu ni alobwana aaye. 60Vano yahimureelihaga Rabeka, yiiraga:

<<Mwa we, murogorihu, ekumemo

ahima macikwi ni macikwi;

anamabaliwelamo aawo yaande othukula

maluwa a amwiiddani eewa>>.

61Egamalile elena, Rabeka ni anamalaba aaye egamaganyile, yahaagwelaga akamelo wi emuharege namalaba a Abarahamu. Oliye agamuthukule Rabeka, yahimaruwaga. 62Mudhidhi olene Ezaaki ahiwelelaga oCeelani ya Lahayi-Royi, amagile elabo ya oNegevi. 63Nlabo nimohi, osiguwaga, ahidhowaga weeddelela midda, vasugwiligiiye woolapelawene, ahawoonaga akamelo edhaaga. 64Rabeka vamooniligiiye Ezaaki, ahikitaga vakameloni, 65omukoha namalaba a Abarahamu, wiira: <<Mulobwana ole onadha mmiddani mule aniharelaga baani?>> Oliye ahimwaakulaga, wiira: <<Di nabwiya aaga>>. Vevale oliye ahithukulaga guwo wiikuneelana wiintoni.#24.65 Wiikuneelana wiintoni yaali etoonyihedho yowi oliye aali muddiye.

66Namalaba ahimwaaddelaga Ezaaki dhaatedhene dheereyile. 67Ezaaki ahimudhowagana Rabeka nyuba eyene yaali ya amaaye Saara. Ahimutela Rabeka, omudhivela. Ndala ahihagalalihiwa amaaye vakwiliiwa.#24.67 Ezaaki ahinagone vamohi ni Rabeka yahitelana. Ela yaali yuubuwelelo ya Mulugu wa ootelana aatene. Ogonana vamohi ehinatelane enokooddihiwa ni Mulugu mwa opama weehu. Moone Meerelo a Arumiwi 15.20; AKorintu Owambeela 6.13, 18; 7.2; AGalasiya 5.19; AEfeso 5.3; ATesalonika Owambeela 4.3.

Currently Selected:

Wambeela 24: tke

Highlight

Copy