Okuma 37
37
Masasanyedho a kaxa
(Okuma 25.10-15)
1Bezaleli ni ameesili amohi yahisasanya kaxa, ya mithanko dha akaasiya; olapa wiwa yaali meeturu nimohi ni meya (1,5m), orambalala wiwa yaali masentimeeturu makumi matanu nameenddi ni matanu (75cm), otaama wiwa yaali yooligana. 2Yahihuruwedha ni oro apama ode ni muwari, yahisasanyedhela kara yootopiwa ya oro mowaapeeleliha. 3Yahinyungulusa mangooza mannayi a oro, yahihela mmonddoni mwa kaxa, mangooza meenddi epaddi ya kaxa meenddi teto epaddi emohi. 4Yahisasanyedhela dhimiri dha akaasiya, ohuruwedha ni oro. 5Yahivolosihamo dhimiri muwari mwa mangooza a kaxa wi evenyihegena.
6Yahisasanya teto yookuneelanaavoya ni oro apama, olapa wiwa yaali meeturu nimohi ni meya (1,5m), orambalala wiwa waali vaari ni vaari va mpimo.#37.6 Naari wi: masentimeeturu matanu (75cm). 7Ni oro oohaniwa yahisasanya dhoopaddusiwa biili dha odhulu dha mompelo, yahihela mmagomelo wa yookuneelana ele. 8Mmohi yamuhelile omagomelo wula teto mmohi omagomelo wumohi. 9Dhoopaddusiwa dha odhulu nde, dhahitapulela mompelo eewa, vadhulu vayookuneelana yaatene, osugwanaga mmohi ni mukwaaye, egaworomihedhe kove dheewa vayookuneelana ele.
Masasanyedho a meeza
(Okuma 25.23-30)
10Yahisasanyedhela teto meeza ni mithanko dha akaasiya; eyene olapa wiwa yaali meeturu nimohi, orambalala wiwa waali meya ya meeturu, otaama wiwa waali masentimeeturu makumi matanu nameenddi ni matanu (75cm). 11Yahihuruwedha yaatene ni oro apama, yahisasanyedhela kara yootopiwa ya oro mowaapeeleliha mwiwa. 12Yahisasanyedhela mowaapeeleliha mukaleloya wa masentimeeturu matanu ni meenddi (7cm). Yahisasanyedhela kara ya mukalelo wootopiwa. 13Yahinyungulusa mangooza mannayi, waahela mwemo munamelela meddo dhiwa. 14Waaddamela kara vahikala nikungu moovirihamo dhimiri dhoothebana. 15Dhimiri ndo dhoothebana meeza dhasasanyiwe ni mithanko dha akaasiya oohuruwedhiwa ni oro. 16Yahisasanya dhego dha vameeza ni oro apama: miziwo dhiwa, anamusaniya, milinga ni mihadha dhoohelamo dhoovaha dhookuthula.
Masasanyedho a extanti voohela panti
(Okuma 25.31-40)
17Yahisasanyedhela teto extanti voohela panti ni oro apama oohaniwa, winna nthiwa, mulongothi, kopo, dhiwuduburu ni tododhiwa, dhaatedhene dhasasanyedhiwe yego emohive eyene. 18Dhahikalana mijindda mitanu ni mmohi, miraaru dhakumile kukuru ela, miraaru teto kukuru emohi. 19Mujindda ni mujindda wahikalana kopo thaaru ni mukalelo wona dhiwuduburu ni todo dha amendowa. 20Vamulongothini wa extanti elena dhahikalavo kopo nnayi dha mukalelo wona dhiwuduburu ni todo dha amendowa. 21Vahikala dhikopo thaaru mwamelela mapura a mijindda miinddi. 22Mijindda ni dhiwuduburu dhasasanyedhiwe yego emohive eyene, extanti yaatene yahaniwe wa yego emohive eyene ni oro apama. 23Yahisasanyedhela teto panti tanu nabiili ni dhoohiddihana ni dhoothimihana dhiwa dha oro apama. 24Yahisasanyedhela extanti yaatene ni dhookamihedha dhiwa dhalabiwena kilu makumi maraaru dha oro apama.
Masasanyedho a niburo na mukutho wa libani
(Okuma 30.1-10)
25Yahisasanyedhela niburo na mukutho wa libani ni mithanko dha akaasiya, eyene dhipaddi dhaatedhene dhoofwanafwana, meya meeturu. Otaama wiwa waali meeturu nimohi. Yahitogoliwa matabwaya wona manyaga mannayi mmagomelo mwiwa. 26Yahihuruwedha niburo naatenene ni oro apama: vadhulu, mbararuni ni manyagaya. Yahitopa wapeeleliha ni oro. 27Yahisasanya teto mangooza meenddi a oro, waahela mbararuni, muddibani mootopiwa mwavira dhimiri dhoothebana. 28Yahisasanyedhela dhimiri dha akaasiya, dhahuruwedhiwe ni oro.
Masasanyedho a makura ni libani
(Okuma 30.22-38)
29Yahisasanyedhela makura wi esakuleliwegena mabasa a Mulugu, ni libani noonukwela, dhoosasanyiwa ni orandda.
Currently Selected:
Okuma 37: tke
Highlight
Share
Copy
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
