Kabavelamu 17
17
Iave nakiakiaya kanayato
1Tutuyanina Ebelam kanadiqaba 99 waineye, Iave imai waineye ivesipupu ivo, “Yau Yaubada Veluvelulunaotoqina. Kiavegu kulaukiaveneni. Komu nuapoumu tamoqana kuyatoi gunuanuana waineye, we ge tamo kapoina kivalabubuni, #17:1 Yaubada Veluvelulunaotoqina: Ibeliu “El Shaddai.” 2beqa guvonadabadaba veluvelulunina aigiavepakali komu waimue, wete tubuleleleqimwavo aikavepue-otoqidi.”
3Matautauda Ebelam inaqo ilaukabubu maiqinaeqa pwayapwaya waineye, wete Yaubada Ebelam waineye ivesipupu ivo, 4-5“We kunoqai Yau guvikai dede mesaida guvonadabadaba komu taiauda: komu kamukabei kabaloina puepuedi tubutubudi. Beqa deqoina kamuavaqa aisivilai Ebelam waineye inanaqo Ebelamo. #17:4-5 Ebelam: Wavaqa dede kananoqaya mesaida Ibeliu bonadi “tama vesivesinuana” paipaina. #17:4-5 Ebelamo: Wavaqa dede kananoqaya mesaida Ibeliu bonadi “tubudi kabaloina puepuena” paipaidi. 6Tubuleleleqimwavo aikavepue-otoqidi. Kabaloina puepuedi inamai komu waimue'eqa we kabaloina dikinivo komu tubuleleleqimwavo waidie'eqa inasauyedi.
7-8 #
Aposi 7:5
“Guvonadabadaba aigiavepakali veluvelulunina komu waimue wete tubuleleleqimwavo lagata imaimai taiauda waimie kaia inanaqo ge menakakava inakeno-vaqata. Yau mu Yaubada wete tubuleleleqimwavo di Yaubada. Kenani pwayapwayanina waineye kusasasala aikalaqeieni waimie, mipwayapwaya ge menakakava.”
9Yaubada Ebelamo ivoneni ivo, “Beqa komu muvikai, komu wete tubuleleleqimwavo guvonadabadaba kwaivematamataneni lagata imaimai waidie ge menakakava. 10#Aposi 7:8Muvikai dede mesaida guvonadabadaba komu taiauda: gukiakiaya bunu kanagusu kuvalabubuni waimue wete mesaida tubuleleleqimwavo lamoqidiavo inavalabubunedi mulimue imaimai. 11Beqa komu dukumunina kabasaila matana bununa kugusuya, inavekiakiaya davonadabadaba komu wete Yau taiauda. 12Lagata deqoina wete imaimai waidie gwagwama lamoqidiavo tamoqana tamoqana dikaiata 8 waineye bunu kanagusu kwaivalabubuni waidie. Natumwavo lamoqidiavo wete mutolituqa natudiavo lamoqidi, gumanidiavo kugimwanedi. #17:12 Dede tolituqavo igimwanedi ge datutulidi paina gunabeida igimwanedi mesaida saku. 13Mwaqitana, dede mesaida gukiakiaya bunu kanagusu kuvalabubuni lamoqidiavo matatabudi waidie mivanuqe. Guvonadabadaba komi Yau taiauda vovomie inavekiakiaya ge menakakava. 14Beqa aitoi tomoqo guvonadabadaba kanakiakiaya bunu kanagusu waineye ge inamiamiaqa no waineye, gumanina guvonadabadaba iqeuya, beqa gumanina aiketovegeia gutomo'otoqavo waidie'eqa.”
Iave Selai waidie ivonadabadaba natudi Aisake inavenatuneni
15Yaubada Ebelamo ivoneni ivo, “Mwanemu kadiwavaqa ‘Selai’ aisivilai ‘Sela.’ #17:15 Selai, Sela: Wavaqa kailuqa kadiyagova “Kini natuna vavinena.” Yaubada Sela wavaqa kaivauna iveledi inavekaivevenedi no gumanidi kabaloina puedi we togumetavo puedi inadi (17:16). 16Mwaqitana, Sela aivonavenapwayewedi waidie'eqa natumu aivelemu, we natumunina waineye'eqa kabaloina puepuedi wete dikinivo inamai.”
17Ebelamo tutuqana iveketonokuyeni maiqinaeqa ilaukabubu pwayepwayeye inamaqa kaisena nuapouneye ivo, “Aa, tavavaida dede diqaba 100 tomoqo idamiamia gwamana idavenatuneni? Wete mesaida Sela kadidiqaba 90. Banikodiqa, mesaida gwamana inababaneni?” 18Ebelamo Yaubada ivoneni ivo, “Oge Isimeli paipaina kuvesipupu kivonavenapwayeweni?”
19We Yaubada ivo, “Gebuka. Mwanemu Sela waidie'eqa natumu inatubuqa kiqoleni Aisake. Gumanina waineye guvonadabadaba aivalabubuni wete tubuleleleqinavo imaimai waidie ge inakakava inakeno-vaqata. #17:19 Aisake: Wavaqa dede Ibeliu bonadieqa kanayagova “inamaqa.” 20Isimeli paipaina gunabeida muvelaukui anoqai. Aivonavenapwayeweni natunavo puedi aiveleni wete tubuleleleqinavo inavepue-otoqa. Gumanina togumetavo 12 tamadi wete tubuleleleqinavo aikavepuedi dikabaloina inavebwaiga. 21We Aisake waineye guvonadabadaba aivalabubuni. Sela inavetubuqi dede kaiatanina waineye diqaba imaimai waineye.”
Currently Selected:
Kabavelamu 17: mzz
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
