Markus 7

Atora dhèu rai-haha baku paꞌele dadꞌèi Ama Lamatua

(Mateos 15:1-9)

1Ca lodꞌo, dhèu partei agama Parisi canau dènge mese-mese agama mai nèti kota Yerusalem neo paraga dènge Yesus. 2-5Dhèu Parisi kèpe paꞌèra adꞌa Yahudi. Nuka sèmi, dhèu neo raꞌa-rinu hudꞌi jꞌamo uuru ku kacui-aai madhutu atora adꞌa. Sèmi èèna kahèi, ladhe lèpa nèti dꞌara pasa, hudꞌi diu uuru ku èi. Toke mèdha dapu rèngu sèmi èru-pangala, pega, curu, galaa, cere, hudꞌi rase uuru ku madhutu atora adꞌa, heka bisa pake raꞌa-rinu kèna.

Ladhe dhèu Yahudi cahagꞌe madhutu boe adꞌa rèngu sèmi èèna, dhèu Parisi nasa.

Nèti èèna ka, ra nasa ropa rèdhi ana madhutu Yesus sèra raꞌa-rinu jꞌamo boe kacui-aai madhutu atora adꞌa rèngu. Ka rèngu mai pasala Yesus, peka na, “Nga tao ka ana madhutu èu se raꞌa-rinu jꞌamo uuru boe kacui-aai? Sèra sa, pasala dènge adꞌa nèti bèi-baki èdhi!”

6-7Te ngaa Yesus dhaa, aku Nèngu na, “Miu se mema padhai lii leo, tao leo! Nèti uru nèka mai Yesaya suri tèke le, lii padhai lii Ama Lamatua sèmi neꞌe,

‘Abhu dhèu dhu koa-kio kolongara Jaꞌa,

dhoka dènge hèbꞌa di, te ngaa nèti boe dꞌara.

Tatao rèngu sèmi èèna na, lèke boe.

Rèngu pusi-pahae boe dadꞌèi Jaꞌa,

te ngaa rèngu madhutu dhoka atora dhèu rai-haha di.’

Miu èci èèna kahèi.#Yesaya 29:13 8-9Miu tèke eele le paredha Ama Lamatua, ho madhutu atora dhèu rai-haha. Tatao miu ne, dꞌèlu-mèu bia!

10Karèi nèti uuru èèna, Musa peka le lii paredha Ama Lamatua sèmi neꞌe ka, ‘Pakabꞌua ina-ama miu.’ Aa tabha hari, peka na, ‘Ladhe ana èci padhèda ama na, do ina na, hudꞌi ra huku pamadhe ne.’#Kalua nèti Masir 20:12, 21:17, Atora nèti Ama-ama Agama 20:9, Lole Hari Jꞌara-jꞌara Mamuri 5:16 11-12Ama Lamatua ajꞌa sèmi èèna, te ngaa miu ajꞌa leo. Miu peka na, ‘Ladhe dhèu èci pamoa le neo hia ngaa èci mi Ama Lamatua, masi ka ina dènge ama na jꞌèra oe madhe èèna ka, te ngaa pake boe mèdha èèna ho soru-bara si, lula nèngu moa le neo hia mi Lamatua.’ 13Nèti èèna ka, deo na Jaꞌa peka le, miu pake heka dadꞌèi Ama Lamatua, te ngaa miu gati eele dènge atora miu dhu hiu. Atora ae le dhu miu gati eele sèmi èèna.”

Jꞌara-jꞌara dhu kajꞌalu mai nèti dꞌara dhèu

(Mateos 15:10-20)

14Hèia Yesus paroa hari dhèu leo ètu sèra, ka Na peka na, “Pasa dhilu ho nanene paie, sèna ka miu meꞌa. 15Ngaa dhu maso asa dꞌara dꞌèlu, pakajꞌalu boe. Te ngaa dhu kalua mai nèti dꞌara, èèna ka dhu pakajꞌalu dhèu. 16[Cee dènge roꞌa dhilu, na, nanene.”]#7:16Ètu dꞌara sasuri lii Yunani asli dhu uru-uru tèka, suri boe ayat ne.

17Èle èèna ka, Yesus dènge ana madhutu Na tèke eele dhèu sèra, ka lasi asa dꞌara èmu èci. Ka ana madhutu sèra karèi sasoa nèti lii pakasame deo na. 18-19Hèia Yesus dhaa, peka na, “Miu meꞌa boe kahèi? Sasoa na sèmi neꞌe ka: ngaa dhu dhèu raꞌa, èèna beꞌa. Te ngaa dhu kalua mai, karehe. Èèna beꞌa boe. Ngaa dhu èdhi taꞌa, maso asa dꞌara dꞌèlu, ho èèna na kalua hari asa liꞌu laꞌe. (Lii Yesus èèna neo peka mi èdhi, ngangaꞌa aaꞌi-aaꞌi, èci sa dhu luri boe).

20Ngaa dhu mai nèti dꞌara, èèna ka dhu paꞌele iie dhèu, nèti èèna ka, Ama Lamatua dꞌèi boe paꞌèci dènge ne. 21Te jꞌara bhelu-katubꞌa ae ka dhu kalua nèti dꞌara dhèu! Nuka sèmi: ngangee karehe, tao jꞌara makae dènge dhèu dhu dhèu èmu boe nèngu, manaꞌu, pamadhe dhèu, 22gagoo-gagehu, bersina, bhelu-katubꞌa, leko-monya, dhèu dhu taha nare boe dꞌara, dꞌèi boe dhèu risi nèngu, padhai lii pamanahu dhèu, padedha iisi, tatao dhu lèke boe, dènge kètu hadhu.

23Jꞌara karehe aaꞌi-aaꞌi sèra mai nèti dꞌara dhèu. Sèra ka dhu paꞌele iie dhèu. Ama Lamatua dꞌèi boe dènge dhèu sèmi èèna.”

Yesus soru-bara bhèni èci dhu dhèu Yahudi boe

(Mateos 15:21-28)

24Èle ka, Yesus tèke eele era èèna, ka laꞌe asa kota èci, ngara na Tirus. Dꞌai nèi, lasi asa dꞌara èmu èci, lula Yesus dꞌèi boe dhèu reꞌa Nèngu ètu èèna. Te ngaa Nèngu bisa boe pahuni ngiꞌu.

25-26Ètu èèna, abhu dhèu bhèni dintiu èci dhu nèti rai Finisia ètu propensi Siria. Ropa na tadèngi Yesus ètu èèna, na mai manèngi Yesus babège eele nidhu nèti ana bhèni na.

27Te ngaa Yesus core lii èci, peka na, “Ana-ana hudꞌi raꞌa uuru ku, ho sisa na, ra core hia busa kèna.” [Dènge lii pacele èèna, Yesus hudꞌi soru-bara uuru ku dhèu Yahudi Nèngu, heka dhèu leo kèna.]

28Te ngaa bhèni èèna bꞌala, aku nèngu na, “Mema tareꞌa Ama. Te ngaa busa mate le ètu roꞌa mei. Nèngu abhu kahèi ngangaꞌa dhu bèbhe nèti dꞌara pega ana iiki sèra.” [Madhutu bhèni èèna, lodꞌo ana raꞌa, na, busa naꞌa kahèi. Masi ka Yesus soru-bara dhèu unu Na, te ngaa Nèngu hudꞌi soru-bara dhèu leo kahèi.]

29Ropa Yesus tadèngi lii dhaa bhèni ne, hèia Na peka, aku Nèngu na, “Tareꞌa! Lii padhai lii èu èèna, mola-mola na kèna! Lèpa ka! Te nidhu rai le nèti ana èu.”

30Hèia bhèni ne laꞌe ka. Na dꞌai èmu, ana na dhu bhèjꞌi luu. Nidhu kalua le.

Lamatua Yesus puri-paꞌèle dhèu èci dhu lii aadꞌo aa katele-katipa

31Èle èèna ka, Yesus si pakèdꞌi nèti kota Tirus, kako lasi madhutu nebhe dhasi re kota Sidon. Nèti era èèna, rèngu lasi taruu dꞌai dano Galilea. Hèia ra lasi asa rai èci dhu dènge canguru kota, dhu ra biasa pangare na, ‘Dekapolis’. 32Ètu èèna, abhu dhèu èci dhu lii aadꞌo aa katele-katipa. Angalai na lere rèti ne asa Yesus. Ra manèngi sèna ka Yesus tao ai mi kètu na, sèna ka na èle. 33Hèia Yesus tèke eele dhèu ae sèra, ka laꞌe mesa Na dènge dhèu èèna. Yesus pamaso kacui-aai Na asa roꞌa dhilu dhèu eèna dua-dua. Èle èèna ka, Na tao ilu ètu kacui-aai Na, ka Na gꞌagꞌe heꞌo dhèu neꞌe. 34Hèia Yesus ladhe asa dedha, Na ère aꞌae madhera, ka Na paredha, aku Nèngu na, “Efata.” (Sasoa na, “Bhoke ka!”)

35Na peka dhoka sèmi èèna di, kabèdhi laa, dhilu dhèu èèna tadèngi dènge. Sèmi èèna kahèi, heꞌo dhu sakaa èèna, mako ka na padhai lii dènge.

36Èle èèna ka, dua ra lasi asa era dhèu ae sèra. Ka Yesus kai si, aku Nèngu na, “Nanene, ee! Baku lolo dènge dhèu, peka na, Jaꞌa ka dhu paꞌèle dhèu neꞌe ne.” Masi ka Na kai si, te ngaa dhèu seꞌe lasi lolo palème dꞌai mia-mia. 37Dhèu-dhèu dhu tadèngi lii lolo èèna, malaa bia. Ra papeka isi-aanga ra, aku rèngu na, “Dhèu neꞌe, dhèu di, nga! Nèngu tao pabeꞌa aaꞌi mèu-mèu. Dhèu katele bisa tadèngi, aa dhèu lii aadꞌo bisa padhai lii.”

Currently Selected:

Markus 7: nfaNTPO

Highlight

Copy