Mateos 23

Lamatua Yesus pasanèdꞌe, sèna ka baku pamudꞌe dènge mese agama aa dhèu Parisi sèra

(Markus 12:38-39, Lukas 11:43,46, 20:45-46)

1Èle èèna ka, Yesus ajꞌa ana madhutu Na dènge dhèu ae leo dhu palere dènge rèngu. 2Na peka dènge ra, aku Nèngu na, “Mese agama dènge dhèu Parisi sèra abhu hak ho ajꞌa-nori atora Musa mi dhèu. 3Nèti èèna ka, miu hudꞌi nanene si, aa tao madhutu lii aꞌajꞌa ra. Te ngaa mage mi madhutu ngaa dhu ra adꞌu-ue, lula rèngu mesa ra madhutu boe lii aꞌajꞌa rèngu sèra. 4Rèngu laka-seti dhèu sèna ka madhutu atora agama ra dhu pabia dhèu. Te ngaa rèngu mesa ra roꞌo boe soru-bara dhèu, sèna ka madhutu atora sèra. 5Aaꞌi-aaꞌi dhu ra adꞌu-ue sèra, sèna ka dhèu koa-kadꞌiri si. Nuka sèmi: ètu katanga rèi ra, dhu èki dènge mèdha èci dhu suri Lii Holo-Nori Ama Lamatua, aa ètu lele aai ra kahèi. Te ngaa rèngu tao parisi hari, sèna ka dhèu padedha si, peka na, ‘Ira ii! Dhèu se, dhèu mola!’#Mateos 6:1, Lole Hari Jꞌara-jꞌara Mamuri 6:8, Sensus 15:38

6Ladhe rèngu maso asa dꞌara èmu gareja, do, dꞌara pesta rèngu dꞌèi tenge era dhu beꞌa risi, sèna ka dhèu ae ladhe rèdhi si. 7Ladhe lasi asa dꞌara pasa, rèngu dꞌèi dhèu pakabꞌua si. Ra tenge jꞌara, sèna ka dhèu pahaha iisi mi rèngu, aa dꞌèi dhèu paroa ra, ‘Ama mese, dhu hua iia.’ 8Te ngaa miu baku madhutu jꞌara rèngu seꞌe! Dhèu baku paroa miu ‘ama mese’, lula Mese miu dhoka ca dhèu di. Aa miu aaꞌi-aaꞌi mi seꞌe, paꞌaꞌari. 9Mage jꞌoka padedha dhèu ètu rai-haha ne, peka na, ‘ama’, lula Ama miu ètu sorga dhoka èci di. 10Dhèu baku paroa miu kahèi, ‘lamatua’, lula Ama Lamatua miu dhodhoka èci di, nuka Jaꞌa ne, dhu Ama Lamatua pajaji mema karèi nèti uru ka. 11Nèti èèna ka, Jaꞌa pasanèdꞌe mema miu, mage padedha iisi mi, nuka sèmi dhèu dhu dꞌèi dhoka dhèu pakabꞌua ra. Nèti miu se, cee ka dhu neo jꞌajꞌi dhèu kapai, nèngu hudꞌi jꞌajꞌi ku nuka sèmi ènu, sèna ka lalau-laloꞌo dhèu leo.#Mateos 20:26-27, Markus 9:35, 10:43-44, Lukas 22:26 12Te dhèu dhu pamone-pabhèni, èèna na Lamatua pamanahu ne. Te ngaa dhèu dhu pahaha iisi nuka sèmi ana iiki, bèli-camèdꞌa Lamatua dedꞌe padedha ne.”#Lukas 14:11, 18:14

Lamatua Yesus pasanèdꞌe kètu agama sèra, lula rèngu padhai lii leo, tao leo

(Markus 12:40, Lukas 11:39-42,44,47-52, 20:47)

13Ka Yesus tuhu hari lii padhai Na, aku Nèngu na, “Hee, miu mese agama dènge dhèu Parisi se! Miu mema dhèu dhu padhai lii leo, tao leo! Bèli-camèdꞌa miu dui mere pala miu, lula miu moꞌo boe parcaya Jaꞌa, nuka Dhèu dhu Ama Lamatua pamoa tèke pua mai. Aa dhu bhelu risi hari, miu bhabhae dhèu neo mai asa dꞌara rai paredha Ama Lamatua, sèna ka ra baku parcaya Jaꞌa.

14[Hee, miu mese-mese agama dènge dhèu-dhèu Parisi! Mema miu dhèu dhu padhai lii leo, tao leo! Bèli-camèdꞌa miu pasae mere mamadhe-mamopo, lula miu dꞌèi kapodꞌe-kabèli bhèni balu, sèna ka parame mere èmu ra. Te ngaa ètu madha dhèu ae, miu paꞌabhe bhabhelu miu, dènge jꞌara sabajꞌa panèbhu-nèbhu, ho dhèu peka na, miu dhèu dꞌara mola. Te ngaa èèna na, Ama Lamatua hia huku dhu bia risi mi miu.]#23:14Ayat 14 ne aadꞌo ètu dꞌara sasuri lii Yunani uru-uru sèra.

15Hee, miu mese agama dènge dhèu Parisi sèra! Mema miu dhèu dhu padhai leo, tao leo! Bèli-camèdꞌa miu pasae mere mamadhe-mamopo, lula miu lami asa mia èèna ka, palème lèu, do, caꞌe-puru ledhe, neo tenge dhoka ca dhèu di, sèna ka maso partei agama miu. Te ngaa ropa na maso, miu adꞌu-ue mamuri na asa bhelu risi, toke na abhu hahuku dhu babia na, dua hari risi nèti miu ètu dꞌara naraka.

16Wee! Dꞌara miu dhu bèdhu le. Nga tao ka limuri ne miu neo padꞌelo jꞌara hia dhèu leo? Pe miu abhu mamadhe-mamopo, lula miu ajꞌa leli, peka na, ‘Ladhe dhèu pajaji pake soo-subha dhu ale Èmu Kapua Manèngi-Mangajꞌi, na, dhèu ne paꞌèki boe dènge lii pajaji na èèna. Te ngaa ladhe na pajaji pake subha dènge ale mèdha hualaa ètu dꞌara Èmu Kapua Manèngi-Mangajꞌi, na, nèngu heka paꞌèki dènge lii pajaji na.’ 17Miu goa kabao! Miu pangee na, Ama Lamatua pakabꞌua risi mèdha hualaa sèra nèti Èmu Kapua Manèngi-Mangajꞌi Na, do? Aadꞌo! Te Èmu neꞌe ka dhu tao mèdha sèra jꞌajꞌi mola-mèci!

18Miu se ajꞌa ore-leli kahèi, peka na, ‘Ladhe dhèu pajaji pake subha ale mei korban dhu ètu dꞌara Èmu Kapua Manèngi-Mangajꞌi, dhèu ne paꞌèki boe dènge lii pajaji na. Te ngaa ladhe na pajaji pake subha aa ale mèdha ètu dedha mei korban, na, dhèu ne heka paꞌèki dènge lii pajaji na kèna.’ 19Miu mema bèdhu tareꞌa-reꞌa. Tatu mei korban ne, kabꞌua risi nèti mèdha ètu dedha mei èèna. Te mei èèna ka dhu tao mèdha korban rèngu jꞌajꞌi mola-mèci mi Ama Lamatua. 20Nèti èèna ka, ladhe dhèu subha ale mei korban ne, na, beꞌa risi ale mei dènge aaꞌi-aaꞌi dhu ètu dedha mei èèna. 21Aa ladhe dhèu subha ale Èmu Kapua Manèngi-Mangajꞌi, na, beꞌa risi ale kahèi Èmu Kapua Manèngi-Mangajꞌi dènge kolongara Ama Lamatua. Te Nèngu ka dhu pea ètu talora aae na. 22Aa ladhe dhèu subha ale sorga, na, èèna èci èèna ka dènge nèngu ale kadera paredha Ama Lamatua, palere-lere dènge kolongara Na, te Nèngu ka dhu madhèdi nèdꞌu paredha ètu èèna.#Yesaya 66:1, Mateos 5:34

23Hee, miu mese agama dènge dhèu Parisi sèra! Mema miu dhèu dhu padhai leo, tao leo! Pe miu abhu mamadhe-mamopo, lula miu dꞌèlu-mèu titu kèna paꞌiga capala nèti canguru pala dhu miu hia Lamatua. Miu paꞌiga aaꞌi mèu-mèu, toke bubhu nèti dꞌara oka, èci sa tèke eele boe. Miu ige toke lutu-sela nuka sèmi, rèu dꞌare, kaꞌunyi, dènge lasona. Te ngaa miu pabhèlu eele atora dhu kabꞌua risi nèti Ama Lamatua! Te mamuri miu mola boe. Miu sue boe dhèu dhu unu aadꞌo. Aa mamuri miu madhutu boe dadꞌèi Lamatua. Beꞌa risi miu tao madhutu aaꞌi dhu pakarejꞌe dꞌara Lamatua, heka mi paꞌige kèna bubhu-bubhu dhu lutu sèra, dhu miu neo hia mi Lamatua.#Atora nèti Ama-ama Agama 27:30 24Dꞌara miu bèdhu, te ngaa tasamia ka neo era pajꞌujꞌu jꞌara hia dhèu leo? Miu tao atora toke lutu, ho pua dhèu madhutu, te ngaa atora dhu kabꞌua risi nèti Ama Lamatua, miu mesa mi pusi-pahae boe. Nuka sèmi miu sule eele kikidui dhu ana iiki-iiki nèti èi dhu miu minu, te ngaa badha aae sèmi kabao, miu dhèle kateme!

25Hee, miu mese agama dènge dhèu Parisi sèra! Mema miu dhèu dhu padhai leo, tao leo! Pe miu abhu mamadhe-mamopo, lula miu rase pega-mago toke mèu kaleꞌe, te ngaa dhoka re liꞌu di. Masi ka re dꞌara na dhu kajꞌalu titu kèna nèti manaꞌu miu dènge dèu ngara miu. Mamuri miu sèmi èèna kahèi.

26Wee, dhèu Parisi dhu bèdhu, ee! Rase uuru ku re dꞌara pega-mago miu sèra! Dènge sèmi èèna, re liꞌu na jꞌajꞌi mèu kahèi!

27Wee, miu mese agama dènge dhèu Parisi sèra! Mema miu dhèu dhu padhai leo, tao leo! Pe miu abhu mamadhe-mamopo, lula miu ca ropa dènge roꞌa dhèu madhe dhu lame dènge èi dama pudhi. Dhèu ladhe re liꞌu na, beꞌa titu kèna. Te ngaa ètu dꞌara, pènu dènge rui dhèu madhe, aa dhu hèu oone-oone.#Lii Lolo nèti Dhèu Pajuu-paleha 23:3 28Miu èci èèna ka! Miu dꞌèi tao iisi mi sèmi dhèu dhu mola-mèci. Nèti liꞌu dhèu rèdhi, na, miu nuka sèmi dhèu dꞌara mola. Te ngaa ètu dꞌara, miu cakaraa dhèu bhelu-katubꞌa. Te miu padhai lii leo, tao leo, aa pabhèlu eele paredha Ama Lamatua sèra.

29Hee, miu mese agama dènge dhèu Parisi sèra! Mema miu dhèu dhu padhai leo, tao leo! Pe miu abhu mamadhe-mamopo! Miu pakapai roꞌa nèti dhèu rèti lii padhai Ama Lamatua, aa dule pabeꞌa-beꞌa roꞌa dhèu dꞌara beꞌa. 30Te ngaa miu peka na, ‘Sèmi jiꞌi se mamuri tèu èci èèna ka dènge bèi-baki jiꞌi, tatu jiꞌi madhutu boe pamadhe dhèu dhu rèti lii padhai Ama Lamatua sèra.’ 31Dènge jꞌara neꞌe, miu unu mi bhoke rahasia miu, na, miu bhelu èci èèna ka dènge bèi-baki miu. 32De laꞌa, sina ma. Miu tao taruu la bhabhelu toke dꞌai èle, madhutu tatao bèi-baki mi!

33Miu tareꞌa-reꞌa bhelu-katubꞌa, èci èèna ka dènge mege dhu dènge raco. Miu pangee, na, Ama Lamatua huku boe miu? Aadꞌo! Tatu Na pèci miu asa dꞌara ai naraka! 34Sanèdꞌe paie! Pe Jaꞌa pua ana madhutu Jaꞌa mai, ho ra ajꞌa-nori dènge padꞌelo miu jꞌara mamuri Lamatua dhu lèke. Te ngaa èèna na miu pamadhe cahagꞌe, aa cahagꞌe hari miu paku pamadhe si ètu ajꞌu palolo-palèbha. Abhu kahèi dhu miu hake-paru si ètu dꞌara èmu-èmu sabajꞌa, aa abhu cahagꞌe kahèi miu pajꞌèra si toke ra rai nèti kota èci asa kota leo. 35Lodꞌo uru sèra, bèi-baki miu pamadhe Habel. Masi ka nèngu ne, dꞌara dhu mola. Bèi-baki miu dhu loe boe pamadhe dhèu dhu dꞌara mola nèti lai ana-lai èpu. Toke dꞌai Sakaria, ana nèti Barakia. Ra pamadhe ne ètu madha Èmu Kapua Manèngi-Mangajꞌi padètu dènge mei korban. Lula miu madhutu bhabhelu bèi-baki mi, nèti èèna ka miu hudꞌi tago mere raa nèti dhèu dhu dꞌara mola seꞌe. 36Mema lèke tareꞌa! Te miu ana lodꞌo limuri ne, bèli-camèdꞌa abhu huku lula jꞌara-jꞌara bhabhelu dhu bèi-baki miu adꞌu-ue karèi nèti uru ka mai.”

Dꞌara Yesus susa lula tatao dhèu Yerusalem

(Lukas 13:34-35)

37“Hee, miu dhèu Yerusalem! Miu dhu loe boe pamadhe dhèu-dhèu rèti lii padhai Ama Lamatua, aa pèci pamadhe dhèu pajuu-paleha Na dhu mai soru-bara miu. Jaꞌa keꞌa boe roca pamako miu, sèna ka lèpa mai asa Jaꞌa ne, nuka sèmi manu rena dhu bhiri-sarobho ana na ètu dꞌara èla na. Te ngaa miu pusi-pahae boe Jaꞌa. 38Nèti èèna ka, Lamatua pusi-pahae heka dènge èmu miu. Ka bèli-camèdꞌa, èmu èèna dhèu pea heka ètu dꞌara. 39Nanene paie-iie! Te bèli-camèdꞌa miu mèdhi heka Jaꞌa toke dꞌai lodꞌo na, miu mangaku, peka na, ‘Èdhi manèngi sèna ka Ama Lamatua pala-bagi mamèngi-nale mi Dhèu neꞌe, lula Lamatua ka dhu pua Na mai.’ Miu mangaku sèmi èèna, heka mèdhi hari Jaꞌa kèna.”

Currently Selected:

Mateos 23: nfaNTPO

Highlight

Copy