John 11

Lazarus Betani nasida besisina.

1Iji angode embo da (1), ainda dao Lazarus, karu eite esisina. Edo embo awa nasi Betani embo. Edo nasi Betani dá ainda Mary ae ainda dao Martha de isima edo esitera. 2(Mary emi gama muno davedemi Badari da taida dasisina, edo ainda kopuru tumi ainda tai gaigesisina. Edo Mary dá eiwa, ainda ru Lazarus karu esisina.) 3Awatedo ru aimonomi Iesu garate ge pietero maunsisina engo, “Badari, giyoǃ Ito otawobé karu eira.”

4Edo Iesu ge awa ingido sisina, “Karu einda beao awa betari ae, ata God da taogari awaembo, edo God da Mai da taogari embomaida yai arapa ari gorote.” 5(Iesu Martha ae ainda dao de Lazarus de dubobudo esisina.) 6Edo iji ainde Lazarus da karu ari ge ingisina, Iesu yai dá ainda imo isite awa deguta tote (2) nei sima esisina.

7Edo ainda amboda embo ami ambodanide sisina, “Kaende tekago yai Judea aimbore.”

8Edo ambodani mi ainde sitera, “Atopatari, iji ribori aebé Jew embobo#11:8 Jew embobo. Ove Kotopuda atopapasigari jiwaemi kotembedo era, embobo einda awa Jew embomaida gisijijiegari. mi imo ganumami daro betatate jipapa eiara, edo imo tekago yai ounda aimain esita?”

9Iesu mi mina sisina, “Deguta da da ora 12 ainda parara isima edo eira. Embo da ainmi ijide ainto aina, aindabé ijida parara gido eira, ainda tai koingae edo eira. 10Ata embo da ainmi muyaede ainto aina, aindabé parara ainda yai itae, ainda tai koingedo eira.”

11Edo ge eiwa tedo ainda amboda ami awamanede sisina, “Kaenato otawo Lazarus jitao aveite isira, ata na mauntena embo awa audano erarate.”

12Edo ainda ambodanimi sitera, “Badari, embo awa jitao aveite isira gido, awa kaviegaina.” 13Awarata, Iesu da geda moka awa Lazarus besitara. Ata ainda ambodanimi imo tepo jitao awarida ge sira awa kotembesitera.

14Ango edo Iesu mi awamanede arapada sisina, “Lazarus besitara. 15Ata aindabé itomane gebé ari nato yai badaina, awaembo dubodave ena yai ainda na itae. Awarata kaende ainda yai boroko aimbore.”

16Edo Thomas (Ainda dao nei awa Didymus.#11:16 Didymus da moka awa ‘jinjiga’.), ami Iesu da ambodani neneide sisina, “Kaende daedo maundo embo ainde daedo betore.”

Iesu mi sisina, “Na awa erari edo wasiri.”

17Edo Iesu gumbiri embomaimi tetero gosisina awa Lazarus goiari yai ude banga toda pietero deguta ipa ao pasido (4) matu sima eutara. 18Betani nasida edo aundo Jerusalem awa ribori tega kilometre tamonde (3) ango. 19Jew embomai jiwae gundo, edo eutumai ainkain Martha ae Mary de matu jinenembetero awa, awamanede daedo doregesitera. Aindabé awamaneda ru betesira, eutu tote (2) dubo vevera esitera. Edo embomaimi awamaneda dubo vevera gido kondade ain guputera. 20Edo iji ainde Martha mi Iesu gupeira da ge awa ingido, imo idegedo embo awa tapusina, ata Mary mando doda anumbedo isite sima esisina.

21Ango edo Martha mi Iesu de sisina, “Badari, imo einda itae eteta gido, nato ru awa betainyae. 22Ata, boroko na daedo gari awa, imo ro God da yai benunu tata awa God mi ito yai piaina.”

23Iesu mi eutu ainde sisina, “Ito ru awa tekago wasiri budo eraina.”

24Martha mi embo ainde sisina, “Na gari, embo awa tekago wasiri budo eraina, erari deguta beao arida.”

25Iesu mi eutu ainde sisina, “Na awa erari edo wasiri. Embo ainmi ainda gebé ari nato yai pisido eira, edo imo amboda betaina gido awa, imo tekago wasiri baina. 26Edo berari ainmi nato yaida isite edo ainda gebé ari nato yaida pipisite awa, mana betaina. Imo ge eiwa gebé esita?”

27Eutu ami ainde sisina, “Gebé, Badari, na gebé esitena imo awa Keriso, God da Mai, butuda piari gumbata awa tarigarida sisina.”

28Edo eutu awa ge eiwa tedo amboda aundo ainda dao Mary dao tesiri gumbiri kundo iunte demonda edo eutu ainde sisina, “Atopatari gumbira isira, edo imo dao sira.” 29Edo iji ainde Mary ge awa ingido, imo burigibé erido ainda yai tuturo edo maunsisina. 30Edo Iesu awa nasida torae, ata matawa yai Martha mi imo tapusina ainda isiri jijirisina. 31Ango edo dubo vevera iji ainde Jew embomai Mary de daedo mando doda isite eutu awa kondade eite itera, ami eutu awa boraebé erido idegesiri gositera. Edo awamanemi sitera, “Eutu ami goiari yai ude banga toda ji tain aunteira.” Awatedo awamane eutu awa ambo ambo esitera.

32Edo iji angode Mary gundo yai ainda Iesu isiri embo awa gido, ainda taida durudo embo ainde sisina, “Badari, imo einda itae eteta gido, nato ru awa betainyae.”

33Awatedo iji ainde Iesu mi eutu awa ji siri gosisina, edo Jew embomai eutu ainde daedo guputera ami ji tero gido, imo do memesi bajinabé biri do buriya esisina. 34Edo ami sisina, “Embo awa yai nonda pipitavi?”

Awamanemi embo ainde sitera, “Badari, gumbu gate.”

35Edo Iesu ji sisina.

36Ango edo Jew embomaimi mina tara esitera, “Giwo, embo ami embo awa dubo bajinabé budo esira!”

37Ata awamane neneimi sitera, “Embo emi embo jisiguba arida jisi pirigatara. Ro awaembo imo Lazarus kondade ari piae dosiri betesiri?”

Iesu mi Lazarus betarida edo jiri erorisina.

38Edo Iesu tekago do memesi bajinabé bureite goiari yai udeda gupusina. (Awa banga to, edo ganuma bajinami ainda be awa engiregesisina.) 39Iesu mi sisina, “Ganuma awa mitewo demonda iyareǃ”

Martha, embo betarida ru, ami Iesu de sisina, “Badari, embo besitara edo gundo boroko emi deguta ipa ao pasido (4) eira, awatedo embo ainda tamo mata beyaebé eira.”

40Edo Iesu mi eutu ainde sisina, “Na imonde matu tetena, edo imo gebé ata, imo God da taogari gata. Ge awa ruvegetesita?”

41Ango edo embo betari pietero isiri ainda yaida edo awamanemi ganuma awa mitedo demonda pipisitera. Edo Iesu pangedo jisi utuda edo sisina, “Mamo, na ingeta, awaembo imo ategetena. 42Edo na gari imo iji berari na ingido eta. Ata embomai einda jinenembedo petari itera awaembo ge eiwa tetena, awamanemi ine na pieteto guputena gebé orote.”

43Edo ge eiwa tedo itae edo amboda, ami aorogatedo ikanade sisina, “O Lazarus, idegeǃ” 44Edo embo betari awa idegesisina, ainda ipatai awa goiari gongomi bundari, edo ainda dombu awa gongo gisimi doiari.

Edo Iesu mi awamanede sisina, “Embo awa udegedo dowo mambare.”

Pirisi babain ae Parasi mane demi Iesu daro betarate ge jijiritera.

(Matthew 26:1-5; Mark 14:1-2; Luke 22:1-2)

45Awatedo Mary da dubo vevera iji ainde, Jew embomai jiwae eutu awa kondade ain guputera. Edo awamanemi Iesu mi buro ro edo esira awa gido awamaneda gebé ari ainda yai pipisitera. 46Ata awamaneda embo neneimi Parasi maneda yai aundo buro ro Iesu mi edo esira awamanede sitera. 47Ango edo pirisi babain ae Parasi mane demi Sanhedrin#11:47 Sanhedrin awa Jew embomaida ge babain katari emboboda doregarida dao. Awamaneda ajigari berari awa gisijijiegari 71. Edo doregari doda awa: Pirisi babain ae Parasi mane de Sadusi mane de Aodarida atopapasigari de, edo gisijijiegari ae babadegari de. da embobo dao tetero gundo doregetero awamanede tedo esitera, “Embo emi kariwa jiwae edo eira. Awatedo kaende nongo ani? 48Edo kaen dowano, embo eiwa buro engo matawa aina gido awa, embo berarimi awamane gebé ari ainda yai piara, edo Rome da embobomi gundo kaenato yai#11:48 kaenato yai. Guriki ge einda awa ‘kaenato yai’, ata Ove Kotopuda atopapasigari jiwae kotembedo era, ainda moka awa ‘Jew embomaida oro kotopu bajina’. ae kaenato embomai de usibesi ara.”

49Edo awamaneda embo da (1), dao Caiaphas, awa pirisi maneda gisijiari bajina#11:49 pirisi maneda gisijiari bajina awa pirisi berarida badarari bajina. Edo daedo imo awa Sanhedrin da badarari bajina. duberi ainde. Ami awamanede ge sisina, “Ge ro tevi awa imomane gae. 50Na kotembetena awa, imomane awa gari bae nongo edo kaena kondade ari tao avi. Kaenato dave awa embo da (1) daro betaina embomai awaembo, gae gae edo kaenato embomai berari betara.”

51Edo embo ami imo akuta ge eiwa kotembedo tae, ata embo awa pirisi maneda gisijiari bajina duberi ainde. Awatedo embo ami ge perovetada ango sisina, Iesu awa Jew embomai berari awaembo betaina. 52Edo Jew embomai akuta awaembo betainyae, ata embo awa daedo God da mamai yai berarida evekara esitera awaembo betaina, kundo gundo dada edo doregari da (1) arate sisina. 53Ango edo deguta ainde awamanemi tuturo edo embo awa nongo edo daro betaini awa ge jijiritera.

54Awatedo Iesu arapada Jew embomaida jisida pepeta ae. Ata imo yai awa dodo nasi bajina dao Ephraim ainda aundo yai abu damodamoda demonda, ainda ambodani de daedo sima esisina.

55Ango edo Jew embomaida Darutegari Bondo awa atutumbesisina. Edo Darutegari Bondoda gumbae gisida, embo jiwae awamaneda yai dodo Jerusalem vivisitera, awamane akutada dono teiarida sirigari awaembo. 56Edo awamanemi Iesu kakowa edo esitera. Edo awamane oro kotopu bajina ainda petedo isite akuta tedo mina gara edo esitera, “Imomane ro kotembetevi? Embo awa doregari einda gumainyae ta?” 57Edo pirisi babain ae Parasi mane demi ge okain sitera, “Imomane da ainmi Iesu yai nonda isiari tambata, teyo gido nakare maundo embo awa kumbore.”

Currently Selected:

John 11: bhg

Highlight

Copy