Kabavelamu 46
46
Iakobo menatunavo wete tubunavo taiauda inaqo Itipita pwayapwayana waineye
1Beqa Iakobo nasakuvo matatabudi ivalabubunidi ilogwegwe inaqo Itipita pwayapwayana waineye nasusuvo taiauda. Tutuyanina ilekwa Bedisiba taoni waineye, kaisayanidiavo iluvewapadi igabunidi tamana Aisake na Yaubada waineye velomu paipaina. 2No lovananina Yaubada ivesipupu Iakobo kenokisakisaeqa waineye ivo, “Iakobo! Iakobo!”
Ibaivila ivo, “Uu, Yau sideqoigu.”
3Matautauda Yaubada ivo, “Yau tamamu na Yaubada. Ge kigololo kinaqo Itipita pwayapwayana waineye, paina kawaie Yau tubuleleleqinavo aikavepuedi dikabaloina inavebwaiga no vikainina waineye. 4Yau taiauda tainaqo Itipita pwayapwayana waineye matautauda mulineye tubuleleleqimwavo aiviledi aimaiedi dede waineye. Tutuyanina kiwapa, natumu Iosepa matamu inagialovoqi.”
5Beqa Iakobo Bedisiba taoni ikiaweni. Natunavo idodoqi wagabiubiu waineye, dede mesaida mwanediavo wete natudiavo siaidi matatabudi ivekaladodoqa wagabiubiu waidie, gumanidiavo Pelo ivetunedi paipaidi. 6-7#Aposi 7:15Dikaisayavo matatabudi wete sakunidiavo matatabudi Kenani waineye ikewadi inawedi Itipita waineye. Beqa Iakobo inaqo Itipita pwayapwayana waineye nasusuvo taiauda, mesaida natunavo lamoqidiavo, vevinediavo wete tubunavo.
Iakobo wete nasusuvo taiauda imai Itipita
28Iakobo Iuda ivetuneni inagumeta, inanaqo Iosepa waineye inavelaukuieni Goseni kanakeda paipaina. Tutuyanina Iakobo wete nasusuvo imai Goseni waineye, 29Iosepa nawagabiubiu ivalabubuni itauya tamana Iakobo inakiseni Goseni navikaie. Tutuyanina tamana ikiseni, iloaqavuya we itaitaiqa tutuya kaniakwanina. 30Matautauda Iakobo ivesipupu Iosepa waineye, “Deqoina maiqimu akiseni we ayagovi komu giladi meyawaimu, beqa yau kanasala aiwapa.”
Currently Selected:
Kabavelamu 46: mzz
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
