Wambeela 17

Etoonyihedho ya nipangano no waandana

1Abaramu aganna yaaka makumi matanu na mannayi, ni yaaka tanu nennayi (99) Nabwiya ahooneyelaga wa oliye, wiira:

<<Miyo gili Mulugu oowodha-wodha;

weeddege ni miyo, okalege apama.

2Miyo ginoodha nkaraateyihe

waandana woopanganela waaga ni weevo,

ginoodha guuvahe ahima owiinjivesesa>>.

3Abaramu ahiworomihedhaga yuuji yaaye vati, vano Mulugu ahididelaga owoga ni oliye, wiira: 4<<Mwa miyo, nipangano no waandana gineeriimi ni weevo, onoodha okale baabi a malogo majinji. 5Wambeela peeno, ndina naawo kunaakale Abaramu, mbwenye, Abarahamu,#17.5 Abaramu, Abarahamu Abaramu mu ewogelo ya eHeberi enatapulela baabi oothithimiheya. Abarahamu nneeweya wona: Baabi a athu ajinji. vowi ginoodha giirena wi okale baabi a malogo majinji.#17.5 Mulugu ahimvaha Abaramu ndina nimohi. Omuthwa ndina muthu enatapulela wi ohukalana othongi va oliye. 6Ginoodha guuvahe anamabaliwelamo owiinjivesa, mwa weevo enoodha ekumemo malogo ni mamwene. 7Waandana woopanganela waaga onoodha okale ni weevo ni wa anaawo a musogolo, wona waandana woopanganela woohumala. Gineere gikale Mulugu aawo ni Mulugu a anaawo.#17.7 Yoororomeliha yowi <<Ginaakale Mulugu aawo>> bu muruya wa muselu wowaandana. Enowelihedhiwa dila dhijinjidhene mu Nipangano Nawale. Mulugu daakale owaakihedha nlogo, musogoleli owaang'anela, dinaroromeliha mareeliho a musogolo. Onaloba wiiwelela, baahi. Moone Wambeela 17.9; 18.19; 22.18; 26.4-5. 8Ginoodha guuvahe weevo ni anamabaliwelamo aawo elabo ela yaatene ya oKanani oliiwe wi ekale yaawo mudhidhi waatene. Ebaribari ginoodha gikale Mulugu eewa>>.#17.2-8 Ola olenddo wa neethaaru Nabwiya vaweleliiye mukalelo wa nipangano. Moone Wambeela 12, 15.

9Mulugu teto ahiwogaga, wiira: <<Vano weevo Abarahamu, waakwanelihege waandana waaga, weevo ni anaawo malabo maatene. 10Makalelo owaakwaneliha waandana waaga ni weevo vamohi ni anaawo aatene baala: Mwawiinelege#17.10 Wiineliwa wu kunafwanafwana ni wiineliwa wa mukalelo weehu, yaali etoonyihedho ya nipangano no waandana naheliwe ni Mulugu yatapulela wi Abaramu ahilibela wi Nabwiya oliyeeneve daakale Mulugu aaye. aniinyu aatene anaalobwana mmwiilini. 11Ogwaddiwa mwiili wa alobwana eenyu eneere ekale etoonyihedho ya nipangano no waandana waaga ni nyoovo. 12Ahima eenyu yaakwanaga malabo matanu na maraaru, mwawiinelege aatene ale eli anaalobwana mowaagwadda, ebaliwe vaade vaawo, naari adhaari ooguliwa ni a malogo mamohi. 13Ale oobaliwa a vaade vaawo, ni adhaareene ooguliwa, yiineliwege. Ela eneere ekale etoonyihedho yoohumala yo waandana waaga mmwiilini mweenyu. 14Oyene oneere ahiineliwe, ahigwaddiwe mwiili waaye, eegariwege mmulogoni mwaaye, vowi ohukoodda waandana woopanganela waaga>>.#17.13-14 Wiineliwa yaali etoonyihedho yowaandana vaari va Abarahamu ni anamabaliwelamo aaye ni Mulugu. Yesu ahiirana nipangano nimohi nixa ni hiyo. ARoma 2.28-29, vamohi ni AFiliposi 3.3 enatapulela wi wiiwelela mwa mahala a Yesu Kirixtu si etoonyihedho ya nipangano nimohi nixa, dhiinova wiineliwa wa mwiili kahuwo woofuneya.

Saara onoodha abale

15Mulugu ahiwogaga ni Abarahamu, wiira: <<Vano mwihiyanaawo kaneethaniwege Sarayi, mbwenye Saara.#17.15 Saara mu ewogelo ya eHeberi nnatapulela mma a mamwene. 16Ginomureeliha wi akale mma a malogo majinji, vano mwa oliye enoodha ekumemo mamwene>>.

17Abarahamu ahiworomihedhaga yuuji vati mbwenye ahiteyaga, wiikoha mmurimani mwaaye, wiira: <<Ebaribari mulobwana onoodha abale aganna yaaka zana (100)? Ebaribari Saara onoodha abale, aganna yaaka makumi matanu na mannayi (90)?>> 18Ndala Abarahamu ahimwaakulaga Mulugu, wiira: <<Mwaheere mmurumeedha Zhumayili wi akalege vameentoni veenyu!>> 19Mbwenye Mulugu ahiiraga: <<Naari, mwihiyanaawo Saara onoodha ombalele mwaana-mulobwana, vano weevo onoodha omuthwe ndina naaye Ezaaki.#17.19 Ezaaki mu ewogelo ya eHeberi nnatapulela oyene onateya. Moone Wambeela 18.12-15. Miyo ginoodha nkaraateyihe waandana waaga ni oliye, vamohi ni anamabaliwelamo aaye, malabo maatene.

20<<Mbwenye dha Zhumayili, gihiiwa. Ginoodha gimureelihe vano ginoodha gimvahe anaaye owiinjiva. Oneere akale baabi a asogoleli kumi nabiili, ni a milogo dhijinji. 21Waandana waaga ginakaraateyihe ni Ezaaki, mwaana oyene Saara oneeriiwe ombalele mudhidhi olena yaaka eyo>>. 22Mulugu agamalile owoga ni Abarahamu, ahivenyagavo va oliye.

23Wona Mulugu vawogeliiye, nlabo nendde Abarahamu ahawiinela alobwana aatene a vaade vaaye, mwaanaye Zhumayili, aatene ayene yabaliwe owaniwa ni aatene alene yaali adhaari ooguliwa. 24Yiineliwaga Abarahamu aganna yaaka makumi matanu namannayi ni yaaka tanu nennayi (99), 25Zhumayili aganna yaaka kumi nathaaru. 26Nlabo nendde yahiineliwaga Abarahamu ni mwaanaye Zhumayili 27vamohi ni alobwana aatene a vaade vaaye, ayene oobaliwa vevale, naari teto adhaari ooguliwa a malogo mamohi.#17.23-27 Wiiwelela weehu okale wowaaguva ni wowaakwanela wona wa Abaramu!

Currently Selected:

Wambeela 17: tke

Highlight

Copy