Matthew 7

Imomane embo nei katove.

(Luke 6:37-42)

1“Embo nei katove dowo, edo God mi imomane katae doware. 2Edo imomane embo nei katewa gido God mi imomane kataina. Edo imomane tega ro embo neide jigamo edo katewa awa, God tega dá awa jigamo edo imomane kataina.

3“Edo ro awaembo imo onyenye saka ito namejida#7:3 nameji da moka einda awa ‘otawo’. jisida isira awa gido tesi, ata ikuta bajina jisi ikaitoda isira awa gae esi? 4O nongo edo ine ito namejide engo teta, ‘Do, onyenye saka ito jisida awa pusigane,’ edo ito jisida ikuta bajina isiri? 5Imo embo iwawa tote (2)de! Gisibé awa ito jisi akutada ikuta bajina isira awa teugeyo. Ango edo imo yai dave gosite ito namejida jisida onyenye saka awa pusigate.

6“Rorae kotopu awa sinomanede piove. Aindabé ango awo awamanemi wareregedo imomane gamundo usibesi ara. Edo gaegae edo itomane kau awa pumaneda doda augove. Ango awo awamaneda taimi pataro beyae aina.#7:6 Jew embomaimi kotembedo esitera awa sinomane de pumane de awa wo donode. Sinomane de pumane de einda kariwa awa embomai ainkainmi God da ge ajiregedo jipapa ae edo era. Rorae kotopu o kau einda kariwa awa God da ge.

Jipapa itomane God de atega ewo, ami piari bawa.

(Luke 11:9-13)

7“Edo jipapa itomane atega ewo, imondemane piari bawa. Itomane jipapa awa gain ewo, edo tambawa. Edo manguroda tatain jivewo, itomane yai manguro pirigaina. 8Aindabé berari ainmi God de atega edo eira awa, ainde pieuri budo eira. Edo ainmi ainda jipapa ro God da yai gain edo eira awa, tamundo eira. Edo ainmi God da manguroda tatain jivedo eira awa, God mi embo ainde manguro pirigaina.

9“Edo imomane embobo itewa doregari einda doda, mai da (1)mi ainda mamode bread atega ari, ganuma piainita? 10O unwo atega ari awa, piae dodo ainde jimbago piainita? 11Awa dave ae. Imomane awa embo bebegae, ata imomane gari bureite kando dave mamai itomanede pisido ewa. Itomane Mamo utuda ami embo beraride dave edo eira, awatedo embo ainkainmi Mamo de atega edo era awa, awamanede rorae davegave jiwaebé piari bara! 12Awatedo buro ro embo neimi imomane embo orote jipapa ewa awa, inemane awamane embo ewo. Eiwa Aodarida edo Peroveta maneda Ove Gaiari#7:12 Aodarida edo Peroveta maneda Ove Gaiari da moka awa God da Ove Gaiarida ge, Genesis maundo Malachi. da atopatarida moka.

Embo indewae God da wasiri natopo itarida torara.

(Luke 13:24)

13-14“Wasiri natopo itarida torari be awa kisisimbari edo ainda begata awa okain, awatedo embo indewae wasiri awa tamundo era. Embo jiwae torari be bebegada torido begata bereyada usibesi ain auntera. Awatedo torari be kisisimbarida toriwo.

Embomaida wasiri edo era ami awamaneda do dave ko beyae awa arapa ari gawa.

(Luke 6:43-45)

15“Peroveta mane pitawami dá wo sipu beyae itaede ango itomane yaida gumbara. Awatedo gidogogobé ewo! Awamaneda do awa abu sino gorobade wo nenei tepotapo injido era ango. 16Awamaneda wasiri edo era ami awamaneda do dave ko beyae awa arapa ari gawa. Embomi pasiporo be awa benomada budo erita ko dunga be awa wodei beoda budo eri? Embomi rorae ango awa bainyae. 17Dá ango ni da da berari dave ami be dave ekedo eira, ata ni beyae ami be beyae ekedo eira. 18Ni dave ami be beyae ekari tao ae. Daedo ni beyae ami be dave ekari tao ae. 19Edo ni da da berari nomi be dave ekae edo eira gido awa, kapedo niyaoda augedo era. 20Awatedo emboda wasiri edo era ami awamaneda do dave ko beyae awa arapa ari gawa.

Embo ainkainmi God da jipapa edo era, awamanemi akuta utuda gisijiari yai torara.

(Luke 13:25-27)

21“Embo berari ainmi namonde, ‘Badari, Badari’ site isimango utuda gisijiari yai#7:21 utuda gisijiari yai awa yai utuda God mi sima dave edo eira. torari tao ae. Ata ainmi nato Mamo utuda ainda jipapa edo eira, ami akuta torari tao. 22Iji ainde embo jiwaemi namonde tara, ‘Badari, Badari, nakare ito daoda ge karigesitera, edo ito daoda asisi bebegae ondetero idegesitera, edo ito daoda wasiri babain jiwae esitera.’ 23Edo iji angode nanemi awamanede ge arapabéda tano gara, ‘Na imomane bé gae. Imomane ge nato kera ae ari embobo, nato yaida dodo eve mambuwo!’

Embo tote (2)mi mando evekara gaputera.

(Luke 6:47-49)

24“Awatedo embo berari ainmi ge nato ingido kera edo eira awa embo dubogari demi ainda mando butu okainda gapusina ango. 25Edo wa wotedo un visido bisi gundo mando ainda ikanade dorisina. Ata mando awa butu okain duredo ainda dasivi piedo gapusina, awatedo durae. 26Ata embo berari ainmi nato ge ingido kera ae edo eira awa embo kotembari itaedemi ainda mando popoda gapusina ango. 27Edo wa wotedo un visido bisi gundo mando ainda ikanade desiri durudo usibesibé esisina.”

28-29Edo Iesu mi ge awara taride embomai atopasido esisina, Aodarida atopapasigari dá ango ae. Awatedo iji ainde Iesu mi ge awa tedo petugesisina, awamanemi ainda atopatari gido korebé edo esitera.

Currently Selected:

Matthew 7: bhg

Highlight

Copy