Wambeela 18

Aleddo araaru enawoga dha mwaana

1Nlabo nimohi, dhipaddi dha mithanko dhuulubale dha oMamere, Nabwiya ahooneyelaga wa Abarahamu, oliye avumaga vamulago va musasa waaye mudhidhi wooviha wa mutana. 2Abarahamu agavenyihile muru, ahawoonaga athu araaru egeemelile vakukuuve vaaye. Ahivenyaga vakaraatiligiiye, othamagela vaaligiisu, okokora.#18.2 Mwa araaru ala, abiili yaali angero, a neethaaru ebaribareene aaligi Mulugu mwa mukalelo wa muthu. 3Vano ahiwogaga, wiira: <<Mwagirumeedha, nabwiya, muhabuwe vang'ono voowanuhu va. 4Enodhiiwana mahinje wi muhabihe manyalo eenyu, mvume mudhidhi vang'ono vamurintini wa muthanko ola. 5Ginoodhana mukaathe, mutakune wi mfwanye kopolo dhoweeddana vowi muhuvira vaade va namalaba eenyu>>.

Aliwa yahaakulaga, wiira: <<Dhihiwomela; dhikale ndo wona muwogeliiwe>>.

6Abarahamu ahithamagelaga mba, owoga ni Saara, wiira: <<Waaguve! Wapime mpimo miraaru dha saambale nendde napama wi osasanye mikaathe>>. 7Vano oliye ahithamagelaga dhoofuwa dhaaye, omwihidda mwaana ng'ombe ooruva, omwiikelela muzombwe aaye omoosa mowaaguva. 8Ndala ahaavaha aleddo ale mwaneenyama amoosiligiiye, waavaha teto makura ni mukaka. Abarahamu ahawiimelelaga vamurintini vevale aleddo aaye ejaga.#18.2-8 Mawaakelelo a Abarahamu yooneyihiliiye wa anaweendda ale enonuubuweleliha mweeddelo wa mukalelo wa mudhidhi olene. Kaawiirelege wi eere waanona. AHeberi 13.2 nnonilibiha wi nooneyihege mukalelo wowawaakela aleddo mowindo vowi kunaanda onona akala anaweendda ala bi athu naari angero!

9Aliwa yahimukohaga, wiira: <<Oli wuuvi mwihiyanaawo Saara?>> Oliye ahaakulaga, wiira: <<Oli mba mu>>. 10Vevale mmohi mwa aliwa ahiiraga: <<Ebaribari, yaaka eyo ginoodha giwelele veva, mudhidhi oyene mwihiyanaawo Saara oneere ombala mwaana-mulobwana>>. Saara ahawiiwaga agali odduli wa mamune Abarahamu, vamulago wa musasa olene.

11Abarahamu ni Saara yahuuluvala, ehaandile waabala ahima. 12Saara vowuubuwelela elena ahiteyaga yeeka, wiira: <<Ginaafwanye addi ohagalala wo? Vowi miyo ni mamunaaga, Nabwiya aaga nuhuuluvala, nihigomeliwa>>.

13 Nabwiya ahiwogaga ni Abarahamu, wiira: <<Saara onateya ddi, eeraga: <Ginoodha gimbale mwaana ngooluvale?> 14Onoobuwela wi Nabwiya ehikalawo yego enamurusa? Yaaka enadha ginowelela veva, Saara oneere ambale mwaana>>.#18.14 Kilivo yoorusa wa Nabwiya! Ohiiriha obala wootikiniha, vowambeela ni Sara, vooharela ni anamabaliwelamo aaye Ezabeli ni Mariya. Moone Luka 1. 15Saara ni mwaha wowoova, ahirunaga yowi ohuteya. Mbwenye Nabwiya ahiiraga: <<Ohuteya, ee>>.#18.15 Dila dhijinji noovaga nnofiyedha oratha, wona Sara, ohiya wi nimuroromelege Mulugu.

Abarahamu waalobelela waaye aSoddoma

16Aleddo yahivenyaga wi ewelele olenddo weewa wooya oSoddoma, Abarahamu ahaaveleelaga aliwa. 17Nabwiya mwa yeeka, ahiiraga: <<Kinafwaneelela omukuwa Abarahamu yego ginafuniimi wiirana. 18Ebaribari Abarahamu oneere akale baabi a malogo majinji ni akopolo, vano mwa oliye enoodha ereelihiwe malogo maatene a elabo ya vati. 19Miyo gihimusakula oliye wi aasuuzihege anaaye ni aniiwa, oharihamo efunelo ya Nabwiya, yiiregena dhowogoowa ni dha ebaribari. Ndala fineeriimi gaakwanelihe mapangano gawiiriliimina ni oliye>>.

20Vevale Nabwiya ahimwaaddelaga Abarahamu, wiira: <<ASoddoma ni aGomora, muladdu weewa ohutthabwa wunnuwa, dhoothega dheewa dhihinjivesa. 21Ginaya wewo goone akala pumwemo wona mwiiweliimi naari eehi kahuwo mwemo. Ginafuna ginone ebaribari>>.

22Aleddo abiili yahihabuwa dila yooya oSoddoma, mbwenye Abarahamu ahalilege ni Nabwiya. 23Abarahamu ahimwaaddamelaga Nabwiya, ahikohaga, wiira: <<Kaahi munaya mwaatolose vamohi athu apama ni oothegaya?#18.22-23 Mulugu ahimvaha Abarahamu mudhidhi wi alobelele muthego woodhulu. Needdaga momwiiwelela Mulugu, oliye ononivaha mpatha mmohive. Soofuneya wi naalobelelege amohiwa ni nriiho njijiji moohukalana woova wona Abarahamu mwaalobeliiye. 24Mwaafwanyawo athu apama makumi matanu (50), muneere waapela vamohi? Kamunaalevelele nluwa ndde va mwaha wa alena makumi matanu (50) apama? 25Kadhinarumeedheya wi nyo mwiirena yego yowinda wi apiwe muthu apama vamohi ni oothega! Munowaafwanafwaniha apama ni oothega? Ndala, naari. Nyoovo munothonga elabo yaatene ya vati, munothonga mowogoowa!>>

26 Nabwiya ahimwaakulaga, wiira: <<Miyo gaafwanya oSoddoma egaliwo athu apama makumi matanu (50), ginohiya nluwa ndde mwaha wa ayene>>.

27Abarahamu ahiwelelaga okoha, wiira: <<Naari ngali nthubi ni nddoora, gihiileva owoga ni Nabwiya aaga. Mugirumeedhe okoha teto: 28Ki mweera, mwaafwanyawo ehaakwanaga makumi matanu (50), ehalaga atanu? Muneere obwanyula nluwa naatenene va mwaha wa ala atanu?>> Nabwiya ahimwaakulaga, wiira: <<Geera gaafwanyawo athu apama makumi mannayi ni athu atanu, kaginapahula nluwa ndde>>.

29Abarahamu ahididelaga owoga ni Nabwiya, wiira: <<Ki mweera mwaafwanyawo athu apama makumi mannayi?>> Nabwiya ahimwaakulaga, wiira: <<Kagidha gipahula nluwa ndde mwaha wa ayene makumi mannayi>>.

30Abarahamu ahiwelelaga owoga, wiira: <<Nabwiya aaga, muhutakaleliwe teto gookohani wi: Ki mweera mwaafwanyawo makumi maraaru?>> Nabwiya ahimwaakulaga, wiira: <<Naari gaafwanyawo athu makumi maraaru, kaginawiirela yootakala>>.

31Nuwindo Abarahamu ahiwogaga, wiira: <<Gihiileva owoga ni Nabwiya aaga. Mugirumeedhe okoha: Ki mweera mwaafwanyawo makumi meenddi?>> Nabwiya ahimwaakulaga, wiira: <<Kaginapahula va mwaha wa ayene makumi meenddi>>.

32Abarahamu ahididelaga owoga, wiira: <<Nabwiya aaga, muhutakaleliwe. Ela yookoha yaaga yoomariha: Ki mweera mwaafwanyawo kumi?>> Ahimwaakulaga, wiira: <<Kaginapahula va mwaha wa ayene kumi>>.

33 Nabwiya agamalile othapanya ni Abarahamu, ahidhowaga. Abarahamu ahiwelelaga owaniwa.

Currently Selected:

Wambeela 18: tke

Highlight

Copy