Wambeela 13

Omwalana wa Abaramu ni Lothi

1Ndala Abaramu ahivenyawo wEgubuddu odhowaga oNegevi ni mwihiyanaaye, dhooreela dheewa dhaatedhene ni mudhule Lothi. 2Abaramu aali mwiinya a dhooreela, ahikalana aneenyama ajinji vamohi ni parata ni oro. 3Ahivenya oNegevi odhowaga dhipaddi dha oBeteli wewo wamagiliiye musasa waaye, vaari va Beteli ni Ayi, 4vevo vowambeela vasasanyiliiye ebuwa ya mukutho wa Nabwiya. Olobelaga mu ndina naaye vevale.

5Lothi ole eedda ni Abaramu, ahikalana mabila ni ng'ombe ni misasa dhijinji.#13.5 Mwanakwaadhuni Lothi vano ahikalana dhooreela dhijinji teto, vowi Abaramu amulelile moodhivela. Hiyo teto enofuneya wi naalelege anakwaadhuni. 6Va mwaha ola kaakwaniha omaga vamohi ni Abaramu, vowi mburo wahiyeva wookalvo aabiili ni dhooreela dheewa.#13.6 Murudda ole kawaali mahinje owaakwana naari thongwe yowaakwana wa aneenyama aatene a Abaramu ni Lothi. 7Vevale vahikala owana-wana wa amakambuzi a mabila a Abaramu ni a Lothi. Ohiya ela, mwiilaboni mule yahimagamo aKanani ni aPerezi mudhidhi olene.

8Abaramu ahiwogaga ni Lothi, wiira: <<Kukalevo owana-wana wa hiyo naari wa amakambuzi a mabila eehu, vowi nili emudhi.#13.5-8 Abaramu ononooniha mukalelo wapama wookalana murenddele mmuralani. Ahogoolela dhoorusa dha mahinje ni thongwe mwa murenddele va emudhi yaaye. Soofuneya niharege mukalelo wowinda nisasanyedhege dhookathamiha mwa murenddele. 9Elabo yaatene ela, osakule eyene enafuniiwe. Nimwalane. Waya epaddi ya omoononi woong'oto, miyo ginaya omoononi wooja. Waya epaddi ya omoononi wooja, miyo ginaya woong'oto>>.

10Lothi ahisugwa dhipaddi dhaatedhene, woona nddiba na oZhordawu, ofiyedha oZowari, nenddo nanna mahinje majinji wona mudda wa Nabwiya, wona wEgubuddu. Nda dheereyile Nabwiya ahinaaguve ombwanyula Soddoma ni Gomora. 11Ndala Lothi ahisakula nddiba nendde na oZhordawu, weeddaga odhowaga wewo onakuma nduwa. Nuwindo famwalaniliiye ni Abaramu. 12Abaramu amagile epaddi ya oKanani, vano Lothi ahisakula epaddi ya maluwa a nddiba na Zhordawu, ahitibela misasa dhaaye waaddamela oSoddoma.#13.12 Soddoma waali mburo woononeya wa dhoothega. Lothi asakulile waaddamela nluwa nendde, omagomelo wiwa ahivolowa okalaga mwemule. Moone Wambeela 19.1-2. Osakula wula ahibwanyulana emudhi yaaye. Enofuneya nirabelege mburo dha dhoothega nihaaddamelege. 13Mbwenye athu a oSoddoma yaali ootakala mirima, yoomuthegelesa Nabwiya.

14 Nabwiya ahiwogaga ni Abaramu, vevale Lothi vamwalaniiye ni oliye, wiira: <<Oli veva osugwe dhipaddi nnayi dha elabo ela, onadhowela pevo ya murubi ni onakumiiwa, onakuma nduwa ni wewo onadhoweliiwa. 15Elabo yaatene ela enooniiwe ginowuuvaha we ni anaawo a musogolo, mudhidhi dhaatedhene.#13.14-15 Mowaaguva Lothi agavenyilewo, Mulugu ahimuroromeliha murudda Lothi wasakuliliiye wa Abaramu, vamohi ni kokola dhimohi dha murudda olene. Mulugu ahitamaalela owoma murima wa Abaramu. Vano teto oneere atamaalele makalelo apama eehu. 16Ginoodha gaweenjedhedhe aniiwa alena, ekale wona nthubi na vatheyani. Kalivo onaakwaniha weelengela nthubi naatenene, kalivo teto oneere aakwanihe waweelengela anaawo. 17Vano, ovenye weeddeedde dhipaddi dhaatedhene dha elabo ela vowi ginowuuvaha>>.

18Abaramu ahitamiha misasa dhaaye, odhowa omaga mmithankoni dhuulubale dha Mamere oHeboroni, vano ahisasanya wewo ebuwa ya mukutho wa Nabwiya.

Currently Selected:

Wambeela 13: tke

Highlight

Copy