Isauyedi 24

Vonadabadaba kabavelamu

3Matautauda Mosese inaqo tomo'otoqa ivonedi Iave navemataluana wete naloinavo matatabuna iveleni, we matatabudi ibaivila bonadi tamoqanaeqa ivo, “Saku matatabudi Iave ivesipupuyedi kaivalabubunidi.”

4Matautauda Mosese Iave navona wete naloinavo matatabudi igililidi. We ikawananaqai kawakawaiotoqe itovoi gileu ilauqi didiqa velomu kabakanigabu paipaina koya dibuneye. Wete gileu bwaigidi 12 ivetovoidi me Isileli manuqa tamoqana tamoqana kadinuavekavina.

5Mosese me Isileli tubuau ivonedi inanaqo kaisaya inaluvewapadi divelomu inagabunidi, we wete bulumakau mwanewaudi lamoqidi inagabunidi veiaiana kanavelomuvo Iave waineye. 6We Mosese kaisayanidiavo dayaqidi takula waineye iwaqi, tamo vikai ikenokeno we tamo beqa didiqa ilauitaitali ivelauvivila. 7Matautauda Vonadabadaba Kanabuki nununumina ikewai iwawai tomo'otoqa matatabudi inanoqai. We tutuyanina inoqai ivo, “Iave navona matatabudi kaivalabubunidi wete kaivekimatanedi.”

8 # Mak 14:24 Matautauda Mosese dayaqa takula waineye ikewai tomo'otoqa ilauitaitalidi. Ivo, “Kwakiseni, tutuyanina Iave loinanidiavo ivelemi, vonadabadaba ivalabubunidi waimie, we dayaqanina mikabakisa vonadabadaba veluvelulunina.”

12Iave ivesipupu Mosese waineye ivo, “Kulagama waigue koya waineye kimiamia, we gileu beabeadi kailuqa aivelemu. Gileunidiavo waidie guloinavo wete guvemataluana aigililidi beqa tomo'otoqa kivevedi inavekimatanedi.”

13-14Matautauda Mosese kanatokaivaisa Iosua taiauda ivalabubuna inalaga. Tomoqovo bwaigidi waidie ivesipupu ivo, “Kwalalaugamasema kanaketoava kaivila kaimai waimie. Eloni wete Kuli komi taiauda kwaimiamia. Kago aitoi inavekawadibidibi inamai waidie inasivetonovidi.” We Mosese wete Iosua ilaga Yaubada nakoya waineye.

15Matautauda Mosese Iosua gamwaneye iyatoi we ilaga Yaubada nakoya tabwaneye, we waumana badubaduna imai koya iumai. 16We Iave mata'udu'udulina iobuma Koya Sainai tabwaneye. We waumana koya iumai kaiata 6 ikenokeno. Kaiata kanave-7 waineye Yaubada iveqole Mosese waineye waumana naqeneye'eqa. 17Me Isileli koya lamuneye imiamia ikisalaga Iave mata'udu'udulina kanakisa mesaida kai bwaigina koya tabwaneye. 18Matautauda Mosese ilaga koya tabwaotoqineye ilugu waumana naqedie, we no waineye imiamia kaiata 40 wete lovana 40.

Currently Selected:

Isauyedi 24: mzz

Highlight

Copy