Kabavelamu 14
14
Tutuyanina Lota Sodoma taoni waineye imiamia, Kini kadikumapuli meditolauqaviavo imai vikainina waineye taiauda ivetalaqa, we Sodoma wete Gomola ditolauqaviavo ivelulunapeledi.
Lota ikewai inaweni we Ebelam inaqo ikewavileni
11-12No waineye Kini kadikumapuli me Sodoma wete me Gomola ditomo'otoqavo, disaku puepuena wete kadi taiauda ikewadi inawedi. Tutuyanina waineye Lota, Ebelam taina natuna, Sodoma waineye imiamia, we nasakuvo ikewadi wete taunina ikavikavini taiauda inawedi. Matautauda no waineye ikiawedi inaqo.
13Tamo tomoqo Sodoma vetalaqaeqa ideqa imai Ebelam tomoqo Ibeliu waineye ivoneni vakai isauyeni no waineye. No tutuyanina waineye, Ebelam imiamia Mamile tomoqo Amoli nawelavi bwaigidi lamudie. Mamile, metainavo Esikoli we Aneli, Ebelam taiauda vonadabadaba ivalabubuni ivelautaubama. Ivonadabadaba me'ediavo iekaikaivaisa Kini kadikumapuli taiauda ietalaqa.
14Ebelam natolauqaviavo kadiyoko 318, puepuedi Ebelam nabaekwa naqeneye itubuqa waineye itaulai. Tutuyanina Ebelam inoqai Kini kadikumapuli Lota ikewai, beqa natolauqaviavo iqolekauqidi Kininidiavo italakwavinidi inawedi Dani taoni waineye. 15Tutuyanina ilovane, Ebelam natolauqaviavo iketovegeidi kadiyoko sulina sulina waidie. Matautauda kabalugu sulina sulina waidie ilugukwailidi ivelulunapeledi. Tutuyanina waineye Kini kadikumapuli wete ditolauqaviavo ideqa, we Ebelam menatolauqaviavo ikwavinedi inawedi Damasiko waineye ikiaweni inaqo Oba. 16Matautauda sakunidiavo matatabudi Kini kadikumapuli ikewadi inawedi, Ebelam menayokovo inaqo ikewaviledi—Lota wete nasakuvo, vevine tupwaidiavo wete tomo'otoqanidiavo ikavikavinidi.
Melekisedeki Ebelam ivonavenapwayeweni
18Matautauda Melekisedeki imai Ebelam ibabaneni. Gumanina Salema vanuqa kanakini, wete tovelomu Yaubada Tabwaotoqineye paipaina. Kaiatanina waineye beledi wete oine ikewadi imaiedi Ebelam waineye. 19Melekisedeki ivelaukui Yaubada waineye ivo,
“Yaubada Tabwaotoqineye,
abama wete pwayapwaya kaditovalabubuna,
avelaukuiemu Ebelam kivonavenapwayeweni.
20Yaubada Tabwaotoqineye, komu Kini kadikumapuli Ebelam
dimaneye kuyatodi beqa kadidigemu.”
Matautauda Ebelam nasakuvo Kini kadikumapuli waidie'eqa ikewadi vetalaqa mulineye imaiedi, bou 10 ivalabubunidi, we tamoqana bou Melekisedeki iveleni.#14:20 Ebelam ge idavemomogai, we bou tamoqana Melekisedeki iveleni kanagiavemaqeta nakalaqei gumegumetana ivalabubuni mesaida gimiuana.
Currently Selected:
Kabavelamu 14: mzz
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
